໒. ປຸຓ຺ຓກຕ຺ເຖຣອປທານໍ

໒໙. ‘‘ປພ຺ຠາຣກູຏໍ ນິສ຺ສາຍ, ສຍມ຺ຠູ ອປຣາຊິໂຕ;

ອາພາຘິໂກ ຈ ໂສ [ອາພາຘິໂກ ຄຣຸ (ສີ.)] ພຸທ຺ໂຘ, ວສຕິ ປພ຺ພຕນ຺ຕເຣ.

໓໐. ‘‘ມມ ອສ຺ສມສາມນ຺ຕາ, ປນາໂທ ອາສິ ຕາວເທ;

ພຸທ຺ເຘ ນິພ຺ພາຍມານມ຺ຫິ, ອາໂລໂກ ອຸທປຊ຺ຊຖ [ອາສິ ຕາວເທ (ສ຺ຍາ. ກ.)].

໓໑. ‘‘ຍາວຕາ ວນສຓ຺ຑສ຺ມິໍ, ອຈ຺ຉໂກກຕຣຈ຺ຉກາ;

ວາຬາ ຈ [ພ຺ຍຄ຺ຆາ (ສີ.)] ເກສຣີ ສພ຺ເພ, ອຠິຄຊ຺ຊິໍສຸ ຕາວເທ.

໓໒. ‘‘ອຸປ຺ປາຕໍ ຕມຫໍ ທິສ຺ວາ, ປພ຺ຠາຣໍ ອຄມາສຫໍ;

ຕຕ຺ຖທ຺ທສ຺ສາສິໍ ສມ຺ພຸທ຺ຘໍ, ນິພ຺ພຸຕໍ ອປຣາຊິຕໍ.

໓໓. ‘‘ສຸຜຸລ຺ລໍ ສາລຣາຊໍວ, ສຕຣໍສິໍວ ອຸຄ຺ຄຕໍ;

ວີຕຈ຺ຈິກໍວ ອງ຺ຄາຣໍ, ນິພ຺ພຸຕໍ ອປຣາຊິຕໍ.

໓໔. ‘‘ຕິຓໍ ກຏ຺ຐຎ຺ຈ ປູເຣຕ຺ວາ, ຈິຕກໍ ຕຕ຺ຖກາສຫໍ;

ຈິຕກໍ ສຸກຕໍ ກຕ຺ວາ, ສຣີຣໍ ຌາປຍິໍ ອຫໍ.

໓໕. ‘‘ສຣີຣໍ ຌາປຍິຕ຺ວານ, ຄນ຺ຘໂຕຍໍ ສໂມກິຣິໍ;

ອນ຺ຕລິກ຺ເຂ ຐິໂຕ ຍກ຺ໂຂ, ນາມມຄ຺ຄຫິ ຕາວເທ.

໓໖. ‘‘ຍໍ ປູຣິຕໍ [ຕໍ ປູຣິຕໍ (ສ຺ຍາ.), ສປ຺ປຸຣິສ (ກ.)] ຕຍາ ກິຈ຺ຈໍ, ສຍມ຺ຠຸສ຺ສ ມເຫສິໂນ;

ປຸຓ຺ຓໂກ ນາມ ນາເມນ, ສທາ ໂຫຫິ ຕຸວໍ [ຍທາ ໂຫສິ ຕຸວໍ (ສ຺ຍາ.), ສທາ ໂຫຫິຕິ ຕ຺ວໍ (ກ.)] ມຸເນ.

໓໗. ‘‘ຕມ຺ຫາ ກາຍາ ຈວິຕ຺ວານ, ເທວໂລກໍ ອຄຈ຺ຉຫໍ;

ຕຕ຺ຖ ທິພ຺ພມໂຍ ຄນ຺ໂຘ, ອນ຺ຕລິກ຺ຂາ ປວສ຺ສຕິ [ອນ຺ຕລິກ຺ເຂ ປວາຍຕິ (ສີ.)].

໓໘. ‘‘ຕຕ຺ຣາປິ ນາມເຘຍ຺ຍໍ ເມ, ປຸຓ຺ຓໂກຕິ ອຫູ ຕທາ;

ເທວຠູໂຕ ມນຸສ຺ໂສ ວາ, ສງ຺ກປ຺ປໍ ປູຣຍາມຫໍ.

໓໙. ‘‘ອິທໍ ປຈ຺ຉິມກໍ ມຍ຺ຫໍ, ຈຣິໂມ ວຕ຺ຕເຕ ຠໂວ;

ອິຘາປິ ປຸຓ຺ຓໂກ ນາມ, ນາມເຘຍ຺ຍໍ ປກາສຕິ.

໔໐. ‘‘ໂຕສຍິຕ຺ວານ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໔໑. ‘‘ເອກນວຸຕິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຕນຸກິຈ຺ຈສ຺ສິທໍ ຜລໍ.

໔໒. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໓. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຸຓ຺ຓໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຸຓ຺ຓກຕ຺ເຖຣສ຺ສາປທານໍ ທຸຕິຍໍ.