໑໒. ມຫາປຣິວາຣວຄ຺ໂຄ

໑. ມຫາປຣິວາຣກຕ຺ເຖຣອປທານໍ

໑. ‘‘ວິປສ຺ສີ ນາມ ຠຄວາ, ໂລກເຊຏ຺ໂຐ ນຣາສໂຠ;

ອຏ຺ຐສຏ຺ຐິສຫສ຺ເສຫິ, ປາວິສິ ພນ຺ຘຸມໍ ຕທາ.

໒. ‘‘ນຄຣາ ອຠິນິກ຺ຂມ຺ມ, ອຄມໍ ທີປເຈຕິຍໍ;

ອທ຺ທສໍ ວິຣຊໍ ພຸທ຺ຘໍ, ອາຫຸຕີນໍ ປຏິຄ຺ຄຫໍ.

໓. ‘‘ຈຸລ຺ລາສີຕິສຫສ຺ສານິ, ຍກ຺ຂາ ມຍ຺ຫໍ ອຸປນ຺ຕິເກ;

ອຸປຏ຺ຐຫນ຺ຕິ ສກ຺ກຈ຺ຈໍ [ມໍ ນິຈ຺ຈໍ (ກ.)], ອິນ຺ທໍວ ຕິທສາ ຄຓາ.

໔. ‘‘ຠວນາ ອຠິນິກ຺ຂມ຺ມ, ທຸສ຺ສໍ ປຄ຺ຄຍ຺ຫຫໍ ຕທາ;

ສິຣສາ ອຠິວາເທສິໍ, ຕຎ຺ຈາທາສິໍ ມເຫສິໂນ.

໕. ‘‘ອໂຫ ພຸທ຺ໂຘ ອໂຫ ຘມ຺ໂມ, ອໂຫ ໂນ ສຕ຺ຖຸ ສມ຺ປທາ;

ພຸທ຺ຘສ຺ສ ອານຸຠາເວນ, ວສຸຘາຍໍ ປກມ຺ປຖ.

໖. ‘‘ຕຎ຺ຈ ອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ພຸທ຺ເຘ ຈິຕ຺ຕໍ ປສາເທມິ, ທ຺ວິປທິນ຺ທມ຺ຫິ ຕາທິເນ.

໗. ‘‘ໂສຫໍ ຈິຕ຺ຕໍ ປສາເທຕ຺ວາ, ທຸສ຺ສໍ ທຕ຺ວານ ສຕ຺ຖຸໂນ;

ສຣຓຎ຺ຈ ອຸປາຄຈ຺ຉິໍ, ສາມຈ຺ໂຈ ສປຣິຊ຺ຊໂນ.

໘. ‘‘ເອກນວຸຕິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໙. ‘‘ອິໂຕ ປນ຺ນຣເສ ກປ຺ເປ, ໂສຬສາສຸໍ ສຸວາຫນາ [ໂສຬສາສິໍສຸ ວາຫໂນ (ສ຺ຍາ.)];

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໑໐. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຫາປຣິວາຣໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຫາປຣິວາຣກຕ຺ເຖຣສ຺ສາປທານໍ ປຐມໍ.

໒. ສຸມງ຺ຄລຕ຺ເຖຣອປທານໍ

໑໑. ‘‘ອຕ຺ຖທສ຺ສີ ຊິນວໂຣ, ໂລກເຊຏ຺ໂຐ ນຣາສໂຠ;

ວິຫາຣາ ອຠິນິກ຺ຂມ຺ມ, ຕຬາກໍ ອຸປສງ຺ກມິ.

໑໒. ‘‘ນ຺ຫຕ຺ວາ ປິຕ຺ວາ ຈ ສມ຺ພຸທ຺ໂຘ, ອຸຕ຺ຕຣິຕ຺ເວກຈີວໂຣ;

ອຏ຺ຐາສິ ຠຄວາ ຕຕ຺ຖ, ວິໂລເກນ຺ໂຕ ທິໂສທິສໍ.

