໓-໑. ສາຣິປຸຕ຺ຕຕ຺ເຖຣອປທານໍ

ອຖ ເຖຣາປທານໍ ສຸຓາຖ –

໑໔໑. ‘‘ຫິມວນ຺ຕສ຺ສ ອວິທູເຣ, ລມ຺ພໂກ ນາມ ປພ຺ພໂຕ;

ອສ຺ສໂມ ສຸກໂຕ ມຍ຺ຫໍ, ປຓ຺ຓສາລາ ສຸມາປິຕາ.

໑໔໒. ‘‘ອຸຕ຺ຕານກູລາ ນທິກາ, ສຸປຕິຕ຺ຖາ ມໂນຣມາ;

ສຸສຸທ຺ຘປຸຬິນາກິຓ຺ຓາ, ອວິທູເຣ ມມສ຺ສມໍ.

໑໔໓. ‘‘ອສກ຺ຂຣາ ອປພ຺ຠາຣາ, ສາທຸ ອປ຺ປຏິຄນ຺ຘິກາ;

ສນ຺ທຕີ ນທິກາ ຕຕ຺ຖ, ໂສຠຍນ຺ຕາ ມມສ຺ສມໍ.

໑໔໔. ‘‘ກຸມ຺ຠີລາ ມກຣາ ເຈຕ຺ຖ, ສຸສຸມາຣາ [ສຸໍສຸມາຣາ (ສີ. ສ຺ຍາ. )] ຈ ກຈ຺ຉປາ;

ຈຣນ຺ຕິ ນທິຍາ ຕຕ຺ຖ, ໂສຠຍນ຺ຕາ ມມສ຺ສມໍ.

໑໔໕. ‘‘ປາຐີນາ ປາວຸສາ ມຈ຺ຉາ, ພລຊາ [ວຊລາ (ສີ. ສ຺ຍາ.) ຊລຊາ (ປີ.)] ມຸຎ຺ຊໂຣຫິຕາ;

ວຄ຺ຄຬາ [ວຄ຺ຄຸລາ (ສີ.) ວຄ຺ຄຸຬາ (ສ຺ຍາ.) ມຄ຺ຄຸຣາ (ເຖຣຄາຖາ)] ປປຕາຍນ຺ຕາ, ໂສຠຍນ຺ຕິ [ປປຕາຍນ຺ຕິ, ໂສຠຍນ຺ຕາ (ກ.)] ມມສ຺ສມໍ.

໑໔໖. ‘‘ອຸໂຠ ກູເລສຸ ນທິຍາ, ປຸປ຺ຜິໂນ ຜລິໂນ ທຸມາ;

ອຸຠໂຕ ອຠິລມ຺ພນ຺ຕາ, ໂສຠຍນ຺ຕິ [ອຠິລມ຺ພນ຺ຕິ ໂສຠຍນ຺ຕາ (ກ.)] ມມສ຺ສມໍ.

໑໔໗. ‘‘ອມ຺ພາ ສາລາ ຈ ຕິລກາ, ປາຏລີ ສິນ຺ທຸວາຣກາ [ສິນ຺ທຸວາຣິກາ (ພຫູສຸ)];

ທິພ຺ພຄນ຺ຘາ ສມ຺ປວນ຺ຕິ, ປຸປ຺ຜິຕາ ມມ ອສ຺ສເມ.

໑໔໘. ‘‘ຈມ຺ປກາ ສຬລາ ນີປາ [ນິມ຺ພາ (ກ.)], ນາຄປຸນ຺ນາຄເກຕກາ;

ທິພ຺ພຄນ຺ຘາ ສມ຺ປວນ຺ຕິ, ປຸປ຺ຜິຕາ ມມ ອສ຺ສເມ.

໑໔໙. ‘‘ອຕິມຸຕ຺ຕາ ອໂສກາ ຈ, ຠຄິນີມາລາ ຈ ປຸປ຺ຜິຕາ;

ອງ຺ໂກລາ ພິມ຺ພິຊາລາ [ພິມ຺ພຊາລາ (ກ.)] ຈ, ປຸປ຺ຜິຕາ ມມ ອສ຺ສເມ.

