໓-໒. ມຫາໂມຄ຺ຄລ຺ລານຕ຺ເຖຣອປທານໍ

໓໗໕. ‘‘ອໂນມທສ຺ສີ ຠຄວາ, ໂລກເຊຏ຺ໂຐ ນຣາສໂຠ;

ວິຫາສິ ຫິມວນ຺ຕມ຺ຫິ, ເທວສງ຺ຆປຸຣກ຺ຂໂຕ.

໓໗໖. ‘‘ວຣຸໂຓ ນາມ ນາເມນ, ນາຄຣາຊາ ອຫໍ ຕທາ;

ກາມຣູປີ ວິກຸພ຺ພາມິ, ມໂຫທຘິນິວາສຫໍ.

໓໗໗. ‘‘ສງ຺ຄຓິຍໍ ຄຓໍ ຫິຕ຺ວາ, ຕູຣິຍໍ ປຏ຺ຐເປສຫໍ;

ສມ຺ພຸທ຺ຘໍ ປຣິວາເຣຕ຺ວາ, ວາເທສຸໍ ອຈ຺ຉຣາ ຕທາ.

໓໗໘. ‘‘ວຊ຺ຊມາເນສຸ ຕູເຣສຸ, ເທວາ ຕູຣານິ [ຕຸຣິເຍສຸ, ເທວາ ຕຸຣິຍານິ (ສີ. ສ຺ຍາ.)] ວຊ຺ຊຍຸໍ;

ອຸຠິນ຺ນໍ ສທ຺ທໍ ສຸຕ຺ວານ, ພຸທ຺ໂຘປິ ສມ຺ປພຸຊ຺ຌຖ.

໓໗໙. ‘‘ນິມນ຺ເຕຕ຺ວານ ສມ຺ພຸທ຺ຘໍ, ສກໍ ຠວນຸປາຄມິໍ;

ອາສນໍ ປຎ຺ຎເປຕ຺ວານ, ກາລມາໂຣຈຍິໍ ອຫໍ.

໓໘໐. ‘‘ຂີຓາສວສຫສ຺ເສຫິ, ປຣິວຸໂຕ ໂລກນາຍໂກ;

ໂອຠາເສນ຺ໂຕ ທິສາ ສພ຺ພາ, ຠວນໍ ເມ ອຸປາຄມິ.

໓໘໑. ‘‘ອຸປວິຏ຺ຐໍ ມຫາວີຣໍ, ເທວເທວໍ ນຣາສຠໍ;

ສຠິກ຺ຂຸສງ຺ຆໍ ຕປ຺ເປສິໍ [ສນ຺ຕປ຺ເປສິໍ (ສ຺ຍາ.), ຕປ຺ເປມິ (ກ.)], ອນ຺ນປາເນນຫໍ ຕທາ.

໓໘໒. ‘‘ອນຸໂມທິ ມຫາວີໂຣ, ສຍມ຺ຠູ ອຄ຺ຄປຸຄ຺ຄໂລ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໓໘໓. ‘‘‘ໂຍ ໂສ [ຍໍ ໂສ (ກ.)] ສງ຺ຆໍ ອປູເຊສິ, ພຸທ຺ຘຎ຺ຈ ໂລກນາຍກໍ;

ເຕນ ຈິຕ຺ຕປ຺ປສາເທນ, ເທວໂລກໍ ຄມິສ຺ສຕິ.

໓໘໔. ‘‘‘ສຕ຺ຕສຕ຺ຕຕິກ຺ຂຕ຺ຕຸຎ຺ຈ, ເທວຣຊ຺ຊໍ ກຣິສ຺ສຕິ;

ປຖພ຺ຍາ ຣຊ຺ຊໍ ອຏ຺ຐສຕໍ, ວສຸຘໍ ອາວສິສ຺ສຕິ.

