໘. ສຸມນາເວຬິຍຕ຺ເຖຣອປທານໍ

໖໔. ‘‘ເວສ຺ສຠຸສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ສພ຺ເພ ຊນາ ສມາຄມ຺ມ, ມຫາປູຊໍ ກໂຣນ຺ຕິ ເຕ.

໖໕. ‘‘ສຸຘາຍ ປິຓ຺ຑໍ ກຕ຺ວານ, ອາເວຬໍ ສຸມນາຍຫໍ;

ສີຫາສນສ຺ສ ປຸຣໂຕ, ອຠິໂຣເປສຫໍ ຕທາ.

໖໖. ‘‘ສພ຺ເພ ຊນາ ສມາຄມ຺ມ, ເປກ຺ຂນ຺ຕິ ປຸປ຺ຜມຸຕ຺ຕມໍ;

ເກນິທໍ ປູຊິຕໍ ປຸປ຺ຜໍ, ພຸທ຺ຘເສຏ຺ຐສ຺ສ ຕາທິໂນ.

໖໗. ‘‘ເຕນ ຈິຕ຺ຕປ຺ປສາເທນ, ນິມ຺ມານໍ ອຸປປຊ຺ຊຫໍ;

ອນຸໂຠມິ [ອນຸໂຠສິໍ (ສີ.)] ສກໍ ກມ຺ມໍ, ປຸພ຺ເພ ສຸກຕມຕ຺ຕໂນ.

໖໘. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ສພ຺ເພສານໍ ປິໂຍ ໂຫມິ, ປຸປ຺ຜປູຊາຍິທໍ ຜລໍ.

໖໙. ‘‘ນາຠິຊານາມິ ກາເຍນ, ວາຈາຍ ອຸທ ເຈຕສາ;

ສໍຍຕານໍ ຕປສ຺ສີນໍ, ກຕໍ ອກ຺ໂກສິຕໍ ມຍາ.

໗໐. ‘‘ເຕນ ສຸຈຣິເຕນາຫໍ, ຈິຕ຺ຕສ຺ສ ປຓິຘີຫິ ຈ;

ສພ຺ເພສໍ ປູຊິໂຕ ໂຫມິ, ອນກ຺ໂກສສ຺ສິທໍ ຜລໍ.

໗໑. ‘‘ອິໂຕ ເອກາທເສ ກປ຺ເປ, ສຫສ຺ສາໂຣສິ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໗໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຸມນາເວຬິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຸມນາເວຬິຍຕ຺ເຖຣສ຺ສາປທານໍ ອຏ຺ຐມໍ.