໓-໗. ອຎ຺ຎາສິໂກຓ຺ຑຎ຺ຎຕ຺ເຖຣອປທານໍ

໕໙໖. ‘‘ປທຸມຸຕ຺ຕຣສມ຺ພຸທ຺ຘໍ, ໂລກເຊຏ຺ຐໍ ວິນາຍກໍ;

ພຸທ຺ຘຠູມິມນຸປ຺ປຕ຺ຕໍ, ປຐມໍ ອທ຺ທສໍ ອຫໍ.

໕໙໗. ‘‘ຍາວຕາ ໂພຘິຍາ ມູເລ, ຍກ຺ຂາ ສພ຺ເພ ສມາຄຕາ;

ສມ຺ພຸທ຺ຘໍ ປຣິວາເຣຕ຺ວາ, ວນ຺ທນ຺ຕິ ປຎ຺ຊລີກຕາ.

໕໙໘. ‘‘ສພ຺ເພ ເທວາ ຕຸຏ຺ຐມນາ, ອາກາເສ ສຎ຺ຈຣນ຺ຕິ ເຕ;

ພຸທ຺ໂຘ ອຍໍ ອນຸປ຺ປຕ຺ໂຕ, ອນ຺ຘກາຣຕໂມນຸໂທ.

໕໙໙. ‘‘ເຕສໍ ຫາສປເຣຕານໍ, ມຫານາໂທ ອວຕ຺ຕຖ;

ກິເລເສ ຌາປຍິສ຺ສາມ, ສມ຺ມາສມ຺ພຸທ຺ຘສາສເນ.

໖໐໐. ‘‘ເທວານໍ ຄິຣມຎ຺ຎາຍ, ວາຈາສຠິມຸທີຣິຫໍ;

ຫຏ຺ໂຐ ຫຏ຺ເຐນ ຈິຕ຺ເຕນ, ອາທິຠິກ຺ຂມທາສຫໍ.

໖໐໑. ‘‘ມມ ສງ຺ກປ຺ປມຎ຺ຎາຍ, ສຕ຺ຖາ ໂລເກ ອນຸຕ຺ຕໂຣ;

ເທວສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໖໐໒. ‘‘‘ສຕ຺ຕາຫໍ ອຠິນິກ຺ຂມ຺ມ, ໂພຘິໍ ອຊ຺ຌຄມໍ ອຫໍ;

ອິທໍ ເມ ປຐມໍ ຠຕ຺ຕໍ, ພ຺ຣຫ຺ມຈາຣິສ຺ສ ຍາປນໍ.

໖໐໓. ‘‘‘ຕຸສິຕາ ຫິ ອິຘາຄນ຺ຕ຺ວາ, ໂຍ ເມ ຠິກ຺ຂໍ ອຸປານຍິ;

ຕມຫໍ ກິຕ຺ຕຍິສ຺ສາມິ, ສຸໂຓຖ ມມ ຠາສໂຕ.

໖໐໔. ‘‘‘ຕິໍສກປ຺ປສຫສ຺ສານິ [ຕິໍສມຕ຺ເຕ ກປ຺ປສຄສ຺ເສ (ສ຺ຍາ. ກ.)], ເທວຣຊ຺ຊໍ ກຣິສ຺ສຕິ;

ສພ຺ເພ ເທເວ ອຠິໂຠຕ຺ວາ, ຕິທິວໍ ອາວສິສ຺ສຕິ.

໖໐໕. ‘‘‘ເທວໂລກາ ຈວິຕ຺ວານ, ມນຸສ຺ສຕ຺ຕໍ ຄມິສ຺ສຕິ;

ສຫສ຺ສຘາ ຈກ຺ກວຕ຺ຕີ, ຕຕ຺ຖ ຣຊ຺ຊໍ ກຣິສ຺ສຕິ.

໖໐໖. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໖໐໗. ‘‘‘ຕິທສາ ໂສ ຈວິຕ຺ວານ, ມນຸສ຺ສຕ຺ຕໍ ຄມິສ຺ສຕິ;

ອຄາຣາ ປພ຺ພຊິຕ຺ວານ, ຉພ຺ພສ຺ສານິ ວສິສ຺ສຕິ.

໖໐໘. ‘‘‘ຕໂຕ ສຕ຺ຕມເກ ວສ຺ເສ, ພຸທ຺ໂຘ ສຈ຺ຈໍ ກເຖສ຺ສຕິ;

ໂກຓ຺ຑຎ຺ໂຎ ນາມ ນາເມນ, ປຐມໍ ສຈ຺ຉິກາຫິຕິ’.

໖໐໙. ‘‘ນິກ຺ຂນ຺ເຕນານຸປພ຺ພຊິໍ, ປຘານໍ ສຸກຕໍ ມຍາ;

ກິເລເສ ຌາປນຕ຺ຖາຍ, ປພ຺ພຊິໍ ອນຄາຣິຍໍ.

໖໑໐. ‘‘ອຠິຄນ຺ຕ຺ວານ ສພ຺ພຎ຺ຎູ, ພຸທ຺ໂຘ ໂລເກ ສເທວເກ;

ອິສິນາເມ ມິຄາຣຎ຺ເຎ [ອິມິນາ ເມ ມຫາຣຎ຺ຎໍ (ສ຺ຍາ.), ອິມິນາ ເມ ມິຄາຣຎ຺ຎໍ (ກ.)], ອມຕເຠຣິມາຫນິ.

໖໑໑. ‘‘ໂສ ທານິ ປຕ຺ໂຕ ອມຕໍ, ສນ຺ຕິປທມນຸຕ຺ຕຣໍ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໖໑໒. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຎ຺ຎາສິໂກຓ຺ຑຎ຺ໂຎ [ອຎ຺ຎາຕໂກຓ຺ຑຎ຺ໂຎ (ສີ.), ອຎ຺ຎາ ໂກຓ຺ຑຎ຺ໂຎ (ສ຺ຍາ.)] ເຖໂຣ ອິມາ

ຄາຖາໂຍ ອຠາສິຕ຺ຖາຕິ.

ອຎ຺ຎາສິໂກຓ຺ຑຎ຺ຎຕ຺ເຖຣສ຺ສາປທານໍ ສຕ຺ຕມໍ.