໑໓. ‘‘ຠວເນ ອຸປວິຏ຺ໂຐຫໍ, ອທ຺ທສໍ ໂລກນາຍກໍ;

ຫຏ຺ໂຐ ຫຏ຺ເຐນ ຈິຕ຺ເຕນ, ອປ຺ໂຜເຏສິໍ ອຫໍ ຕທາ.

໑໔. ‘‘ສຕຣໍສິໍວ ໂຊຕນ຺ຕໍ, ປຠາສນ຺ຕໍວ ກຎ຺ຈນໍ [ອິມິນາ ປາທທ຺ວເຍນ ປຸຣິມປາທທ຺ວຍສ຺ສ ປຸຣໂຕ ຠວິຕພ຺ພໍ];

ນຈ຺ຈຄີເຕ ປຍຸຕ຺ໂຕຫໍ, ປຎ຺ຈງ຺ຄຕູຣິຍມ຺ຫິ ຈ.

໑໕. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ສພ຺ເພ ສຕ຺ເຕ ອຠິໂຠມິ, ວິປຸໂລ ໂຫຕິ ເມ ຍໂສ [ອຍຎ຺ຈ ຄາຖາ ປຣິຄ຺ຄເຫຕິຄາຖາຍ ອນນ຺ຕຣເມວ ຐາຕຸໍ ຍຸຕ຺ຕາ].

໑໖. ‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ອຕ຺ຕານໍ ໂຕສຍິຕ຺ວານ, ປເຣ ໂຕເສສິ ຕ຺ວໍ ມຸນິ.

໑໗. ‘‘ປຣິຄ຺ຄເຫ [ປຣິຄ຺ຄຍ຺ຫ (ສີ.), ປຣິຄ຺ຄຫິຕ຺ວາ (ສ຺ຍາ.), ປຣິຄ຺ຄເຫນ (ກ.)] ນິສີທິຕ຺ວາ, ຫາສໍ ກຕ຺ວານ ສຸພ຺ພເຕ;

ອຸປຏ຺ຐຫິຕ຺ວາ ສມ຺ພຸທ຺ຘໍ, ຕຸສິຕໍ ອຸປປຊ຺ຊຫໍ.

໑໘. ‘‘ໂສຬເສໂຕ ກປ຺ປສເຕ, ທ຺ວິນວເອກຈິນ຺ຕິຕາ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໑໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຸມງ຺ຄໂລ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຸມງ຺ຄລຕ຺ເຖຣສ຺ສາປທານໍ ທຸຕິຍໍ.

໓. ສຣຓຄມນິຍຕ຺ເຖຣອປທານໍ

໒໐. ‘‘ອຸຠິນ຺ນໍ ເທວຣາຊູນໍ, ສງ຺ຄາໂມ ສມຸປຏ຺ຐິໂຕ;

ອໂຫສິ ສມຸປພ຺ຍູຬ຺ໂຫ [ສມຸປພ຺ພູຬ຺ໂຫ (ສີ.)], ມຫາໂຆໂສ ອວຕ຺ຕຖ [ປວຕ຺ຕຖ (ສີ.)].

໒໑. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ອນ຺ຕລິກ຺ເຂ ຐິໂຕ ສຕ຺ຖາ, ສໍເວເຊສິ ມຫາຊນໍ.

໒໒. ‘‘ສພ຺ເພ ເທວາ ອຕ຺ຕມນາ, ນິກ຺ຂິຕ຺ຕກວຈາວຸຘາ;

ສມ຺ພຸທ຺ຘໍ ອຠິວາເທຕ຺ວາ, ເອກຄ຺ຄາສິໍສຸ ຕາວເທ.

໒໓. ‘‘ມຍ຺ຫໍ [ອມ຺ຫໍ (ສີ.)] ສງ຺ກປ຺ປມຎ຺ຎາຍ, ວາຈາສຠິມຸທີຣຍິ;

ອນຸກມ຺ປໂກ ໂລກວິທູ, ນິພ຺ພາເປສິ ມຫາຊນໍ.

