໒. ສີຫາສນິຍວຄ຺ໂຄ

໑. ສີຫາສນທາຍກຕ຺ເຖຣອປທານໍ

໑. ‘‘ນິພ຺ພຸເຕ ໂລກນາຖມ຺ຫິ, ສິທ຺ຘຕ຺ເຖ ທ຺ວິປທຸຕ຺ຕເມ [ທິປທຸຕ຺ຕເມ (ສີ. ສ຺ຍາ.)];

ວິຕ຺ຖາຣິເກ ປາວຈເນ, ພາຫຸຊຎ຺ຎມ຺ຫິ ສາສເນ.

໒. ‘‘ປສນ຺ນຈິຕ຺ໂຕ ສຸມໂນ, ສີຫາສນມກາສຫໍ;

ສີຫາສນໍ ກຣິຕ຺ວານ, ປາທປີຐມກາສຫໍ.

໓. ‘‘ສີຫາສເນ ຈ ວສ຺ສນ຺ເຕ, ຆຣໍ ຕຕ຺ຖ ອກາສຫໍ;

ເຕນ ຈິຕ຺ຕປ຺ປສາເທນ, ຕຸສິຕໍ ອຸປປຊ຺ຊຫໍ.

໔. ‘‘ອາຍາເມນ ຈຕຸພ຺ພີສ, ໂຍຊນໍ ອາສິ [ໂຍຊນາສິໍສຸ (ສ຺ຍາ. ກ.)] ຕາວເທ;

ວິມານໍ ສຸກຕໍ ມຍ຺ຫໍ, ວິຕ຺ຖາເຣນ ຈຕຸທ຺ທສ.

໕. ‘‘ສຕໍ [ສຕ຺ຕ (ສ຺ຍາ.)] ກຎ຺ຎາສຫສ຺ສານິ, ປຣິວາເຣນ຺ຕິ ມໍ ສທາ;

ໂສຓ຺ຓມຍຎ຺ຈ ປລ຺ລງ຺ກໍ, ພ຺ຍມ຺ເຫ ອາສິ ສຸນິມ຺ມິຕໍ.

໖. ‘‘ຫຕ຺ຖິຍານໍ ອສ຺ສຍານໍ, ທິພ຺ພຍານໍ ອຸປຏ຺ຐິຕໍ;

ປາສາທາ ສິວິກາ ເຈວ, ນິພ຺ພຕ຺ຕນ຺ຕິ ຍທິຈ຺ຉກໍ.

໗. ‘‘ມຓິມຍາ ຈ ປລ຺ລງ຺ກາ, ອຎ຺ເຎ ສາຣມຍາ ພຫູ;

ນິພ຺ພຕ຺ຕນ຺ຕິ ມມໍ ສພ຺ເພ, ສີຫາສນສ຺ສິທໍ ຜລໍ.

໘. ‘‘ໂສຓ຺ຓມຍາ ຣູປິມຍາ, ຜລິກາເວຬຸຣິຍາມຍາ;

ປາທຸກາ ອຠິຣູຫາມິ, ປາທປີຐສ຺ສິທໍ ຜລໍ.

໙. ‘‘ຈຕຸນ຺ນວຸຕິໂຕ [ຈຕຸນວຸເຕ ອິໂຕ (ສີ. ສ຺ຍາ.)] ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ປຸຎ຺ຎກມ຺ມສ຺ສິທໍ ຜລໍ.

໑໐. ‘‘ເຕສຕ຺ຕຕິມ຺ຫິໂຕ ກປ຺ເປ, ອິນ຺ທນາມາ ຕໂຍ ຊນາ;

ທ຺ເວສຕ຺ຕຕິມ຺ຫິໂຕ ກປ຺ເປ, ຕໂຍ ສຸມນນາມກາ.

໑໑. ‘‘ສມສຕ຺ຕຕິໂຕ ກປ຺ເປ, ຕໂຍ ວຣຸຓນາມກາ;

ສຕ຺ຕຣຕນສມ຺ປນ຺ນາ, ຈຕຸທີປມ຺ຫິ ອິສ຺ສຣາ.

