໒໒. ຫຕ຺ຖິວຄ຺ໂຄ

໑. ຫຕ຺ຖິທາຍກຕ຺ເຖຣອປທານໍ

໑. ‘‘ສິທ຺ຘຕ຺ຖສ຺ສ ຠຄວໂຕ, ທ຺ວິປທິນ຺ທສ຺ສ ຕາທິໂນ;

ນາຄເສຏ຺ໂຐ ມຍາ ທິນ຺ໂນ, ອີສາທນ຺ໂຕ ອຸຣູຬ຺ຫວາ.

໒. ‘‘ອຸຕ຺ຕມຕ຺ຖໍ ອນຸໂຠມິ, ສນ຺ຕິປທມນຸຕ຺ຕຣໍ;

ນາຄທານໍ [ອຄ຺ຄທານໍ (ສີ. ກ.)] ມຍາ ທິນ຺ນໍ, ສພ຺ພໂລກຫິເຕສິໂນ.

໓. ‘‘ຈຕຸນ຺ນວຸຕິໂຕ ກປ຺ເປ, ຍໍ ນາຄ [ທານ (ສີ. ກ.)] ມທທິໍ ຕທາ;

ທຸຄ຺ຄຕິໍ ນາຠິຊານາມິ, ນາຄທານສ຺ສິທໍ ຜລໍ.

໔. ‘‘ອຏ຺ຐສຕ຺ຕຕິກປ຺ປມ຺ຫິ, ໂສຬສາສິໍສຸ ຂຕ຺ຕິຍາ;

ສມນ຺ຕປາສາທິກາ ນາມ, ຈກ຺ກວຕ຺ຕີ ມຫພ຺ພລາ.

໕. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຫຕ຺ຖິທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຫຕ຺ຖິທາຍກຕ຺ເຖຣສ຺ສາປທານໍ ປຐມໍ.

໒. ປານຘິທາຍກຕ຺ເຖຣອປທານໍ

໖. ‘‘ອາຣຎ຺ຎິກສ຺ສ ອິສິໂນ, ຈິຣຣຕ຺ຕຕປສ຺ສິໂນ [ຌາຍິໂນ, ເມຕ຺ຕຈິຕ຺ຕຕປສ຺ສິໂນ (ສ຺ຍາ.)];

ພຸທ຺ຘສ຺ສ [ຘມ຺ມສ຺ສ (ສ຺ຍາ. ກ.)] ຠາວິຕຕ຺ຕສ຺ສ, ອທາສິໍ ປານຘິໍ ອຫໍ.

໗. ‘‘ເຕນ ກມ຺ເມນ ທ຺ວິປທິນ຺ທ, ໂລກເຊຏ຺ຐ ນຣາສຠ;

ທິພ຺ພຍານໍ [ສພ຺ພໍ ຍານໍ (ສີ.)] ອນຸໂຠມິ, ປຸພ຺ພກມ຺ມສ຺ສິທໍ ຜລໍ.

໘. ‘‘ຈຕຸນ຺ນວຸເຕ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ປານຘິສ຺ສ ອິທໍ ຜລໍ.

໙. ‘‘ສຕ຺ຕສຕ຺ຕຕິໂຕ ກປ຺ເປ, ອຏ຺ຐ ອາສິໍສຸ ຂຕ຺ຕິຍາ;

ສຸຍານາ ນາມ ນາເມນ, ຈກ຺ກວຕ຺ຕີ ມຫພ຺ພລາ.

໑໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປານຘິທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປານຘິທາຍກຕ຺ເຖຣສ຺ສາປທານໍ ທຸຕິຍໍ.

໓. ສຈ຺ຈສຎ຺ຎກຕ຺ເຖຣອປທານໍ

໑໑. ‘‘ເວສ຺ສຠູ ຕມ຺ຫິ ສມເຍ, ຠິກ຺ຂຸສງ຺ຆປຸຣກ຺ຂໂຕ;

ເທເສຕິ ອຣິຍສຈ຺ຈານິ, ນິພ຺ພາເປນ຺ໂຕ ມຫາຊນໍ.

໑໒. ‘‘ປຣມກາຣຸຎ຺ຎປຕ຺ໂຕມ຺ຫິ, ສມິຕິໍ ອຄມາສຫໍ;

ໂສຫໍ ນິສິນ຺ນໂກ ສນ຺ໂຕ, ຘມ຺ມມສ຺ໂສສິ ສຕ຺ຖຸໂນ.