໒໔. ‘‘ປທຸຏ຺ຐຈິຕ຺ໂຕ ມນຸໂຊ, ເອກປາຓໍ ວິເຫຐຍໍ;

ເຕນ ຈິຕ຺ຕປ຺ປໂທເສນ, ອປາຍໍ ອຸປປຊ຺ຊຕິ.

໒໕. ‘‘ສງ຺ຄາມສີເສ ນາໂຄວ, ພຫູ ປາເຓ ວິເຫຐຍໍ;

ນິພ຺ພາເປຖ ສກໍ ຈິຕ຺ຕໍ, ມາ ຫຎ຺ຎິຕ຺ໂຖ ປຸນປ຺ປຸນໍ.

໒໖. ‘‘ທ຺ວິນ຺ນມ຺ປິ ຍກ຺ຂຣາຊູນໍ, ເສນາ ສາ ວິມ຺ຫິຕາ ອຫຸ [ເສນາໂຍ ວິມ຺ຫິຕາ ອຫູ (ສີ.), ເສນາປິ ສມິຕາ ອຫຸ (ສ຺ຍາ.)];

ສຣຓຎ຺ຈ ອຸປາຄຈ຺ຉຸໍ, ໂລກເຊຏ຺ຐໍ ສຸຕາທິນໍ.

໒໗. ‘‘ສຎ຺ຎາເປຕ຺ວານ ຊນຕໍ, ປທມຸທ຺ຘຣິ [ອຸທ຺ຘຣິ ປນ (ສີ. ສ຺ຍາ.)] ຈກ຺ຂຸມາ;

ເປກ຺ຂມາໂນວ ເທເວຫິ, ປກ຺ກາມິ ອຸຕ຺ຕຣາມຸໂຂ.

໒໘. ‘‘ປຐມໍ ສຣຓໍ ຄຈ຺ຉິໍ, ທ຺ວິປທິນ຺ທສ຺ສ ຕາທິໂນ;

ກປ຺ປານໍ ສຕສຫສ຺ສໍ, ທຸຄ຺ຄຕິໍ ນຸປປຊ຺ຊຫໍ.

໒໙. ‘‘ມຫາທຸນ຺ທຸຠິນາມາ ຈ, ໂສຬສາສຸໍ ຣເຖສຠາ;

ຕິໍສກປ຺ປສຫສ຺ສມ຺ຫິ, ຣາຊາໂນ ຈກ຺ກວຕ຺ຕິໂນ.

໓໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຣຓຄມນິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຣຓຄມນິຍຕ຺ເຖຣສ຺ສາປທານໍ ຕຕິຍໍ.

໔. ເອກາສນິຍຕ຺ເຖຣອປທານໍ

໓໑. ‘‘ວຣຸໂຓ ນາມ ນາເມນ, ເທວຣາຊາ ອຫໍ ຕທາ;

ອຸປຏ຺ຐເຫສິໍ ສມ຺ພຸທ຺ຘໍ, ສໂຍຄ຺ຄພລວາຫໂນ.

໓໒. ‘‘ນິພ຺ພຸເຕ ໂລກນາຖມ຺ຫິ, ອຕ຺ຖທສ຺ສີນຣຸຕ຺ຕເມ;

ຕູຣິຍໍ ສພ຺ພມາທາຍ, ອຄມໍ ໂພຘິມຸຕ຺ຕມໍ.

໓໓. ‘‘ວາທິເຕນ ຈ ນຈ຺ເຈນ, ສມ຺ມຕາຬສມາຫິໂຕ;

ສມ຺ມຸຂາ ວິຍ ສມ຺ພຸທ຺ຘໍ, ອຸປຏ຺ຐິໍ ໂພຘິມຸຕ຺ຕມໍ.

