໓-໖. ອຸປາລິຕ຺ເຖຣອປທານໍ

໔໔໑. ‘‘ນຄເຣ ຫໍສວຕິຍາ, ສຸຊາໂຕ ນາມ ພ຺ຣາຫ຺ມໂຓ;

ອສີຕິໂກຏິນິຈໂຍ, ປຫູຕຘນຘຎ຺ຎວາ.

໔໔໒. ‘‘ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ;

ລກ຺ຂເຓ ອິຕິຫາເສ ຈ, ສຘມ຺ເມ ປາຣມິໍ ຄໂຕ.

໔໔໓. ‘‘ປຣິພ຺ພາຊາ ເອກສິຂາ [ເອກຠິກ຺ຂາ (ກ.)], ໂຄຕມາ

ພຸທ຺ຘສາວກາ [ສພ຺ພຕ຺ຖປິ ເອວເມວ ທິສ຺ສຕິ].

ຈຣກາ ຕາປສາ ເຈວ, ຈຣນ຺ຕິ ມຫິຍາ ຕທາ.

໔໔໔. ‘‘ເຕປິ ມໍ ປຣິວາເຣນ຺ຕິ, ພ຺ຣາຫ຺ມໂຓ ວິສ຺ສຸໂຕ ອິຕິ;

ພຫຸຊ຺ຊໂນ ມໍ ປູເຊຕິ, ນາຫໍ ປູເຊມິ ກິຎ຺ຈນໍ.

໔໔໕. ‘‘ປູຊາຣຫໍ ນ ປສ຺ສາມິ, ມານຕ຺ຖທ຺ໂຘ ອຫໍ ຕທາ;

ພຸທ຺ໂຘຕິ ວຈນໍ ນຕ຺ຖິ, ຕາວ ນຸປ຺ປຊ຺ຊເຕ ຊິໂນ.

໔໔໖. ‘‘ອຈ຺ຈເຍນ ອໂຫຣຕ຺ຕໍ, ປທຸມຸຕ຺ຕຣນາມໂກ [ນາຍໂກ (ສີ. ສ຺ຍາ.)];

ສພ຺ພໍ ຕມໍ ວິໂນເທຕ຺ວາ, ໂລເກ ອຸປ຺ປຊ຺ຊິ ຈກ຺ຂຸມາ.

໔໔໗. ‘‘ວິຕ຺ຖາຣິເກ ພາຫຸຊຎ຺ເຎ, ປຸຖຸຠູເຕ ຈ ສາສເນ;

ອຸປາຄມິ ຕທາ ພຸທ຺ໂຘ, ນຄຣໍ ຫໍສສວ຺ຫຍໍ.

໔໔໘. ‘‘ປິຕຸ ອຕ຺ຖາຍ ໂສ ພຸທ຺ໂຘ, ຘມ຺ມໍ ເທເສສິ ຈກ຺ຂຸມາ;

ເຕນ ກາເລນ ປຣິສາ, ສມນ຺ຕາ ໂຍຊນໍ ຕທາ.

໔໔໙. ‘‘ສມ຺ມໂຕ ມນຸຊານໍ ໂສ, ສຸນນ຺ໂທ ນາມ ຕາປໂສ;

ຍາວຕາ ພຸທ຺ຘປຣິສາ, ປຸປ຺ເຜຫຈ຺ຉາທຍີ ຕທາ.

໔໕໐. ‘‘ຈຕຸສຈ຺ຈໍ ປກາເສນ຺ເຕ, ເສຏ຺ເຐ ຈ [ເຫຏ຺ຐາ ຈ (ກ.)] ປຸປ຺ຜມຓ຺ຑເປ;

ໂກຏິສຕສຫສ຺ສານໍ, ຘມ຺ມາຠິສມໂຍ ອຫຸ.

໔໕໑. ‘‘ສຕ຺ຕຣຕ຺ຕິນ຺ທິວໍ ພຸທ຺ໂຘ, ວສ຺ເສຕ຺ວາ ຘມ຺ມວຸຏ຺ຐິໂຍ;

ອຏ຺ຐເມ ທິວເສ ປຕ຺ເຕ, ສຸນນ຺ທໍ ກິຕ຺ຕຍີ ຊິໂນ.

