໙. ປຸປ຺ຜຈ຺ຉຕ຺ຕິຍຕ຺ເຖຣອປທານໍ

໗໓. ‘‘ສິທ຺ຘຕ຺ຖສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ສຈ຺ຈໍ ປກາສຍນ຺ຕສ຺ສ, ນິພ຺ພາເປນ຺ຕສ຺ສ ປາຓິໂນ.

໗໔. ‘‘ຊລຊໍ ອາຫຣິຕ຺ວານ, ສຕປຕ຺ຕໍ ມໂນຣມໍ;

ປຸປ຺ຜສ຺ສ ຉຕ຺ຕໍ ກຕ຺ວານ, ພຸທ຺ຘສ຺ສ ອຠິໂຣປຍິໍ.

໗໕. ‘‘ສິທ຺ຘຕ຺ໂຖ ຈ ໂລກວິທູ, ອາຫຸຕີນໍ ປຏິຄ຺ຄໂຫ;

ຠິກ຺ຂຸສງ຺ເຆ ຐິໂຕ ສຕ຺ຖາ, ອິມໍ ຄາຖໍ ອຠາສຖ.

໗໖. ‘‘‘ໂຍ ເມ ຈິຕ຺ຕໍ ປສາເທຕ຺ວາ, ປຸປ຺ຜຈ຺ຉຕ຺ຕໍ ອຘາຣຍິໍ;

ເຕນ ຈິຕ຺ຕປ຺ປສາເທນ, ທຸຄ຺ຄຕິໍ ໂສ ນ ຄຈ຺ຉຕິ’.

໗໗. ‘‘ອິທໍ ວຕ຺ວານ ສມ຺ພຸທ຺ໂຘ, ສິທ຺ຘຕ຺ໂຖ ໂລກນາຍໂກ;

ອຸຍ຺ໂຍເຊຕ຺ວານ ປຣິສໍ, ເວຫາສໍ ນຠມຸຄ຺ຄມິ.

໗໘. ‘‘ວຸຏ຺ຐິເຕ ນຣເທວມ຺ຫິ, ເສຕຈ຺ຉຕ຺ຕມ຺ປິ ວຸຏ຺ຐຫິ;

ປຸຣໂຕ ພຸທ຺ຘເສຏ຺ຐສ຺ສ, ຄຈ຺ຉຕິ ຉຕ຺ຕມຸຕ຺ຕມໍ.

໗໙. ‘‘ຈຕຸນ຺ນວຸຕິໂຕ ກປ຺ເປ, ຍໍ ຉຕ຺ຕໍ ອຠິໂຣປຍິໍ;

ທຸຄ຺ຄຕິໍ ນາຠິຊານາມິ, ປຸປ຺ຜຈ຺ຉຕ຺ຕສ຺ສິທໍ ຜລໍ.

໘໐. ‘‘ຈຕຸສຕ຺ຕຕິກປ຺ປມ຺ຫິ, ອຏ຺ຐ ຊລສິຂາ ອຫູ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໘໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຸປ຺ຜຈ຺ຉຕ຺ຕິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຸປ຺ຜຈ຺ຉຕ຺ຕິຍຕ຺ເຖຣສ຺ສາປທານໍ ນວມໍ.