໑໒. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສີຫາສນທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສີຫາສນທາຍກຕ຺ເຖຣສ຺ສາປທານໍ ປຐມໍ.

໒. ເອກຕ຺ຖມ຺ຠິກຕ຺ເຖຣອປທານໍ

໑໓. ‘‘ສິທ຺ຘຕ຺ຖສ຺ສ ຠຄວໂຕ, ມຫາປູຄຄໂຓ ອຫຸ;

ສຣຓໍ ຄຕາ ຈ ເຕ ພຸທ຺ຘໍ, ສທ຺ທຫນ຺ຕິ ຕຖາຄຕໍ.

໑໔. ‘‘ສພ຺ເພ ສງ຺ຄມ຺ມ ມນ຺ເຕຕ຺ວາ, ມາຬໍ ກຸພ຺ພນ຺ຕິ ສຕ຺ຖຸໂນ;

ເອກຕ຺ຖມ຺ຠໍ ອລຠນ຺ຕາ, ວິຈິນນ຺ຕິ ພ຺ຣຫາວເນ.

໑໕. ‘‘ເຕຫໍ ອຣຎ຺ເຎ ທິສ຺ວານ, ອຸປຄມ຺ມ ຄຓໍ ຕທາ;

ອຎ຺ຊລິໍ ປຄ຺ຄເຫຕ຺ວານ, ປຣິປຸຈ຺ຉິໍ ຄຓໍ ອຫໍ.

໑໖. ‘‘ເຕ ເມ ປຸຏ຺ຐາ ວິຍາກໍສຸ, ສີລວນ຺ໂຕ ອຸປາສກາ;

ມາຬໍ ມຍໍ ກຕ຺ຕຸກາມາ, ເອກຕ຺ຖມ຺ໂຠ ນ ລພ຺ຠຕິ.

໑໗. ‘‘ເອກຕ຺ຖມ຺ຠໍ ມມໍ ເທຖ, ອຫໍ ທສ຺ສາມິ ສຕ຺ຖຸໂນ;

ອາຫຣິສ຺ສາມຫໍ ຖມ຺ຠໍ, ອປ຺ໂປສ຺ສຸກ຺ກາ ຠວນ຺ຕຸ ເຕ [ຠວນ຺ຕຸ ໂວ (ສີ.), ຠວາຖ ໂວ (?)].

໑໘. ‘‘ເຕ ເມ ຖມ຺ຠໍ ປເວຈ຺ຉິໍສຸ, ປສນ຺ນາ ຕຸຏ຺ຐມານສາ;

ຕໂຕ ປຏິນິວຕ຺ຕິຕ຺ວາ, ອຄມໍສຸ ສກໍ ຆຣໍ.

໑໙. ‘‘ອຈິຣໍ ຄເຕ ປູຄຄເຓ, ຖມ຺ຠໍ ອຫາສຫໍ ຕທາ;

ຫຏ຺ໂຐ ຫຏ຺ເຐນ ຈິຕ຺ເຕນ, ປຐມໍ ອຸສ຺ສເປສຫໍ.

໒໐. ‘‘ເຕນ ຈິຕ຺ຕປ຺ປສາເທນ, ວິມານໍ ອຸປປຊ຺ຊຫໍ;

ອຸພ຺ພິທ຺ຘໍ ຠວນໍ ມຍ຺ຫໍ, ສຕ຺ຕຠູມໍ [ສຕຠູມໍ (ສີ. ກ.)] ສມຸຄ຺ຄຕໍ.

໒໑. ‘‘ວຊ຺ຊມານາສຸ ເຠຣີສຸ, ປຣິຈາເຣມຫໍ ສທາ;

ປຎ຺ຈປຎ຺ຎາສກປ຺ປມ຺ຫິ, ຣາຊາ ອາສິໍ ຍໂສຘໂຣ.

