໘. ອຸຕ຺ຕເຣຍ຺ຍທາຍກຕ຺ເຖຣອປທານໍ

໙໐. ‘‘ນຄເຣ ຫໍສວຕິຍາ, ອໂຫສິໍ ພ຺ຣາຫ຺ມໂຓ ຕທາ;

ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ.

໙໑. ‘‘ປຸຣກ຺ຂໂຕ ສສິສ຺ເສຫິ, ຊາຕິມາ ຈ ສຸສິກ຺ຂິໂຕ;

ໂຕຍາຠິເສຈນຕ຺ຖາຍ, ນຄຣາ ນິກ຺ຂມິໍ ຕທາ.

໙໒. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ຂີຓາສວສຫສ຺ເສຫິ, ປາວິສີ ນຄຣໍ ຊິໂນ.

໙໓. ‘‘ສຸຈາຣຸຣູປໍ ທິສ຺ວານ, ອາເນຎ຺ຊກາຣິຕໍ ວິຍ;

ປຣິວຸຕໍ ອຣຫນ຺ເຕຫິ, ທິສ຺ວາ ຈິຕ຺ຕໍ ປສາທຍິໍ.

໙໔. ‘‘ສິຣສ຺ມິໍ ອຎ຺ຊລິໍ ກຕ຺ວາ, ນມສ຺ສິຕ຺ວານ ສຸພ຺ພຕໍ;

ປສນ຺ນຈິຕ຺ໂຕ ສຸມໂນ, ອຸຕ຺ຕຣີຍມທາສຫໍ.

໙໕. ‘‘ອຸໂຠ ຫຕ຺ເຖຫິ ປຄ຺ຄຍ຺ຫ, ສາຏກໍ ອຸກ຺ຂິປິໍ ອຫໍ;

ຍາວຕາ ພຸທ຺ຘປຣິສາ, ຕາວ ຉາເທສິ ສາຏໂກ.

໙໖. ‘‘ປິຓ຺ຑຈາຣໍ ຈຣນ຺ຕສ຺ສ, ມຫາຠິກ຺ຂຸຄຓາທິໂນ;

ຉທໍ ກໂຣນ຺ໂຕ ອຏ຺ຐາສິ, ຫາສຍນ຺ໂຕ ມມໍ ຕທາ.

໙໗. ‘‘ຆຣໂຕ ນິກ຺ຂມນ຺ຕສ຺ສ, ສຍມ຺ຠູ ອຄ຺ຄປຸຄ຺ຄໂລ;

ວີຖິຍໍວ ຐິໂຕ ສຕ຺ຖາ, ອກາ ເມ [ອກາສິ (ສ຺ຍາ.)] ອນຸໂມທນໍ.

໙໘. ‘‘ປສນ຺ນຈິຕ຺ໂຕ ສຸມໂນ, ໂຍ ເມ ອທາສິ ສາຏກໍ;

ຕມຫໍ ກິຕ຺ຕຍິສ຺ສາມິ, ສຸໂຓຖ ມມ ຠາສໂຕ.

໙໙. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ປຎ຺ຎາສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ.

໑໐໐. ‘‘‘ເທວໂລເກ ວສນ຺ຕສ຺ສ, ປຸຎ຺ຎກມ຺ມສມງ຺ຄິໂນ;

ສມນ຺ຕາ ໂຍຊນສຕໍ, ທຸສ຺ສຈ຺ຉນ຺ນໍ ຠວິສ຺ສຕິ.

໑໐໑. ‘‘‘ຉຕ຺ຕິໍສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໑໐໒. ‘‘‘ຠເວ ສໍສຣມານສ຺ສ, ປຸຎ຺ຎກມ຺ມສມງ຺ຄິໂນ;

ມນສາ ປຕ຺ຖິຕໍ ສພ຺ພໍ, ນິພ຺ພຕ຺ຕິສ຺ສຕິ ຕາວເທ.

໑໐໓. ‘‘‘ໂກເສຍ຺ຍກມ຺ພລິຍານິ [ໂກເສຍ຺ຍກມ຺ພລີຍານິ (ສີ.)], ໂຂມກປ຺ປາສິການິ ຈ;

ມຫຄ຺ຆານິ ຈ ທຸສ຺ສານິ, ປຏິລຈ຺ຉຕິຍໍ ນໂຣ.

໑໐໔. ‘‘‘ມນສາ ປຕ຺ຖິຕໍ ສພ຺ພໍ, ປຏິລຈ຺ຉຕິຍໍ ນໂຣ;

ເອກທຸສ຺ສສ຺ສ ວິປາກໍ, ອນຸໂຠສ຺ສຕິ ສພ຺ພທາ.

໑໐໕. ‘‘‘ໂສ ປຈ຺ຉາ ປພ຺ພຊິຕ຺ວານ, ສຸກ຺ກມູເລນ ໂຈທິໂຕ;

ໂຄຕມສ຺ສ ຠຄວໂຕ, ຘມ຺ມໍ ສຈ຺ຉິກຣິສ຺ສຕິ’.

໑໐໖. ‘‘ອໂຫ ເມ ສຸກຕໍ ກມ຺ມໍ, ສພ຺ພຎ຺ຎຸສ຺ສ ມເຫສິໂນ;

ເອກາຫໍ ສາຏກໍ ທຕ຺ວາ, ປຕ຺ໂຕມ຺ຫິ ອມຕໍ ປທໍ.

໑໐໗. ‘‘ມຓ຺ຑເປ ຣຸກ຺ຂມູເລ ວາ, ວສໂຕ ສຸຎ຺ຎເກ ຆເຣ;

ຘາເຣຕິ ທຸສ຺ສຉທນໍ, ສມນ຺ຕາ ພ຺ຍາມໂຕ ມມ.

໑໐໘. ‘‘ອວິຎ຺ຎຕ຺ຕໍ ນິວາເສມິ [ອວິຎ຺ຎຕ຺ຕານິ ເສວາມິ (?)], ຈີວຣໍ ປຈ຺ຈຍຎ຺ຈຫໍ;

ລາຠີ [ລາຠິມ຺ຫິ (ສ຺ຍາ.)] ອນ຺ນສ຺ສ ປານສ຺ສ, ອຸຕ຺ຕເຣຍ຺ຍສ຺ສິທໍ ຜລໍ.

໑໐໙. ‘‘ສຕສຫສ຺ສິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ວຕ຺ຖທານສ຺ສິທໍ ຜລໍ.

໑໑໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸຕ຺ຕເຣຍ຺ຍທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸຕ຺ຕເຣຍ຺ຍທາຍກຕ຺ເຖຣສ຺ສາປທານໍ ອຏ຺ຐມໍ.