໑໐. ປາປນິວາຣິຍຕ຺ເຖຣອປທານໍ

໔໔. ‘‘ຕິສ຺ສສ຺ສ ຕຸ ຠຄວໂຕ, ເທວເທວສ຺ສ ຕາທິໂນ;

ເອກຈ຺ຉຕ຺ຕໍ ມຍາ ທິນ຺ນໍ, ວິປ຺ປສນ຺ເນນ ເຈຕສາ.

໔໕. ‘‘ນິວຸຕໍ ໂຫຕິ ເມ ປາປໍ, ກຸສລສ຺ສຸປສມ຺ປທາ;

ອາກາເສ ຉຕ຺ຕໍ ຘາເຣນ຺ຕິ, ປຸພ຺ພກມ຺ມສ຺ສິທໍ ຜລໍ.

໔໖. ‘‘ຈຣິມໍ ວຕ຺ຕເຕ ມຍ຺ຫໍ, ຠວາ ສພ຺ເພ ສມູຫຕາ;

ຘາເຣມິ ອນ຺ຕິມໍ ເທຫໍ, ສມ຺ມາສມ຺ພຸທ຺ຘສາສເນ.

໔໗. ‘‘ທ຺ເວນວຸເຕ ອິໂຕ ກປ຺ເປ, ຍໍ ຉຕ຺ຕມທທິໍ ຕທາ;

ທຸຄ຺ຄຕິໍ ນາຠິຊານາມິ, ຉຕ຺ຕທານສ຺ສິທໍ ຜລໍ.

໔໘. ‘‘ທ຺ເວສຕ຺ຕຕິມ຺ຫິໂຕ ກປ຺ເປ, ອຏ຺ຐາສິໍສຸ ຊນາຘິປາ;

ມຫານິທານນາເມນ, ຣາຊາໂນ ຈກ຺ກວຕ຺ຕິໂນ.

໔໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປາປນິວາຣິໂຍ [ວາຕາຕປນິວາຣິໂຍ (ສີ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ;

ປາປນິວາຣິຍຕ຺ເຖຣສ຺ສາປທານໍ ທສມໍ.

ກຓິກາຣປຸປ຺ຜິຍວຄ຺ໂຄ ເອກວີສຕິໂມ.