໒໒. ‘‘ຕຕ຺ຖາປິ ຠວນໍ ມຍ຺ຫໍ, ສຕ຺ຕຠູມໍ ສມຸຄ຺ຄຕໍ;

ກູຏາຄາຣວຣູເປຕໍ, ເອກຕ຺ຖມ຺ຠໍ ມໂນຣມໍ.

໒໓. ‘‘ເອກວີສຕິກປ຺ປມ຺ຫິ, ອຸເທໂນ ນາມ ຂຕ຺ຕິໂຍ;

ຕຕ຺ຣາປິ ຠວນໍ ມຍ຺ຫໍ, ສຕ຺ຕຠູມໍ ສມຸຄ຺ຄຕໍ.

໒໔. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ອນຸໂຠມິ ສຸຂໍ ສພ຺ພໍ [ສພ຺ພເມຕໍ (ສ຺ຍາ.)], ເອກຕ຺ຖມ຺ຠສ຺ສິທໍ ຜລໍ.

໒໕. ‘‘ຈຕຸນ຺ນວຸຕິໂຕ ກປ຺ເປ, ຍໍ ຖມ຺ຠມທທໍ ຕທາ;

ທຸຄ຺ຄຕິໍ ນາຠິຊານາມິ, ເອກຕ຺ຖມ຺ຠສ຺ສິທໍ ຜລໍ.

໒໖. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກຕ຺ຖມ຺ຠິໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ເອກຕ຺ຖມ຺ຠິກຕ຺ເຖຣສ຺ສາປທານໍ ທຸຕິຍໍ.

໓. ນນ຺ທຕ຺ເຖຣອປທານໍ

໒໗. ‘‘ປທຸມຸຕ຺ຕຣສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ວຕ຺ຖໍ ໂຂມໍ ມຍາ ທິນ຺ນໍ, ສຍມ຺ຠຸສ຺ສ ມເຫສິໂນ.

໒໘. ‘‘ຕໍ ເມ ພຸທ຺ໂຘ ວິຍາກາສິ, ຊລຊຸຕ຺ຕຣນາມໂກ;

‘ອິມິນາ ວຕ຺ຖທາເນນ, ເຫມວຓ຺ໂຓ ຠວິສ຺ສສິ.

໒໙. ‘‘‘ທ຺ເວ ສມ຺ປຕ຺ຕີ ອນຸໂຠຕ຺ວາ, ກຸສລມູເລຫິ ໂຈທິໂຕ;

ໂຄຕມສ຺ສ ຠຄວໂຕ, ກນິຏ຺ໂຐ ຕ຺ວໍ ຠວິສ຺ສສິ.

໓໐. ‘‘‘ຣາຄຣຕ຺ໂຕ ສຸຂສີໂລ, ກາເມສຸ ເຄຘມາຍຸໂຕ;

ພຸທ຺ເຘນ ໂຈທິໂຕ ສນ຺ໂຕ, ຕທາ [ຕໂຕ (ສ຺ຍາ.)] ຕ຺ວໍ ປພ຺ພຊິສ຺ສສິ.

໓໑. ‘‘‘ປພ຺ພຊິຕ຺ວານ ຕ຺ວໍ ຕຕ຺ຖ, ກຸສລມູເລນ ໂຈທິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສສິນາສໂວ’.

໓໒. ‘‘ສຕ຺ຕ [ສຕ (ສ຺ຍາ.)] ກປ຺ປສຫສ຺ສມ຺ຫິ, ຈຕຸໂຣ ເຈຬນາມກາ;

ສຏ຺ຐິ ກປ຺ປສຫສ຺ສມ຺ຫິ, ອຸປເຈລາ ຈຕຸຊ຺ຊນາ.

໓໓. ‘‘ປຎ຺ຈ ກປ຺ປສຫສ຺ສມ຺ຫິ, ເຈຬາວ ຈຕຸໂຣ ຊນາ;

ສຕ຺ຕຣຕນສມ຺ປນ຺ນາ, ຈຕຸທີປມ຺ຫິ ອິສ຺ສຣາ.

