໑໐. ສປຣິວາຣຉຕ຺ຕທາຍກຕ຺ເຖຣອປທານໍ

໘໒. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ອາກາເສ ຊລວຸຏ຺ຐີວ ວສ຺ສເຕ [ວສ຺ສຕິ (ສີ. ສ຺ຍາ.), ວສ຺ເສຕິ (?)] ຘມ຺ມວຸຏ຺ຐິຍາ.

໘໓. ‘‘ຕມທ຺ທສາສິໍ ສມ຺ພຸທ຺ຘໍ, ເທເສນ຺ຕໍ ອມຕໍ ປທໍ;

ສກໍ ຈິຕ຺ຕໍ ປສາເທຕ຺ວາ, ອຄມາສິໍ ສກໍ ຆຣໍ.

໘໔. ‘‘ຉຕ຺ຕໍ ອລງ຺ກຕໍ ຄຍ຺ຫ, ອຸປຄຈ຺ຉິໍ ນຣຸຕ຺ຕມໍ;

ຫຏ຺ໂຐ ຫຏ຺ເຐນ ຈິຕ຺ເຕນ, ອາກາເສ ອຸກ຺ຂິປິໍ ອຫໍ.

໘໕. ‘‘ສຸສງ຺ຄຫິຕຍານໍວ, ທນ຺ໂຕວ ສາວກຸຕ຺ຕໂມ;

ອຸປຄນ຺ຕ຺ວານ ສມ຺ພຸທ຺ຘໍ, ມຕ຺ຖເກ ສມ຺ປຕິຏ຺ຐຫິ.

໘໖. ‘‘ອນຸກມ຺ປໂກ ກາຣຸຓິໂກ, ພຸທ຺ໂຘ ໂລກຄ຺ຄນາຍໂກ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໘໗. ‘‘‘ເຍນ ຉຕ຺ຕມິທໍ ທິນ຺ນໍ, ອລງ຺ກຕໍ ມໂນຣມໍ;

ເຕນ ຈິຕ຺ຕປ຺ປສາເທນ, ທຸຄ຺ຄຕິໍ ໂສ ນ ຄຈ຺ຉຕິ.

໘໘. ‘‘‘ສຕ຺ຕກ຺ຂຕ຺ຕຸຎ຺ຈ ເທເວສຸ, ເທວຣຊ຺ຊໍ ກຣິສ຺ສຕິ;

ພາຕ຺ຕິໍສກ຺ຂຕ຺ຕຸຎ຺ຈ ຣາຊາ, ຈກ຺ກວຕ຺ຕີ ຠວິສ຺ສຕິ.

໘໙. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໙໐. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ’.

໙໑. ‘‘ພຸທ຺ຘສ຺ສ ຄິຣມຎ຺ຎາຍ, ວາຈາສຠິມຸທີຣິຕໍ;

ປສນ຺ນຈິຕ຺ໂຕ ສຸມໂນ, ຠິຍ຺ໂຍ ຫາສໍ ຊເນສຫໍ.

໙໒. ‘‘ຊຫິຕ຺ວາ ມານຸສໍ ໂຍນິໍ, ທິພ຺ພໍ ໂຍນິໍ [ເທວໂຍນິໍ (ສີ.), ທິພ຺ພໂຍນິໍ (ສ຺ຍາ.)] ມຊ຺ຌຄໍ;

ວິມານມຸຕ຺ຕມໍ ມຍ຺ຫໍ, ອພ຺ຠຸຄ຺ຄຕໍ ມໂນຣມໍ.

໙໓. ‘‘ວິມານາ ນິກ຺ຂມນ຺ຕສ຺ສ, ເສຕຈ຺ຉຕ຺ຕໍ ຘຣີຍຕິ;

ຕທາ ສຎ຺ຎໍ ປຏິລຠິໍ, ປຸພ຺ພກມ຺ມສ຺ສິທໍ ຜລໍ.

