໑. ສຸຠູຕິຕ຺ເຖຣອປທານໍ

໑. ‘‘ຫິມວນ຺ຕສ຺ສາວິທູເຣ, ນິສໂຠ ນາມ ປພ຺ພໂຕ;

ອສ຺ສໂມ ສຸກໂຕ ມຍ຺ຫໍ, ປຓ຺ຓສາລາ ສຸມາປິຕາ.

໒. ‘‘ໂກສິໂຍ ນາມ ນາເມນ, ຊຏິໂລ ອຸຄ຺ຄຕາປໂນ;

ເອກາກິໂຍ [ເອກາກິໂກ (ກ.)] ອທຸຕິໂຍ, ວສາມິ ນິສເຠ ຕທາ.

໓. ‘‘ຜລໍ ມູລຎ຺ຈ ປຓ຺ຓຎ຺ຈ, ນ ຠຸຎ຺ຊາມິ ອຫໍ ຕທາ;

ປວຕ຺ຕໍວ ສຸປາຕາຫໍ [ປວຕ຺ຕປຓ຺ຑຸປຕ຺ຕານິ (ສີ.)], ອຸປຊີວາມິ ຕາວເທ.

໔. ‘‘ນາຫໍ ໂກເປມິ ອາຊີວໍ, ຈຊມາໂນປິ ຊີວິຕໍ;

ອາຣາເຘມິ ສກໍ ຈິຕ຺ຕໍ, ວິວຊ຺ເຊມິ ອເນສນໍ.

໕. ‘‘ຣາຄູປສໍຫິຕໍ ຈິຕ຺ຕໍ, ຍທາ ອຸປ຺ປຊ຺ຊເຕ ມມ;

ສຍໍວ ປຈ຺ຈເວກ຺ຂາມິ, ເອກຄ຺ໂຄ ຕໍ ທເມມຫໍ.

໖. ‘‘‘ຣຊ຺ຊເສ ຣຊ຺ຊນີເຍ ຈ, ທຸສ຺ສນີເຍ ຈ ທຸສ຺ສເສ;

ມຸຍ຺ຫເສ ໂມຫນີເຍ ຈ, ນິກ຺ຂມສ຺ສຸ ວນາ ຕຸວໍ.

໗. ‘‘‘ວິສຸທ຺ຘານໍ ອຍໍ ວາໂສ, ນິມ຺ມລານໍ ຕປສ຺ສິນໍ;

ມາ ໂຂ ວິສຸທ຺ຘໍ ທູເສສິ, ນິກ຺ຂມສ຺ສຸ ວນາ ຕຸວໍ.

໘. ‘‘‘ອຄາຣິໂກ ຠວິຕ຺ວານ, ຍທາ ປຸຕ຺ຕໍ [ສທາຍຸຕ຺ຕໍ (ສີ.), ຍທາຍຸຕ຺ຕໍ (ສ຺ຍາ.)], ລຠິສ຺ສສິ;

ອຸໂຠປິ ມາ ວິຣາເຘສິ, ນິກ຺ຂມສ຺ສຸ ວນາ ຕຸວໍ.

໙. ‘‘‘ຉວາລາຕໍ ຍຖາ ກຏ຺ຐໍ, ນ ກ຺ວຈິ ກິຈ຺ຈກາຣກໍ;

ເນວ ຄາເມ ອຣຎ຺ເຎ ວາ, ນ ຫິ ຕໍ ກຏ຺ຐສມ຺ມຕໍ.

໑໐. ‘‘‘ຉວາລາຕູປໂມ ຕ຺ວໍສິ, ນ ຄິຫີ ນາປິ ສຎ຺ຎໂຕ;

ອຸຠໂຕ ມຸຕ຺ຕໂກ ອຊ຺ຊ, ນິກ຺ຂມສ຺ສຸ ວນາ ຕຸວໍ.

໑໑. ‘‘‘ສິຍາ ນຸ ໂຂ ຕວ ເອຕໍ, ໂກ ປຊານາຕິ ເຕ ອິທໍ;

ສທ຺ຘາຘຸຣໍ ວຫິສິ [ສທ຺ຘາຘຸຣໍ ຊຫສິ (ສີ.), ສີຆໍ ຘຸຣໍ ວຫິສິ (ສ຺ຍາ.)] ເມ, ໂກສຊ຺ຊພຫຸລາຍ ຈ.