໑໓. ‘‘ຕສ຺ສາຫໍ ຘມ຺ມໍ ສຸຕ຺ວານ, ເທວໂລກໍ ອຄຈ຺ຉຫໍ;

ຕິໍສກປ຺ປານິ ເທເວສຸ, ອວສິໍ ຕຕ຺ຖຫໍ ປຸເຣ.

໑໔. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ສຈ຺ຈສຎ຺ຎາຍິທໍ ຜລໍ.

໑໕. ‘‘ຉພ຺ພີສມ຺ຫິ ອິໂຕ ກປ຺ເປ, ເອໂກ ອາສິໍ ຊນາຘິໂປ;

ເອກຜຸສິຕນາເມນ, ຈກ຺ກວຕ຺ຕີ ມຫພ຺ພໂລ.

໑໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຈ຺ຈສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຈ຺ຈສຎ຺ຎກຕ຺ເຖຣສ຺ສາປທານໍ ຕຕິຍໍ.

໔. ເອກສຎ຺ຎກຕ຺ເຖຣອປທານໍ

໑໗. ‘‘ທຸມຄ຺ເຄ ປໍສຸກູລິກໍ [ປໍສຸກູລກໍ (?)], ລຄ຺ຄໍ ທິສ຺ວານ ສຕ຺ຖຸໂນ;

ອຎ຺ຊລິໍ ປຄ຺ຄເຫຕ຺ວານ, ປໍສຸກູລໍ ອວນ຺ທຫໍ.

໑໘. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໑໙. ‘‘ປຎ຺ຈວີເສ ອິໂຕ ກປ຺ເປ, ເອໂກ ອາສິໍ ຊນາຘິໂປ;

ອມິຕາໂຠຕິ ນາເມນ, ຈກ຺ກວຕ຺ຕີ ມຫພ຺ພໂລ.

໒໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ເອກສຎ຺ຎກຕ຺ເຖຣສ຺ສາປທານໍ ຈຕຸຕ຺ຖໍ.

໕. ຣໍສິສຎ຺ຎກຕ຺ເຖຣອປທານໍ

໒໑. ‘‘ອຸເທນ຺ຕໍ ສຕຣໍສິໍວ, ປີຕຣໍສິໍວ [ສິຕຣໍສິໍ ວ (ສີ. ສ຺ຍາ.)] ຠາຓຸມໍ;

ພ຺ຍຄ຺ຆູສຠໍວ ປວຣໍ, ສຸຊາຕໍ ປພ຺ພຕນ຺ຕເຣ.

໒໒. ‘‘ພຸທ຺ຘສ຺ສ ອານຸຠາໂວ ໂສ, ຊລເຕ ປພ຺ພຕນ຺ຕເຣ;

ຣໍເສ [ຣໍສ຺ຍາ (?)] ຈິຕ຺ຕໍ ປສາເທຕ຺ວາ, ກປ຺ປໍ ສຄ຺ຄມ຺ຫິ ໂມທຫໍ.

໒໓. ‘‘ອວເສເສສຸ ກປ຺ເປສຸ, ກຸສລໍ ຈຣິຕໍ ມຍາ;

ເຕນ ຈິຕ຺ຕປ຺ປສາເທນ, ພຸທ຺ຘານຸສ຺ສຕິຍາປິ ຈ.

໒໔. ‘‘ຕິໍສກປ຺ປສຫສ຺ເສໂຕ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘສຎ຺ຎາຍິທໍ ຜລໍ.

໒໕. ‘‘ສຕ຺ຕປຎ຺ຎາສກປ຺ປມ຺ຫິ, ເອໂກ ອາສິໍ ຊນາຘິໂປ;

ສຸຊາໂຕ ນາມ ນາເມນ, ຈກ຺ກວຕ຺ຕີ ມຫພ຺ພໂລ.

໒໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຣໍສິສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຣໍສິສຎ຺ຎກຕ຺ເຖຣສ຺ສາປທານໍ ປຎ຺ຈມໍ.

໖. ສນ຺ຘິຕຕ຺ເຖຣອປທານໍ

໒໗. ‘‘ອສ຺ສຕ຺ເຖ ຫຣິໂຕຠາເສ, ສໍວິຣູຬ຺ຫມ຺ຫິ ປາທເປ;

ເອກໍ ພຸທ຺ຘຄຕໍ ສຎ຺ຎໍ, ອລຠິໍຫໍ [ອລຠິສ຺ສໍ (ສີ.)] ປຕິສ຺ສໂຕ.