໔໕໒. ‘‘ເທວໂລເກ ມນຸສ຺ເສ ວາ, ສໍສຣນ຺ໂຕ ອຍໍ ຠເວ;

ສພ຺ເພສໍ ປວໂຣ ຫຸຕ຺ວາ, ຠເວສຸ ສໍສຣິສ຺ສຕິ.

໔໕໓. ‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໔໕໔. ‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ມນ຺ຕາຓິປຸຕ຺ໂຕ ປຸຓ຺ໂຓຕິ, ເຫສ຺ສຕິ ສຕ຺ຖຸ ສາວໂກ.

໔໕໕. ‘‘ເອວໍ ກິຕ຺ຕຍິ ສມ຺ພຸທ຺ໂຘ, ສຸນນ຺ທໍ ຕາປສໍ ຕທາ;

ຫາສຍນ຺ໂຕ ຊນໍ ສພ຺ພໍ, ທສ຺ສຍນ຺ໂຕ ສກໍ ພລໍ.

໔໕໖. ‘‘ກຕຎ຺ຊລີ ນມສ຺ສນ຺ຕິ, ສຸນນ຺ທໍ ຕາປສໍ ຊນາ;

ພຸທ຺ເຘ ກາຣໍ ກຣິຕ຺ວານ, ໂສເຘສິ ຄຕິມຕ຺ຕໂນ.

໔໕໗. ‘‘ຕຕ຺ຖ ເມ ອຫຸ ສງ຺ກປ຺ໂປ, ສຸຕ຺ວານ ມຸນິໂນ ວຈໍ;

ອຫມ຺ປິ ກາຣໍ ກສ຺ສາມິ, ຍຖາ ປສ຺ສາມິ ໂຄຕມໍ.

໔໕໘. ‘‘ເອວາຫໍ ຈິນ຺ຕຍິຕ຺ວານ, ກິຣິຍໍ ຈິນ຺ຕຍິໍ ມມ;

ກ຺ຍາຫໍ ກມ຺ມໍ ອາຈຣາມິ, ປຸຎ຺ຎກ຺ເຂຕ຺ເຕ ອນຸຕ຺ຕເຣ.

໔໕໙. ‘‘ອຍຎ຺ຈ ປາຐິໂກ ຠິກ຺ຂຸ, ສພ຺ພປາຐິສ຺ສ ສາສເນ;

ວິນເຍ ອຄ຺ຄນິກ຺ຂິຕ຺ໂຕ, ຕໍ ຐານໍ ປຕ຺ຖເຍ ອຫໍ.

໔໖໐. ‘‘ອິທໍ ເມ ອມິຕໍ ໂຠຄໍ, ອກ຺ໂຂຠໍ ສາຄຣູປມໍ;

ເຕນ ໂຠເຄນ ພຸທ຺ຘສ຺ສ, ອາຣາມໍ ມາປເຍ ອຫໍ.

໔໖໑. ‘‘ໂສຠນໍ ນາມ ອາຣາມໍ, ນຄຣສ຺ສ ປຸຣຕ຺ຖໂຕ;

ກິຓິຕ຺ວາ [ກີຕ຺ວາ (ສີ.), ກິຕ຺ວາ (ກ.)] ສຕສຫສ຺ເສນ, ສງ຺ຆາຣາມໍ ອມາປຍິໍ.

໔໖໒. ‘‘ກູຏາຄາເຣ ຈ ປາສາເທ, ມຓ຺ຑເປ ຫມ຺ມິເຍ ຄຸຫາ;

ຈງ຺ກເມ ສຸກເຕ ກຕ຺ວາ, ສງ຺ຆາຣາມໍ ອມາປຍິໍ.

໔໖໓. ‘‘ຊນ຺ຕາຆຣໍ ອຄ຺ຄິສາລໍ, ອໂຖ ອຸທກມາຬກໍ;

ນ຺ຫານຆຣໍ ມາປຍິຕ຺ວາ, ຠິກ຺ຂຸສງ຺ຆສ຺ສທາສຫໍ.

໔໖໔. ‘‘ອາສນ຺ທິໂຍ ປີຐເກ ຈ, ປຣິໂຠເຄ ຈ ຠາຊເນ;

ອາຣາມິກຎ຺ຈ ເຠສຊ຺ຊໍ, ສພ຺ພເມຕໍ ອທາສຫໍ.