໙໔. ‘‘ເທວໂລກາ ຈວິຕ຺ວານ, ມນຸສ຺ສຕ຺ຕຎ຺ຈ ອາຄມິໍ;

ຉຕ຺ຕິໍສກ຺ຂຕ຺ຕຸໍ ຈກ຺ກວຕ຺ຕີ, ສຕ຺ຕກປ຺ປສຕມ຺ຫິໂຕ.

໙໕. ‘‘ຕມ຺ຫາ ກາຍາ ຈວິຕ຺ວານ, ອາຄຈ຺ຉິໍ [ອຄຎ຺ຉິໍ (?)] ຕິທສໍ ປຸຣໍ;

ສໍສຣິຕ຺ວານຸປຸພ຺ເພນ, ມານຸສໍ ປຸນຣາຄມິໍ.

໙໖. ‘‘ໂອກ຺ກນ຺ຕໍ ມາຕຸກຸຈ຺ຉິໍ ມໍ, ເສຕ຺ຕຈ຺ຉຕ຺ຕໍ ອຘາຣຍຸໍ;

ຊາຕິຍາ ສຕ຺ຕວສ຺ໂສຫໍ, ປພ຺ພຊິໍ ອນຄາຣິຍໍ.

໙໗. ‘‘ສຸນນ຺ໂທ ນາມ ນາເມນ, ພ຺ຣາຫ຺ມໂຓ ມນ຺ຕປາຣຄູ;

ຜລິກໍ ຉຕ຺ຕມາທາຍ, ສາວກຄ຺ຄສ຺ສ ໂສ ຕທາ.

໙໘. ‘‘ອນຸໂມທິ ມຫາວີໂຣ, ສາຣິປຸຕ຺ໂຕ ມຫາກຖີ;

ສຸຕ຺ວານຸໂມທນໍ ຕສ຺ສ, ປຸພ຺ພກມ຺ມມນຸສ຺ສຣິໍ.

໙໙. ‘‘ອຎ຺ຊລິໍ ປຄ຺ຄເຫຕ຺ວານ, ສກໍ ຈິຕ຺ຕໍ ປສາທຍິໍ;

ສຣິຕ຺ວາ ປຸຣິມໍ ກມ຺ມໍ, ອຣຫຕ຺ຕມປາປຸຓິໍ.

໑໐໐. ‘‘ອຸຏ຺ຐາຍ ອາສນາ ຕມ຺ຫາ, ສິເຣ ກຕ຺ວານ ອຎ຺ຊລິໍ;

ສມ຺ພຸທ຺ຘໍ ອຠິວາເທຕ຺ວາ, ອິມໍ ວາຈໍ ອຸທີຣິຍິໍ.

໑໐໑. ‘‘ສຕສຫສ຺ສິໂຕ ກປ຺ເປ, ພຸທ຺ໂຘ ໂລເກ ອນຸຕ຺ຕໂຣ;

ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ.

໑໐໒. ‘‘ຕສ຺ສ ຉຕ຺ຕໍ ມຍາ ທິນ຺ນໍ, ວິຈິຕ຺ຕໍ ສມລງ຺ກຕໍ;

ອຸໂຠ ຫຕ຺ເຖຫິ ປຄ຺ຄຓ຺ຫິ, ສຍມ຺ຠູ ອຄ຺ຄປຸຄ຺ຄໂລ.

໑໐໓. ‘‘ອໂຫ ພຸທ຺ໂຘ ອໂຫ ຘມ຺ໂມ, ອໂຫ ໂນ ສຕ຺ຖຸສມ຺ປທາ;

ເອກຈ຺ຉຕ຺ຕສ຺ສ ທາເນນ, ທຸຄ຺ຄຕິໍ ນຸປປຊ຺ຊຫໍ.

໑໐໔. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໑໐໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສປຣິວາຣຉຕ຺ຕທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສປຣິວາຣຉຕ຺ຕທາຍກຕ຺ເຖຣສ຺ສາປທານໍ ທສມໍ.

ອຸມາປຸປ຺ຜິຍວຄ຺ໂຄ ເຕຕ຺ຕິໍສຕິໂມ.