໑໐. ຊາຕິປູຊກຕ຺ເຖຣອປທານໍ

໘໒. ‘‘ຊາຍນ຺ຕສ຺ສ ວິປສ຺ສິສ຺ສ, ອາໂລໂກ ວິປຸໂລ ອຫຸ;

ປຖວີ ຈ ປກມ຺ປິຕ຺ຖ, ສສາຄຣາ ສປພ຺ພຕາ.

໘໓. ‘‘ເນມິຕ຺ຕາ ຈ ວິຍາກໍສຸ, ພຸທ຺ໂຘ ໂລເກ ຠວິສ຺ສຕິ;

ອຄ຺ໂຄ ຈ ສພ຺ພສຕ຺ຕານໍ, ຊນຕໍ ອຸທ຺ຘຣິສ຺ສຕິ.

໘໔. ‘‘ເນມິຕ຺ຕານໍ ສຸຓິຕ຺ວານ, ຊາຕິປູຊມກາສຫໍ;

ເອທິສາ ປູຊນາ ນຕ຺ຖິ, ຍາທິສາ ຊາຕິປູຊນາ.

໘໕. ‘‘ສງ຺ຂຣິຕ຺ວານ [ສໍຫຣິຕ຺ວານ (ສີ. ສ຺ຍາ.), ສງ຺ກຣິຕ຺ວານ (ກ.)]

ກຸສລໍ, ສກໍ ຈິຕ຺ຕໍ ປສາທຍິໍ.

ຊາຕິປູຊໍ ກຣິຕ຺ວານ, ຕຕ຺ຖ ກາລງ຺ກໂຕ ອຫໍ.

໘໖. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ສພ຺ເພ ສຕ຺ເຕ ອຠິໂຠມິ, ຊາຕິປູຊາຍິທໍ ຜລໍ.

໘໗. ‘‘ຘາຕິໂຍ ມໍ ອຸປຏ຺ຐນ຺ຕິ, ມມ ຈິຕ຺ຕວສານຸຄາ;

ນ ຕາ ສກ຺ໂກນ຺ຕິ ໂກເປຕຸໍ, ຊາຕິປູຊາຍິທໍ ຜລໍ.

໘໘. ‘‘ເອກນວຸຕິໂຕ ກປ຺ເປ, ຍໍ ປູຊມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຊາຕິປູຊາຍິທໍ ຜລໍ.

໘໙. ‘‘ສຸປາຣິຈຣິຍາ ນາມ, ຈຕຸຕ຺ຕິໍສ ຊນາຘິປາ;

ອິໂຕ ຕຕິຍກປ຺ປມ຺ຫິ, ຈກ຺ກວຕ຺ຕີ ມຫພ຺ພລາ.

໙໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຊາຕິປູຊໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຊາຕິປູຊກຕ຺ເຖຣສ຺ສາປທານໍ ທສມໍ.

ມຫາປຣິວາຣວຄ຺ໂຄ ທ຺ວາທສໂມ.