໑໒. ‘‘‘ຊິຄຸຈ຺ຉິສ຺ສນ຺ຕິ ຕໍ ວິຎ຺ຎູ, ອສຸຈິໍ ນາຄຣິໂກ ຍຖາ;

ອາກຑ຺ຒິຕ຺ວານ ອິສໂຍ, ໂຈທຍິສ຺ສນ຺ຕິ ຕໍ ສທາ.

໑໓. ‘‘‘ຕໍ ວິຎ຺ຎູ ປວທິສ຺ສນ຺ຕິ, ສມຕິກ຺ກນ຺ຕສາສນໍ;

ສໍວາສໍ ອລຠນ຺ໂຕ ຫິ, ກຖໍ ຊີວິຫິສິ [ຊີວິສ຺ສສິ (ສີ.)] ຕຸວໍ.

໑໔. ‘‘‘ຕິຘາປຠິນ຺ນໍ ມາຕງ຺ຄໍ, ກຸຎ຺ຊຣໍ ສຏ຺ຐິຫາຍນໍ;

ພລີ ນາໂຄ ອຸປຄນ຺ຕ຺ວາ, ຍູຖາ ນີຫຣເຕ ຄຊໍ.

໑໕. ‘‘‘ຍູຖາ ວິນິສ຺ສໂຏ ສນ຺ໂຕ, ສຸຂໍ ສາຕໍ ນ ວິນ຺ທຕິ;

ທຸກ຺ຂິໂຕ ວິມໂນ ໂຫຕິ, ປຊ຺ຌາຍນ຺ໂຕ ປເວຘຕິ.

໑໖. ‘‘‘ຕເຖວ ຊຏິລາ ຕມ຺ປິ, ນີຫຣິສ຺ສນ຺ຕິ ທຸມ຺ມຕິໍ;

ເຕຫິ ຕ຺ວໍ ນິສ຺ສໂຏ ສນ຺ໂຕ, ສຸຂໍ ສາຕໍ ນ ລຈ຺ຉສິ.

໑໗. ‘‘‘ທິວາ ວາ ຍທິ ວາ ຣຕ຺ຕິໍ, ໂສກສລ຺ລສມປ຺ປິໂຕ;

ຑຍ຺ຫສິ ປຣິຬາເຫນ, ຄໂຊ ຍູຖາວ ນິສ຺ສໂຏ.

໑໘. ‘‘‘ຊາຕຣູປໍ ຍຖາ ກູຏໍ, ເນວ ຌາຍຕິ [ຍາຍຕິ (ສ຺ຍາ.)] ກຕ຺ຖຈິ;

ຕຖາ ສີລວິຫີໂນ ຕ຺ວໍ, ນ ຌາຍິສ຺ສສິ [ຍາຣິສ຺ສຕິ (ສ຺ຍາ.)] ກຕ຺ຖຈິ.

໑໙. ‘‘‘ອຄາຣໍ ວສມາໂນປິ, ກຖໍ ຊີວິຫິສິ ຕຸວໍ;

ມຕ຺ຕິກໍ ເປຕ຺ຕິກຎ຺ຈາປິ, ນຕ຺ຖິ ເຕ ນິຫິຕໍ ຘນໍ.

໒໐. ‘‘‘ສຍໍ ກມ຺ມໍ ກຣິຕ຺ວານ, ຄຕ຺ເຕ ເສທໍ ປໂມຈຍໍ;

ເອວໍ ຊີວິຫິສິ ເຄເຫ, ສາຘຸ ເຕ ຕໍ ນ ຣຸຈ຺ຈຕິ.

໒໑. ‘‘‘ເອວາຫໍ ຕຕ຺ຖ ວາເຣມິ, ສໍກິເລສຄຕໍ ມນໍ;

ນານາຘມ຺ມກຖໍ ກຕ຺ວາ, ປາປາ ຈິຕ຺ຕໍ ນິວາຣຍິໍ’.

໒໒. ‘‘ເອວໍ ເມ ວິຫຣນ຺ຕສ຺ສ, ອປ຺ປມາທວິຫາຣິໂນ;

ຕິໍສວສ຺ສສຫສ຺ສານິ, ວິປິເນ ເມ ອຕິກ຺ກມຸໍ.

໒໓. ‘‘ອປ຺ປມາທຣຕໍ ທິສ຺ວາ, ອຸຕ຺ຕມຕ຺ຖໍ ຄເວສກໍ;

ປທຸມຸຕ຺ຕຣສມ຺ພຸທ຺ໂຘ, ອາຄຈ຺ຉິ ມມ ສນ຺ຕິກໍ.