໔໖໕. ‘‘ອາຣກ຺ຂໍ ປຏ຺ຐເປຕ຺ວານ, ປາກາຣໍ ກາຣຍິໍ ທຬ຺ຫໍ;

ມາ ນໍ ໂກຈິ ວິເຫເຐສິ, ສນ຺ຕຈິຕ຺ຕານ ຕາທິນໍ.

໔໖໖. ‘‘ສຕສຫສ຺ເສນາວາສໍ [ອາວາສໍ ສຕສຫສ຺ເສນ (ສີ.), ອາວາເສ ສຕສຫສ຺ເສ (ສ຺ຍາ.)], ສງ຺ຆາຣາເມ ອມາປຍິໍ;

ເວປຸລ຺ລໍ ຕໍ ມາປຍິຕ຺ວາ [ເວປຸລ຺ລຕໍ ປາປຍິຕ຺ວາ (ສີ.)], ສມ຺ພຸທ຺ຘໍ ອຸປນາມຍິໍ.

໔໖໗. ‘‘ນິຏ຺ຐາປິໂຕ ມຍາຣາໂມ, ສມ຺ປຏິຈ຺ຉ ຕຸວໍ ມຸນິ;

ນິຍ຺ຍາເທສ຺ສາມິ ຕໍ ວີຣ [ເຕ ວີຣ (ສີ.), ຕໍ ຘີຣ (ສ຺ຍາ.)], ອຘິວາເສຫິ ຈກ຺ຂຸມ.

໔໖໘. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມ ສງ຺ກປ຺ປມຎ຺ຎາຍ, ອຘິວາເສສິ ນາຍໂກ.

໔໖໙. ‘‘ອຘິວາສນມຎ຺ຎາຍ, ສພ຺ພຎ຺ຎຸສ຺ສ ມເຫສິໂນ;

ໂຠຊນໍ ປຏິຍາເທຕ຺ວາ, ກາລມາໂຣຈຍິໍ ອຫໍ.

໔໗໐. ‘‘ອາໂຣຈິຕມ຺ຫິ ກາລມ຺ຫິ, ປທຸມຸຕ຺ຕຣນາຍໂກ;

ຂີຓາສວສຫສ຺ເສຫິ, ອາຣາມໍ ເມ ອຸປາຄມິ.

໔໗໑. ‘‘ນິສິນ຺ນໍ ກາລມຎ຺ຎາຍ, ອນ຺ນປາເນນ ຕປ຺ປຍິໍ;

ຠຸຕ຺ຕາວິໍ ກາລມຎ຺ຎາຍ, ອິທໍ ວຈນມພ຺ຣວິໍ.

໔໗໒. ‘‘ກີໂຕ ສຕສຫສ຺ເສນ, ຕຕ຺ຕເກເນວ ກາຣິໂຕ;

ໂສຠໂນ ນາມ ອາຣາໂມ, ສມ຺ປຏິຈ຺ຉ ຕຸວໍ ມຸນິ.

໔໗໓. ‘‘ອິມິນາຣາມທາເນນ, ເຈຕນາປຓິຘີຫິ ຈ;

ຠເວ ນິພ຺ພຕ຺ຕມາໂນຫໍ, ລຠາມິ ມມ ປຕ຺ຖິຕໍ.

໔໗໔. ‘‘ປຏິຄ຺ຄເຫຕ຺ວາ ສມ຺ພຸທ຺ໂຘ, ສງ຺ຆາຣາມໍ ສຸມາປິຕໍ;

ຠິກ຺ຂຸສງ຺ເຆ ນິສີທິຕ຺ວາ, ອິທໍ ວຈນມພ຺ຣວິ.

໔໗໕. ‘‘ໂຍ ໂສ ພຸທ຺ຘສ຺ສ ປາທາສິ, ສງ຺ຆາຣາມໍ ສຸມາປິຕໍ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໔໗໖. ‘‘ຫຕ຺ຖີ ອສ຺ສາ ຣຖາ ປຕ຺ຕີ, ເສນາ ຈ ຈຕຸຣງ຺ຄິນີ;

ປຣິວາເຣສ຺ສນ຺ຕິມໍ ນິຈ຺ຈໍ, ສງ຺ຆາຣາມສ຺ສິທໍ ຜລໍ.

