໑໐. ປຸພ຺ພກມ຺ມປິໂລຕິກພຸທ຺ຘອປທານໍ

໖໔. ‘‘ອໂນຕຕ຺ຕສຣາສນ຺ເນ, ຣມຓີເຍ ສິລາຕເລ;

ນານາຣຕນປຊ຺ໂຊເຕ, ນານາຄນ຺ຘວນນ຺ຕເຣ.

໖໕. ‘‘ມຫຕາ ຠິກ຺ຂຸສງ຺ເຆນ, ປເຣໂຕ [ອຸເປໂຕ (ອຸທານຏ຺ຐກຖາຍໍ ໔ ວຄ຺ເຄ, ໘ ສຸຕ຺ເຕ)] ໂລກນາຍໂກ;

ອາສີໂນ ພ຺ຍາກຣີ ຕຕ຺ຖ, ປຸພ຺ພກມ຺ມານິ ອຕ຺ຕໂນ.

໖໖. [ສຸຓາຖ ຠິກ຺ຂເວ ມຍ຺ຫໍ, ຍໍ ກມ຺ມໍ ປກຕໍ ມຍາ; ເອກໍ ອຣຎ຺ຎິກໍ ຠິກ຺ຂຸໍ, ທິສ຺ວາ ທິນ຺ນໍ ປິໂລຕິກໍ; ປຕ຺ຖິຕໍ ປຐມໍ ພຸທ຺ຘໍ, ພຸທ຺ຘຕ຺ຕາຍ ມຍາ ຕທາ; ປິໂລຕິຍສ຺ສ ກມ຺ມສ຺ສ, ພຸທ຺ຘຕ຺ເຕປິ ວິປຈ຺ຈຕິ; ໂຄປາລໂກ ປຸເຣ ອາສິໍ, ຄາວິໍ ປາເຊຕິ ໂຄຈຣໍ; ປິວນ຺ຕິໍ ອຸທກໍ ອາວິລໍ, ຄາວິໍ ທິສ຺ວາ ນິວາຣຍິໍ; ເຕນ ກມ຺ມວິປາເກນ, ອິຘ ປຈ຺ຉິມເກ ຠເວ; ວິປາສິໂຕ ຍທິຈ຺ຉກໍ, ນ ຫິ ປາຕຸໍ ລຠາມຫໍ (ສ຺ຍາ.)] ‘‘ສຸຓາຖ ຠິກ຺ຂໂວ ມຍ຺ຫໍ, ຍໍ ກມ຺ມໍ ປກຕໍ ມຍາ;

ປິໂລຕິກສ຺ສ ກມ຺ມສ຺ສ, ພຸທ຺ຘຕ຺ເຕປິ ວິປຈ຺ຈຕິ [ສຸຓາຖ ຠິກ຺ຂເວ ມຍ຺ຫໍ, ຍໍ ກມ຺ມໍ ປກຕໍ ມຍາ; ເອກໍ ອຣຎ຺ຎິກໍ ຠິກ຺ຂຸໍ, ທິສ຺ວາ ທິນ຺ນໍ ປິໂລຕິກໍ; ປຕ຺ຖິຕໍ ປຐມໍ ພຸທ຺ຘໍ, ພຸທ຺ຘຕ຺ຕາຍ ມຍາ ຕທາ; ປິໂລຕິຍສ຺ສ ກມ຺ມສ຺ສ, ພຸທ຺ຘຕ຺ເຕປິ ວິປຈ຺ຈຕິ; ໂຄປາລໂກ ປຸເຣ ອາສິໍ, ຄາວິໍ ປາເຊຕິ ໂຄຈຣໍ; ປິວນ຺ຕິໍ ອຸທກໍ ອາວິລໍ, ຄາວິໍ ທິສ຺ວາ ນິວາຣຍິໍ; ເຕນ ກມ຺ມວິປາເກນ, ອິຘ ປຈ຺ຉິມເກ ຠເວ; ວິປາສິໂຕ ຍທິຈ຺ຉກໍ, ນ ຫິ ປາຕຸໍ ລຠາມຫໍ (ສ຺ຍາ.)].