໒໔. ‘‘ຕິມ຺ພຣູສກວຓ຺ຓາໂຠ, ອປ຺ປເມຍ຺ໂຍ ອນູປໂມ;

ຣູເປນາສທິໂສ ພຸທ຺ໂຘ, ອາກາເສ ຈງ຺ກມີ ຕທາ.

໒໕. ‘‘ສຸຜຸລ຺ໂລ ສາລຣາຊາວ, ວິຊ຺ຊູວພ຺ຠຆນນ຺ຕເຣ;

ຎາເຓນາສທິໂສ ພຸທ຺ໂຘ, ອາກາເສ ຈງ຺ກມີ ຕທາ.

໒໖. ‘‘ສີຫຣາຊາ ວສມ຺ຠີໂຕ [ຉມ຺ຠິໂຕ (ກ.)],

ຄຊຣາຊາວ ທປ຺ປິໂຕ [ທມ຺ມິໂຕ (ກ.)].

ລາສິໂຕ [ອຠີໂຕ (ສ຺ຍາ.)] ພ຺ຍຄ຺ຆຣາຊາວ, ອາກາເສ ຈງ຺ກມີ ຕທາ.

໒໗. ‘‘ສິງ຺ຄີນິກ຺ຂສວຓ຺ຓາໂຠ, ຂທິຣງ຺ຄາຣສນ຺ນິໂຠ;

ມຓິ ຍຖາ ໂຊຕິຣໂສ, ອາກາເສ ຈງ຺ກມີ ຕທາ.

໒໘. ‘‘ວິສຸທ຺ຘເກລາສນິໂຠ, ປຸຓ຺ຓມາເຍວ ຈນ຺ທິມາ;

ມຊ຺ຌນ຺ຫິເກວ [ມຊ຺ຌນ຺ຕິເກວ (ສພ຺ພຕ຺ຖ)] ສູຣິໂຍ, ອາກາເສ ຈງ຺ກມີ ຕທາ.

໒໙. ‘‘ທິສ຺ວາ ນເຠ ຈງ຺ກມນ຺ຕໍ, ເອວໍ ຈິນ຺ເຕສຫໍ ຕທາ;

‘ເທໂວ ນຸ ໂຂ ອຍໍ ສຕ຺ໂຕ, ອຸທາຫຸ ມນຸໂຊ ອຍໍ.

໓໐. ‘‘‘ນ ເມ ສຸໂຕ ວາ ທິຏ຺ໂຐ ວາ, ມຫິຍາ ເອທິໂສ ນໂຣ;

ອປິ ມນ຺ຕປທໍ ອຕ຺ຖິ, ອຍໍ ສຕ຺ຖາ ຠວິສ຺ສຕິ’.

໓໑. ‘‘ເອວາຫໍ ຈິນ຺ຕຍິຕ຺ວານ, ສກໍ ຈິຕ຺ຕໍ ປສາທຍິໍ;

ນານາປຸປ຺ຜຎ຺ຈ ຄນ຺ຘຎ຺ຈ, ສນ຺ນິປາເຕສຫໍ [ສນ຺ນິປາເຕຕ຺ວາຫໍ (ສີ.)] ຕທາ.

໓໒. ‘‘ປຸປ຺ຜາສນໍ ປຎ຺ຎເປຕ຺ວາ, ສາຘຸຈິຕ຺ຕໍ ມໂນຣມໍ;

ນຣສາຣຖິນໍ ອຄ຺ຄໍ, ອິທໍ ວຈນມພ຺ຣວິໍ.

໓໓. ‘‘‘ອິທໍ ເມ ອາສນໍ ວີຣ, ປຎ຺ຎຕ຺ຕໍ ຕວນຸຈ຺ຉວໍ;

ຫາສຍນ຺ໂຕ ມມໍ ຈິຕ຺ຕໍ, ນິສີທ ກຸສຸມາສເນ’.

໓໔. ‘‘ນິສີທິ ຕຕ຺ຖ ຠຄວາ, ອສມ຺ຠີໂຕວ [ອຉມ຺ຠິໂຕວ (ກ.)] ເກສຣີ;

ສຕ຺ຕຣຕ຺ຕິນ຺ທິວໍ ພຸທ຺ໂຘ, ປວເຣ ກຸສຸມາສເນ.

