໓. ນນ຺ທຕ຺ເຖຣອປທານໍ

໒໗. ‘‘ປທຸມຸຕ຺ຕຣສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ວຕ຺ຖໍ ໂຂມໍ ມຍາ ທິນ຺ນໍ, ສຍມ຺ຠຸສ຺ສ ມເຫສິໂນ.

໒໘. ‘‘ຕໍ ເມ ພຸທ຺ໂຘ ວິຍາກາສິ, ຊລຊຸຕ຺ຕຣນາມໂກ;

‘ອິມິນາ ວຕ຺ຖທາເນນ, ເຫມວຓ຺ໂຓ ຠວິສ຺ສສິ.

໒໙. ‘‘‘ທ຺ເວ ສມ຺ປຕ຺ຕີ ອນຸໂຠຕ຺ວາ, ກຸສລມູເລຫິ ໂຈທິໂຕ;

ໂຄຕມສ຺ສ ຠຄວໂຕ, ກນິຏ຺ໂຐ ຕ຺ວໍ ຠວິສ຺ສສິ.

໓໐. ‘‘‘ຣາຄຣຕ຺ໂຕ ສຸຂສີໂລ, ກາເມສຸ ເຄຘມາຍຸໂຕ;

ພຸທ຺ເຘນ ໂຈທິໂຕ ສນ຺ໂຕ, ຕທາ [ຕໂຕ (ສ຺ຍາ.)] ຕ຺ວໍ ປພ຺ພຊິສ຺ສສິ.

໓໑. ‘‘‘ປພ຺ພຊິຕ຺ວານ ຕ຺ວໍ ຕຕ຺ຖ, ກຸສລມູເລນ ໂຈທິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສສິນາສໂວ’.

໓໒. ‘‘ສຕ຺ຕ [ສຕ (ສ຺ຍາ.)] ກປ຺ປສຫສ຺ສມ຺ຫິ, ຈຕຸໂຣ ເຈຬນາມກາ;

ສຏ຺ຐິ ກປ຺ປສຫສ຺ສມ຺ຫິ, ອຸປເຈລາ ຈຕຸຊ຺ຊນາ.

໓໓. ‘‘ປຎ຺ຈ ກປ຺ປສຫສ຺ສມ຺ຫິ, ເຈຬາວ ຈຕຸໂຣ ຊນາ;

ສຕ຺ຕຣຕນສມ຺ປນ຺ນາ, ຈຕຸທີປມ຺ຫິ ອິສ຺ສຣາ.

໓໔. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນນ຺ໂທ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນນ຺ທຕ຺ເຖຣສ຺ສາປທານໍ ຕຕິຍໍ.