໓໔. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນນ຺ໂທ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນນ຺ທຕ຺ເຖຣສ຺ສາປທານໍ ຕຕິຍໍ.

໔. ຈູຬປນ຺ຖກຕ຺ເຖຣອປທານໍ

໓໕. ‘‘ປທຸມຸຕ຺ຕໂຣ ນາມ ຊິໂນ, ອາຫຸຕີນໍ ປຏິຄ຺ຄໂຫ;

ຄຓມ຺ຫາ ວູປກຏ຺ໂຐ ໂສ, ຫິມວນ຺ເຕ ວສີ ຕທາ.

໓໖. ‘‘ອຫມ຺ປິ ຫິມວນ຺ຕມ຺ຫິ, ວສາມິ ອສ຺ສເມ ຕທາ;

ອຈິຣາຄຕໍ ມຫາວີຣໍ, ອຸເປສິໍ ໂລກນາຍກໍ.

໓໗. ‘‘ປຸປ຺ຜຈ຺ຉຕ຺ຕໍ ຄເຫຕ຺ວານ, ອຸປຄຈ຺ຉິໍ ນຣາສຠໍ;

ສມາຘິໍ ສມາປຊ຺ຊນ຺ຕໍ, ອນ຺ຕຣາຍມກາສຫໍ.

໓໘. ‘‘ອຸໂຠ ຫຕ຺ເຖຫິ ປຄ຺ຄຍ຺ຫ, ປຸປ຺ຜຈ຺ຉຕ຺ຕໍ ອທາສຫໍ;

ປຏິຄ຺ຄເຫສິ ຠຄວາ, ປທຸມຸຕ຺ຕໂຣ ມຫາມຸນິ.

໓໙. ‘‘ສພ຺ເພ ເທວາ ອຕ຺ຕມນາ, ຫິມວນ຺ຕໍ ອຸເປນ຺ຕິ ເຕ;

ສາຘຸກາຣໍ ປວຕ຺ເຕສຸໍ, ອນຸໂມທິສ຺ສຕິ ຈກ຺ຂຸມາ.

໔໐. ‘‘ອິທໍ ວຕ຺ວານ ເຕ ເທວາ, ອຸປຄຈ຺ຉຸໍ ນຣຸຕ຺ຕມໍ;

ອາກາເສ ຘາຣຍນ຺ຕສ຺ສ [ຘາຣຍນ຺ຕໍ ເມ (ກ), ຘາຣຍໂຕ ເມ (?)], ປທຸມຈ຺ຉຕ຺ຕມຸຕ຺ຕມໍ.

໔໑. ‘‘ສຕປຕ຺ຕຉຕ຺ຕໍ ປຄ຺ຄຍ຺ຫ, ອທາສິ ຕາປໂສ ມມ;

‘ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໔໒. ‘‘‘ປຎ຺ຈວີສຕິກປ຺ປານິ, ເທວຣຊ຺ຊໍ ກຣິສ຺ສຕິ;

ຈຕຸຕ຺ຕິໍສຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ.

໔໓. ‘‘‘ຍໍ ຍໍ ໂຍນິໍ ສໍສຣຕິ, ເທວຕ຺ຕໍ ອຖ ມານຸສໍ;

ອພ຺ໂຠກາເສ ປຕິຏ຺ຐນ຺ຕໍ, ປທຸມໍ ຘາຣຍິສ຺ສຕິ’.

໔໔. ‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ [ນາເມນ (ສີ. ກ.)], ສຕ຺ຖາ ໂລເກ ຠວິສ຺ສຕິ.

໔໕. ‘‘‘ປກາສິເຕ ປາວຈເນ, ມນຸສ຺ສຕ຺ຕໍ ລຠິສ຺ສຕິ;

ມໂນມຍມ຺ຫິ ກາຍມ຺ຫິ, ອຸຕ຺ຕໂມ ໂສ ຠວິສ຺ສຕິ.