໓໔. ‘‘ອຸປຏ຺ຐຫິຕ຺ວາ ຕໍ ໂພຘິໍ, ຘຣຓີຣຸຫປາທປໍ;

ປລ຺ລງ຺ກໍ ອາຠຸຊິຕ຺ວານ, ຕຕ຺ຖ ກາລງ຺ກໂຕ ອຫໍ.

໓໕. ‘‘ສກກມ຺ມາຠິຣທ຺ໂຘຫໍ, ປສນ຺ໂນ ໂພຘິມຸຕ຺ຕເມ;

ເຕນ ຈິຕ຺ຕປ຺ປສາເທນ, ນິມ຺ມານໍ ອຸປປຊ຺ຊຫໍ.

໓໖. ‘‘ສຏ຺ຐິຕູຣິຍສຫສ຺ສານິ, ປຣິວາເຣນ຺ຕິ ມໍ ສທາ;

ມນຸສ຺ເສສຸ ຈ ເທເວສຸ, ວຕ຺ຕມານໍ ຠວາຠເວ.

໓໗. ‘‘ຕິວິຘຄ຺ຄີ ນິພ຺ພຸຕາ ມຍ຺ຫໍ, ຠວາ ສພ຺ເພ ສມູຫຕາ;

ຘາເຣມິ ອນ຺ຕິມໍ ເທຫໍ, ສມ຺ມາສມ຺ພຸທ຺ຘສາສເນ [ອຍຎ຺ຈ ຄາຖາ ປຏິສມ຺ຠິທາ ຈຕສ຺ເສຕິຄາຖາຍ ເອກສມ຺ພນ຺ຘາ ຠວິຕໍ ຍຸຕ຺ຕາ].

໓໘. ‘‘ສຸພາຫູ ນາມ ນາເມນ, ຈຕຸຕ຺ຕິໍສາສຸ ຂຕ຺ຕິຍາ;

ສຕ຺ຕຣຕນສມ຺ປນ຺ນາ, ປຎ຺ຈກປ຺ປສເຕ ອິໂຕ.

໓໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກາສນິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ເອກາສນິຍຕ຺ເຖຣສ຺ສາປທານໍ ຈຕຸຕ຺ຖໍ.

໕. ສຸວຓ຺ຓປຸປ຺ຜິຍຕ຺ເຖຣອປທານໍ

໔໐. ‘‘ວິປສ຺ສີ ນາມ ຠຄວາ, ໂລກເຊຏ຺ໂຐ ນຣາສໂຠ;

ນິສິນ຺ໂນ ຊນກາຍສ຺ສ, ເທເສສິ ອມຕໍ ປທໍ.

໔໑. ‘‘ຕສ຺ສາຫໍ ຘມ຺ມໍ ສຸຕ຺ວານ, ທ຺ວິປທິນ຺ທສ຺ສ ຕາທິໂນ;

ໂສຓ຺ຓປຸປ຺ຜານິ ຈຕ຺ຕາຣິ, ພຸທ຺ຘສ຺ສ ອຠິໂຣປຍິໍ.

໔໒. ‘‘ສຸວຓ຺ຓຈ຺ຉທນໍ ອາສິ, ຍາວຕາ ປຣິສາ ຕທາ;

ພຸທ຺ຘາຠາ ຈ ສຸວຓ຺ຓາຠາ, ອາໂລໂກ ວິປຸໂລ ອຫຸ.

໔໓. ‘‘ອຸທຄ຺ຄຈິຕ຺ໂຕ ສຸມໂນ, ເວທຊາໂຕ ກຕຎ຺ຊລີ;

ວິຕ຺ຕິສຎ຺ຊນໂນ ເຕສໍ, ທິຏ຺ຐຘມ຺ມສຸຂາວໂຫ.

໔໔. ‘‘ອາຍາຈິຕ຺ວານ ສມ຺ພຸທ຺ຘໍ, ວນ຺ທິຕ຺ວານ ຈ ສຸພ຺ພຕໍ;

ປາໂມຊ຺ຊໍ ຊນຍິຕ຺ວານ, ສກໍ ຠວນຸປາຄມິໍ.

