໒. ສາຄຕຕ຺ເຖຣອປທານໍ

໑໗. ‘‘ໂສຠິໂຕ ນາມ ນາເມນ, ອໂຫສິໍ ພ຺ຣາຫ຺ມໂຓ ຕທາ;

ປຸຣກ຺ຂໂຕ ສສິສ຺ເສຫິ, ອາຣາມໍ ອຄມາສຫໍ.

໑໘. ‘‘ຠຄວາ ຕມ຺ຫິ ສມເຍ, ຠິກ຺ຂຸສງ຺ຆປຸຣກ຺ຂໂຕ;

ອາຣາມທ຺ວາຣາ ນິກ຺ຂມ຺ມ, ອຏ຺ຐາສິ ປຸຣິສຸຕ຺ຕໂມ.

໑໙. ‘‘ຕມທ຺ທສາສິໍ ສມ຺ພຸທ຺ຘໍ, ທນ຺ຕໍ ທນ຺ຕປຸຣກ຺ຂຕໍ;

ສກໍ ຈິຕ຺ຕໍ ປສາເທຕ຺ວາ, ສນ຺ຖວິໍ ໂລກນາຍກໍ.

໒໐. ‘‘ເຍ ເກຈິ ປາທປາ ສພ຺ເພ, ມຫິຍາ ເຕ ວິຣູຫເຣ;

ພຸທ຺ຘິມນ຺ໂຕ ຕຖາ ສຕ຺ຕາ, ຣຸຫນ຺ຕິ ຊິນສາສເນ.

໒໑. ‘‘ສຕ຺ຖວາໂຫສິ ສປ຺ປຎ຺ໂຎ, ມເຫສິ ພຫຸເກ ຊເນ;

ວິປຖາ ອຸທ຺ຘຣິຕ຺ວານ, ປຖໍ ອາຈິກ຺ຂເສ ຕຸວໍ.

໒໒. ‘‘ທນ຺ໂຕ ທນ຺ຕປຣິກິຓ຺ໂຓ [ປຸຣກ຺ຂໂຕ (ສ຺ຍາ.)], ຌາຍີ ຌານຣເຕຫິ ຈ;

ອາຕາປີ ປຫິຕຕ຺ເຕຫິ, ອຸປສນ຺ເຕຫິ ຕາທິຠິ.

໒໓. ‘‘ອລງ຺ກໂຕ ປຣິສາຫິ, ປຸຎ຺ຎຎາເຓຫິ ໂສຠຕິ;

ປຠາ ນິທ຺ຘາວເຕ ຕຸຍ຺ຫໍ, ສູຣິໂຍທຍເນ ຍຖາ.

໒໔. ‘‘ປສນ຺ນຈິຕ຺ຕໍ ທິສ຺ວານ, ມເຫສີ ປທຸມຸຕ຺ຕໂຣ;

ຠິກ຺ຂຸສງ຺ເຆ ຐິໂຕ ສຕ຺ຖາ, ອິມາ ຄາຖາ ອຠາສຖ.

໒໕. ‘‘‘ໂຍ ໂສ ຫາສໍ ຊເນຕ຺ວານ, ມມໍ ກິຕ຺ເຕສິ ພ຺ຣາຫ຺ມໂຓ;

ກປ຺ປານໍ ສຕສຫສ຺ສໍ, ເທວໂລເກ ຣມິສ຺ສຕິ.

໒໖. ‘‘‘ຕຸສິຕາ ຫິ ຈວິຕ຺ວານ, ສຸກ຺ກມູເລນ ໂຈທິໂຕ;

ໂຄຕມສ຺ສ ຠຄວໂຕ, ສາສເນ ປພ຺ພຊິສ຺ສຕິ.

໒໗. ‘‘‘ເຕນ ກມ຺ເມນ ສຸກເຕນ, ອຣຫຕ຺ຕໍ [ຕຸຏ຺ຐຫຏ຺ຐໍ (ສ຺ຍາ. ກ.)] ລຠິສ຺ສຕິ;

ສາຄໂຕ ນາມ ນາເມນ, ເຫສ຺ສຕິ ສຕ຺ຖຸ ສາວໂກ’.

໒໘. ‘‘ປພ຺ພຊິຕ຺ວານ ກາເຍນ, ປາປກມ຺ມໍ ວິວຊ຺ຊຍິໍ;

ວຈີທຸຈ຺ຈຣິຕໍ ຫິຕ຺ວາ, ອາຊີວໍ ປຣິໂສຘຍິໍ.

໒໙. ‘‘ເອວໍ ວິຫຣມາໂນຫໍ, ເຕໂຊຘາຕູສຸ ໂກວິໂທ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໓໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສາຄໂຕ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສາຄຕຕ຺ເຖຣສ຺ສາປທານໍ ທຸຕິຍໍ.