[໑]

໖໗. ‘‘ມຸນາຬິ ນາມຫໍ ຘຸຕ຺ໂຕ, ປຸພ຺ເພ ອຎ຺ຎາສຸ ຊາຕິສຸ [ອຎ຺ຎາຍ ຊາຕິຍາ (ອຸທານ ອຏ຺ຐ.)];

ປຈ຺ເຈກພຸທ຺ຘໍ ສຸຣຠິໍ [ສຣຠຸໍ (ສີ.)], ອພ຺ຠາຈິກ຺ຂິໍ ອທູສກໍ.

໖໘. ‘‘ເຕນ ກມ຺ມວິປາເກນ, ນິຣເຍ ສໍສຣິໍ ຈິຣໍ;

ພຫູວສ຺ສສຫສ຺ສານິ, ທຸກ຺ຂໍ ເວເທສິ ເວທນໍ.

໖໙. ‘‘ເຕນ ກມ຺ມາວເສເສນ, ອິຘ ປຈ຺ຉິມເກ ຠເວ;

ອພ຺ຠກ຺ຂານໍ ມຍາ ລທ຺ຘໍ, ສຸນ຺ທຣິກາຍ ກາຣຓາ.

[໒]

໗໐. ‘‘ສພ຺ພາຠິຠຸສ຺ສ ພຸທ຺ຘສ຺ສ, ນນ຺ໂທ ນາມາສິ ສາວໂກ;

ຕໍ ອພ຺ຠກ຺ຂາຍ ນິຣເຍ, ຈິຣໍ ສໍສຣິຕໍ ມຍາ.

໗໑. ‘‘ທສວສ຺ສສຫສ຺ສານິ, ນິຣເຍ ສໍສຣິໍ ຈິຣໍ;

ມນຸສ຺ສຠາວໍ ລທ຺ຘາຫໍ, ອພ຺ຠກ຺ຂານໍ ພຫຸໍ ລຠິໍ.

໗໒. ‘‘ເຕນ ກມ຺ມາວເສເສນ, ຈິຎ຺ຈມານວິກາ ມມໍ;

ອພ຺ຠາຈິກ຺ຂິ ອຠູເຕນ, ຊນກາຍສ຺ສ ອຄ຺ຄໂຕ.

[໓]

໗໓. ‘‘ພ຺ຣາຫ຺ມໂຓ ສຸຕວາ ອາສິໍ, ອຫໍ ສກ຺ກຕປູຊິໂຕ;

ມຫາວເນ ປຎ຺ຈສເຕ, ມນ຺ເຕ ວາເຈມິ ມາຓເວ.

໗໔. ‘‘ຕຕ຺ຖາຄໂຕ [ຕມາຄໂຕ (ກ.)] ອິສິ ຠີໂມ, ປຎ຺ຈາຠິຎ຺ໂຎ ມຫິທ຺ຘິໂກ;

ຕໍ ຈາຫໍ ອາຄຕໍ ທິສ຺ວາ, ອພ຺ຠາຈິກ຺ຂິໍ ອທູສກໍ.

໗໕. ‘‘ຕໂຕຫໍ ອວຈໍ ສິສ຺ເສ, ກາມໂຠຄີ ອຍໍ ອິສິ;

ມຍ຺ຫມ຺ປິ ຠາສມານສ຺ສ, ອນຸໂມທິໍສຸ ມາຓວາ.

໗໖. ‘‘ຕໂຕ ມາຓວກາ ສພ຺ເພ, ຠິກ຺ຂມານໍ ກຸເລ ກຸເລ;

ມຫາຊນສ຺ສ ອາຫໍສຸ, ກາມໂຠຄີ ອຍໍ ອິສິ.

໗໗. ‘‘ເຕນ ກມ຺ມວິປາເກນ, ປຎ຺ຈ ຠິກ຺ຂຸສຕາ ອິເມ;

ອພ຺ຠກ຺ຂານໍ ລຠຸໍ ສພ຺ເພ, ສຸນ຺ທຣິກາຍ ກາຣຓາ.

