໑໐. ສຸມງ຺ຄລຕ຺ເຖຣອປທານໍ

໑໒໔. ‘‘ອາຫຸຕິໍ ຍິຏ຺ຐຸກາໂມຫໍ, ປຏິຍາເທຕ຺ວານ ໂຠຊນໍ;

ພ຺ຣາຫ຺ມເຓ ປຏິມາເນນ຺ໂຕ, ວິສາເລ ມາຬເກ ຐິໂຕ.

໑໒໕. ‘‘ອຖທ຺ທສາສິໍ ສມ຺ພຸທ຺ຘໍ, ປິຍທສ຺ສິໍ ມຫາຍສໍ;

ສພ຺ພໂລກວິເນຕາຣໍ, ສຍມ຺ຠຸໍ ອຄ຺ຄປຸຄ຺ຄລໍ.

໑໒໖. ‘‘ຠຄວນ຺ຕໍ ຊຸຕິມນ຺ຕໍ, ສາວເກຫິ ປຸຣກ຺ຂຕໍ;

ອາທິຈ຺ຈມິວ ໂຣຈນ຺ຕໍ, ຣຖິຍໍ ປຏິປນ຺ນກໍ.

໑໒໗. ‘‘ອຎ຺ຊລິໍ ປຄ຺ຄເຫຕ຺ວານ, ສກໍ ຈິຕ຺ຕໍ ປສາທຍິໍ;

ມນສາວ ນິມນ຺ເຕສິໍ, ‘ອາຄຈ຺ຉຕຸ ມຫາມຸນິ’.

໑໒໘. ‘‘ມມ ສງ຺ກປ຺ປມຎ຺ຎາຍ, ສຕ຺ຖາ ໂລເກ ອນຸຕ຺ຕໂຣ;

ຂີຓາສວສຫສ຺ເສຫິ, ມມ ທ຺ວາຣໍ ອຸປາຄມິ.

໑໒໙. ‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ປາສາທໍ ອຠິຣູຫິຕ຺ວາ, ສີຫາສເນ ນິສີທຕໍ [ນິສີທ ຕ຺ວໍ (ສີ.)].

໑໓໐. ‘‘ທນ຺ໂຕ ທນ຺ຕປຣິວາໂຣ, ຕິຓ຺ໂຓ ຕາຣຍຕໍ ວໂຣ;

ປາສາທໍ ອຠິຣູຫິຕ຺ວາ, ນິສີທິ ປວຣາສເນ.

໑໓໑. ‘‘ຍໍ ເມ ອຕ຺ຖິ ສເກ ເຄເຫ, ອາມິສໍ ປຈ຺ຈຸປຏ຺ຐິຕໍ;

ຕາຫໍ ພຸທ຺ຘສ຺ສ ປາທາສິໍ, ປສນ຺ໂນ ເສຫິ ປາຓິຠິ.

໑໓໒. ‘‘ປສນ຺ນຈິຕ຺ໂຕ ສຸມໂນ, ເວທຊາໂຕ ກຕຎ຺ຊລີ;

ພຸທ຺ຘເສຏ຺ຐໍ ນມສ຺ສາມິ, ອໂຫ ພຸທ຺ຘສ຺ສຸຬາຣຕາ.

໑໓໓. ‘‘ອຏ຺ຐນ຺ນໍ ປຍິຣູປາສຕໍ, ຠຸຎ຺ຊໍ ຂີຓາສວາ ພຫູ;

ຕຸຍ຺ເຫເວໂສ ອານຸຠາໂວ, ສຣຓໍ ຕໍ ອຸເປມຫໍ.

໑໓໔. ‘‘ປິຍທສ຺ສີ ຈ ຠຄວາ, ໂລກເຊຏ຺ໂຐ ນຣາສໂຠ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໑໓໕. ‘‘‘ໂຍ ໂສ ສງ຺ຆໍ ອໂຠເຊສິ, ອຸຊຸຠູຕໍ ສມາຫິຕໍ;

ຕຖາຄຕຎ຺ຈ ສມ຺ພຸທ຺ຘໍ, ສຸຓາຖ ມມ ຠາສໂຕ.

໑໓໖. ‘‘‘ສຕ຺ຕວີສຕິກ຺ຂຕ຺ຕຸໍ ໂສ, ເທວຣຊ຺ຊໍ ກຣິສ຺ສຕິ;

ສກກມ຺ມາຠິຣທ຺ໂຘ ໂສ, ເທວໂລເກ ຣມິສ຺ສຕິ.

໑໓໗. ‘‘‘ທສ ອຏ຺ຐ ຈກ຺ຂຕ຺ຕຸໍ [ທສຎ຺ຈຏ຺ຐກ຺ຂຕ຺ຖຸໍ (ສີ.), ທສ ຈຏ຺ຐກ຺ຂຕ຺ຕຸໍ (ສ຺ຍາ.)] ໂສ, ຈກ຺ກວຕ຺ຕີ ຠວິສ຺ສຕິ;

ປຖພ຺ຍາ ຣຊ຺ຊໍ ປຎ຺ຈສຕໍ, ວສຸຘໍ ອາວສິສ຺ສຕິ’.

໑໓໘. ‘‘ອຣຎ຺ຎວນໂມຄ຺ຄຍ຺ຫ, ການນໍ ພ຺ຍຄ຺ຆເສວິຕໍ;

ປຘານໍ ປທຫິຕ຺ວານ, ກິເລສາ ຌາປິຕາ ມຍາ.

໑໓໙. ‘‘ອຏ຺ຐາຣເສ ກປ຺ປສເຕ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ຠຕ຺ຕທານສ຺ສິທໍ ຜລໍ.

໑໔໐. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຸມງ຺ຄໂລ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຸມງ຺ຄລຕ຺ເຖຣສ຺ສາປທານໍ ທສມໍ.

ຕສ຺ສຸທ຺ທານໍ –

ສີຫາສນີ ເອກຖມ຺ຠີ, ນນ຺ໂທ ຈ ຈູຬປນ຺ຖໂກ;

ປິລິນ຺ທຣາຫຸໂລ ເຈວ, ວງ຺ຄນ຺ໂຕ ຣຏ຺ຐປາລໂກ.

ໂສປາໂກ ມງ຺ຄໂລ ເຈວ, ທເສວ ທຸຕິເຍ ວຄ຺ເຄ;

ສຕຎ຺ຈ ອຏ຺ຐຕິໍສ ຈ, ຄາຖາ ເຈຕ຺ຖ ປກາສິຕາ.

ສີຫາສນິຍວຄ຺ໂຄ ທຸຕິໂຍ.