໗. ນຬມາລິຍຕ຺ເຖຣອປທານໍ

໓໖. ‘‘ປທຸມຸຕ຺ຕຣພຸທ຺ຘສ຺ສ, ໂລກເຊຏ຺ຐສ຺ສ ຕາທິໂນ;

ຕິຓຕ຺ຖເຣ ນິສິນ຺ນສ຺ສ, ອຸປສນ຺ຕສ຺ສ ຕາທິໂນ.

໓໗. ‘‘ນຬມາລໍ ຄເຫຕ຺ວານ, ພນ຺ຘິຕ຺ວາ [ພີຊິຕ຺ວາ (ກ.)] ພີຊນິໍ ອຫໍ;

ພຸທ຺ຘສ຺ສ ອຸປນາເມສິໍ, ທ຺ວິປທິນ຺ທສ຺ສ ຕາທິໂນ.

໓໘. ‘‘ປຏິຄ຺ຄເຫຕ຺ວາ ສພ຺ພຎ຺ຎູ, ພີຊນິໍ ໂລກນາຍໂກ;

ມມ ສງ຺ກປ຺ປມຎ຺ຎາຍ, ອິມໍ ຄາຖໍ ອຠາສຖ.

໓໙. ‘‘‘ຍຖາ ເມ ກາໂຍ ນິພ຺ພາຕິ, ປຣິຬາໂຫ ນ ວິຊ຺ຊຕິ;

ຕເຖວ ຕິວິຘຄ຺ຄີຫິ, ຈິຕ຺ຕໍ ຕວ ວິມຸຈ຺ຈຕຸ’.

໔໐. ‘‘ສພ຺ເພ ເທວາ ສມາຄຈ຺ຉຸໍ, ເຍ ເກຈິ ວນນິສ຺ສິຕາ;

ໂສສ຺ສາມ ພຸທ຺ຘວຈນໍ, ຫາສຍນ຺ຕຎ຺ຈ ທາຍກໍ.

໔໑. ‘‘ນິສິນ຺ໂນ ຠຄວາ ຕຕ຺ຖ, ເທວສງ຺ຆປຸຣກ຺ຂໂຕ;

ທາຍກໍ ສມ຺ປຫໍເສນ຺ໂຕ, ອິມາ ຄາຖາ ອຠາສຖ.

໔໒. ‘‘‘ອິມິນາ ພີຊນິທາເນນ, ຈິຕ຺ຕສ຺ສ ປຓິຘີຫິ ຈ;

ສຸພ຺ພໂຕ ນາມ ນາເມນ, ຈກ຺ກວຕ຺ຕີ ຠວິສ຺ສຕິ.

໔໓. ‘‘‘ເຕນ ກມ຺ມາວເສເສນ, ສຸກ຺ກມູເລນ ໂຈທິໂຕ;

ມາລຸໂຕ ນາມ ນາເມນ, ຈກ຺ກວຕ຺ຕີ ຠວິສ຺ສຕິ’.

໔໔. ‘‘‘ອິມິນາ ພີຊນິທາເນນ, ສມ຺ມານວິປຸເລນ ຈ;

ກປ຺ປສຕສຫສ຺ສມ຺ປິ, ທຸຄ຺ຄຕິໍ ນຸປປຊ຺ຊຕິ.

໔໕. ‘‘ຕິໍສກປ຺ປສຫສ຺ສມ຺ຫິ, ສຸພ຺ພຕາ ອຏ຺ຐຕິໍສ ເຕ;

ເອກູນຕິໍສສຫສ຺ເສ, ອຏ຺ຐ ມາລຸຕນາມກາ.

໔໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນຬມາລິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນຬມາລິຍຕ຺ເຖຣສ຺ສາປທານໍ ສຕ຺ຕມໍ.

ສຕ຺ຕມຠາຓວາຣໍ.