໗. ຕິຓກຸຏິທາຍກຕ຺ເຖຣອປທານໍ

໗໔. ‘‘ນຄເຣ ພນ຺ຘຸມຕິຍາ, ອໂຫສິໍ ປຣກມ຺ມິໂກ;

ປຣກມ຺ມາຍເນ ຍຸຕ຺ໂຕ, ປຣຠຕ຺ຕໍ ອປສ຺ສິໂຕ.

໗໕. ‘‘ຣໂຫຄໂຕ ນິສີທິຕ຺ວາ, ເອວໍ ຈິນ຺ເຕສຫໍ ຕທາ;

ພຸທ຺ໂຘ ໂລເກ ສມຸປ຺ປນ຺ໂນ, ອຘິກາໂຣ ຈ ນຕ຺ຖິ ເມ.

໗໖. ‘‘ກາໂລ ເມ ຄຕິໍ [ກາໂລ ຄຕິໍ ເມ (ສີ. ສ຺ຍາ.)] ໂສເຘຕຸໍ, ຂໂຓ ເມ ປຏິປາທິໂຕ;

ທຸກ຺ໂຂ ນິຣຍສມ຺ຜສ຺ໂສ, ອປຸຎ຺ຎານຎ຺ຫິ ປາຓິນໍ.

໗໗. ‘‘ເອວາຫໍ ຈິນ຺ຕຍິຕ຺ວານ, ກມ຺ມສາມິໍ ອຸປາຄມິໍ;

ເອກາຫໍ ກມ຺ມໍ ຍາຈິຕ຺ວາ, ວິປິນໍ ປາວິສິໍ ອຫໍ.

໗໘. ‘‘ຕິຓກຏ຺ຐຎ຺ຈ ວລ຺ລິຎ຺ຈ, ອາຫຣິຕ຺ວານຫໍ ຕທາ;

ຕິທຓ຺ຑເກ ຐເປຕ຺ວານ, ອກໍ ຕິຓກຸຏິໍ ອຫໍ.

໗໙. ‘‘ສງ຺ຆສ຺ສຕ຺ຖາຍ ກຸຏິກໍ, ນິຍ຺ຍາເທຕ຺ວານ [ນິຍ຺ຍາເຕຕ຺ວານ (ສີ.)] ຕໍ ອຫໍ;

ຕທເຫເຍວ ອາຄນ຺ຕ຺ວາ, ກມ຺ມສາມິໍ ອຸປາຄມິໍ.

໘໐. ‘‘ເຕນ ກມ຺ເມນ ສຸກເຕນ, ຕາວຕິໍສມຄຈ຺ຉຫໍ;

ຕຕ຺ຖ ເມ ສຸກຕໍ ພ຺ຍມ຺ຫໍ, ກຸຏິກາຍ ສຸນິມ຺ມິຕໍ [ຕິຓກຸຏິກາຍ ນິມ຺ມິຕໍ (ສີ.)].

໘໑. ‘‘ສຫສ຺ສກຓ຺ຑໍ ສຕເຠຓ຺ຑຸ, ຘຊາລຸ ຫຣິຕາມຍໍ;

ສຕສຫສ຺ສນິຍ຺ຍູຫາ, ພ຺ຍມ຺ເຫ ປາຕຸຠວິໍສຸ ເມ.

໘໒. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ມມ ສງ຺ກປ຺ປມຎ຺ຎາຍ, ປາສາໂທ ອຸປຕິຏ຺ຐຕິ.

໘໓. ‘‘ຠຍໍ ວາ ຉມ຺ຠິຕຕ຺ຕໍ ວາ, ໂລມຫໍໂສ ນ ວິຊ຺ຊຕິ;

ຕາສໍ ມມ ນ ຊານາມິ, ຕິຓກຸຏິກາຍິທໍ [ຕິຓກຸຏິຍິທໍ (ກ.)] ຜລໍ.

໘໔. ‘‘ສີຫພ຺ຍຄ຺ຆາ ຈ ທີປີ ຈ, ອຈ຺ຉໂກກຕຣຈ຺ຉກາ [ຕຣຈ຺ຉໂຍ (ສ຺ຍາ. ກ.)];

ສພ຺ເພ ມໍ ປຣິວຊ຺ເຊນ຺ຕິ, ຕິຓກຸຏິກາຍິທໍ ຜລໍ.

໘໕. ‘‘ສຣີສປາ [ສິຣິໍສປາ (ສີ. ສ຺ຍາ.), ສຣິໍສປາ (ກ.)] ຈ ຠູຕາ ຈ, ອຫີ ກຸມ຺ຠຓ຺ຑຣກ຺ຂສາ;

ເຕປິ ມໍ ປຣິວຊ຺ເຊນ຺ຕິ, ຕິຓກຸຏິກາຍິທໍ ຜລໍ.

໘໖. ‘‘ນ ປາປສຸປິນສ຺ສາປິ, ສຣາມິ ທສ຺ສນໍ ມມ;

ອຸປຏ຺ຐິຕາ ສຕິ ມຍ຺ຫໍ, ຕິຓກຸຏິກາຍິທໍ ຜລໍ.

໘໗. ‘‘ຕາເຍວ ຕິຓກຸຏິກາຍ, ອນຸໂຠຕ຺ວານ ສມ຺ປທາ;

ໂຄຕມສ຺ສ ຠຄວໂຕ, ຘມ຺ມໍ ສຈ຺ຉິກຣິໍ ອຫໍ.

໘໘. ‘‘ເອກນວຸຕິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຕິຓກຸຏິກາຍິທໍ ຜລໍ.

໘໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕິຓກຸຏິທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕິຓກຸຏິທາຍກຕ຺ເຖຣສ຺ສາປທານໍ ສຕ຺ຕມໍ.