໔. ຍຎ຺ຎສາມິກຕ຺ເຖຣອປທານໍ

໑໗. ‘‘ຊາຕິຍາ ສຕ຺ຕວສ຺ໂສຫໍ, ອໂຫສິໍ ມນ຺ຕປາຣຄູ;

ກຸລວຕ຺ຕໍ [ກຸລວໍສໍ (ສີ. ສ຺ຍາ.)] ອຘາເຣສິໍ, ຍຎ຺ໂຎ ອຸສ຺ສາຫິໂຕ ມຍາ.

໑໘. ‘‘ຈຸລ຺ລາສີຕິສຫສ຺ສານິ, ປສູ ຫຎ຺ຎນ຺ຕິ ເມ ຕທາ;

ສາຣຖມ຺ຠຸປນີຕານິ [ຕາຣສ຺ມີຫິ ອຸປນີຕານິ (ກ.), ສາຣສ຺ມິໍຫິ ອຸປນີຕານິ (ສ຺ຍາ.)], ຍຎ຺ຎຕ຺ຖາຍ ອຸປຏ຺ຐິຕາ.

໑໙. ‘‘ອຸກ຺ກາມຸຂປຫຏ຺ໂຐວ, ຂທິຣງ຺ຄາຣສນ຺ນິໂຠ;

ອຸທຍນ຺ໂຕວ ສູຣິໂຍ, ປຸຓ຺ຓມາເຍວ [ປຸຓ຺ຓມາເສວ (ສີ.)] ຈນ຺ທິມາ.

໒໐. ‘‘ສິທ຺ຘຕ຺ໂຖ ສພ຺ພສິທ຺ຘຕ຺ໂຖ, ຕິໂລກມຫິໂຕ ຫິໂຕ;

ອຸປຄນ຺ຕ຺ວານ ສມ຺ພຸທ຺ໂຘ, ອິທໍ ວຈນມພ຺ຣວິ.

໒໑. ‘‘‘ອຫິໍສາ ສພ຺ພປາຓີນໍ, ກຸມາຣ ມມ ຣຸຈ຺ຈຕິ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣຕິ.

໒໒. ‘‘‘ຣຕິ ຈ ສມຈຣິຍາຍ, ພາຫຸສຈ຺ຈໍ ກຕຎ຺ຎຸຕາ;

ທິຏ຺ເຐ ຘມ຺ເມ ປຣຕ຺ຖ ຈ, ຘມ຺ມາ ເອເຕ ປສໍສິຍາ.

໒໓. ‘‘‘ເອເຕ ຘມ຺ເມ ຠາວຍິຕ຺ວາ, ສພ຺ພສຕ຺ຕຫິເຕ ຣໂຕ [ຫິເຕສິໂຕ (ກ.)];

ພຸທ຺ເຘ ຈິຕ຺ຕໍ ປສາເທຕ຺ວາ, ຠາເວຫິ ມຄ຺ຄມຸຕ຺ຕມໍ’.

໒໔. ‘‘ອິທໍ ວຕ຺ວານ ສພ຺ພຎ຺ຎູ, ໂລກເຊຏ຺ໂຐ ນຣາສໂຠ;

ມເມວໍ ອນຸສາສິຕ຺ວາ, ເວຫາສໍ ອຸຄ຺ຄໂຕ ຄໂຕ.

໒໕. ‘‘ປຸພ຺ເພ ຈິຕ຺ຕໍ ວິໂສເຘຕ຺ວາ, ປຈ຺ຉາ ຈິຕ຺ຕໍ ປສາທຍິໍ;

ເຕນ ຈິຕ຺ຕປ຺ປສາເທນ, ຕຸສິຕໍ ອຸປປຊ຺ຊຫໍ.

໒໖. ‘‘ຈຕຸນ຺ນວຸຕິໂຕ ກປ຺ເປ, ຍທາ ຈິຕ຺ຕໍ ປສາທຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘສຎ຺ຎາຍິທໍ ຜລໍ.

໒໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຍຎ຺ຎສາມິໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຍຎ຺ຎສາມິກຕ຺ເຖຣສ຺ສາປທານໍ ຈຕຸຕ຺ຖໍ.