໒໘. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ຕສ຺ສາ ສຎ຺ຎາຍ ວາຫສາ, ປຕ຺ໂຕ ເມ ອາສວກ຺ຂໂຍ.

໒໙. ‘‘ອິໂຕ ເຕຣສກປ຺ປມ຺ຫິ, ຘນິຏ຺ໂຐ ນາມ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໓໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສນ຺ຘິໂຕ [ສຓ຺ຐິໂຕ (ສີ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສນ຺ຘິຕຕ຺ເຖຣສ຺ສາປທານໍ ຉຏ຺ຐໍ.

໗. ຕາລວຓ຺ຏທາຍກຕ຺ເຖຣອປທານໍ

໓໑. ‘‘ຕາລວຓ຺ຏໍ ມຍາ ທິນ຺ນໍ, ຕິສ຺ສສ຺ສາທິຈ຺ຈພນ຺ຘຸໂນ;

ຄິມ຺ຫນິພ຺ພາປນຕ຺ຖາຍ, ປຣິຬາໂຫປສນ຺ຕິຍາ.

໓໒. ‘‘ສນ຺ນິພ຺ພາເປມິ ຣາຄຄ຺ຄິໍ, ໂທສຄ຺ຄິຎ຺ຈ ຕທຸຕ຺ຕຣິໍ;

ນິພ຺ພາເປມິ ຈ ໂມຫຄ຺ຄິໍ, ຕາລວຓ຺ຏສ຺ສິທໍ ຜລໍ.

໓໓. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ຘາເຣມິ ອນ຺ຕິມໍ ເທຫໍ, ສມ຺ມາສມ຺ພຸທ຺ຘສາສເນ.

໓໔. ‘‘ທ຺ເວນວຸເຕ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຕາລວຓ຺ຏສ຺ສິທໍ ຜລໍ.

໓໕. ‘‘ເຕສຏ຺ຐິມ຺ຫິ ອິໂຕ ກປ຺ເປ, ມຫານາມສນາມໂກ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໓໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕາລວຓ຺ຏທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕາລວຓ຺ຏທາຍກຕ຺ເຖຣສ຺ສາປທານໍ ສຕ຺ຕມໍ.

໘. ອກ຺ກນ຺ຕສຎ຺ຎກຕ຺ເຖຣອປທານໍ

໓໗. ‘‘ກຸສາຏກໍ ຄເຫຕ຺ວານ, ອຸປຊ຺ຌາຍສ຺ສຫໍ ປຸເຣ;

ມນ຺ຕຎ຺ຈ ອນຸສິກ຺ຂາມິ, ຄນ຺ຖາໂທສສ຺ສ [ກຓ຺ຑເຠທສ຺ສ (ສີ.), ຄຓ຺ຑເຠທສ຺ສ (ສ຺ຍາ.)] ປຕ຺ຕິຍາ.

໓໘. ‘‘ອທ຺ທສໍ ວິຣຊໍ ພຸທ຺ຘໍ, ອາຫຸຕີນໍ ປຏິຄ຺ຄຫໍ;

ອຸສຠໍ ປວຣໍ ອຄ຺ຄໍ, ຕິສ຺ສໍ ພຸທ຺ຘໍ ຄຓຸຕ຺ຕມໍ [ຄຊຸຕ຺ຕມໍ (ສ຺ຍາ.)].

໓໙. ‘‘ກຸສາຏກໍ ປຕ຺ຖຣິຕໍ, ອກ຺ກມນ຺ຕໍ ນຣຸຕ຺ຕມໍ;

ສມຸຄ຺ຄຕໍ ມຫາວີຣໍ, ໂລກເຊຏ຺ຐໍ ນຣາສຠໍ.

໔໐. ‘‘ທິສ຺ວາ ຕໍ ໂລກປຊ຺ໂຊຕໍ, ວິມລໍ ຈນ຺ທສນ຺ນິຠໍ;

ອວນ຺ທິໍ ສຕ຺ຖຸໂນ ປາເທ, ວິປ຺ປສນ຺ເນນ ເຈຕສາ.