[໔]

໗໘. ‘‘ເວມາຕຸຠາຕຣໍ ປຸພ຺ເພ, ຘນເຫຕຸ ຫນິໍ ອຫໍ;

ປກ຺ຂິປິໍ ຄິຣິທຸຄ຺ຄສ຺ມິໍ, ສິລາຍ ຈ ອປິໍສຍິໍ.

໗໙. ‘‘ເຕນ ກມ຺ມວິປາເກນ, ເທວທຕ຺ໂຕ ສິລໍ ຂິປິ;

ອງ຺ຄຸຏ຺ຐໍ ປິໍສຍີ ປາເທ, ມມ ປາສາຓສກ຺ຂຣາ.

[໕]

໘໐. ‘‘ປຸເຣຫໍ ທາຣໂກ ຫຸຕ຺ວາ, ກີຬມາໂນ ມຫາປເຖ;

ປຈ຺ເຈກພຸທ຺ຘໍ ທິສ຺ວານ, ມຄ຺ເຄ ສກລິກໍ [ສກ຺ຂລິກໍ (ກ.)] ຂິປິໍ [ທຫິໍ (ສ຺ຍາ.)].

໘໑. ‘‘ເຕນ ກມ຺ມວິປາເກນ, ອິຘ ປຈ຺ຉິມເກ ຠເວ;

ວຘຕ຺ຖໍ ມໍ ເທວທຕ຺ໂຕ, ອຠິມາເຣ ປໂຍຊຍິ.

[໖]

໘໒. ‘‘ຫຕ຺ຖາໂຣໂຫ ປຸເຣ ອາສິໍ, ປຈ຺ເຈກມຸນິມຸຕ຺ຕມໍ;

ປິຓ຺ຑາຍ ວິຈຣນ຺ຕໍ ຕໍ, ອາສາເທສິໍ ຄເຊນຫໍ.

໘໓. ‘‘ເຕນ ກມ຺ມວິປາເກນ, ຠນ຺ໂຕ [ທນ຺ໂຕ (ກ.)] ນາຬາຄິຣີ ຄໂຊ;

ຄິຣິພ຺ພເຊ ປຸຣວເຣ, ທາຣຸໂຓ ສມຸປາຄມິ [ມໍ ອຸປາຄມິ (ສີ.)].

[໗]

໘໔. ‘‘ຣາຊາຫໍ ປຕ຺ຖິໂວ [ປຕ຺ຕິໂກ (ສ຺ຍາ. ກ.), ຂຕ຺ຕິໂຍ (ອຸທານ ອຏ຺ຐ.)] ອາສິໍ, ສຕ຺ຕິຍາ ປຸຣິສໍ ຫນິໍ;

ເຕນ ກມ຺ມວິປາເກນ, ນິຣເຍ ປຈ຺ຈິສໍ ຠຸສໍ.

໘໕. ‘‘ກມ຺ມຸໂນ ຕສ຺ສ ເສເສນ, ອິທານິ ສກລໍ ມມ;

ປາເທ ຉວິໍ ປກປ຺ເປສິ [ປໂກເປສິ (ສີ.)], ນ ຫິ ກມ຺ມໍ ວິນສ຺ສຕິ.

[໘]

໘໖. ‘‘ອຫໍ ເກວຏ຺ຏຄາມສ຺ມິໍ, ອຫຸໍ ເກວຏ຺ຏທາຣໂກ;

ມຈ຺ຉເກ ຆາຕິເຕ ທິສ຺ວາ, ຊນຍິໍ ໂສມນສ຺ສກໍ [ໂສມນສ຺ສຫໍ (ອຸທານ ອຏ຺ຐ.)].

໘໗. ‘‘ເຕນ ກມ຺ມວິປາເກນ, ສີສທຸກ຺ຂໍ ອຫູ ມມ;

ສພ຺ເພ ສກ຺ກາ ຈ ຫຎ຺ຎິໍສຸ, ຍທາ ຫນິ ວິຏຏູໂຠ [ວິຏຏຸໂຠ (ສ຺ຍາ. ກ.)].

