໑. ຕິສ຺ສເມຕ຺ເຕຍ຺ຍຕ຺ເຖຣອປທານໍ

໑. ‘‘ປພ຺ຠາຣກູຏໍ ນິສ຺ສາຍ, ໂສຠິໂຕ ນາມ ຕາປໂສ;

ປວຕ຺ຕຜລໍ ຠຸຎ຺ຊິຕ຺ວາ, ວສຕິ ປພ຺ພຕນ຺ຕເຣ.

໒. ‘‘ອຄ຺ຄິໍ ທາຣຸໍ ອາຫຣິຕ຺ວາ, ອຸຊ຺ຊາເລສິໍ ອຫໍ ຕທາ;

ອຸຕ຺ຕມຕ຺ຖໍ ຄເວສນ຺ໂຕ, ພ຺ຣຫ຺ມໂລກູປປຕ຺ຕິຍາ.

໓. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມຸທ຺ຘຣິຕຸກາໂມ ໂສ, ອາຄຈ຺ຉິ ມມ ສນ຺ຕິເກ.

໔. ‘‘ກິໍ ກໂຣສິ ມຫາປຸຎ຺ຎ, ເທຫິ ເມ ອຄ຺ຄິທາຣຸກໍ;

ອຫມຄ຺ຄິໍ ປຣິຈເຣ, ຕໂຕ ເມ ສຸທ຺ຘິ ໂຫຫິຕິ [ເຫຫິຕິ (ສີ.)].

໕. ‘‘ສຸຠທ຺ທໂກ ຕ຺ວໍ ມນຸເຊ, ເທວເຕ ຕ຺ວໍ ປຊານສິ;

ຕຸວໍ ອຄ຺ຄິໍ ປຣິຈຣ, ຫນ຺ທ ເຕ ອຄ຺ຄິທາຣຸກໍ.

໖. ‘‘ຕໂຕ ກຏ຺ຐໍ ຄເຫຕ຺ວານ, ອຄ຺ຄິໍ ອຸຊ຺ຊາລຍີ ຊິໂນ;

ນ ຕຕ຺ຖ ກຏ຺ຐໍ ປຊ຺ຌາຍິ, ປາຏິເຫຣໍ ມເຫສິໂນ.

໗. ‘‘ນ ເຕ ອຄ຺ຄິ ປຊ຺ຊລຕິ, ອາຫຸຕີ ເຕ ນ ວິຊ຺ຊຕິ;

ນິຣຕ຺ຖກໍ ວຕໍ ຕຸຍ຺ຫໍ, ອຄ຺ຄິໍ ປຣິຈຣສ຺ສຸ ເມ.

໘. ‘‘ກີທິໂສ ໂສ [ເຕ (ສ຺ຍາ. ກ.)] ມຫາວີຣ, ອຄ຺ຄິ ຕວ ປວຸຈ຺ຈຕິ;

ມຍ຺ຫມ຺ປິ ກຖຍສ຺ເສຕໍ, ອຸໂຠ ປຣິຈຣາມເສ.

໙. ‘‘ເຫຕຸຘມ຺ມນິໂຣຘາຍ, ກິເລສສມຓາຍ ຈ;

ອິສ຺ສາມຈ຺ຉຣິຍໍ ຫິຕ຺ວາ, ຕໂຍ ເອເຕ ມມາຫຸຕີ.

໑໐. ‘‘ກີທິໂສ ຕ຺ວໍ ມຫາວີຣ, ກຖໍ ໂຄຕ຺ໂຕສິ ມາຣິສ;

ອາຈາຣປຏິປຕ຺ຕິ ເຕ, ພາຬ຺ຫໍ ໂຂ ມມ ຣຸຈ຺ຈຕິ.

໑໑. ‘‘ຂຕ຺ຕິຍມ຺ຫິ ກຸເລ ຊາໂຕ, ອຠິຎ຺ຎາປາຣມິໍ ຄໂຕ;

ສພ຺ພາສວປຣິກ຺ຂີໂຓ, ນຕ຺ຖິ ທານິ ປຸນພ຺ຠໂວ.

໑໒. ‘‘ຍທິ ພຸທ຺ໂຘສິ ສພ຺ພຎ຺ຎູ, ປຠງ຺ກຣ ຕໂມນຸທ;

ນມສ຺ສິສ຺ສາມິ ຕໍ ເທວ, ທຸກ຺ຂສ຺ສນ຺ຕກໂຣ ຕຸວໍ.