໔໖. ‘‘‘ທ຺ເວ ຠາຕໂຣ ຠວິສ຺ສນ຺ຕິ, ອຸໂຠປິ ປນ຺ຖກວ຺ຫຍາ;

ອນຸໂຠຕ຺ວາ ອຸຕ຺ຕມຕ຺ຖໍ, ໂຊຕຍິສ຺ສນ຺ຕິ ສາສນໍ’.

໔໗. ‘‘ໂສຫໍ ອຏ຺ຐາຣສວສ຺ໂສ [ໂສ ອຏ຺ຐາຣສວສ຺ໂສຫໍ (ສ຺ຍາ.)], ປພ຺ພຊິໍ ອນຄາຣິຍໍ;

ວິເສສາຫໍ ນ ວິນ຺ທາມິ, ສກ຺ຍປຸຕ຺ຕສ຺ສ ສາສເນ.

໔໘. ‘‘ທນ຺ຘາ ມຍ຺ຫໍ ຄຕີ ອາສິ, ປຣິຠູໂຕ ປຸເຣ ອຫຸໍ [ອຫໍ (ສ຺ຍາ.)];

ຠາຕາ ຈ ມໍ ປຓາເມສິ, ຄຈ຺ຉ ທານິ ສກໍ ຆຣໍ.

໔໙. ‘‘ໂສຫໍ ປຓາມິໂຕ ສນ຺ໂຕ, ສງ຺ຆາຣາມສ຺ສ ໂກຏ຺ຐເກ;

ທຸມ຺ມໂນ ຕຕ຺ຖ ອຏ຺ຐາສິໍ, ສາມຎ຺ຎສ຺ມິໍ ອເປກ຺ຂວາ.

໕໐. ‘‘ຠຄວາ ຕຕ຺ຖ [ອເຖຕ຺ຖ ສຕ຺ຖາ (ສີ. ສ຺ຍາ.)] ອາຄຈ຺ຉິ, ສີສໍ ມຍ຺ຫໍ ປຣາມສິ;

ພາຫາຍ ມໍ ຄເຫຕ຺ວານ, ສງ຺ຆາຣາມໍ ປເວສຍິ.

໕໑. ‘‘ອນຸກມ຺ປາຍ ເມ ສຕ຺ຖາ, ອທາສິ ປາທປຸຎ຺ຉນິໍ;

ເອວໍ ສຸທ຺ຘໍ ອຘິຏ຺ເຐຫິ, ເອກມນ຺ຕມຘິຏ຺ຐຫໍ.

໕໒. ‘‘ຫຕ຺ເຖຫິ ຕມຫໍ ຄຍ຺ຫ, ສຣິໍ ໂກກນທໍ ອຫໍ;

ຕຕ຺ຖ ຈິຕ຺ຕໍ ວິມຸຈ຺ຈິ ເມ, ອຣຫຕ຺ຕໍ ອປາປຸຓິໍ.

໕໓. ‘‘ມໂນມເຍສຸ ກາເຍສຸ, ສພ຺ພຕ຺ຖ ປາຣມິໍ ຄໂຕ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໕໔. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຈູຬປນ຺ຖໂກ [ຈຸລ຺ລປນ຺ຖໂກ (ສີ. ສ຺ຍາ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຈູຬປນ຺ຖກຕ຺ເຖຣສ຺ສາປທານໍ ຈຕຸຕ຺ຖໍ.

໕. ປິລິນ຺ທວຈ຺ຉຕ຺ເຖຣອປທານໍ

໕໕. ‘‘ນິພ຺ພຸເຕ ໂລກນາຖມ຺ຫິ, ສຸເມເຘ ອຄ຺ຄປຸຄ຺ຄເລ;

ປສນ຺ນຈິຕ຺ໂຕ ສຸມໂນ, ຖູປປູຊໍ ອກາສຫໍ.

໕໖. ‘‘ເຍ ຈ ຂີຓາສວາ ຕຕ຺ຖ, ຉຬຠິຎ຺ຎາ ມຫິທ຺ຘິກາ;

ເຕຫໍ ຕຕ຺ຖ ສມາເນຕ຺ວາ, ສງ຺ຆຠຕ຺ຕໍ ອກາສຫໍ.

