໓. ຕິສຣຓຄມນິຍຕ຺ເຖຣອປທານໍ

໑໐໖. ‘‘ນຄເຣ ຈນ຺ທວຕິຍາ [ພນ຺ຘຸມຕິຍາ (ອຏ຺ຐ.)], ມາຕຸອຸປຏ຺ຐາໂກ [ມາຕຸປຏ຺ຐາຍໂກ (ສີ.), ມາຕຸປຏ຺ຐານໂກ (ສ຺ຍາ.)] ອຫຸໍ;

ອນ຺ຘາ ມາຕາ ປິຕາ ມຍ຺ຫໍ, ເຕ ໂປເສມິ ອຫໍ ຕທາ.

໑໐໗. ‘‘ຣໂຫຄໂຕ ນິສີທິຕ຺ວາ, ເອວໍ ຈິນ຺ເຕສຫໍ ຕທາ;

ໂປເສນ຺ໂຕ ມາຕາປິຕໂຣ, ປພ຺ພຊ຺ຊໍ ນ ລຠາມຫໍ.

໑໐໘. ‘‘ມຫນ຺ຘກາຣປິຫິຕາ [ຕມນ຺ຘກາຣປິຫິຕາ (ສ຺ຍາ.)], ຕິວິຘຄ຺ຄີຫິ ຑຍ຺ຫເຣ;

ເອຕາທິເສ ຠເວ [ຠເຍ (ສີ.)] ຊາເຕ, ນຕ຺ຖິ ໂກຈິ ວິນາຍໂກ.

໑໐໙. ‘‘ພຸທ຺ໂຘ ໂລເກ ສມຸປ຺ປນ຺ໂນ, ທິປ຺ປຕິ [ທິພ຺ພຕິ (ກ.)] [ຊິນສາສນໍ (ສີ.)] ທານິ ສາສນໍ;

ສກ຺ກາ ອຸທ຺ຘຣິຕຸໍ ອຕ຺ຕາ, ປຸຎ຺ຎກາເມນ ຊນ຺ຕຸນາ.

໑໑໐. ‘‘ອຸຄ຺ຄຍ຺ຫ ຕີຓິ ສຣເຓ, ປຣິປຸຓ຺ຓານິ ໂຄປຍິໍ;

ເຕນ ກມ຺ເມນ ສຸກເຕນ, ປຏິໂມກ຺ຂາມິ ທຸຄ຺ຄຕິໍ.

໑໑໑. ‘‘ນິສໂຠ ນາມ ສມໂຓ, ພຸທ຺ຘສ຺ສ ອຄ຺ຄສາວໂກ;

ຕມຫໍ ອຸປຄນ຺ຕ຺ວານ, ສຣຓຄມນໍ ຄຫິໍ.

໑໑໒. ‘‘ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ສຣຓຄມນໍ, ປຣິປຸຓ຺ຓໍ ອໂຄປຍິໍ.

໑໑໓. ‘‘ຈຣິເມ ວຕ຺ຕມານມ຺ຫິ, ສຣຓໍ ຕໍ ອນຸສ຺ສຣິໍ;

ເຕນ ກມ຺ເມນ ສຸກເຕນ, ຕາວຕິໍສໍ ອຄຈ຺ຉຫໍ.

໑໑໔. ‘‘ເທວໂລກຄໂຕ ສນ຺ໂຕ, ປຸຎ຺ຎກມ຺ມສມາຫິໂຕ;

ຍໍ ເທສໍ [ຍໍ ຍໍ ເທສໍ (ສ຺ຍາ.)] ອຸປປຊ຺ຊາມິ [ອຸປຄຈ຺ຉາມິ (ສີ.)], ອຏ຺ຐ ເຫຕູ ລຠາມຫໍ.

໑໑໕. ‘‘ທິສາສຸ ປູຊິໂຕ ໂຫມິ, ຕິກ຺ຂປຎ຺ໂຎ ຠວາມຫໍ;

ສພ຺ເພ ເທວານຸວຕ຺ຕນ຺ຕິ, ອມິຕໂຠຄໍ ລຠາມຫໍ.

໑໑໖. ‘‘ສຸວຓ຺ຓວຓ຺ໂຓ ສພ຺ພຕ຺ຖ, ປຏິກນ຺ໂຕ ຠວາມຫໍ;

ມິຕ຺ຕານໍ ອຈໂລ ໂຫມິ, ຍໂສ ອພ຺ຠຸຄ຺ຄໂຕ ມມໍ.

໑໑໗. ‘‘ອສີຕິກ຺ຂຕ຺ຕຸ ເທວິນ຺ໂທ, ເທວຣຊ຺ຊມກາຣຍິໍ;

ທິພ຺ພສຸຂໍ ອນຸຠວິໍ, ອຈ຺ຉຣາຫິ ປຸຣກ຺ຂໂຕ.

໑໑໘. ‘‘ປຎ຺ຈສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໑໑໙. ‘‘ປຈ຺ຉິເມ ຠເວ ສມ຺ປຕ຺ເຕ, ປຸຎ຺ຎກມ຺ມສມາຫິໂຕ;

ປຸເຣ ສາວຕ຺ຖິຍໍ ຊາໂຕ, ມຫາສາເລ ສຸອຑ຺ຒເກ.