໔໗໗. ‘‘ສຏ຺ຐິ ຕູຣສຫສ຺ສານິ [ຕຸຣິຍສຫສ຺ສານິ (ສີ. ສ຺ຍາ.)], ເຠຣິໂຍ ສມລງ຺ກຕາ;

ປຣິວາເຣສ຺ສນ຺ຕິມໍ ນິຈ຺ຈໍ, ສງ຺ຆາຣາມສ຺ສິທໍ ຜລໍ.

໔໗໘. ‘‘ຉຬສີຕິສຫສ຺ສານິ, ນາຣິໂຍ ສມລງ຺ກຕາ;

ວິຈິຕ຺ຕວຕ຺ຖາຠຣຓາ, ອາມຸຕ຺ຕມຓິກຸຓ຺ຑລາ.

໔໗໙. ‘‘ອຬາຣປມ຺ຫາ ຫສຸລາ, ສຸສຎ຺ຎາ ຕນຸມຊ຺ຌິມາ;

ປຣິວາເຣສ຺ສນ຺ຕິມໍ ນິຈ຺ຈໍ, ສງ຺ຆາຣາມສ຺ສິທໍ ຜລໍ.

໔໘໐. ‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ.

໔໘໑. ‘‘ເທວຣາເຊນ ປຕ຺ຕພ຺ພໍ, ສພ຺ພໍ ປຏິລຠິສ຺ສຕິ;

ອນູນໂຠໂຄ ຫຸຕ຺ວານ, ເທວຣຊ຺ຊໍ ກຣິສ຺ສຕິ.

໔໘໒. ‘‘ສຫສ຺ສກ຺ຂຕ຺ຕຸໍ ຈກ຺ກວຕ຺ຕີ, ຣາຊາ ຣຏ຺ເຐ ຠວິສ຺ສຕິ;

ປຖພ຺ຍາ ຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໔໘໓. ‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໔໘໔. ‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ອຸປາລິ ນາມ ນາເມນ, ເຫສ຺ສຕິ ສຕ຺ຖຸ ສາວໂກ.

໔໘໕. ‘‘ວິນເຍ ປາຣມິໍ ປຕ຺ວາ, ຐານາຐາເນ ຈ ໂກວິໂທ;

ຊິນສາສນໍ ຘາເຣນ຺ໂຕ, ວິຫຣິສ຺ສຕິນາສໂວ.

໔໘໖. ‘‘ສພ຺ພເມຕໍ ອຠິຎ຺ຎາຍ, ໂຄຕໂມ ສກ຺ຍປຸງ຺ຄໂວ;

ຠິກ຺ຂຸສງ຺ເຆ ນິສີທິຕ຺ວາ, ເອຕທຄ຺ເຄ ຐເປສ຺ສຕິ.

໔໘໗. ‘‘ອປຣິເມຍ຺ຍຸປາທາຍ, ປຕ຺ເຖມິ ຕວ ສາສນໍ;

ໂສ ເມ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ.

໔໘໘. ‘‘ຍຖາ ສູລາວຸໂຕ ໂປໂສ, ຣາຊທຓ຺ເຑນ ຕຊ຺ຊິໂຕ;

ສູເລ ສາຕໍ ອວິນ຺ທນ຺ໂຕ, ປຣິມຸຕ຺ຕິໍວ ອິຈ຺ຉຕິ.

໔໘໙. ‘‘ຕເຖວາຫໍ ມຫາວີຣ, ຠວທຓ຺ເຑນ ຕຊ຺ຊິໂຕ;

ກມ຺ມສູລາວຸໂຕ ສນ຺ໂຕ, ປິປາສາເວທນຏ຺ຏິໂຕ.

໔໙໐. ‘‘ຠເວ ສາຕໍ ນ ວິນ຺ທາມິ, ຑຍ຺ຫນ຺ໂຕ ຕີຫິ ອຄ຺ຄິຠິ;

ປຣິມຸຕ຺ຕິໍ ຄເວສາມິ, ຍຖາປິ ຣາຊທຓ຺ຑິໂຕ.