໔໑. ‘‘ຈຕຸນ຺ນວຸຕິໂຕ ກປ຺ເປ, ຍໍ ອທາສິໍ ກຸສາຏກໍ;

ທຸຄ຺ຄຕິໍ ນາຠິຊານາມິ, ກຸສາຏກສ຺ສິທໍ ຜລໍ.

໔໒. ‘‘ສຕ຺ຕຕິໍເສ ອິໂຕ ກປ຺ເປ, ເອໂກ ອາສິໍ ຊນາຘິໂປ;

ສຸນນ຺ໂທ ນາມ ນາເມນ, ຈກ຺ກວຕ຺ຕີ ມຫພ຺ພໂລ.

໔໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອກ຺ກນ຺ຕສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ;

ອກ຺ກນ຺ຕສຎ຺ຎກຕ຺ເຖຣສ຺ສາປທານໍ ອຏ຺ຐມໍ.

໙. ສປ຺ປິທາຍກຕ຺ເຖຣອປທານໍ

໔໔. ‘‘ນິສິນ຺ໂນ ປາສາທວເຣ, ນາຣີຄຓປຸຣກ຺ຂໂຕ;

ພ຺ຍາຘິຕໍ ສມຓໍ ທິສ຺ວາ, ອຠິນາເມສຫໍ ຆຣໍ.

໔໕. ‘‘ອຸປວິຏ຺ຐໍ ມຫາວີຣໍ, ເທວເທວໍ ນຣາສຠໍ;

ສປ຺ປິເຕລໍ ມຍາ ທິນ຺ນໍ, ສິທ຺ຘຕ຺ຖສ຺ສ ມເຫສິໂນ.

໔໖. ‘‘ປສ຺ສທ຺ຘທຣຖໍ ທິສ຺ວາ, ວິປ຺ປສນ຺ນມຸຂິນ຺ທ຺ຣິຍໍ;

ວນ຺ທິຕ຺ວາ ສຕ຺ຖຸໂນ ປາເທ, ອນຸສໍສາວຍິໍ ປຸເຣ.

໔໗. ‘‘ທິສ຺ວາ ມໍ ສຸປ຺ປສນ຺ນຕ຺ຕໍ [ສຸປ຺ປສນ຺ນນ຺ຕໍ (ສ຺ຍາ. ກ.) ສຸປ຺ປສນ຺ນຈິຕ຺ຕນ຺ຕິ ອຕ຺ໂຖ], ອິທ຺ຘິຍາ ປາຣມິງ຺ຄໂຕ;

ນຠໍ ອພ຺ຠຸຄ຺ຄມີ ຘີໂຣ, ຫໍສຣາຊາວ ອມ຺ພເຣ.

໔໘. ‘‘ຈຕຸນ຺ນວຸຕິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ສປ຺ປິເຕລສ຺ສິທໍ ຜລໍ.

໔໙. ‘‘ອິໂຕ ສຕ຺ຕຣເສ ກປ຺ເປ, ຊຸຕິເທວ [ທຸຕິເທວ (ສ຺ຍາ.), ຕຸຕິເທວ (ກ.)] ສນາມໂກ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໕໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສປ຺ປິທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສປ຺ປິທາຍກຕ຺ເຖຣສ຺ສາປທານໍ ນວມໍ.

໑໐. ປາປນິວາຣິຍຕ຺ເຖຣອປທານໍ

໕໑. ‘‘ປິຍທສ຺ສິສ຺ສ ຠຄວໂຕ, ຈງ຺ກມໍ ໂສຘິຕໍ ມຍາ;

ນຬເກຫິ ປຏິຈ຺ຉນ຺ນໍ, ວາຕາຕປນິວາຣຓໍ.

໕໒. ‘‘ປາປໍ ວິວຊ຺ຊນຕ຺ຖາຍ, ກຸສລສ຺ສຸປສມ຺ປທາ;

ກິເລສານໍ ປຫານາຍ, ປທຫິໍ ສຕ຺ຖຸ ສາສເນ.

໕໓. ‘‘ອິໂຕ ເອກາທເສ ກປ຺ເປ, ອຄ຺ຄິເທໂວຕິ ວິສ຺ສຸໂຕ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

໕໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປາປນິວາຣິໂຍ [ວາຕາຕປນິວາຣິໂຍ (?)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປາປນິວາຣິຍຕ຺ເຖຣສ຺ສາປທານໍ ທສມໍ.

ຫຕ຺ຖິວຄ຺ໂຄ ພາວີສຕິໂມ.