[໙]

໘໘. ‘‘ຜຸສ຺ສສ຺ສາຫໍ ປາວຈເນ, ສາວເກ ປຣິຠາສຍິໍ;

ຍວໍ ຂາທຖ ຠຸຎ຺ຊຖ, ມາ ຈ ຠຸຎ຺ຊຖ ສາລໂຍ.

໘໙. ‘‘ເຕນ ກມ຺ມວິປາເກນ, ເຕມາສໍ ຂາທິຕໍ ຍວໍ;

ນິມນ຺ຕິໂຕ ພ຺ຣາຫ຺ມເຓນ, ເວຣຎ຺ຊາຍໍ ວສິໍ ຕທາ.

[໑໐]

໙໐. ‘‘ນິພ຺ພຸທ຺ເຘ ວຕ຺ຕມານມ຺ຫິ, ມລ຺ລປຸຕ຺ຕໍ ນິເຫຐຍິໍ [ນິເສຘຍິໍ (ສ຺ຍາ. ກ.)];

ເຕນ ກມ຺ມວິປາເກນ, ປິຏ຺ຐິທຸກ຺ຂໍ ອຫູ ມມ.

[໑໑]

໙໑. ‘‘ຕິກິຈ຺ຉໂກ ອຫໍ ອາສິໍ, ເສຏ຺ຐິປຸຕ຺ຕໍ ວິເຣຈຍິໍ;

ເຕນ ກມ຺ມວິປາເກນ, ໂຫຕິ ປກ຺ຂນ຺ທິກາ ມມ.

[໑໒]

໙໒. ‘‘ອວຈາຫໍ ໂຊຕິປາໂລ, ສຸຄຕໍ ກສ຺ສປໍ ຕທາ;

ກຸໂຕ ນຸ ໂພຘິ ມຸຓ຺ຑສ຺ສ, ໂພຘິ ປຣມທຸລ຺ລຠາ.

໙໓. ‘‘ເຕນ ກມ຺ມວິປາເກນ, ອຈຣິໍ ທຸກ຺ກຣໍ ພຫຸໍ;

ຉພ຺ພສ຺ສານຸຣຸເວຬາຍໍ, ຕໂຕ ໂພຘິມປາປຸຓິໍ.

໙໔. ‘‘ນາຫໍ ເອເຕນ ມຄ຺ເຄນ, ປາປຸຓິໍ ໂພຘິມຸຕ຺ຕມໍ;

ກຸມ຺ມຄ຺ເຄນ ຄເວສິສ຺ສໍ, ປຸພ຺ພກມ຺ເມນ ວາຣິໂຕ.

໙໕. ‘‘ປຸຎ຺ຎປາປປຣິກ຺ຂີໂຓ, ສພ຺ພສນ຺ຕາປວຊ຺ຊິໂຕ;

ອໂສໂກ ອນຸປາຍາໂສ, ນິພ຺ພາຍິສ຺ສມນາສໂວ.

໙໖. ‘‘ເອວໍ ຊິໂນ ວິຍາກາສິ, ຠິກ຺ຂຸສງ຺ຆສ຺ສ ອຄ຺ຄໂຕ;

ສພ຺ພາຠິຎ຺ຎາພລປ຺ປຕ຺ໂຕ, ອໂນຕຕ຺ເຕ ມຫາສເຣ’’ຕິ.

ອິຕ຺ຖໍ ສຸທໍ ຠຄວາ ອຕ຺ຕໂນ ປຸພ຺ພຈຣິຕໍ ກມ຺ມປິໂລຕິກໍ ນາມ ພຸທ຺ຘາປທານຘມ຺ມປຣິຍາຍໍ ອຠາສິຕ຺ຖາຕິ.

ປຸພ຺ພກມ຺ມປິໂລຕິກໍ ນາມ ພຸທ຺ຘາປທານໍ ທສມໍ.

ອວຏຜລວຄ຺ໂຄ ເອກູນຈຕ຺ຕາລີສໂມ.