໙. ຘມ຺ມສວນິຍຕ຺ເຖຣອປທານໍ

໑໑໑. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ຈຕຸສຈ຺ຈໍ ປກາເສນ຺ໂຕ, ສນ຺ຕາເຣສິ ພຫຸໍ ຊນໍ.

໑໑໒. ‘‘ອຫໍ ເຕນ ສມເຍນ, ຊຏິໂລ ອຸຄ຺ຄຕາປໂນ;

ຘຸນນ຺ໂຕ ວາກຈີຣານິ, ຄຈ຺ຉາມິ ອມ຺ພເຣ ຕທາ.

໑໑໓. ‘‘ພຸທ຺ຘເສຏ຺ຐສ຺ສ ອຸປຣິ, ຄນ຺ຕຸໍ ນ ວິສຫາມຫໍ;

ປກ຺ຂີວ ເສລມາສຊ຺ຊ [ເສລມາປຊ຺ຊ (ສ຺ຍາ.)], ຄມນໍ ນ ລຠາມຫໍ.

໑໑໔. ‘‘ນ ເມ ອິທໍ ຠູຕປຸພ຺ພໍ, ອິຣິຍສ຺ສ ວິໂກປນໍ;

ທເກ ຍຖາ ອຸມ຺ມຸຊ຺ຊິຕ຺ວາ, ເອວໍ ຄຈ຺ຉາມິ ອມ຺ພເຣ.

໑໑໕. ‘‘ອຸຬາຣຠູໂຕ ມນຸໂຊ, ເຫຏ຺ຐາສີໂນ [ເຫຏ຺ຐາປິ ໂນ (ກ.)] ຠວິສ຺ສຕິ;

ຫນ຺ທ ເມນໍ ຄເວສິສ຺ສໍ, ອປິ ອຕ຺ຖໍ ລເຠຍ຺ຍຫໍ.

໑໑໖. ‘‘ໂອໂຣຫນ຺ໂຕ ອນ຺ຕລິກ຺ຂາ, ສທ຺ທມສ຺ໂສສິ ສຕ຺ຖຸໂນ;

ອນິຈ຺ຈຕໍ ກເຖນ຺ຕສ຺ສ, ຕມຫໍ ອຸຄ຺ຄຫິໍ ຕທາ.

໑໑໗. ‘‘ອນິຈ຺ຈສຎ຺ຎມຸຄ຺ຄຍ຺ຫ, ອຄມາສິໍ ມມສ຺ສມໍ;

ຍາວຕາຍຸໍ ວສິຕ຺ວານ, ຕຕ຺ຖ ກາລງ຺ກໂຕ ອຫໍ.

໑໑໘. ‘‘ຈຣິເມ ວຕ຺ຕມານມ຺ຫິ, ຕໍ ຘມ຺ມສວນໍ [ຘມ຺ມສວຓໍ (ສີ.)] ສຣິໍ;

ເຕນ ກມ຺ເມນ ສຸກເຕນ, ຕາວຕິໍສມຄຈ຺ຉຫໍ.

໑໑໙. ‘‘ຕິໍສກປ຺ປສຫສ຺ສານິ, ເທວໂລເກ ຣມິໍ ອຫໍ;

ເອກປຎ຺ຎາສກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ.

໑໒໐. ‘‘ເອກສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໑໒໑. ‘‘ປິຕຸເຄເຫ ນິສີທິຕ຺ວາ, ສມໂຓ ຠາວິຕິນ຺ທ຺ຣິໂຍ;

ຄາຖາຍ ປຣິທີເປນ຺ໂຕ, ອນິຈ຺ຈຕມຸທາຫຣິ [ອນິຈ຺ຈວຕ຺ຖຸທາຫຣິ (ສ຺ຍາ. ກ.)].

໑໒໒. ‘‘ອນຸສ຺ສຣາມິ ຕໍ ສຎ຺ຎໍ, ສໍສຣນ຺ໂຕ ຠວາຠເວ;

ນ ໂກຏິໍ ປຏິວິຊ຺ຌາມິ [ນ ໂກຈິ ປຏິວຊ຺ຊາມິ (ກ.)], ນິພ຺ພານໍ ອຈ຺ຈຸຕໍ ປທໍ [ອຍໍ ຄາຖາ ອຸປຣິ ໔໓ ວຄ຺ເຄ ສຕ຺ຕມາປທາເນ ປຸຣິມຄາຖາຍ ປຸເຣຕຣໍ ທິສ຺ສຕິ].

໑໒໓. ‘‘ອນິຈ຺ຈາ ວຕ ສງ຺ຂາຣາ, ອຸປ຺ປາທວຍຘມ຺ມິໂນ;

ອຸປ຺ປຊ຺ຊິຕ຺ວາ ນິຣຸຊ຺ຌນ຺ຕິ, ເຕສໍ ວູປສໂມ ສຸໂຂ.

໑໒໔. ‘‘ສຫ ຄາຖໍ ສຸຓິຕ຺ວານ, ປຸພ຺ພກມ຺ມໍ ອນຸສ຺ສຣິໍ;

ເອກາສເນ ນິສີທິຕ຺ວາ, ອຣຫຕ຺ຕມປາປຸຓິໍ.

໑໒໕. ‘‘ຊາຕິຍາ ສຕ຺ຕວສ຺ໂສຫໍ, ອຣຫຕ຺ຕມປາປຸຓິໍ;

ອຸປສມ຺ປາທຍິ ພຸທ຺ໂຘ, ຄຸຓມຎ຺ຎາຍ ຈກ຺ຂຸມາ.

໑໒໖. ‘‘ທາຣໂກວ ອຫໍ ສນ຺ໂຕ, ກຣຓີຍໍ ສມາປຍິໍ;

ກິໍ ເມ ກຣຓີຍໍ ອຊ຺ຊ, ສກ຺ຍປຸຕ຺ຕສ຺ສ ສາສເນ.

໑໒໗. ‘‘ສຕສຫສ຺ສິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ສທ຺ຘມ຺ມສວເນ ຜລໍ.

໑໒໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຘມ຺ມສວນິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຘມ຺ມສວນິຍຕ຺ເຖຣສ຺ສາປທານໍ ນວມໍ.