໗. ນິຄ຺ຄຸຓ຺ຑິປຸປ຺ຜິຍຕ຺ເຖຣອປທານໍ

໓໙. ‘‘ຍທາ ເທໂວ ເທວກາຍາ, ຈວເຕ ອາຍຸສງ຺ຂຍາ;

ຕໂຍ ສທ຺ທາ ນິຈ຺ຉຣນ຺ຕິ, ເທວານໍ ອນຸໂມທຕໍ.

໔໐. ‘‘‘ອິໂຕ ໂຠ ສຸຄຕິໍ ຄຈ຺ຉ, ມນຸສ຺ສານໍ ສຫພ຺ຍຕໍ;

ມນຸສ຺ສຠູໂຕ ສທ຺ຘມ຺ເມ, ລຠ ສທ຺ຘໍ ອນຸຕ຺ຕຣໍ.

໔໑. ‘‘‘ສາ ເຕ ສທ຺ຘາ ນິວິຏ຺ຐາສ຺ສ, ມູລຊາຕາ ປຕິຏ຺ຐິຕາ;

ຍາວຊີວໍ ອສໍຫີຣາ, ສທ຺ຘມ຺ເມ ສຸປ຺ປເວທິເຕ.

໔໒. ‘‘‘ກາເຍນ ກຸສລໍ ກຕ຺ວາ, ວາຈາຍ ກຸສລໍ ພຫຸໍ;

ມນສາ ກຸສລໍ ກຕ຺ວາ, ອພ຺ຍາປຊ຺ຊໍ ນິຣູປຘິໍ.

໔໓. ‘‘‘ຕໂຕ ໂອປຘິກໍ ປຸຎ຺ຎໍ, ກຕ຺ວາ ທາເນນ ຕໍ ພຫຸໍ;

ອຎ຺ເຎປິ ມຈ຺ເຈ ສທ຺ຘມ຺ເມ, ພ຺ຣຫ຺ມຈຣິເຍ ນິເວສຍ’.

໔໔. ‘‘ອິມາຍ ອນຸກມ຺ປາຍ, ເທວາເທວໍ ຍທາ ວິທູ;

ຈວນ຺ຕໍ ອນຸໂມທນ຺ຕິ, ເອຫິ ເທວ ປຸນປ຺ປຸນໍ [ເທວປຸຣໍ ປຸນ (ສີ.)].

໔໕. ‘‘ສໍເວໂຄ ເມ [ສໍວິຄ຺ໂຄຫໍ (ສ຺ຍາ.)] ຕທາ ອາສິ, ເທວສງ຺ເຆ ສມາຄເຕ;

ກໍສຸ ນາມ ອຫໍ ໂຍນິໍ, ຄມິສ຺ສາມິ ອິໂຕ ຈຸໂຕ.

໔໖. ‘‘ມມ ສໍເວຄມຎ຺ຎາຍ, ສມໂຓ ຠາວິຕິນ຺ທ຺ຣິໂຍ;

ມມຸທ຺ຘຣິຕຸກາໂມ ໂສ, ອາຄຈ຺ຉິ ມມ ສນ຺ຕິກໍ.

໔໗. ‘‘ສຸມໂນ ນາມ ນາເມນ, ປທຸມຸຕ຺ຕຣສາວໂກ;

ອຕ຺ຖຘມ຺ມານຸສາສິຕ຺ວາ, ສໍເວເຊສິ ມມໍ ຕທາ.

ທ຺ວາທສມໍ ຠາຓວາຣໍ.

໔໘. ‘‘ຕສ຺ສາຫໍ ວຈນໍ ສຸຕ຺ວາ, ພຸທ຺ເຘ ຈິຕ຺ຕໍ ປສາທຍິໍ;

ຕໍ ຘີຣໍ ອຠິວາເທຕ຺ວາ, ຕຕ຺ຖ ກາລໍກໂຕ ອຫໍ.

໔໙. ‘‘ອຸປປຊ຺ຊິໍ ສ [ອຸປປຊ຺ຊິສ຺ສໍ (ສີ.)] ຕຕ຺ເຖວ, ສຸກ຺ກມູເລນ ໂຈທິໂຕ;

ວສນ຺ໂຕ ມາຕຸກຸຈ຺ຉິມ຺ຫິ, ປຸນ ຘາເຣຕິ ມາຕຸຍາ.

໕໐. ‘‘ຕມ຺ຫາ ກາຍາ ຈວິຕ຺ວານ, ຕິທເສ ອຸປປຊ຺ຊຫໍ;

ເອຕ຺ຖນ຺ຕເຣ ນ ປສ຺ສາມິ, ໂທມນສ຺ສມຫໍ ຕທາ.