໑໒໐. ‘‘ນຄຣາ ນິກ຺ຂມິຕ຺ວານ, ທາຣເກຫິ ປຸຣກ຺ຂໂຕ;

ຫສຂິຑ຺ຑສມງ຺ຄີຫໍ [ສາຫໍ ຂິຑ຺ຑສມງ຺ຄີ (ສ຺ຍາ.)], ສງ຺ຆາຣາມໍ ອຸປາຄມິໍ.

໑໒໑. ‘‘ຕຕ຺ຖທ຺ທສາສິໍ [ຕຕ຺ຖທ຺ທສາຫໍ (ກ.)] ສມຓໍ, ວິປ຺ປມຸຕ຺ຕໍ ນິຣູປຘິໍ;

ໂສ ເມ ຘມ຺ມມເທເສສິ, ສຣຓຎ຺ຈ ອທາສິ ເມ.

໑໒໒. ‘‘ໂສຫໍ ສຸຕ຺ວານ ສຣຓໍ, ສຣຓໍ ເມ ອນຸສ຺ສຣິໍ;

ເອກາສເນ ນິສີທິຕ຺ວາ, ອຣຫຕ຺ຕມປາປຸຓິໍ.

໑໒໓. ‘‘ຊາຕິຍາ ສຕ຺ຕເມ ວສ຺ເສ, ອຣຫຕ຺ຕມປາປຸຓິໍ;

ອຸປສມ຺ປາທຍິ ພຸທ຺ໂຘ, ຄຸຓມຎ຺ຎາຍ ຈກ຺ຂຸມາ.

໑໒໔. ‘‘ອປຣິເມຍ຺ເຍ ອິໂຕ ກປ຺ເປ, ສຣຓານິ ອຄຈ຺ຉຫໍ;

ຕໂຕ ເມ ສຸກຕໍ ກມ຺ມໍ, ຜລໍ ທສ຺ເສສິ ເມ ອິຘ.

໑໒໕. ‘‘ສຸໂຄປິຕໍ ເມ ສຣຓໍ, ມານສໍ ສຸປ຺ປຓີຫິຕໍ;

ອນຸໂຠຕ຺ວາ ຍສໍ ສພ຺ພໍ, ປຕ຺ໂຕມ຺ຫິ ອຈລໍ ປທໍ.

໑໒໖. ‘‘ເຍສໍ ໂສຕາວຘານຕ຺ຖິ, ສຸໂຓຖ ມມ ຠາສໂຕ;

ອຫໍ [ອຕ຺ຖໍ (ສ຺ຍາ.)] ໂວ ກຖຍິສ຺ສາມິ, ສາມໍ ທິຏ຺ຐໍ ປທໍ ມມ.

໑໒໗. ‘‘‘ພຸທ຺ໂຘ ໂລເກ ສມຸປ຺ປນ຺ໂນ, ວຕ຺ຕເຕ ຊິນສາສນໍ;

ອມຕາ ວາທິຕາ ເຠຣີ, ໂສກສລ຺ລວິໂນທນາ.

໑໒໘. ‘‘‘ຍຖາສເກນ ຖາເມນ, ປຸຎ຺ຎກ຺ເຂຕ຺ເຕ ອນຸຕ຺ຕເຣ;

ອຘິກາຣໍ ກເຣຍ຺ຍາຖ, ປສ຺ສຍິສ຺ສຖ ນິພ຺ພຸຕິໍ.

໑໒໙. ‘‘‘ປຄ຺ຄຍ຺ຫ ຕີຓິ ສຣເຓ, ປຎ຺ຈສີລານິ ໂຄປິຍ;

ພຸທ຺ເຘ ຈິຕ຺ຕໍ ປສາເທຕ຺ວາ, ທຸກ຺ຂສ຺ສນ຺ຕໍ ກຣິສ຺ສຖ.

໑໓໐. ‘‘‘ສມ຺ມາ ຘມ຺ມໍ ຠາເວຕ຺ວານ [ມໂມປມໍ ກຣິຕ຺ວານ (ສີ. ສ຺ຍາ.)], ສີລານິ ປຣິໂຄປິຍ;

ອຈິຣໍ ອຣຫຕ຺ຕໍ ໂວ, ສພ຺ເພປິ ປາປຸຓິສ຺ສຖ.

໑໓໑. ‘‘‘ເຕວິຊ຺ໂຊ ອິທ຺ຘິປຕ຺ໂຕມ຺ຫິ, ເຈໂຕປຣິຍໂກວິໂທ;

ສາວໂກ ເຕ ມຫາວີຣ, ສຣໂຓ [ຈຣເຓ (ສີ. ສ຺ຍາ.)] ວນ຺ທຕິ ສຕ຺ຖຸໂນ’.

໑໓໒. ‘‘ອປຣິເມຍ຺ເຍ ອິໂຕ ກປ຺ເປ, ສຣຓໍ ພຸທ຺ຘສ຺ສ ຄຈ຺ຉຫໍ;

ທຸຄ຺ຄຕິໍ ນາຠິຊານາມິ, ສຣຓໍ ຄມເນ ຜລໍ.

໑໓໓. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕິສຣຓຄມນິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕິສຣຓຄມນິຍຕ຺ເຖຣສ຺ສາປທານໍ ຕຕິຍໍ.