໑໐. ອຸກ຺ຂິຕ຺ຕປທຸມິຍຕ຺ເຖຣອປທານໍ

໑໒໙. ‘‘ນຄເຣ ຫໍສວຕິຍາ, ອໂຫສິໍ ມາລິໂກ ຕທາ;

ໂອຄາເຫຕ຺ວາ ປທຸມສຣໍ, ສຕປຕ຺ຕໍ ໂອຈິນາມຫໍ.

໑໓໐. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ສຫ ສຕສຫສ຺ເສຫິ [ສຕສຫສ຺ສສິສ຺ເສຫິ (ກ.)], ສນ຺ຕຈິຕ຺ເຕຫິ ຕາທິຠິ.

໑໓໑. ‘‘ຂີຓາສເວຫິ ສຸທ຺ເຘຫິ, ຉຬຠິຎ຺ເຎຫິ ຌາຍິຠິ [ໂສ ຕທາ (ສີ.), ໂສ ສຫ (ກ.)];

ມມ ວຸທ຺ຘິໍ ສມນ຺ເວສໍ, ອາຄຈ຺ຉິ ມມ ສນ຺ຕິກໍ [ມມ ສນ຺ຕິເກ (ສີ.), ປຸຣິສຸຕ຺ຕໂມ (ສ຺ຍາ. ກ.)].

໑໓໒. ‘‘ທິສ຺ວານຫໍ ເທວເທວໍ, ສຍມ຺ຠຸໍ ໂລກນາຍກໍ;

ວຓ຺ເຏ ເຉຕ຺ວາ ສຕປຕ຺ຕໍ, ອຸກ຺ຂິປິມມ຺ພເຣ ຕທາ.

໑໓໓. ‘‘ຍທິ ພຸທ຺ໂຘ ຕຸວໍ ວີຣ, ໂລກເຊຏ຺ໂຐ ນຣາສໂຠ;

ສຍໍ ຄນ຺ຕ຺ວາ ສຕປຕ຺ຕາ, ມຕ຺ຖເກ ຘາຣຍນ຺ຕຸ ເຕ.

໑໓໔. ‘‘ອຘິຏ຺ຐຫິ ມຫາວີໂຣ, ໂລກເຊຏ຺ໂຐ ນຣາສໂຠ;

ພຸທ຺ຘສ຺ສ ອານຸຠາເວນ, ມຕ຺ຖເກ ຘາຣຍິໍສຸ ເຕ.

໑໓໕. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໓໖. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ສຕປຕ຺ຕນ຺ຕິ ວຸຈ຺ຈຕິ;

ສຏ຺ຐິໂຍຊນມຸພ຺ພິທ຺ຘໍ, ຕິໍສໂຍຊນວິຕ຺ຖຕໍ.

໑໓໗. ‘‘ສຫສ຺ສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊມກາຣຍິໍ;

ປຎ຺ຈສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ.

໑໓໘. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ອນຸໂຠມິ ສກໍ ກມ຺ມໍ, ປຸພ຺ເພ ສຸກຕມຕ຺ຕໂນ.

໑໓໙. ‘‘ເຕເນເວກປທຸເມນ, ອນຸໂຠຕ຺ວານ ສມ຺ປທາ;

ໂຄຕມສ຺ສ ຠຄວໂຕ, ຘມ຺ມໍ ສຈ຺ຉິກຣິໍ ອຫໍ.

໑໔໐. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໑໔໑. ‘‘ສຕສຫສ຺ສິໂຕ ກປ຺ເປ, ຍໍ ປຸປ຺ຜມຠິປູຊຍິໍ;

ທຸຄ຺ຄຕິໍ ນາຠິຊານາມິ, ເອກປທຸມສ຺ສິທໍ ຜລໍ.

໑໔໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸກ຺ຂິຕ຺ຕປທຸມິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸກ຺ຂິຕ຺ຕປທຸມິຍຕ຺ເຖຣສ຺ສາປທານໍ ທສມໍ.

ຄນ຺ໂຘທກວຄ຺ໂຄ ຈຕຸຕິໍສຕິໂມ.