໒. ຕີຓຸປ຺ປລມາລິຍຕ຺ເຖຣອປທານໍ

໑໑. ‘‘ຈນ຺ທຠາຄານທີຕີເຣ, ອໂຫສິໍ ວານໂຣ ຕທາ;

ອທ຺ທສໍ ວິຣຊໍ ພຸທ຺ຘໍ, ນິສິນ຺ນໍ ປພ຺ພຕນ຺ຕເຣ.

໑໒. ‘‘ໂອຠາເສນ຺ຕໍ ທິສາ ສພ຺ພາ, ສາລຣາຊໍວ ຜຸລ຺ລິຕໍ;

ລກ຺ຂຓພ຺ຍຎ຺ຊນູເປຕໍ, ທິສ຺ວາ ອຕ຺ຕມໂນ ອຫຸໍ.

໑໓. ‘‘ອຸທຄ຺ຄຈິຕ຺ໂຕ ສຸມໂນ, ປີຕິຍາ ຫຏ຺ຐມານໂສ;

ຕີຓິ ອຸປ຺ປລປຸປ຺ຜານິ, ມຕ຺ຖເກ ອຠິໂຣປຍິໍ.

໑໔. ‘‘ປຸປ຺ຜານິ ອຠິໂຣເປຕ຺ວາ, ວິປສ຺ສິສ຺ສ ມເຫສິໂນ;

ສຄາຣໂວ ຠວິຕ຺ວານ [ຄມິຕ຺ວານ (ສີ.), ນມິຕ຺ວານ (ກ.)], ປກ຺ກາມິໍ ອຸຕ຺ຕຣາມຸໂຂ.

໑໕. ‘‘ຄຈ຺ຉນ຺ໂຕ ປຏິກຸຏິໂກ, ວິປ຺ປສນ຺ເນນ ເຈຕສາ;

ເສລນ຺ຕເຣ ປຕິຕ຺ວານ [ປປຕິຕ຺ວາ (ສ຺ຍາ. ກ.)], ປາປຸຓິໍ ຊີວິຕກ຺ຂຍໍ.

໑໖. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ [ປຸຣິມໍ ຊາຕິໍ (?) ອຸປຣິ ໓໘ ວຄ຺ເຄ ຕຕິຍາປທາເນ ເອວເມວ ທິສ຺ສຕິ], ຕາວຕິໍສມຄຈ຺ຉຫໍ.

໑໗. ‘‘ສຕານໍ ຕີຓິກ຺ຂຕ຺ຕຸຎ຺ຈ, ເທວຣຊ຺ຊໍ ອກາຣຍິໍ;

ສຕານໍ ປຎ຺ຈກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ.

໑໘. ‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໑໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕີຓຸປ຺ປລມາລິໂຍ [ຕິອຸປ຺ປລມາລິໂຍ (ສີ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕີຓຸປ຺ປລມາລິຍຕ຺ເຖຣສ຺ສາປທານໍ ທຸຕິຍໍ.