໗. ອຸປເສນວງ຺ຄນ຺ຕປຸຕ຺ຕຕ຺ເຖຣອປທານໍ

໘໖. ‘‘ປທຸມຸຕ຺ຕຣໍ ຠຄວນ຺ຕໍ, ໂລກເຊຏ຺ຐໍ ນຣາສຠໍ;

ປພ຺ຠາຣມ຺ຫິ ນິສີທນ຺ຕໍ, ອຸປຄຈ຺ຉິໍ ນຣຸຕ຺ຕມໍ.

໘໗. ‘‘ກຓິກາຣປຸປ຺ຜໍ [ກຓິກາຣໍ ປຸປ຺ຜິຕໍ (ສີ. ສ຺ຍາ.)] ທິສ຺ວາ, ວຓ຺ເຏ ເຉຕ຺ວານຫໍ ຕທາ;

ອລງ຺ກຣິຕ຺ວາ ຉຕ຺ຕມ຺ຫິ, ພຸທ຺ຘສ຺ສ ອຠິໂຣປຍິໍ.

໘໘. ‘‘ປິຓ຺ຑປາຕຎ຺ຈ ປາທາສິໍ, ປຣມນ຺ນໍ ສຸໂຠຊນໍ;

ພຸທ຺ເຘນ ນວເມ ຕຕ຺ຖ, ສມເຓ ອຏ຺ຐ ໂຠຊຍິໍ.

໘໙. ‘‘ອນຸໂມທິ ມຫາວີໂຣ, ສຍມ຺ຠູ ອຄ຺ຄປຸຄ຺ຄໂລ;

ອິມິນາ ຉຕ຺ຕທາເນນ, ປຣມນ຺ນປເວຈ຺ຉນາ.

໙໐. ‘‘ເຕນ ຈິຕ຺ຕປ຺ປສາເທນ, ສມ຺ປຕ຺ຕິມນຸໂຠສ຺ສສິ;

ຉຕ຺ຕິໍສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ.

໙໑. ‘‘ເອກວີສຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໙໒. ‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ [ຍໍ ວທນ຺ຕິ ສຸເມໂຘຕິ, ຠູຣິປຎ຺ຎໍ ສຸເມຘສໍ; ກປ຺ເປໂຕ ສຕສຫສ຺ເສ, ເອສ ພຸທ຺ໂຘ ຠວິສ຺ສຕິ; (ກ.)].

໙໓. ‘‘ສາສເນ ທິພ຺ພມານມ຺ຫິ, ມນຸສ຺ສຕ຺ຕໍ ຄມິສ຺ສຕິ;

ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ.

໙໔. ‘‘ອຸປເສໂນຕິ ນາເມນ, ເຫສ຺ສຕິ ສຕ຺ຖຸ ສາວໂກ;

[ອິທໍ ປາທທ຺ວຍໍ ເຖຣຄາຖາອຏ຺ຐກຖາຍເມວ ທິສ຺ສຕິ] ສມນ຺ຕປາສາທິກຕ຺ຕາ, ອຄ຺ຄຏ຺ຐາເນ ຐເປສ຺ສຕິ

[ອິທໍ ປາທທ຺ວຍໍ ເຖຣຄາຖາອຏ຺ຐກຖາຍເມວ ທິສ຺ສຕິ].

໙໕. ‘‘ຈຣິມໍ ວຕ຺ຕເຕ ມຍ຺ຫໍ, ຠວາ ສພ຺ເພ ສມູຫຕາ;

ຘາເຣມິ ອນ຺ຕິມໍ ເທຫໍ, ເຊຕ຺ວາ ມາຣໍ ສວາຫນໍ [ສວາຫິນິໍ (?)].

໙໖. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸປເສໂນ ວງ຺ຄນ຺ຕປຸຕ຺ໂຕ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸປເສນວງ຺ຄນ຺ຕປຸຕ຺ຕຕ຺ເຖຣສ຺ສາປທານໍ ສຕ຺ຕມໍ.

ຕຕິຍຠາຓວາຣໍ.