໓-໘. ປິຓ຺ໂຑລຠາຣທ຺ວາຊຕ຺ເຖຣອປທານໍ

໖໑໓. ‘‘ປທຸມຸຕ຺ຕໂຣ ນາມ ຊິໂນ, ສຍມ຺ຠູ ອຄ຺ຄປຸຄ຺ຄໂລ;

ປຸຣໂຕ ຫິມວນ຺ຕສ຺ສ, ຈິຕ຺ຕກູເຏ ວສີ ຕທາ.

໖໑໔. ‘‘ອຠີຕຣູໂປ ຕຕ຺ຖາສິໍ, ມິຄຣາຊາ ຈຕຸກ຺ກໂມ;

ຕສ຺ສ ສທ຺ທໍ ສຸຓິຕ຺ວານ, ວິກ຺ຂມ຺ຠນ຺ຕິ ພຫຸຊ຺ຊນາ.

໖໑໕. ‘‘ສຸຜຸລ຺ລໍ ປທຸມໍ ຄຍ຺ຫ, ອຸປຄຈ຺ຉິໍ ນຣາສຠໍ;

ວຸຏ຺ຐິຕສ຺ສ ສມາຘິມ຺ຫາ, ພຸທ຺ຘສ຺ສ ອຠິໂຣປຍິໍ.

໖໑໖. ‘‘ຈາຕຸທ຺ທິສໍ ນມສ຺ສິຕ຺ວາ, ພຸທ຺ຘເສຏ຺ຐໍ ນຣຸຕ຺ຕມໍ;

ສກໍ ຈິຕ຺ຕໍ ປສາເທຕ຺ວາ, ສີຫນາທໍ ນທິໍ ອຫໍ [ຕທາ (ສ຺ຍາ.)].

໖໑໗. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ສກາສເນ ນິສີທິຕ຺ວາ, ອິມາ ຄາຖາ ອຠາສຖ.

໖໑໘. ‘‘‘ພຸທ຺ຘສ຺ສ ຄິຣມຎ຺ຎາຍ, ສພ຺ເພ ເທວາ ສມາຄຕາ;

ອາຄໂຕ ວທຕໍ ເສຏ຺ໂຐ, ຘມ຺ມໍ ໂສສ຺ສາມ ຕໍ ມຍໍ.

໖໑໙. ‘‘‘ເຕສໍ ຫາສປເຣຕານໍ, ປຸຣໂຕ ໂລກນາຍໂກ;

ມມ ສທ຺ທໍ [ກມ຺ມໍ (?)] ປກິຕ຺ເຕສິ, ທີຆທສ຺ສີ ມຫາມຸນິ’.

໖໒໐. ‘‘ເຍນິທໍ ປທຸມໍ ທິນ຺ນໍ, ສີຫນາໂທ ຈ ນາທິໂຕ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໖໒໑. ‘‘‘ອິໂຕ ອຏ຺ຐມເກ ກປ຺ເປ, ຈກ຺ກວຕ຺ຕີ ຠວິສ຺ສຕິ;

ສຕ຺ຕຣຕນສມ຺ປນ຺ໂນ ຈຕຸທີປມ຺ຫິ ອິສ຺ສໂຣ.

໖໒໒. ‘‘‘ກາຣຍິສ຺ສຕິ ອິສ຺ສຣິຍໍ [ອິສ຺ສຣໍ (ສ຺ຍາ. ກ.)], ມຫິຍາ ຈຕຸສຏ຺ຐິຍາ;

ປທຸໂມ ນາມ ນາເມນ, ຈກ຺ກວຕ຺ຕີ ມຫພ຺ພໂລ.

໖໒໓. ‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໖໒໔. ‘ປກາສິເຕ ປາວຈເນ, ພ຺ຣຫ຺ມພນ຺ຘຸ ຠວິສ຺ສຕິ;

ພ຺ຣຫ຺ມຎ຺ຎາ ອຠິນິກ຺ຂມ຺ມ, ປພ຺ພຊິສ຺ສຕິ ຕາວເທ’.

໖໒໕. ‘‘ປຘານປຫິຕຕ຺ໂຕ ໂສ, ອຸປສນ຺ໂຕ ນິຣູປຘິ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

໖໒໖. ‘‘ວິຊເນ ປນ຺ຕເສຍ຺ຍມ຺ຫິ, ວາຬມິຄສມາກຸເລ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

໖໒໗. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປິຓ຺ໂຑລຠາຣທ຺ວາໂຊ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປິຓ຺ໂຑລຠາຣທ຺ວາຊຕ຺ເຖຣສ຺ສາປທານໍ ອຏ຺ຐມໍ.