໓-໓. ມຫາກສ຺ສປຕ຺ເຖຣອປທານໍ

໓໙໘. ‘‘ປທຸມຸຕ຺ຕຣສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ນິພ຺ພຸເຕ ໂລກນາຖມ຺ຫິ, ປູຊໍ ກຸພ຺ພນ຺ຕິ ສຕ຺ຖຸໂນ.

໓໙໙. ‘‘ອຸທຄ຺ຄຈິຕ຺ຕາ ຊນຕາ, ອາໂມທິຕປໂມທິຕາ;

ເຕສຸ ສໍເວຄຊາເຕສຸ, ປີຕິ ເມ ອຸທປຊ຺ຊຖ.

໔໐໐. ‘‘ຎາຕິມິຕ຺ເຕ ສມາເນຕ຺ວາ, ອິທໍ ວຈນມພ຺ຣວິໍ;

ປຣິນິພ຺ພຸໂຕ ມຫາວີໂຣ, ຫນ຺ທ ປູຊໍ ກໂຣມເສ.

໔໐໑. ‘‘ສາຘູຕິ ເຕ ປຏິສ຺ສຸຕ຺ວາ, ຠິຍ຺ໂຍ ຫາສໍ ຊນິໍສຸ ເມ;

ພຸທ຺ຘສ຺ມິໍ ໂລກນາຖມ຺ຫິ, ກາຫາມ ປຸຎ຺ຎສຎ຺ຈຍໍ.

໔໐໒. ‘‘ອຄ຺ຆິຍໍ ສຸກຕໍ ກຕ຺ວາ, ສຕຫຕ຺ຖສມຸຄ຺ຄຕໍ;

ທິຍຑ຺ຒຫຕ຺ຖປຕ຺ຖຏໍ, ວິມານໍ ນຠມຸຄ຺ຄຕໍ.

໔໐໓. ‘‘ກຕ຺ວານ ຫມ຺ມິຍໍ ຕຕ຺ຖ, ຕາລປນ຺ຕີຫິ ຈິຕ຺ຕິຕໍ;

ສກໍ ຈິຕ຺ຕໍ ປສາເທຕ຺ວາ, ເຈຕິຍໍ ປູຊຍຸຕ຺ຕມໍ.

໔໐໔. ‘‘ອຄ຺ຄິກ຺ຂນ຺ໂຘວ ຊລິໂຕ, ກິໍສຸໂກ ອິວ [ສາລຣາຊາວ (ສີ.)] ຜຸລ຺ລິໂຕ;

ອິນ຺ທລຏ຺ຐີວ ອາກາເສ, ໂອຠາເສຕິ ຈຕຸທ຺ທິສາ.

໔໐໕. ‘‘ຕຕ຺ຖ ຈິຕ຺ຕໍ ປສາເທຕ຺ວາ, ກຕ຺ວານ ກຸສລໍ ພຫຸໍ;

ປຸພ຺ພກມ຺ມໍ ສຣິຕ຺ວານ, ຕິທສໍ ອຸປປຊ຺ຊຫໍ.

໔໐໖. ‘‘ສຫສ຺ສຍຸຕ຺ຕໍ ຫຍວາຫິໍ, ທິພ຺ພຍານມຘິຏ຺ຐິໂຕ;

ອຸພ຺ພິທ຺ຘໍ ຠວນໍ ມຍ຺ຫໍ, ສຕ຺ຕຠູມໍ ສມຸຄ຺ຄຕໍ.

໔໐໗. ‘‘ກູຏາຄາຣສຫສ຺ສານິ, ສພ຺ພໂສຓ຺ຓມຍາ ອຫຸໍ;

ຊລນ຺ຕິ ສກເຕເຊນ, ທິສາ ສພ຺ພາ ປຠາສຍໍ.

໔໐໘. ‘‘ສນ຺ຕິ ອຎ຺ເຎປິ ນິຍ຺ຍູຫາ, ໂລຫິຕງ຺ຄມຍາ ຕທາ;

ເຕປິ ໂຊຕນ຺ຕິ ອາຠາຍ, ສມນ຺ຕາ ຈຕຸໂຣ ທິສາ.

໔໐໙. ‘‘ປຸຎ຺ຎກມ຺ມາຠິນິພ຺ພຕ຺ຕາ, ກູຏາຄາຣາ ສຸນິມ຺ມິຕາ;

ມຓິມຍາປິ ໂຊຕນ຺ຕິ, ທິສາ ທສ [ທິໂສທິສໍ (ສ຺ຍາ.)] ສມນ຺ຕໂຕ.

