໒. ອຸປວານຕ຺ເຖຣອປທານໍ

໕໒. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ຊລິຕ຺ວາ ອຄ຺ຄິກ຺ຂນ຺ໂຘວ, ສມ຺ພຸທ຺ໂຘ ປຣິນິພ຺ພຸໂຕ.

໕໓. ‘‘ມຫາຊນາ ສມາຄມ຺ມ, ປູຊຍິຕ຺ວາ ຕຖາຄຕໍ;

ຈິຕໍ ກຕ຺ວານ ສຸກຕໍ, ສຣີຣໍ ອຠິໂຣປຍຸໍ.

໕໔. ‘‘ສຣີຣກິຈ຺ຈໍ ກຕ຺ວານ, ຘາຕຸໍ ຕຕ຺ຖ ສມານຍຸໍ;

ສເທວມານຸສາ ສພ຺ເພ, ພຸທ຺ຘຖູປໍ ອກໍສຸ ເຕ.

໕໕. ‘‘ປຐມາ ກຎ຺ຈນມຍາ, ທຸຕິຍາສິ ມຓີມຍາ;

ຕຕິຍາ ຣູປິຍມຍາ, ຈຕຸຕ຺ຖີ ຜລິກາມຍາ.

໕໖. ‘‘ຕຖາ [ຕຕ຺ຖ (ສ຺ຍາ. ກ.)] ປຎ຺ຈມິຍາ ຠູມິ [ເນມິ (ສີ.)], ໂລຫິຕງ຺ຄມຍາ ອຫຸ;

ຉຏ຺ຐາ ມສາຣຄລ຺ລສ຺ສ, ສພ຺ພຣຕນມຍູປຣິ.

໕໗. ‘‘ຊງ຺ຆາ ມຓິມຍາ ອາສິ, ເວທິກາ ຣຕນມຍາ;

ສພ຺ພໂສຓ຺ຓມໂຍ ຖູໂປ, ອຸທ຺ຘໍ ໂຍຊນມຸຄ຺ຄໂຕ.

໕໘. ‘‘ເທວາ ຕຕ຺ຖ ສມາຄນ຺ຕ຺ວາ, ເອກໂຕ ມນ຺ຕຍຸໍ ຕທາ;

ມຍມ຺ປິ ຖູປໍ ກສ຺ສາມ, ໂລກນາຖສ຺ສ ຕາທິໂນ.

໕໙. ‘‘ຘາຕຸ ອາເວຓິກາ ນຕ຺ຖິ, ສຣີຣໍ ເອກປິຓ຺ຑິຕໍ;

ອິມມ຺ຫິ ພຸທ຺ຘຖູປມ຺ຫິ, ກສ຺ສາມ ກຎ຺ຈຸກໍ ມຍໍ.

໖໐. ‘‘ເທວາ ສຕ຺ຕຫິ ຣຕ຺ເນຫິ [ສຕ຺ຕຣຕເນຫິ (ສີ.)], ອຎ຺ຎໍ ວຑ຺ເຒສຸ ໂຍຊນໍ;

ຖູໂປ ທ຺ວິໂຍຊນຸພ຺ເພໂຘ, ຕິມິຣໍ ພ຺ຍປຫນ຺ຕິ ໂສ.

໖໑. ‘‘ນາຄາ ຕຕ຺ຖ ສມາຄນ຺ຕ຺ວາ, ເອກໂຕ ມນ຺ຕຍຸໍ ຕທາ;

ມນຸສ຺ສາ ເຈວ ເທວາ ຈ, ພຸທ຺ຘຖູປໍ ອກໍສຸ ເຕ.

໖໒. ‘‘ມາ ໂນ ປມຕ຺ຕາ ອສ຺ສຸມ຺ຫ [ອສ຺ສຸມ຺ຫາ (ສີ. ສ຺ຍາ.), ອາສິມ຺ຫາ (?)], ອປ຺ປມຕ຺ຕາ ສເທວກາ;

ມຍມ຺ປິ ຖູປໍ ກສ຺ສາມ, ໂລກນາຖສ຺ສ ຕາທິໂນ.

໖໓. ‘‘ອິນ຺ທນີລໍ ມຫານີລໍ, ອໂຖ ໂຊຕິຣສໍ ມຓິໍ;

ເອກໂຕ ສນ຺ນິປາເຕຕ຺ວາ, ພຸທ຺ຘຖູປໍ ອຉາທຍຸໍ.

໖໔. ‘‘ສພ຺ພໍ ມຓິມຍໍ ອາສິ, ຕາວຕາ ພຸທ຺ຘເຈຕິຍໍ;

ຕິໂຍຊນສມຸພ຺ພິທ຺ຘໍ [ຕີຓິ ໂຍຊນມຸພ຺ພິທ຺ຘໍ (ສີ. ກ.)], ອາໂລກກຣຓໍ ຕທາ.

