໖. ປຠງ຺ກຣຕ຺ເຖຣອປທານໍ

໕໓. ‘‘ປທຸມຸຕ຺ຕຣຠຄວໂຕ, ໂລກເຊຏ຺ຐສ຺ສ ຕາທິໂນ;

ວິປິເນ ເຈຕິຍໍ ອາສິ, ວາຬມິຄສມາກຸເລ.

໕໔. ‘‘ນ ໂກຈິ ວິສຫິ ຄນ຺ຕຸໍ, ເຈຕິຍໍ ອຠິວນ຺ທິຕຸໍ;

ຕິຓກຏ຺ຐລໂຕນທ຺ຘໍ, ປລຸຄ຺ຄໍ ອາສິ ເຈຕິຍໍ.

໕໕. ‘‘ວນກມ຺ມິໂກ ຕທາ ອາສິໍ, ປິຕຸມາຕຸມເຕນຫໍ [ປິຕຸເປຕາມເຫນຫໍ (ສີ.), ປິຕາເປຕາມເຫນຫໍ (ສ຺ຍາ.)];

ອທ຺ທສໍ ວິປິເນ ຖູປໍ, ລຸຄ຺ຄໍ ຕິຓລຕາກຸລໍ.

໕໖. ‘‘ທິສ຺ວານາຫໍ ພຸທ຺ຘຖູປໍ, ຄຣຸຈິຕ຺ຕໍ ອຸປຏ຺ຐຫິໍ;

ພຸທ຺ຘເສຏ຺ຐສ຺ສ ຖູໂປຍໍ, ປລຸຄ຺ໂຄ ອຈ຺ຉຕີ ວເນ.

໕໗. ‘‘ນຈ຺ຉນ຺ນໍ ນປ຺ປຕິຣູປໍ, ຊານນ຺ຕສ຺ສ ຄຸຓາຄຸຓໍ;

ພຸທ຺ຘຖູປໍ ອໂສເຘຕ຺ວາ, ອຎ຺ຎໍ ກມ຺ມໍ ປໂຍຊເຍ.

໕໘. ‘‘ຕິຓກຏ຺ຐຎ຺ຈ ວລ຺ລິຎ຺ຈ, ໂສຘຍິຕ຺ວານ ເຈຕິເຍ;

ວນ຺ທິຕ຺ວາ ອຏ຺ຐ ວາຣານິ [ອຏ຺ຐ ຐານານິ (ກ.)], ປຏິກຸຏິໂກ ອຄຈ຺ຉຫໍ.

໕໙. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໖໐. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ໂສວຓ຺ຓໍ ສປຠສ຺ສຣໍ;

ສຏ຺ຐິໂຍຊນມຸພ຺ພິທ຺ຘໍ, ຕິໍສໂຍຊນວິຕ຺ຖຕໍ.

໖໑. ‘‘ຕິສຕານິ ຈ ວາຣານິ, ເທວຣຊ຺ຊມກາຣຍິໍ;

ປຎ຺ຈວີສຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ.

໖໒. ‘‘ຠວາຠເວ ສໍສຣນ຺ໂຕ, ມຫາໂຠຄໍ ລຠາມຫໍ;

ໂຠເຄ ເມ ອູນຕາ ນຕ຺ຖິ, ໂສຘນາຍ ອິທໍ ຜລໍ.

໖໓. ‘‘ສິວິກາ ຫຕ຺ຖິຂນ຺ເຘນ, ວິປິເນ ຄຈ຺ຉໂຕ ມມ;

ຍໍ ຍໍ ທິສາຫໍ ຄຈ຺ຉາມິ, ສຣຓໍ ສມ຺ປເຕ [ສິຊ຺ຌເຕ (ກ.)] ວນໍ.

໖໔. ‘‘ຂາຓຸໍ ວາ ກຓ຺ຏກໍ ວາປິ, ນາຫໍ ປສ຺ສາມິ ຈກ຺ຂຸນາ;

ປຸຎ຺ຎກມ຺ເມນ ສໍຍຸຕ຺ໂຕ, ສຍເມວາປນີຍເຣ.

໖໕. ‘‘ກຸຏ຺ຐໍ ຄຓ຺ໂຑ ກິລາໂສ ຈ, ອປມາໂຣ ວິຕຈ຺ຉິກາ;

ທທ຺ທຸ ກຈ຺ຉຸ [ກຓ຺ຑຸ (ສ຺ຍາ.)] ຈ ເມ ນຕ຺ຖິ, ໂສຘນາຍ ອິທໍ ຜລໍ.

໖໖. ‘‘ອຎ຺ຎມ຺ປິ ເມ ອຈ຺ຉຣິຍໍ, ພຸທ຺ຘຖູປສ຺ສ ໂສຘເນ [ພຸທ຺ຘຖູປມ຺ຫິ ໂສຘິເຕ (ສ຺ຍາ.)];

ນາຠິຊານາມິ ເມ ກາເຍ, ຊາຕໍ ປິຬກພິນ຺ທຸກໍ.

໖໗. ‘‘ອຎ຺ຎມ຺ປິ ເມ ອຈ຺ຉຣິຍໍ, ພຸທ຺ຘຖູປມ຺ຫິ ໂສຘິເຕ [ສພ຺ພຕ຺ຖປິ ເອວເມວ ທິສ຺ສຕິ, ຕຖາ ອຸປຣິປິ];

ທຸເວ ຠເວ ສໍສຣາມິ, ເທວຕ຺ເຕ ອຖ ມານຸເສ.

໖໘. ‘‘ອຎ຺ຎມ຺ປິ ເມ ອຈ຺ຉຣິຍໍ, ພຸທ຺ຘຖູປມ຺ຫິ ໂສຘິເຕ;

ສຸວຓ຺ຓວຓ຺ໂຓ ສພ຺ພຕ຺ຖ, ສປ຺ປຠາໂສ ຠວາມຫໍ.

໖໙. ‘‘ອຎ຺ຎມ຺ປິ ເມ ອຈ຺ຉຣິຍໍ, ພຸທ຺ຘຖູປມ຺ຫິ ໂສຘິເຕ;

ອມນາປໍ ວິວຊ຺ຊຕິ, ມນາປໍ ອຸປຕິຏ຺ຐຕິ.

໗໐. ‘‘ອຎ຺ຎມ຺ປິ ເມ ອຈ຺ຉຣິຍໍ, ພຸທ຺ຘຖູປມ຺ຫິ ໂສຘິເຕ;

ວິສຸທ຺ຘໍ ໂຫຕິ ເມ ຈິຕ຺ຕໍ, ເອກຄ຺ຄໍ ສຸສມາຫິຕໍ.

໗໑. ‘‘ອຎ຺ຎມ຺ປິ ເມ ອຈ຺ຉຣິຍໍ, ພຸທ຺ຘຖູປມ຺ຫິ ໂສຘິເຕ;

ເອກາສເນ ນິສີທິຕ຺ວາ, ອຣຫຕ຺ຕມປາປຸຓິໍ.

໗໒. ‘‘ສຕສຫສ຺ສິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ໂສຘນາຍ ອິທໍ ຜລໍ.

໗໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຠງ຺ກໂຣ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຠງ຺ກຣຕ຺ເຖຣສ຺ສາປທານໍ ຉຏ຺ຐໍ.