໕໑. ‘‘ຕາວຕິໍສາ ຈວິຕ຺ວານ, ມາຕຸກຸຈ຺ຉິໍ ສໂມກ຺ກມິໍ;

ນິກ຺ຂມິຕ຺ວານ ກຸຈ຺ຉິມ຺ຫາ, ກຓ຺ຫສຸກ຺ກໍ ອຊານຫໍ.

໕໒. ‘‘ຊາຕິຍາ ສຕ຺ຕວສ຺ໂສວ [ຊາຕິຍາ ສຕ຺ຕວສ຺ເສນ (ສ຺ຍາ.)], ອາຣາມໍ ປາວິສິໍ ອຫໍ;

ໂຄຕມສ຺ສ ຠຄວໂຕ, ສກ຺ຍປຸຕ຺ຕສ຺ສ ຕາທິໂນ.

໕໓. ‘‘ວິຕ຺ຖາຣິເກ [ວິຕ຺ຖາຣິເຕ (ສີ. ກ.)] ປາວຈເນ, ພາຫຸຊຎ຺ຎມ຺ຫິ ສາສເນ;

ອທ຺ທສໍ ສາສນກເຣ, ຠິກ຺ຂໂວ ຕຕ຺ຖ ສຕ຺ຖຸໂນ.

໕໔. ‘‘ສາວຕ຺ຖິ ນາມ ນຄຣໍ, ຣາຊາ ຕຕ຺ຖາສິ ໂກສໂລ;

ຣເຖນ ນາຄຍຸຕ຺ເຕນ, ອຸເປສິ ໂພຘິມຸຕ຺ຕມໍ.

໕໕. ‘‘ຕສ຺ສາຫໍ ນາຄໍ ທິສ຺ວານ, ປຸພ຺ພກມ຺ມໍ ອນຸສ຺ສຣິໍ;

ອຎ຺ຊລິໍ ປຄ຺ຄເຫຕ຺ວານ, ສມຍໍ ອຄມາສຫໍ.

໕໖. ‘‘ຊາຕິຍາ ສຕ຺ຕວສ຺ໂສວ, ປພ຺ພຊິໍ ອນຄາຣິຍໍ;

ໂຍ ໂສ ພຸທ຺ຘໍ ອຸປຏ຺ຐາສິ, ອານນ຺ໂທ ນາມ ສາວໂກ.

໕໗. ‘‘ຄຕິມາ ຘິຕິມາ ເຈວ, ສຕິມາ ຈ ພຫຸສ຺ສຸໂຕ;

ຣຎ຺ໂຎ ຈິຕ຺ຕໍ ປສາເທນ຺ໂຕ, ນິຍ຺ຍາເທສິ ມຫາຊຸຕິ.

໕໘. ‘‘ຕສ຺ສາຫໍ ຘມ຺ມໍ ສຸຕ຺ວານ, ປຸພ຺ພກມ຺ມໍ ອນຸສ຺ສຣິໍ;

ຕຕ຺ເຖວ ຐິຕໂກ ສນ຺ໂຕ, ອຣຫຕ຺ຕມປາປຸຓິໍ.

໕໙. ‘‘ເອກໍສໍ ຈີວຣໍ ກຕ຺ວາ, ສິເຣ ກຕ຺ວານ ອຎ຺ຊລິໍ;

ສມ຺ພຸທ຺ຘໍ ອຠິວາເທຕ຺ວາ, ອິມໍ ວາຈໍ ອຸທີຣຍິໍ.

໖໐. ‘‘‘ປທຸມຸຕ຺ຕຣພຸທ຺ຘສ຺ສ, ທ຺ວິປທິນ຺ທສ຺ສ ສຕ຺ຖຸໂນ;

ນິຄ຺ຄຸຓ຺ຑິປຸປ຺ຜໍ ປຄ຺ຄຍ຺ຫ, ສີຫາສເນ ຐເປສຫໍ.

໖໑. ‘‘‘ເຕນ ກມ຺ເມນ ທ຺ວິປທິນ຺ທ, ໂລກເຊຏ຺ຐ ນຣາສຠ;

ປຕ຺ໂຕມ຺ຫິ ອຈລໍ ຐານໍ, ຫິຕ຺ວາ ຊຍປຣາຊຍໍ’.

໖໒. ‘‘ປຎ຺ຈວີສສຫສ຺ສມ຺ຫິ, ກປ຺ປານໍ ມນຸຊາຘິປາ;

ອພ຺ພຸທນິຣພ຺ພຸທານິ, ອຏ຺ຐຏ຺ຐາສິໍສຸ ຂຕ຺ຕິຍາ.

໖໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນິຄ຺ຄຸຓ຺ຑິປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນິຄ຺ຄຸຓ຺ຑິປຸປ຺ຜິຍຕ຺ເຖຣສ຺ສາປທານໍ ສຕ຺ຕມໍ.