໓໘໕. ‘‘‘ປຎ຺ຈປຎ຺ຎາສກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ;

ໂຠຄາ ອສງ຺ຂິຍາ ຕສ຺ສ, ອຸປ຺ປຊ຺ຊິສ຺ສນ຺ຕິ ຕາວເທ.

໓໘໖. ‘‘‘ອປຣິເມຍ຺ເຍ ອິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ [ນາເມນ (ສີ.)], ສຕ຺ຖາ ໂລເກ ຠວິສ຺ສຕິ.

໓໘໗. ‘‘‘ນິຣຍາ ໂສ ຈວິຕ຺ວານ, ມນຸສ຺ສຕໍ ຄມິສ຺ສຕິ;

ໂກລິໂຕ ນາມ ນາເມນ, ພ຺ຣຫ຺ມພນ຺ຘຸ ຠວິສ຺ສຕິ.

໓໘໘. ‘‘‘ໂສ ປຈ຺ຉາ ປພ຺ພຊິຕ຺ວານ, ກຸສລມູເລນ ໂຈທິໂຕ;

ໂຄຕມສ຺ສ ຠຄວໂຕ, ທຸຕິໂຍ ເຫສ຺ສຕິ ສາວໂກ.

໓໘໙. ‘‘‘ອາຣທ຺ຘວີຣິໂຍ ປຫິຕຕ຺ໂຕ, ອິທ຺ຘິຍາ ປາຣມິໍ ຄໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ’.

໓໙໐. ‘‘ປາປມິຕ຺ໂຕປນິສ຺ສາຍ, ກາມຣາຄວສໍ ຄໂຕ;

ມາຕຣໍ ປິຕຣຎ຺ຈາປິ, ຆາຕຍິໍ ທຸຏ຺ຐມານໂສ.

໓໙໑. ‘‘ຍໍ ຍໍ ໂຍນຸປປຊ຺ຊາມິ, ນິຣຍໍ ອຖ ມານຸສໍ;

ປາປກມ຺ມສມງ຺ຄິຕາ, ຠິນ຺ນສີໂສ ມຣາມຫໍ.

໓໙໒. ‘‘ອິທໍ ປຈ຺ຉິມກໍ ມຍ຺ຫໍ, ຈຣິໂມ ວຕ຺ຕເຕ ຠໂວ;

ອິຘາປິ ເອທິໂສ ມຍ຺ຫໍ, ມຣຓກາເລ ຠວິສ຺ສຕິ.

໓໙໓. ‘‘ປວິເວກມນຸຍຸຕ຺ໂຕ, ສມາຘິຠາວນາຣໂຕ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໓໙໔. ‘‘ຘຣຓິມ຺ປິ ສຸຄມ຺ຠີຣໍ, ພຫລໍ ທຸປ຺ປຘໍສິຍໍ;

ວາມງ຺ຄຸຏ຺ເຐນ ໂຂເຠຍ຺ຍໍ, ອິທ຺ຘິຍາ ປາຣມິໍ ຄໂຕ.

໓໙໕. ‘‘ອສ຺ມິມານໍ ນ ປສ຺ສາມິ, ມາໂນ ມຍ຺ຫໍ ນ ວິຊ຺ຊຕິ;

ສາມເຓເຣ ອຸປາທາຍ, ຄຣຸຈິຕ຺ຕໍ ກໂຣມຫໍ.

໓໙໖. ‘‘ອປຣິເມຍ຺ເຍ ອິໂຕ ກປ຺ເປ, ຍໍ ກມ຺ມມຠິນີຫຣິໍ;

ຕາຫໍ ຠູມິມນຸປ຺ປຕ຺ໂຕ, ປຕ຺ໂຕມ຺ຫິ ອາສວກ຺ຂຍໍ.

໓໙໗. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຫາໂມຄ຺ຄລ຺ລາໂນ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຫາໂມຄ຺ຄລ຺ລານຕ຺ເຖຣສ຺ສາປທານໍ ທຸຕິຍໍ.