໑໕໐. ‘‘ເກຕກາ ກນ຺ທລິ [ກທລີ (ສ຺ຍາ.)] ເຈວ, ໂຄຘຸກາ ຕິຓສູລິກາ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໑໕໑. ‘‘ກຓິກາຣາ ກຓ຺ຓິກາ ຈ, ອສນາ ອຊ຺ຊຸນາ ພຫູ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໑໕໒. ‘‘ປຸນ຺ນາຄາ ຄິຣິປຸນ຺ນາຄາ, ໂກວິຬາຣາ ຈ ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໑໕໓. ‘‘ອຸທ຺ຘາລກາ ຈ ກຸຏຊາ, ກທມ຺ພາ ວກຸລາ ພຫູ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໑໕໔. ‘‘ອາຬກາ ອິສິມຸຄ຺ຄາ ຈ, ກທລິມາຕຸລຸງ຺ຄິໂຍ;

ຄນ຺ໂຘທເກນ ສໍວຑ຺ຒາ, ຜລານິ ຘາຣຍນ຺ຕິ ເຕ.

໑໕໕. ‘‘ອຎ຺ເຎ ປຸປ຺ຜນ຺ຕິ ປທຸມາ, ອຎ຺ເຎ ຊາຍນ຺ຕິ ເກສຣີ;

ອຎ຺ເຎ ໂອປຸປ຺ຜາ ປທຸມາ, ປຸປ຺ຜິຕາ ຕຬາເກ ຕທາ.

໑໕໖. ‘‘ຄພ຺ຠໍ ຄຓ຺ຫນ຺ຕິ ປທຸມາ, ນິທ຺ຘາວນ຺ຕິ ມຸລາຬິໂຍ;

ສິໍຆາຏິປຕ຺ຕມາກິຓ຺ຓາ, ໂສຠນ຺ຕິ ຕຬາເກ ຕທາ.

໑໕໗. ‘‘ນຍິຕາ ອມ຺ພຄນ຺ຘີ ຈ, ອຸຕ຺ຕລີ ພນ຺ຘຸຊີວກາ;

ທິພ຺ພຄນ຺ຘາ ສມ຺ປວນ຺ຕິ, ປຸປ຺ຜິຕາ ຕຬາເກ ຕທາ.

໑໕໘. ‘‘ປາຐີນາ ປາວຸສາ ມຈ຺ຉາ, ພລຊາ ມຸຎ຺ຊໂຣຫິຕາ;

ສໍຄຸລາ ມຄ຺ຄຸຣາ [ມງ຺ຄຸຣາ (ສີ. ກ.)] ເຈວ, ວສນ຺ຕິ ຕຬາເກ ຕທາ.

໑໕໙. ‘‘ກຸມ຺ຠີລາ ສຸສຸມາຣາ ຈ, ຕນ຺ຕິຄາຫາ ຈ ຣກ຺ຂສາ;

ໂອຄຸຫາ [ໂອຄາຫາ (ສ຺ຍາ.)] ອຊຄຣາ ຈ, ວສນ຺ຕິ ຕຬາເກ ຕທາ.

໑໖໐. ‘‘ປາເຣວຕາ ຣວິຫໍສາ, ຈກ຺ກວາກາ ນທີຈຣາ;

ໂກກິລາ ສຸກສາຬິກາ, ອຸປຊີວນ຺ຕິ ຕໍ ສຣໍ.

໑໖໑. ‘‘ກຸກ຺ກຸຕ຺ຖກາ ກຸຬີຣກາ, ວເນ ໂປກ຺ຂຣສາຕກາ;

ທິນ຺ທິຠາ ສຸວໂປຕາ ຈ, ອຸປຊີວນ຺ຕິ ຕໍ ສຣໍ.

໑໖໒. ‘‘ຫໍສາ ໂກຎ຺ຈາ ມຍູຣາ ຈ, ໂກກິລາ ຕມ຺ພຈູຬກາ [ຕມ຺ພຈູຬິກາ (ສີ.)];

ປມ຺ປກາ ຊີວໍຊີວາ ຈ, ອຸປຊີວນ຺ຕິ ຕໍ ສຣໍ.