໑໓. ‘‘ປຕ຺ຖຣິຕ຺ວາຊິນຈມ຺ມໍ, ນິສີທນມທາສຫໍ;

ນິສີທ ນາຖ ສພ຺ພຎ຺ຎຸ, ອຸປຏ຺ຐິສ຺ສາມຫໍ ຕຸວໍ.

໑໔. ‘‘ນິສີທິ ຠຄວາ ຕຕ຺ຖ, ອຊິນມ຺ຫິ ສຸວິຕ຺ຖເຕ;

ນິມນ຺ຕຍິຕ຺ວາ ສມ຺ພຸທ຺ຘໍ, ປພ຺ພຕໍ ອຄມາສຫໍ.

໑໕. ‘‘ຂາຣິຠາຣຎ຺ຈ ປູເຣຕ຺ວາ, ຕິນ຺ທຸກຜລມາຫຣິໍ;

ມຘຸນາ ໂຍຊຍິຕ຺ວານ, ຜລໍ ພຸທ຺ຘສ຺ສທາສຫໍ.

໑໖. ‘‘ມມ ນິຊ຺ຌາຍມານສ຺ສ, ປຣິຠຸຎ຺ຊິ ຕທາ ຊິໂນ;

ຕຕ຺ຖ ຈິຕ຺ຕໍ ປສາເທສິໍ, ເປກ຺ຂນ຺ໂຕ ໂລກນາຍກໍ.

໑໗. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມສ຺ສເມ ນິສີທິຕ຺ວາ, ອິມາ ຄາຖາ ອຠາສຖ.

໑໘. ‘‘‘ໂຍ ມໍ ຜເລນ ຕປ຺ເປສິ, ປສນ຺ໂນ ເສຫິ ປາຓິຠິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໑໙. ‘‘‘ປຎ຺ຈວີສຕິກ຺ຂຕ຺ຕຸໍ ໂສ, ເທວຣຊ຺ຊໍ ກຣິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ.

໒໐. ‘‘‘ຕສ຺ສ ສງ຺ກປ຺ປມຎ຺ຎາຍ, ປຸພ຺ພກມ຺ມສມງ຺ຄິໂນ;

ອນ຺ນໍ ປານຎ຺ຈ ວຕ຺ຖຎ຺ຈ, ສຍນຎ຺ຈ ມຫາຣຫໍ.

໒໑. ‘‘‘ປຸຎ຺ຎກມ຺ເມນ ສໍຍຸຕ຺ຕາ, ນິພ຺ພຕ຺ຕິສ຺ສນ຺ຕິ ຕາວເທ;

ສທາ ປມຸທິໂຕ ຈາຍໍ, ຠວິສ຺ສຕິ ອນາມໂຍ.

໒໒. ‘‘‘ອຸປປຊ຺ຊຕິ ຍໍ ໂຍນິໍ, ເທວຕ຺ຕໍ ອຖ ມານຸສໍ;

ສພ຺ພຕ຺ຖ ສຸຂິໂຕ ຫຸຕ຺ວາ, ມນຸສ຺ສຕ຺ຕໍ ຄມິສ຺ສຕິ.

໒໓. ‘‘‘ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ;

ສມ຺ພຸທ຺ຘໍ ອຸປຄນ຺ຕ຺ວານ, ອຣຫາ ໂສ ຠວິສ຺ສຕິ’.

໒໔. ‘‘ຍໂຕ ສຣາມິ ອຕ຺ຕານໍ, ຍໂຕ ປຕ຺ໂຕສ຺ມິ ວິຎ຺ຎຸຕໍ;

ໂຠເຄ ເມ ອູນຕາ ນຕ຺ຖິ, ຜລທານສ຺ສິທໍ ຜລໍ.

໒໕. ‘‘ວຣຘມ຺ມມນຸປ຺ປຕ຺ໂຕ, ຣາຄໂທເສ ສມູຫນິໍ;

ສພ຺ພາສວປຣິກ຺ຂີໂຓ, ນຕ຺ຖິ ທານິ ປຸນພ຺ຠໂວ.

໒໖. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໒໗. ‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ ສນ຺ຕິເກ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໒໘. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕິສ຺ສເມຕ຺ເຕຍ຺ໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕິສ຺ສເມຕ຺ເຕຍ຺ຍຕ຺ເຖຣສ຺ສາປທານໍ ປຐມໍ.