໔໕. ‘‘ຠວເນ ອຸປວິຏ຺ໂຐຫໍ, ພຸທ຺ຘເສຏ຺ຐໍ ອນຸສ຺ສຣິໍ;

ເຕນ ຈິຕ຺ຕປ຺ປສາເທນ, ຕຸສິຕໍ ອຸປປຊ຺ຊຫໍ.

໔໖. ‘‘ເອກນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໔໗. ‘‘ໂສຬສາສິໍສຸ ຣາຊາໂນ, ເນມິສມ຺ມຕນາມກາ;

ເຕຕາລີເສ ອິໂຕ ກປ຺ເປ, ຈກ຺ກວຕ຺ຕີ ມຫພ຺ພລາ.

໔໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຸວຓ຺ຓປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຸວຓ຺ຓປຸປ຺ຜິຍຕ຺ເຖຣສ຺ສາປທານໍ ປຎ຺ຈມໍ.

໖. ຈິຕກປູຊກຕ຺ເຖຣອປທານໍ

໔໙. ‘‘ວສາມິ ຣາຊາຍຕເນ, ສາມຈ຺ໂຈ ສປຣິຊ຺ຊໂນ;

ປຣິນິພ຺ພຸເຕ ຠຄວຕິ, ສິຂິໂນ ໂລກພນ຺ຘຸໂນ.

໕໐. ‘‘ປສນ຺ນຈິຕ຺ໂຕ ສຸມໂນ, ຈິຕກໍ ອຄມາສຫໍ;

ຕູຣິຍໍ ຕຕ຺ຖ ວາເທຕ຺ວາ, ຄນ຺ຘມາລໍ ສໂມກິຣິໍ.

໕໑. ‘‘ຈິຕມ຺ຫິ ປູຊໍ ກຕ຺ວານ, ວນ຺ທິຕ຺ວາ ຈິຕກໍ ອຫໍ;

ປສນ຺ນຈິຕ຺ໂຕ ສຸມໂນ, ສກໍ ຠວນຸປາຄມິໍ.

໕໒. ‘‘ຠວເນ ອຸປວິຏ຺ໂຐຫໍ, ຈິຕປູຊໍ ອນຸສ຺ສຣິໍ;

ເຕນ ກມ຺ເມນ ທ຺ວິປທິນ຺ທ, ໂລກເຊຏ຺ຐ ນຣາສຠ.

໕໓. ‘‘ອນຸໂຠຕ຺ວານ ສມ຺ປຕ຺ຕິໍ, ເທເວສຸ ມານຸເສສຸ ຈ;

ປຕ຺ໂຕມ຺ຫິ ອຈລໍ ຐານໍ, ຫິຕ຺ວາ ຊຍປຣາຊຍໍ.

໕໔. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ຈິຕປູຊາຍິທໍ ຜລໍ.

໕໕. ‘‘ເອກູນຕິໍສກປ຺ປມ຺ຫິ, ອິໂຕ ໂສຬສ ຣາຊາໂນ;

ອຸຄ຺ຄຕາ ນາມ ນາເມນ, ຈກ຺ກວຕ຺ຕີ ມຫພ຺ພລາ.

໕໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຈິຕກປູຊໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຈິຕກປູຊກຕ຺ເຖຣສ຺ສາປທານໍ ຉຏ຺ຐໍ.

໗. ພຸທ຺ຘສຎ຺ຎກຕ຺ເຖຣອປທານໍ

໕໗. ‘‘ຍທາ ວິປສ຺ສີ ໂລກຄ຺ໂຄ, ອາຍຸສງ຺ຂາຣໂມສ຺ສຊິ;

ປຖວີ ສມ຺ປກມ຺ປິຕ຺ຖ, ເມທນີ ຊລເມຂລາ.

