໓. ມຫາກຈ຺ຈານຕ຺ເຖຣອປທານໍ

໓໑. ‘‘ປທຸມຸຕ຺ຕຣນາຖສ຺ສ, ປທຸມໍ ນາມ ເຈຕິຍໍ;

ສິລາສນໍ [ສີຫາສນໍ (ກ.)] ກາຣຍິຕ຺ວາ, ສຸວຓ຺ເຓນາຠິເລປຍິໍ.

໓໒. ‘‘ຣຕນາມຍຉຕ຺ຕຎ຺ຈ, ປຄ຺ຄຍ຺ຫ ວາຬພີຊນິໍ [ວາຬພີຊນີ (ສີ. ສ຺ຍາ.)];

ພຸທ຺ຘສ຺ສ ອຠິໂຣເປສິໍ, ໂລກພນ຺ຘຸສ຺ສ ຕາທິໂນ.

໓໓. ‘‘ຍາວຕາ ເທວຕາ ຠຸມ຺ມາ [ຠູມາ (ກ.)], ສພ຺ເພ ສນ຺ນິປຕຸໍ ຕທາ;

ຣຕນາມຍຉຕ຺ຕານໍ, ວິປາກໍ ກຖຍິສ຺ສຕິ.

໓໔. ‘‘ຕຎ຺ຈ ສພ຺ພໍ ສຸຓິສ຺ສາມ, ກຖຍນ຺ຕສ຺ສ ສຕ຺ຖຸໂນ;

ຠິຍ຺ໂຍ ຫາສໍ ຊເນຍ຺ຍາມ, ສມ຺ມາສມ຺ພຸທ຺ຘສາສເນ.

໓໕. ‘‘ເຫມາສເນ ນິສີທິຕ຺ວາ, ສຍມ຺ຠູ ອຄ຺ຄປຸຄ຺ຄໂລ;

ຠິກ຺ຂຸສງ຺ຆປຣິພ຺ຍູຬ຺ໂຫ [ປຣິພ຺ພູຬ຺ໂຫ (ສີ.)], ອິມາ ຄາຖາ ອຠາສຖ.

໓໖. ‘‘‘ເຍນິທໍ ອາສນໍ ທິນ຺ນໍ, ໂສວຓ຺ຓໍ ຣຕນາມຍໍ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໗. ‘‘‘ຕິໍສກປ຺ປານິ ເທວິນ຺ໂທ, ເທວຣຊ຺ຊໍ ກຣິສ຺ສຕິ;

ສມນ຺ຕາ ໂຍຊນສຕໍ, ອາຠາຍາຠິຠວິສ຺ສຕິ.

໓໘. ‘‘‘ມນຸສ຺ສໂລກມາຄນ຺ຕ຺ວາ, ຈກ຺ກວຕ຺ຕີ ຠວິສ຺ສຕິ;

ປຠສ຺ສໂຣຕິ ນາເມນ, ອຸຄ຺ຄເຕໂຊ ຠວິສ຺ສຕິ.

໓໙. ‘‘‘ທິວາ ວາ ຍທິ ວາ ຣຕ຺ຕິໍ, ສຕຣໍສີວ ອຸຄ຺ຄໂຕ;

ສມນ຺ຕາ ອຏ຺ຐຣຕນໍ, ອຸຊ຺ໂຊຕິສ຺ສຕິ ຂຕ຺ຕິໂຍ.

໔໐. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໔໑. ‘‘‘ຕຸສິຕາ ຫິ ຈວິຕ຺ວານ, ສຸກ຺ກມູເລນ ໂຈທິໂຕ;

ກຈ຺ຈາໂນ ນາມ ນາເມນ, ພ຺ຣຫ຺ມພນ຺ຘຸ ຠວິສ຺ສຕິ.

໔໒. ‘‘‘ໂສ ປຈ຺ຉາ ປພ຺ພຊິຕ຺ວານ, ອຣຫາ ເຫສ຺ສຕິນາສໂວ;

ໂຄຕໂມ ໂລກປຊ຺ໂຊໂຕ, ອຄ຺ຄຏ຺ຐາເນ ຐເປສ຺ສຕິ.

໔໓. ‘‘‘ສໍຂິຕ຺ຕປຸຈ຺ຉິຕໍ [ສໍຂິຕ຺ຕໍ ປຸຈ຺ຉິຕໍ (ສ຺ຍາ. ກ.)] ປຎ຺ຫໍ, ວິຕ຺ຖາເຣນ ກເຖສ຺ສຕິ;

ກຖຍນ຺ໂຕ ຈ ຕໍ ປຎ຺ຫໍ, ອຊ຺ຌາສຍໍ [ອຊ຺ຌາສໍ (ສີ.), ອພ຺ຠາສໍ (ກ.)] ປູຣຍິສ຺ສຕິ’.

໔໔. ‘‘ອຑ຺ເຒ ກຸເລ ອຠິຊາໂຕ, ພ຺ຣາຫ຺ມໂຓ ມນ຺ຕປາຣຄູ;

ໂອຫາຍ ຘນຘຎ຺ຎານິ, ປພ຺ພຊິໍ ອນຄາຣິຍໍ.

໔໕. ‘‘ສໍຂິຕ຺ເຕນປິ ປຸຈ຺ຉນ຺ເຕ, ວິຕ຺ຖາເຣນ ກເຖມຫໍ;

ອຊ຺ຌາສຍໍ ເຕສໍ ປູເຣມິ, ໂຕເສມິ ທ຺ວິປທຸຕ຺ຕມໍ.

໔໖. ‘‘ໂຕສິໂຕ ເມ ມຫາວີໂຣ, ສຍມ຺ຠູ ອຄ຺ຄປຸຄ຺ຄໂລ;

ຠິກ຺ຂຸສງ຺ເຆ ນິສີທິຕ຺ວາ, ເອຕທຄ຺ເຄ ຐເປສິ ມໍ.

໔໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຫາກຈ຺ຈາໂນ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຫາກຈ຺ຈານຕ຺ເຖຣສ຺ສາປທານໍ ຕຕິຍໍ.