໔໙໑. ‘‘ຍຖາ ວິສາໂທ ປຸຣິໂສ, ວິເສນ ປຣິປີຬິໂຕ;

ອຄທໍ ໂສ ຄເວເສຍ຺ຍ, ວິສຆາຕາຍຸປາລນໍ [ວິສຆາຕາຍຸປາຍນໍ (ສ຺ຍາ. ກ.)].

໔໙໒. ‘‘ຄເວສມາໂນ ປສ຺ເສຍ຺ຍ, ອຄທໍ ວິສຆາຕກໍ;

ຕໍ ປິວິຕ຺ວາ ສຸຂີ ອສ຺ສ, ວິສມ຺ຫາ ປຣິມຸຕ຺ຕິຍາ.

໔໙໓. ‘‘ຕເຖວາຫໍ ມຫາວີຣ, ຍຖາ ວິສຫໂຕ ນໂຣ;

ສມ຺ປີຬິໂຕ ອວິຊ຺ຊາຍ, ສທ຺ຘມ຺ມາຄທເມສຫໍ.

໔໙໔. ‘‘ຘມ຺ມາຄທໍ ຄເວສນ຺ໂຕ, ອທ຺ທກ຺ຂິໍ ສກ຺ຍສາສນໍ;

ອຄ຺ຄໍ ສພ຺ໂພສຘານໍ ຕໍ, ສພ຺ພສລ຺ລວິໂນທນໍ.

໔໙໕. ‘‘ຘມ຺ໂມສຘໍ ປິວິຕ຺ວານ, ວິສໍ ສພ຺ພໍ ສມູຫນິໍ;

ອຊຣາມຣໍ ສີຕິຠາວໍ, ນິພ຺ພານໍ ຜສ຺ສຍິໍ ອຫໍ.

໔໙໖. ‘‘ຍຖາ ຠູຕຏ຺ຏິໂຕ ໂປໂສ, ຠູຕຄ຺ຄາເຫນ ປີຬິໂຕ;

ຠູຕເວຊ຺ຊໍ ຄເວເສຍ຺ຍ, ຠູຕສ຺ມາ ປຣິມຸຕ຺ຕິຍາ.

໔໙໗. ‘‘ຄເວສມາໂນ ປສ຺ເສຍ຺ຍ, ຠູຕວິຊ຺ຊາສຸ ໂກວິທໍ;

ຕສ຺ສ ໂສ ວິຫເນ ຠູຕໍ, ສມູລຎ຺ຈ ວິນາສເຍ.

໔໙໘. ‘‘ຕເຖວາຫໍ ມຫາວີຣ, ຕມຄ຺ຄາເຫນ ປີຬິໂຕ;

ຎາຓາໂລກໍ ຄເວສາມິ, ຕມໂຕ ປຣິມຸຕ຺ຕິຍາ.

໔໙໙. ‘‘ອຖທ຺ທສໍ ສກ຺ຍມຸນິໍ, ກິເລສຕມໂສຘນໍ;

ໂສ ເມ ຕມໍ ວິໂນເທສິ, ຠູຕເວຊ຺ໂຊວ ຠູຕກໍ.

໕໐໐. ‘‘ສໍສາຣໂສຕໍ ສຎ຺ຉິນ຺ທິໍ, ຕຓ຺ຫາໂສຕໍ ນິວາຣຍິໍ;

ຠວໍ ອຸຄ຺ຆາຏຍິໍ ສພ຺ພໍ, ຠູຕເວຊ຺ໂຊວ ມູລໂຕ.

໕໐໑. ‘‘ຄຣຸໂຬ ຍຖາ ໂອປຕຕິ, ປນ຺ນຄໍ ຠກ຺ຂມຕ຺ຕໂນ;

ສມນ຺ຕາ ໂຍຊນສຕໍ, ວິກ຺ໂຂເຠຕິ ມຫາສຣໍ.

໕໐໒. ‘‘ປນ຺ນຄໍ ໂສ ຄເຫຕ຺ວານ, ອໂຘສີສໍ ວິເຫຐຍໍ;

ອາທາຍ ໂສ ປກ຺ກມຕິ, ເຍນກາມໍ ວິຫງ຺ຄໂມ.

