໔. ປຎ຺ຈສີລສມາທານິຍຕ຺ເຖຣອປທານໍ

໑໓໔. ‘‘ນຄເຣ ຈນ຺ທວຕິຍາ, ຠຕໂກ ອາສຫໍ ຕທາ;

ປຣກມ຺ມາຍເນ ຍຸຕ຺ໂຕ, ປພ຺ພຊ຺ຊໍ ນ ລຠາມຫໍ.

໑໓໕. ‘‘ມຫນ຺ຘກາຣປິຫິຕາ, ຕິວິຘຄ຺ຄີຫິ ຑຍ຺ຫເຣ;

ເກນ ນຸ ໂຂ ອຸປາເຍນ, ວິສໍຍຸຕ຺ໂຕ ຠເວ ອຫໍ.

໑໓໖. ‘‘ເທຍ຺ຍຘມ຺ໂມ ຈ ເມ ນຕ຺ຖິ, ວຣາໂກ ຠຕໂກ ອຫໍ;

ຍໍນູນາຫໍ ປຎ຺ຈສີລໍ, ຣກ຺ເຂຍ຺ຍໍ ປຣິປູຣຍໍ.

໑໓໗. ‘‘ອໂນມທສ຺ສິສ຺ສ ມຸນິໂນ, ນິສໂຠ ນາມ ສາວໂກ;

ຕມຫໍ ອຸປສງ຺ກມ຺ມ, ປຎ຺ຈສິກ຺ຂາປທຄ຺ຄຫິໍ.

໑໓໘. ‘‘ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ປຎ຺ຈສີລານິ, ປຣິປຸຓ຺ຓານິ ໂຄປຍິໍ.

໑໓໙. ‘‘ມຈ຺ຈຸກາເລ ຈ ສມ຺ປຕ຺ເຕ, ເທວາ ອສ຺ສາສຍນ຺ຕິ ມໍ;

‘ຣໂຖ ສຫສ຺ສຍຸຕ຺ໂຕ ເຕ, ມາຣິສາຍໍ [ມາຣິສສ຺ສ (ກ.)] ອຸປຏ຺ຐິໂຕ’.

໑໔໐. ‘‘ວຕ຺ຕນ຺ເຕ ຈຣິເມ ຈິຕ຺ເຕ, ມມ ສີລໍ ອນຸສ຺ສຣິໍ;

ເຕນ ກມ຺ເມນ ສຸກເຕນ, ຕາວຕິໍສໍ ອຄຈ຺ຉຫໍ.

໑໔໑. ‘‘ຕິໍສກ຺ຂຕ຺ຕຸຎ຺ຈ ເທວິນ຺ໂທ, ເທວຣຊ຺ຊມກາຣຍິໍ;

ທິພ຺ພສຸຂໍ [ທິພ຺ພໍ ສຸຂໍ (ສີ.)] ອນຸຠວິໍ, ອຈ຺ຉຣາຫິ ປຸຣກ຺ຂໂຕ.

໑໔໒. ‘‘ປຎ຺ຈສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໑໔໓. ‘‘ເທວໂລກາ ຈວິຕ຺ວານ, ສຸກ຺ກມູເລນ ໂຈທິໂຕ;

ປຸເຣ ເວສາລິຍໍ ຊາໂຕ, ມຫາສາເລ ສຸອຑ຺ຒເກ.

໑໔໔. ‘‘ວສ຺ສູປນາຍິເກ ກາເລ, ທິປ຺ປນ຺ເຕ [ທິພ຺ພນ຺ຕິ (ກ.)] ຊິນສາສເນ;

ມາຕາ ຈ ເມ ປິຕາ ເຈວ, ປຎ຺ຈສິກ຺ຂາປທຄ຺ຄຫຸໍ.

໑໔໕. ‘‘ສຫ ສຸຕ຺ວານຫໍ ສີລໍ, ມມ ສີລໍ ອນຸສ຺ສຣິໍ;

ເອກາສເນ ນິສີທິຕ຺ວາ, ອຣຫຕ຺ຕມປາປຸຓິໍ.

໑໔໖. ‘‘ຊາຕິຍາ ປຎ຺ຈວສ຺ເສນ, ອຣຫຕ຺ຕມປາປຸຓິໍ;

ອຸປສມ຺ປາທຍິ ພຸທ຺ໂຘ, ຄຸຓມຎ຺ຎາຍ ຈກ຺ຂຸມາ.

໑໔໗. ‘‘ປຣິປຸຓ຺ຓານິ ໂຄເປຕ຺ວາ, ປຎ຺ຈສິກ຺ຂາປທານຫໍ;

ອປຣິເມຍ຺ເຍ ອິໂຕ ກປ຺ເປ, ວິນິປາຕໍ ນ ຄຈ຺ຉຫໍ.

໑໔໘. ‘‘ສ຺ວາຫໍ ຍສມນຸຠວິໍ, ເຕສໍ ສີລານ ວາຫສາ;

ກປ຺ປໂກຏິມ຺ປິ ກິຕ຺ເຕນ຺ໂຕ, ກິຕ຺ຕເຍ ເອກເທສກໍ.

໑໔໙. ‘‘ປຎ຺ຈສີລານິ ໂຄເປຕ຺ວາ, ຕໂຍ ເຫຕູ ລຠາມຫໍ;

ທີຆາຍຸໂກ ມຫາໂຠໂຄ, ຕິກ຺ຂປຎ຺ໂຎ ຠວາມຫໍ.

໑໕໐. ‘‘ສໍກິຕ຺ເຕນ຺ໂຕ ຈ [ປກິຕ຺ເຕນ຺ໂຕວ (ສີ.), ປກິຕ຺ເຕນ຺ເຕ ຈ (ສ຺ຍາ.)] ສພ຺ເພສໍ, ອຠິມຕ຺ຕຎ຺ຈ ໂປຣິສໍ;

ຠວາຠເວ ສໍສຣິຕ຺ວາ, ເອເຕ ຐາເນ ລຠາມຫໍ.

໑໕໑. ‘‘ອປຣິເມຍ຺ຍສີເລສຸ, ວຕ຺ຕນ຺ຕາ ຊິນສາວກາ;

ຠເວສຸ ຍທິ ຣຊ຺ເຊຍ຺ຍຸໍ, ວິປາໂກ ກີທິໂສ ຠເວ.

໑໕໒. ‘‘ສຸຈິຓ຺ຓໍ ເມ ປຎ຺ຈສີລໍ, ຠຕເກນ ຕປສ຺ສິນາ [ວິປສ຺ສິນາ (ສີ.)];

ເຕນ ສີເລນຫໍ ອຊ຺ຊ, ໂມຈຍິໍ ສພ຺ພພນ຺ຘນາ.

໑໕໓. ‘‘ອປຣິເມຍ຺ເຍ ອິໂຕ ກປ຺ເປ, ປຎ຺ຈສີລານິ ໂຄປຍິໍ;

ທຸຄ຺ຄຕິໍ ນາຠິຊານາມິ, ປຎ຺ຈສີລານິທໍ ຜລໍ.

໑໕໔. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຎ຺ຈສີລສມາທານິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຎ຺ຈສີລສມາທານິຍຕ຺ເຖຣສ຺ສາປທານໍ ຈຕຸຕ຺ຖໍ.