໕໗. ‘‘ສຸເມຘສ຺ສ ຠຄວໂຕ, ອຸປຏ຺ຐາໂກ ຕທາ ອຫຸ;

ສຸເມໂຘ ນາມ ນາເມນ, ອນຸໂມທິຕ຺ຖ ໂສ ຕທາ.

໕໘. ‘‘ເຕນ ຈິຕ຺ຕປ຺ປສາເທນ, ວິມານໍ ອຸປປຊ຺ຊຫໍ;

ຉຬາສີຕິສຫສ຺ສານິ, ອຈ຺ຉຣາໂຍ ຣມິໍສຸ ເມ.

໕໙. ‘‘ມເມວ ອນຸວຕ຺ຕນ຺ຕິ, ສພ຺ພກາເມຫິ ຕາ ສທາ;

ອຎ຺ເຎ ເທເວ ອຠິໂຠມິ, ປຸຎ຺ຎກມ຺ມສ຺ສິທໍ ຜລໍ.

໖໐. ‘‘ປຎ຺ຈວີສຕິກປ຺ປມ຺ຫິ, ວຣຸໂຓ ນາມ ຂຕ຺ຕິໂຍ;

ວິສຸທ຺ຘໂຠຊໂນ [ສຸສຸທ຺ຘໂຠຊໂນ (ສີ.)] ອາສິໍ, ຈກ຺ກວຕ຺ຕີ ອຫໍ ຕທາ.

໖໑. ‘‘ນ ເຕ ພີຊໍ ປວປນ຺ຕິ, ນປິ ນີຍນ຺ຕິ ນງ຺ຄລາ;

ອກຏ຺ຐປາກິມໍ ສາລິໍ, ປຣິຠຸຎ຺ຊນ຺ຕິ ມານຸສາ.

໖໒. ‘‘ຕຕ຺ຖ ຣຊ຺ຊໍ ກຣິຕ຺ວານ, ເທວຕ຺ຕໍ ປຸນ ຄຈ຺ຉຫໍ;

ຕທາປິ ເອທິສາ ມຍ຺ຫໍ, ນິພ຺ພຕ຺ຕາ ໂຠຄສມ຺ປທາ.

໖໓. ‘‘ນ ມໍ ມິຕ຺ຕາ ອມິຕ຺ຕາ ວາ, ຫິໍສນ຺ຕິ ສພ຺ພປາຓິໂນ;

ສພ຺ເພສມ຺ປິ ປິໂຍ ໂຫມິ, ປຸຎ຺ຎກມ຺ມສ຺ສິທໍ ຜລໍ.

໖໔. ‘‘ຕິໍສກປ຺ປສຫສ຺ສມ຺ຫິ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ຄນ຺ຘາເລປສ຺ສິທໍ ຜລໍ.

໖໕. ‘‘ອິມສ຺ມິໍ ຠທ຺ທເກ ກປ຺ເປ, ເອໂກ ອາສິໍ ຊນາຘິໂປ;

ມຫານຸຠາໂວ ຣາຊາຫໍ [ຣາຊີສິ (ສ຺ຍາ. ກ.)], ຈກ຺ກວຕ຺ຕີ ມຫພ຺ພໂລ.

໖໖. ‘‘ໂສຫໍ ປຎ຺ຈສຸ ສີເລສຸ, ຐເປຕ຺ວາ ຊນຕໍ ພຫຸໍ;

ປາເປຕ຺ວາ ສຸຄຕິໍເຍວ, ເທວຕານໍ ປິໂຍ ອຫຸໍ.

໖໗. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປິລິນ຺ທວຈ຺ໂຉ [ປິລິນ຺ທິວຈ຺ໂຉ (ສີ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປິລິນ຺ທວຈ຺ຉຕ຺ເຖຣສ຺ສາປທານໍ ປຎ຺ຈມໍ.