໖໕. ‘‘ຄຣຸຬາ ຈ ສມາຄນ຺ຕ຺ວາ, ເອກໂຕ ມນ຺ຕຍຸໍ ຕທາ;

ມນຸສ຺ສາ ເທວາ ນາຄາ ຈ, ພຸທ຺ຘຖູປໍ ອກໍສຸ ເຕ.

໖໖. ‘‘‘ມາ ໂນ ປມຕ຺ຕາ ອສ຺ສຸມ຺ຫ, ອປ຺ປມຕ຺ຕາ ສເທວກາ;

ມຍມ຺ປິ ຖູປໍ ກສ຺ສາມ, ໂລກນາຖສ຺ສ ຕາທິໂນ’.

໖໗. ‘‘ສພ຺ພໍ ມຓິມຍໍ ຖູປໍ, ອກຣຸໍ ເຕ ຈ ກຎ຺ຈຸກໍ [ສພ຺ພມຓິມຍໍ ຖູເປ, ອກຣຸຕ຺ຕຣກຎ຺ຈຸກໍ (ສີ.)];

ໂຍຊນໍ ເຕປິ ວຑ຺ເຒສຸໍ, ອາຍຕໍ ພຸທ຺ຘເຈຕິຍໍ.

໖໘. ‘‘ຈຕຸໂຍຊນມຸພ຺ພິທ຺ໂຘ, ພຸທ຺ຘຖູໂປ ວິໂຣຈຕິ;

ໂອຠາເສຕິ ທິສາ ສພ຺ພາ, ສຕຣໍສີວ ອຸຄ຺ຄໂຕ.

໖໙. ‘‘ກຸມ຺ຠຓ຺ຑາ ຈ ສມາຄນ຺ຕ຺ວາ, ເອກໂຕ ມນ຺ຕຍຸໍ ຕທາ;

ມນຸສ຺ສາ ເຈວ ເທວາ ຈ, ນາຄາ ຈ ຄຣຸຬາ ຕຖາ.

ປຈ຺ເຈກໍ ພຸທ຺ຘເສຏ຺ຐສ຺ສ, ອກໍສຸ ຖູປມຸຕ຺ຕມໍ.

໗໐. ‘‘‘ມາ ໂນ ປມຕ຺ຕາ ອສ຺ສຸມ຺ຫ, ອປ຺ປມຕ຺ຕາ ສເທວກາ;

ມຍມ຺ປິ ຖູປໍ ກສ຺ສາມ, ໂລກນາຖສ຺ສ ຕາທິໂນ;

ຣຕເນຫິ ຉາເທສ຺ສາມ, ອາຍຕໍ ພຸທ຺ຘເຈຕິຍໍ’.

໗໑. ‘‘ໂຍຊນໍ ເຕປິ ວຑ຺ເຒສຸໍ, ອາຍຕໍ ພຸທ຺ຘເຈຕິຍໍ;

ປຎ຺ຈໂຍຊນມຸພ຺ພິທ຺ໂຘ, ຖູໂປ ໂອຠາສເຕ ຕທາ.

໗໒. ‘‘ຍກ຺ຂາ ຕຕ຺ຖ ສມາຄນ຺ຕ຺ວາ, ເອກໂຕ ມນ຺ຕຍຸໍ ຕທາ;

ມນຸສ຺ສາ ເທວາ ນາຄາ ຈ, ຄຣຸຬາ ກຸມ຺ຠອຓ຺ຑກາ.

໗໓. ‘‘ປຈ຺ເຈກໍ ພຸທ຺ຘເສຏ຺ຐສ຺ສ, ອກໍສຸ ຖູປມຸຕ຺ຕມໍ;

‘ມາ ໂນ ປມຕ຺ຕາ ອສ຺ສຸມ຺ຫ, ອປ຺ປມຕ຺ຕາ ສເທວກາ.

໗໔. ‘‘‘ມຍມ຺ປິ ຖູປໍ ກສ຺ສາມ, ໂລກນາຖສ຺ສ ຕາທິໂນ;

ຜລິກາຫິ ຉາເທສ຺ສາມ, ອາຍຕໍ ພຸທ຺ຘເຈຕິຍໍ’.

໗໕. ‘‘ໂຍຊນໍ ເຕປິ ວຑ຺ເຒສຸໍ, ອາຍຕໍ ພຸທ຺ຘເຈຕິຍໍ;

ຉ ໂຍຊນານິ ອຸພ຺ພິທ຺ໂຘ, ຖູໂປ ໂອຠາສເຕ ຕທາ.