໕໐໓. ‘‘ຕເຖວາຫໍ ມຫາວີຣ, ຍຖາປິ ຄຣຸໂຬ ພລີ;

ອສງ຺ຂຕໍ ຄເວສນ຺ໂຕ, ໂທເສ ວິກ຺ຂາລຍິໍ ອຫໍ.

໕໐໔. ‘‘ທິຏ຺ໂຐ ອຫໍ ຘມ຺ມວຣໍ, ສນ຺ຕິປທມນຸຕ຺ຕຣໍ;

ອາທາຍ ວິຫຣາເມຕໍ, ຄຣຸໂຬ ປນ຺ນຄໍ ຍຖາ.

໕໐໕. ‘‘ອາສາວຕີ ນາມ ລຕາ, ຊາຕາ ຈິຕ຺ຕລຕາວເນ;

ຕສ຺ສາ ວສ຺ສສຫສ຺ເສນ, ເອກໍ ນິພ຺ພຕ຺ຕເຕ ຜລໍ.

໕໐໖. ‘‘ຕໍ ເທວາ ປຍິຣຸປາສນ຺ຕິ, ຕາວທູຣຜເລ ສຕິ;

ເທວານໍ ສາ ປິຍາ ເອວໍ, ອາສາວຕີ ລຕຸຕ຺ຕມາ.

໕໐໗. ‘‘ສຕສຫສ຺ສຸປາທາຍ, ຕາຫໍ ປຣິຈເຣ ມຸນິ;

ສາຍໍ ປາຕໍ ນມສ຺ສາມິ, ເທວາ ອາສາວຕິໍ ຍຖາ.

໕໐໘. ‘‘ອວຎ຺ຌາ ປາຣິຈຣິຍາ, ອໂມຆາ ຈ ນມສ຺ສນາ;

ທູຣາຄຕມ຺ປິ ມໍ ສນ຺ຕໍ, ຂໂຓຍໍ ນ ວິຣາຘຍິ.

໕໐໙. ‘‘ປຏິສນ຺ຘິໍ ນ ປສ຺ສາມິ, ວິຈິນນ຺ໂຕ ຠເວ ອຫໍ;

ນິຣູປຘິ ວິປ຺ປມຸຕ຺ໂຕ [ວິປ຺ປຍຸຕ຺ໂຕ (ກ.)], ອຸປສນ຺ໂຕ ຈຣາມຫໍ.

໕໑໐. ‘‘ຍຖາປິ ປທຸມໍ ນາມ, ສູຣິຍຣໍເສນ ປຸປ຺ຜຕິ;

ຕເຖວາຫໍ ມຫາວີຣ, ພຸທ຺ຘຣໍເສນ ປຸປ຺ຜິໂຕ.

໕໑໑. ‘‘ຍຖາ ພລາກໂຍນິມ຺ຫິ, ນ ວິຊ຺ຊຕິ ປຸໂມ [ປຸມາ (ສີ. ສ຺ຍາ.)] ສທາ;

ເມເຆສຸ ຄຊ຺ຊມາເນສຸ, ຄພ຺ຠໍ ຄຓ຺ຫນ຺ຕິ ຕາ ສທາ.

໕໑໒. ‘‘ຈິຣມ຺ປິ ຄພ຺ຠໍ ຘາເຣນ຺ຕິ, ຍາວ ເມໂຆ ນ ຄຊ຺ຊຕິ;

ຠາຣໂຕ ປຣິມຸຈ຺ຈນ຺ຕິ, ຍທາ ເມໂຆ ປວສ຺ສຕິ.

໕໑໓. ‘‘ປທຸມຸຕ຺ຕຣພຸທ຺ຘສ຺ສ, ຘມ຺ມເມເຆນ ຄຊ຺ຊໂຕ;

ສທ຺ເທນ ຘມ຺ມເມຆສ຺ສ, ຘມ຺ມຄພ຺ຠໍ ອຄຓ຺ຫຫໍ.

໕໑໔. ສຕສຫສ຺ສຸປາທາຍ, ປຸຎ຺ຎຄພ຺ຠໍ ຘເຣມຫໍ;

ນປ຺ປມຸຈ຺ຈາມິ ຠາຣໂຕ, ຘມ຺ມເມໂຆ ນ ຄຊ຺ຊຕິ.