໑໖໓. ‘‘ໂກສິກາ ໂປຏ຺ຐສີສາ ຈ, ກຸຣຣາ ເສນກາ ພຫູ;

ມຫາກາຬາ ຈ ສກຸຓາ, ອຸປຊີວນ຺ຕິ ຕໍ ສຣໍ.

໑໖໔. ‘‘ປສທາ ຈ ວຣາຫາ ຈ, ຈມຣາ ຄຓ຺ຑກາ ພຫູ [ວກາ ເຠຣຓ຺ຑກາ ພຫູ (ສີ. ສ຺ຍາ.)];

ໂຣຫິຈ຺ຈາ ສຸກໂປຕາ [ສຸຕ຺ຕໂປຕາ (ສ຺ຍາ.)] ຈ, ອຸປຊີວນ຺ຕິ ຕໍ ສຣໍ.

໑໖໕. ‘‘ສີຫພ຺ຍຄ຺ຆາ ຈ ທີປີ ຈ, ອຈ຺ຉໂກກຕຣຈ຺ຉກາ;

ຕິຘາ ປຠິນ຺ນມາຕງ຺ຄາ, ອຸປຊີວນ຺ຕິ ຕໍ ສຣໍ.

໑໖໖. ‘‘ກິນ຺ນຣາ ວານຣາ ເຈວ, ອໂຖປິ ວນກມ຺ມິກາ;

ເຈຕາ ຈ ລຸທ຺ທກາ ເຈວ, ອຸປຊີວນ຺ຕິ ຕໍ ສຣໍ.

໑໖໗. ‘‘ຕິນ຺ທຸການິ ປິຍາລານິ, ມຘຸກາ ກາສຸມາຣໂຍ [ກາສມາຣິໂຍ (ສ຺ຍາ.)];

ຘຸວໍ ຜລານິ ຘາເຣນ຺ຕິ, ອວິທູເຣ ມມສ຺ສມໍ.

໑໖໘. ‘‘ໂກສມ຺ພາ [ໂກສຸມ຺ຠາ (ສີ. ສ຺ຍາ.)] ສຬລາ ນິມ຺ພາ [ສຬລາ ນີປາ (ສີ. ສ຺ຍາ.) ປນສາ ອມ຺ພາ (?)], ສາທຸຜລສມາຍຸຕາ;

ຘຸວໍ ຜລານິ ຘາເຣນ຺ຕິ, ອວິທູເຣ ມມສ຺ສມໍ.

໑໖໙. ‘‘ຫຣີຕກາ ອາມລກາ, ອມ຺ພຊມ຺ພຸວິຠີຕກາ;

ໂກລາ ຠລ຺ລາຕກາ ພິລ຺ລາ, ຜລານິ ຘາຣຍນ຺ຕິ ເຕ.

໑໗໐. ‘‘ອາລຸວາ ຈ ກຬມ຺ພາ ຈ, ພິຬາລີຕກ຺ກຬານິ ຈ;

ຊີວກາ ສຸຕກາ ເຈວ, ພຫຸກາ ມມ ອສ຺ສເມ.

໑໗໑. ‘‘ອສ຺ສມສ຺ສາວິທູຣມ຺ຫິ, ຕຬາກາສຸໍ ສຸນິມ຺ມິຕາ;

ອຈ຺ໂຉທກາ ສີຕຊລາ, ສຸປຕິຕ຺ຖາ ມໂນຣມາ.

໑໗໒. ‘‘ປທຸມຸປ຺ປລສຎ຺ຉນ຺ນາ, ປຸຓ຺ຑຣີກສມາຍຸຕາ;

ມນ຺ທາລເກຫິ ສຎ຺ຉນ຺ນາ, ທິພ຺ພຄນ຺ໂຘ ປວາຍຕິ.

໑໗໓. ‘‘ເອວໍ ສພ຺ພງ຺ຄສມ຺ປນ຺ເນ, ປຸປ຺ຜິເຕ ຜລິເຕ ວເນ;

ສຸກເຕ ອສ຺ສເມ ຣມ຺ເມ, ວິຫຣາມິ ອຫໍ ຕທາ.