໗໖. ‘‘ຄນ຺ຘພ຺ພາ ຈ ສມາຄນ຺ຕ຺ວາ, ເອກໂຕ ມນ຺ຕຍຸໍ ຕທາ;

‘ມນຸຊາ ເທວຕາ ນາຄາ, ຄຣຸຬາ ກຸມ຺ຠຍກ຺ຂກາ.

໗໗. ‘‘‘ສພ຺ເພກໍສຸ ພຸທ຺ຘຖູປໍ, ມຍເມຕ຺ຖ ອກາຣກາ;

ມຍມ຺ປິ ຖູປໍ ກສ຺ສາມ, ໂລກນາຖສ຺ສ ຕາທິໂນ’.

໗໘. ‘‘ເວທິໂຍ ສຕ຺ຕ ກຕ຺ວານ, ຉຕ຺ຕມາໂຣປຍິໍສຸ ເຕ;

ສພ຺ພໂສຓ຺ຓມຍໍ ຖູປໍ, ຄນ຺ຘພ຺ພາ ກາຣຍຸໍ ຕທາ.

໗໙. ‘‘ສຕ຺ຕໂຍຊນມຸພ຺ພິທ຺ໂຘ, ຖູໂປ ໂອຠາສເຕ ຕທາ;

ຣຕ຺ຕິນ຺ທິວາ ນ ຎາຍນ຺ຕິ, ອາໂລໂກ ໂຫຕິ [ອາໂລກາ ໂຫນ຺ຕິ (ສ຺ຍາ. ກ.)] ສພ຺ພທາ.

໘໐. ‘‘ອຠິໂຠນ຺ຕິ ນ ຕສ຺ສາຠາ, ຈນ຺ທສູຣາ ສຕາຣກາ;

ສມນ຺ຕາ ໂຍຊນສເຕ, ປທີໂປປິ ນ ປຊ຺ຊລິ.

໘໑. ‘‘ເຕນ ກາເລນ ເຍ ເກຈິ, ຖູປໍ ປູເຊນ຺ຕິ ມານຸສາ;

ນ ເຕ ຖູປມາຣຸຫນ຺ຕິ, ອມ຺ພເຣ ອຸກ຺ຂິປນ຺ຕິ ເຕ.

໘໒. ‘‘ເທເວຫິ ຐປິໂຕ ຍກ຺ໂຂ, ອຠິສມ຺ມຕນາມໂກ;

ຘຊໍ ວາ ປຸປ຺ຜທາມໍ ວາ, ອຠິໂຣເປຕິ ອຸຕ຺ຕຣິ.

໘໓. ‘‘ນ ເຕ ປສ຺ສນ຺ຕິ ຕໍ ຍກ຺ຂໍ, ທາມໍ ປສ຺ສນ຺ຕິ ຄຈ຺ຉໂຕ;

ເອວໍ ປສ຺ສິຕ຺ວາ ຄຈ຺ຉນ຺ຕາ, ສພ຺ເພ ຄຈ຺ຉນ຺ຕິ ສຸຄ຺ຄຕິໍ.

໘໔. ‘‘ວິຣຸທ຺ຘາ [ວິສທ຺ຘາ (ສີ.)] ເຍ ປາວຈເນ, ປສນ຺ນາ ເຍ ຈ ສາສເນ;

ປາຏິເຫຣໍ ທຏ຺ຐຸກາມາ, ຖູປໍ ປູເຊນ຺ຕິ ມານຸສາ.

໘໕. ‘‘ນຄເຣ ຫໍສວຕິຍາ, ອໂຫສິໍ ຠຕໂກ [ວຣໂກ (ສ຺ຍາ. ກ.)] ຕທາ;

ອາໂມທິຕໍ ຊນໍ ທິສ຺ວາ, ເອວໍ ຈິນ຺ເຕສຫໍ ຕທາ.

໘໖. ‘‘‘ອຸຬາໂຣ ຠຄວາ ເຫໂສ, ຍສ຺ສ ຘາຕຸຘເຣທິສໍ;

ອິມາ ຈ ຊນຕາ ຕຸຏ຺ຐາ, ກາຣໍ ກຸພ຺ພໍ ນ ຕປ຺ປເຣ [ກຸພ຺ພນ຺ຕນປ຺ປກໍ (ສີ.)].

໘໗. ‘‘‘ອຫມ຺ປິ ກາຣໍ ກສ຺ສາມິ, ໂລກນາຖສ຺ສ ຕາທິໂນ;

ຕສ຺ສ ຘມ຺ເມສຸ ທາຍາໂທ, ຠວິສ຺ສາມິ ອນາຄເຕ’.

໘໘. ‘‘ສຸໂຘຕໍ ຣຊເກນາຫໍ, ອຸຕ຺ຕເຣຍ຺ຍປຏໍ ມມ;

ເວຬຄ຺ເຄ ອາລເຄຕ຺ວານ, ຘຊໍ ອຸກ຺ຂິປິມມ຺ພເຣ.

