໙. ໂສຓໂກຏິວີສຕ຺ເຖຣອປທານໍ

໔໙. ‘‘ວິປສ຺ສິໂນ ປາວຈເນ, ເອກໍ ເລຓໍ ມຍາ ກຕໍ;

ຈາຕຸທ຺ທິສສ຺ສ ສງ຺ຆສ຺ສ, ພນ຺ຘຸມາຣາຊຘານິຍາ.

໕໐. ‘‘ທຸສ຺ເສຫິ ຠູມິໍ ເລຓສ຺ສ, ສນ຺ຖຣິຕ຺ວາ ປຣິຈ຺ຈຊິໍ;

ອຸທຄ຺ຄຈິຕ຺ໂຕ ສຸມໂນ, ອກາສິໍ ປຓິຘິໍ ຕທາ.

໕໑. ‘‘ອາຣາຘເຍຍ຺ຍໍ ສມ຺ພຸທ຺ຘໍ, ປພ຺ພຊ຺ຊຎ຺ຈ ລເຠຍ຺ຍຫໍ;

ອນຸຕ຺ຕຣຎ຺ຈ ນິພ຺ພານໍ, ຜຸເສຍ຺ຍໍ ສນ຺ຕິມຸຕ຺ຕມໍ.

໕໒. ‘‘ເຕເນວ ສຸກ຺ກມູເລນ, ກປ຺ເປ [ກປ຺ປໍ (ສີ.), ກປ຺ປ (ກ.)] ນວຸຕິ ສໍສຣິໍ;

ເທວຠູໂຕ ມນຸສ຺ໂສ ຈ, ກຕປຸຎ຺ໂຎ ວິໂຣຈຫໍ.

໕໓. ‘‘ຕໂຕ ກມ຺ມາວເສເສນ, ອິຘ ປຈ຺ຉິມເກ ຠເວ;

ຈມ຺ປາຍໍ ອຄ຺ຄເສຏ຺ຐິສ຺ສ, ຊາໂຕມ຺ຫິ ເອກປຸຕ຺ຕໂກ.

໕໔. ‘‘ຊາຕມຕ຺ຕສ຺ສ ເມ ສຸຕ຺ວາ, ປິຕຸ ຉນ຺ໂທ ອຍໍ ອຫຸ;

ທທາມຫໍ ກຸມາຣສ຺ສ, ວີສໂກຏີ ອນູນກາ.

໕໕. ‘‘ຈຕຸຣງ຺ຄຸລາ ຈ ເມ ໂລມາ, ຊາຕາ ປາທຕເລ ອຸໂຠ;

ສຸຂຸມາ ມຸທຸສມ຺ຜສ຺ສາ, ຕູລາປິຈຸສມາ ສຸຠາ.

໕໖. ‘‘ອຕີຕາ ນວຸຕິ ກປ຺ປາ, ອຍໍ ເອໂກ ຈ ອຸຕ຺ຕຣິ;

ນາຠິຊານາມິ ນິກ຺ຂິຕ຺ເຕ, ປາເທ ຠູມ຺ຍາ ອສນ຺ຖເຕ.

໕໗. ‘‘ອາຣາຘິໂຕ ເມ ສມ຺ພຸທ຺ໂຘ, ປພ຺ພຊິໍ ອນຄາຣິຍໍ;

ອຣຫຕ຺ຕຎ຺ຈ ເມ ປຕ຺ຕໍ, ສີຕິຠູໂຕມ຺ຫິ ນິພ຺ພຸໂຕ.

໕໘. ‘‘ອຄ຺ໂຄ ອາຣທ຺ຘວີຣິຍານໍ, ນິທ຺ທິຏ຺ໂຐ ສພ຺ພທສ຺ສິນາ;

ຂີຓາສໂວມ຺ຫິ ອຣຫາ, ຉຬຠິຎ຺ໂຎ ມຫິທ຺ຘິໂກ.

໕໙. ‘‘ເອກນວຸຕິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ເລຓທານສ຺ສິທໍ ຜລໍ.

໖໐. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໖໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໖໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

໖໓. ‘‘ເຖໂຣ ໂກຏິວີໂສ [ໂກຏິວິໂສ (ສ຺ຍາ. ກ.), ໂກຬິວິໂສ (ອຎ຺ຎຏ຺ຐາເນສຸ)] ໂສໂຓ, ຠິກ຺ຂຸສງ຺ຆສ຺ສ ອຄ຺ຄໂຕ;

ປຎ຺ຫໍ ປຸຏ຺ໂຐ ວິຍາກາສິ, ອໂນຕຕ຺ເຕ ມຫາສເຣ’’ຕິ.

ອິຕ຺ຖໍ ສຸທໍ ອາຍສ຺ມາ ໂສໂຓ ໂກຏິວີໂສ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ໂສຓໂກຏິວີສຕ຺ເຖຣສ຺ສາປທານໍ ນວມໍ.