໓໕. ‘‘ນມສ຺ສມາໂນ ອຏ຺ຐາສິໍ, ສຕ຺ຕຣຕ຺ຕິນ຺ທິວໍ ອຫໍ;

ວຸຏ຺ຐຫິຕ຺ວາ ສມາຘິມ຺ຫາ, ສຕ຺ຖາ ໂລເກ ອນຸຕ຺ຕໂຣ;

ມມ ກມ຺ມໍ ປກິຕ຺ເຕນ຺ໂຕ, ອິທໍ ວຈນມພ຺ຣວິ.

໓໖. ‘‘‘ຠາເວຫິ ພຸທ຺ຘານຸສ຺ສຕິໍ, ຠາວນານມນຸຕ຺ຕຣໍ;

ອິມໍ ສຕິໍ ຠາວຍິຕ຺ວາ, ປູຣຍິສ຺ສສິ ມານສໍ.

໓໗. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສສິ;

ອສີຕິກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສສິ;

ສຫສ຺ສກ຺ຂຕ຺ຕຸໍ ຈກ຺ກວຕ຺ຕີ, ຣາຊາ ຣຏ຺ເຐ ຠວິສ຺ສສິ.

໓໘. ‘‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ອນຸໂຠສ຺ສສິ ຕໍ ສພ຺ພໍ, ພຸທ຺ຘານຸສ຺ສຕິຍາ ຜລໍ.

໓໙. ‘‘‘ຠວາຠເວ ສໍສຣນ຺ໂຕ, ມຫາໂຠຄໍ ລຠິສ຺ສສິ;

ໂຠເຄ ເຕ ອູນຕາ ນຕ຺ຖິ, ພຸທ຺ຘານຸສ຺ສຕິຍາ ຜລໍ.

໔໐. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໔໑. ‘‘‘ອສີຕິໂກຏິໍ ຉຑ຺ເຑຕ຺ວາ, ທາເສ ກມ຺ມກເຣ ພຫູ;

ໂຄຕມສ຺ສ ຠຄວໂຕ, ສາສເນ ປພ຺ພຊິສ຺ສສິ.

໔໒. ‘‘‘ອາຣາຘຍິຕ຺ວາ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ສຸຠູຕິ ນາມ ນາເມນ, ເຫສ຺ສຕິ ສຕ຺ຖຸ ສາວໂກ.

໔໓. ‘‘‘ຠິກ຺ຂຸສງ຺ເຆ ນິສີທິຕ຺ວາ, ທກ຺ຂິເຓຍ຺ຍຄຸຓມ຺ຫິ ຕໍ;

ຕຖາຣຓວິຫາເຣ ຈ, ທ຺ວີສຸ ອຄ຺ເຄ ຐເປສ຺ສຕິ’.

໔໔. ‘‘ອິທໍ ວຕ຺ວານ ສມ຺ພຸທ຺ໂຘ, ຊລຊຸຕ຺ຕມນາມໂກ;

ນຠໍ ອພ຺ຠຸຄ຺ຄມີ ວີໂຣ, ຫໍສຣາຊາວ ອມ຺ພເຣ.

໔໕. ‘‘ສາສິໂຕ ໂລກນາເຖນ, ນມສ຺ສິຕ຺ວາ ຕຖາຄຕໍ;

ສທາ ຠາເວມິ ມຸທິໂຕ, ພຸທ຺ຘານຸສ຺ສຕິມຸຕ຺ຕມໍ.

໔໖. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສໍ ອຄຈ຺ຉຫໍ.

໔໗. ‘‘ອສີຕິກ຺ຂຕ຺ຕຸໍ ເທວິນ຺ໂທ, ເທວຣຊ຺ຊມກາຣຍິໍ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ອໂຫສຫໍ.

໔໘. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ອນຸໂຠມິ ສຸສມ຺ປຕ຺ຕິໍ, ພຸທ຺ຘານຸສ຺ສຕິຍາ ຜລໍ.

໔໙. ‘‘ຠວາຠເວ ສໍສຣນ຺ໂຕ, ມຫາໂຠຄໍ ລຠາມຫໍ;

ໂຠເຄ ເມ ອູນຕາ ນຕ຺ຖິ, ພຸທ຺ຘານຸສ຺ສຕິຍາ ຜລໍ.

໕໐. ‘‘ສຕສຫສ຺ສິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘານຸສ຺ສຕິຍາ ຜລໍ.

໕໑. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຸຠູຕິ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຸຠູຕິຕ຺ເຖຣສ຺ສາປທານໍ ປຐມໍ.