໘໙. ‘‘ອຠິສມ຺ມຕໂກ ຄຍ຺ຫ, ອມ຺ພເຣຫາສິ ເມ ຘຊໍ;

ວາເຕຣິຕໍ ຘຊໍ ທິສ຺ວາ, ຠິຍ຺ໂຍ ຫາສໍ ຊເນສຫໍ.

໙໐. ‘‘ຕຕ຺ຖ ຈິຕ຺ຕໍ ປສາເທຕ຺ວາ, ສມຓໍ ອຸປສງ຺ກມິໍ;

ຕໍ ຠິກ຺ຂຸໍ ອຠິວາເທຕ຺ວາ, ວິປາກໍ ປຸຈ຺ຉຫໍ ຘເຊ.

໙໑. ‘‘ໂສ ເມ ກເຖສິ ອານນ຺ທ, ປີຕິສຎ຺ຊນນໍ ມມ;

‘ຕສ຺ສ ຘຊສ຺ສ ວິປາກໍ, ອນຸໂຠສ຺ສສິ ສພ຺ພທາ.

໙໒. ‘‘‘ຫຕ຺ຖີ ອສ຺ສາ ຣຖາ ປຕ຺ຕີ, ເສນາ ຈ ຈຕຸຣງ຺ຄິນີ;

ປຣິວາເຣສ຺ສນ຺ຕິ ຕໍ ນິຈ຺ຈໍ, ຘຊທານສ຺ສິທໍ ຜລໍ.

໙໓. ‘‘‘ສຏ຺ຐິຕູຣິຍສຫສ຺ສານິ, ເຠຣິໂຍ ສມລງ຺ກຕາ;

ປຣິວາເຣສ຺ສນ຺ຕິ ຕໍ ນິຈ຺ຈໍ, ຘຊທານສ຺ສິທໍ ຜລໍ.

໙໔. ‘‘‘ຉຬາສີຕິສຫສ຺ສານິ, ນາຣິໂຍ ສມລງ຺ກຕາ;

ວິຈິຕ຺ຕວຕ຺ຖາຠຣຓາ, ອາມຸຕ຺ຕມຓິກຸຓ຺ຑລາ.

໙໕. ‘‘‘ອຬາຣປມ຺ຫາ ຫສຸລາ, ສຸສຎ຺ຎາ ຕນຸມຊ຺ຌິມາ;

ປຣິວາເຣສ຺ສນ຺ຕິ ຕໍ ນິຈ຺ຈໍ, ຘຊທານສ຺ສິທໍ ຜລໍ.

໙໖. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສສິ;

ອສີຕິກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສສິ.

໙໗. ‘‘‘ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສສິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໙໘. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໙໙. ‘‘‘ເທວໂລກາ ຈວິຕ຺ວານ, ສຸກ຺ກມູເລນ ໂຈທິໂຕ;

ປຸຎ຺ຎກມ຺ເມນ ສໍຍຸຕ຺ໂຕ, ພ຺ຣຫ຺ມພນ຺ຘຸ ຠວິສ຺ສສິ.

໑໐໐. ‘‘‘ອສີຕິໂກຏິໍ ຉຑ຺ເຑຕ຺ວາ, ທາເສ ກມ຺ມກເຣ ພຫູ;

ໂຄຕມສ຺ສ ຠຄວໂຕ, ສາສເນ ປພ຺ພຊິສ຺ສສິ.

໑໐໑. ‘‘‘ອາຣາຘຍິຕ຺ວາ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ອຸປວາໂນຕິ ນາເມນ, ເຫສ຺ສສິ ສຕ຺ຖຸ ສາວໂກ’.

໑໐໒. ‘‘ສຕສຫສ຺ເສ ກຕໍ ກມ຺ມໍ, ຜລໍ ທສ຺ເສສິ ເມ ອິຘ;

ສຸມຸຕ຺ໂຕ ສຣເວໂຄວ ກິເລເສ ຌາປຍີ ມມ.

໑໐໓. ‘‘ຈກ຺ກວຕ຺ຕິສ຺ສ ສນ຺ຕສ຺ສ, ຈຕຸທີປິສ຺ສຣສ຺ສ ເມ;

ຕິໂຍຊນານິ ສມນ຺ຕາ, ອຸສ຺ສີສນ຺ຕິ ຘຊາ ສທາ.

໑໐໔. ‘‘ສຕສຫສ຺ສິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຘຊທານສ຺ສິທໍ ຜລໍ.

໑໐໕. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸປວາໂນ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸປວານຕ຺ເຖຣສ຺ສາປທານໍ ທຸຕິຍໍ.