໔໑໐. ‘‘ເຕສໍ ອຸຊ຺ໂຊຕມານານໍ, ໂອຠາໂສ ວິປຸໂລ ອຫຸ;

ສພ຺ເພ ເທເວ ອຠິໂຠມິ, ປຸຎ຺ຎກມ຺ມສ຺ສິທໍ ຜລໍ.

໔໑໑. ‘‘ສຏ຺ຐິກປ຺ປສຫສ຺ສມ຺ຫິ, ອຸພ຺ພິທ຺ໂຘ ນາມ ຂຕ຺ຕິໂຍ;

ຈາຕຸຣນ຺ໂຕ ວິຊິຕາວີ, ປຖວິໍ ອາວສິໍ ອຫໍ.

໔໑໒. ‘‘ຕເຖວ ຠທ຺ທເກ ກປ຺ເປ, ຕິໍສກ຺ຂຕ຺ຕຸໍ ອໂຫສຫໍ;

ສກກມ຺ມາຠິຣທ຺ໂຘມ຺ຫິ, ຈກ຺ກວຕ຺ຕີ ມຫພ຺ພໂລ.

໔໑໓. ‘‘ສຕ຺ຕຣຕນສມ຺ປນ຺ໂນ, ຈຕຸທີປມ຺ຫິ ອິສ຺ສໂຣ;

ຕຕ຺ຖາປິ ຠວນໍ ມຍ຺ຫໍ, ອິນ຺ທລຏ຺ຐີວ ອຸຄ຺ຄຕໍ.

໔໑໔. ‘‘ອາຍາມໂຕ ຈຕຸພ຺ພີສໍ, ວິຕ຺ຖາເຣນ ຈ ທ຺ວາທສ;

ຣມ຺ມຓໍ [ຣມ຺ມກໍ (ສີ. ສ຺ຍາ.)] ນາມ ນຄຣໍ, ທຬ຺ຫປາກາຣໂຕຣຓໍ.

໔໑໕. ‘‘ອາຍາມໂຕ ປຎ຺ຈສຕໍ, ວິຕ຺ຖາເຣນ ຕທຑ຺ຒກໍ;

ອາກິຓ຺ຓໍ ຊນກາເຍຫິ, ຕິທສານໍ ປຸຣໍ ວິຍ.

໔໑໖. ‘‘ຍຖາ ສູຈິຆເຣ ສູຈີ, ປກ຺ຂິຕ຺ຕາ ປຓ຺ຓວີສຕິ;

ອຎ຺ຎມຎ຺ຎໍ ປຆຏ຺ເຏນ຺ຕິ, ອາກິຓ຺ຓໍ ໂຫຕິ ລງ຺ກຕໍ [ຕໍ ຕທາ (ສີ.), ສຕຕາ (ສ຺ຍາ.), ສງ຺ກຣໍ (?)].

໔໑໗. ‘‘ເອວມ຺ປິ ນຄຣໍ ມຍ຺ຫໍ, ຫຕ຺ຖິສ຺ສຣຖສໍກຸລໍ;

ມນຸສ຺ເສຫິ ສທາກິຓ຺ຓໍ, ຣມ຺ມຓໍ ນຄຣຸຕ຺ຕມໍ.

໔໑໘. ‘‘ຕຕ຺ຖ ຠຸຕ຺ວາ ປິວິຕ຺ວາ ຈ, ປຸນ ເທວຕ຺ຕນໍ ຄໂຕ [ປຸນປິ ເທວຕງ຺ຄໂຕ (ກ.)].

ຠເວ ປຈ຺ຉິມເກ ມຍ຺ຫໍ, ອໂຫສິ ກຸລສມ຺ປທາ.

໔໑໙. ‘‘ພ຺ຣາຫ຺ມຎ຺ຎກຸລສມ຺ຠູໂຕ, ມຫາຣຕນສຎ຺ຈໂຍ;

ອສີຕິໂກຏິໂຍ ຫິຕ຺ວາ, ຫິຣຎ຺ຎສ຺ສາປິ ປພ຺ພຊິໍ.

໔໒໐. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຫາກສ຺ສໂປ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຫາກສ຺ສປຕ຺ເຖຣສ຺ສາປທານໍ ຕຕິຍໍ.