໕໘. ‘‘ໂອຕຕໍ ວິຕ຺ຖຕໍ [ໂອຕຕໍ ວິຕຕໍ (ສ຺ຍາ.)] ມຍ຺ຫໍ, ສຸວິຈິຕ຺ຕວຏໍສກໍ [ສຸຈິຈິຕ຺ຕໍ ປປຎ຺ຈກໍ (ສ຺ຍາ.)];

ຠວນມ຺ປິ ປກມ຺ປິຕ຺ຖ, ພຸທ຺ຘສ຺ສ ອາຍຸສງ຺ຂເຍ.

໕໙. ‘‘ຕາໂສ ມຍ຺ຫໍ ສມຸປ຺ປນ຺ໂນ, ຠວເນ ສມ຺ປກມ຺ປິເຕ;

ອຸປ຺ປາໂທ [ອຸປ຺ປາໂຕ (?)] ນຸ ກິມຕ຺ຖາຍ, ອາໂລໂກ ວິປຸໂລ ອຫຸ.

໖໐. ‘‘ເວສ຺ສວໂຓ ອິຘາຄມ຺ມ, ນິພ຺ພາເປສິ ມຫາຊນໍ;

ປາຓຠູເຕ [ປາຓຠຸຕໍ (ສ຺ຍາ.), ປາຓຠູນໍ (ສີ. ກ.)] ຠຍໍ ນຕ຺ຖິ, ເອກຄ຺ຄາ ໂຫຖ ສໍວຸຕາ [ສຄາຣວາ (ສ຺ຍາ.)].

໖໑. ‘‘ອໂຫ ພຸທ຺ໂຘ ອໂຫ ຘມ຺ໂມ, ອໂຫ ໂນ ສຕ຺ຖຸ ສມ຺ປທາ;

ຍສ຺ມິໍ ອຸປ຺ປຊ຺ຊມານມ຺ຫິ, ປຖວີ [ປຐວີ (ສີ. ສ຺ຍາ.)] ສມ຺ປກມ຺ປຕິ.

໖໒. ‘‘ພຸທ຺ຘານຸຠາວໍ ກິຕ຺ເຕຕ຺ວາ, ກປ຺ປໍ ສຄ຺ຄມ຺ຫິ ໂມທຫໍ;

ອວເສເສສຸ ກປ຺ເປສຸ, ກຸສລໍ ຈຣິຕໍ [ກຣິຕໍ (ສີ. ສ຺ຍາ.), ກາຣິຕໍ (ກ.)] ມຍາ.

໖໓. ‘‘ເອກນວຸຕິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘສຎ຺ຎາຍິທໍ ຜລໍ.

໖໔. ‘‘ອິໂຕ ຈຸທ຺ທສກປ຺ປມ຺ຫິ, ຣາຊາ ອາສິໍ ປຕາປວາ;

ສມິໂຕ ນາມ ນາເມນ, ຈກ຺ກວຕ຺ຕີ ມຫພ຺ພໂລ.

໖໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ພຸທ຺ຘສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ພຸທ຺ຘສຎ຺ຎກຕ຺ເຖຣສ຺ສາປທານໍ ສຕ຺ຕມໍ.

໘. ມຄ຺ຄສຎ຺ຎກຕ຺ເຖຣອປທານໍ

໖໖. ‘‘ປທຸມຸຕ຺ຕຣພຸທ຺ຘສ຺ສ, ສາວກາ ວນຈາຣິໂນ;

ວິປ຺ປນຏ຺ຐາ ພ຺ຣຫາຣຎ຺ເຎ, ອນ຺ຘາວ ອນຸສຸຍ຺ຍເຣ [ອນຸສຸຍເຣ (ສີ.)].

໖໗. ‘‘ອນຸສ຺ສຣິຕ຺ວາ ສມ຺ພຸທ຺ຘໍ, ປທຸມຸຕ຺ຕຣນາຍກໍ;