໑໗໔. ‘‘ສີລວາ ວຕສມ຺ປນ຺ໂນ [ວຕ຺ຕສມ຺ປນ຺ໂນ (ສ຺ຍາ.)], ຌາຍີ ຌານຣໂຕ ສທາ;

ປຎ຺ຈາຠິຎ຺ຎາພລປ຺ປຕ຺ໂຕ, ສຸຣຸຈິ ນາມ ຕາປໂສ.

໑໗໕. ‘‘ຈຕຸວີສສຫສ຺ສານິ, ສິສ຺ສາ ມຍ຺ຫໍ ອຸປຏ຺ຐຫຸ;

ສພ຺ເພວ ພ຺ຣາຫ຺ມຓາ ເອເຕ, ຊາຕິມນ຺ໂຕ ຍສສ຺ສິໂນ.

໑໗໖. ‘‘ລກ຺ຂເຓ ອິຕິຫາເສ ຈ, ສນິຆຓ຺ຏຸສເກຏຸເຠ;

ປທກາ ເວຍ຺ຍາກຣຓາ, ສຘມ຺ເມ ປາຣມິໍ ຄຕາ.

໑໗໗. ‘‘ອຸປ຺ປາເຕສຸ ນິມິຕ຺ເຕສຸ, ລກ຺ຂເຓສຸ ຈ ໂກວິທາ;

ປຖພ຺ຍາ ຠູມນ຺ຕລິກ຺ເຂ, ມມ ສິສ຺ສາ ສຸສິກ຺ຂິຕາ.

໑໗໘. ‘‘ອປ຺ປິຈ຺ຉາ ນິປກາ ເອເຕ, ອປ຺ປາຫາຣາ ອໂລລຸປາ;

ລາຠາລາເຠນ ສນ຺ຕຸຏ຺ຐາ, ປຣິວາເຣນ຺ຕິ ມໍ ສທາ.

໑໗໙. ‘‘ຌາຍີ ຌານຣຕາ ຘີຣາ, ສນ຺ຕຈິຕ຺ຕາ ສມາຫິຕາ;

ອາກິຎ຺ຈຎ຺ຎໍ ປຕ຺ຖຍນ຺ຕາ, ປຣິວາເຣນ຺ຕິ ມໍ ສທາ.

໑໘໐. ‘‘ອຠິຎ຺ຎາປາຣມິປ຺ປຕ຺ຕາ, ເປຕ຺ຕິເກ ໂຄຈເຣ ຣຕາ;

ອນ຺ຕລິກ຺ຂຈຣາ ຘີຣາ, ປຣິວາເຣນ຺ຕິ ມໍ ສທາ.

໑໘໑. ‘‘ສໍວຸຕາ ຉສຸ ທ຺ວາເຣສຸ, ອເນຊາ ຣກ຺ຂິຕິນ຺ທ຺ຣິຍາ;

ອສໍສຏ຺ຐາ ຈ ເຕ ຘີຣາ, ມມ ສິສ຺ສາ ທຸຣາສທາ.

໑໘໒. ‘‘ປລ຺ລງ຺ເກນ ນິສຊ຺ຊາຍ, ຐານຈງ຺ກມເນນ ຈ;

ວີຕິນາເມນ຺ຕິ ເຕ ຣຕ຺ຕິໍ, ມມ ສິສ຺ສາ ທຸຣາສທາ.

໑໘໓. ‘‘ຣຊນີເຍ ນ ຣຊ຺ຊນ຺ຕິ, ທຸສ຺ສນີເຍ ນ ທຸສ຺ສເຣ;

ໂມຫນີເຍ ນ ມຸຍ຺ຫນ຺ຕິ, ມມ ສິສ຺ສາ ທຸຣາສທາ.

໑໘໔. ‘‘ອິທ຺ຘິໍ ວີມໍສມານາ ເຕ, ວຕ຺ຕນ຺ຕິ ນິຈ຺ຈກາລິກໍ;

ປຖວິໍ [ປຐວິໍ (ສີ. ສ຺ຍາ.)] ເຕ ປກມ຺ເປນ຺ຕິ, ສາຣມ຺ເຠນ ທຸຣາສທາ.

໑໘໕. ‘‘ກີຬມານາ ຈ ເຕ ສິສ຺ສາ, ກີຬນ຺ຕິ ຌານກີຬິຕໍ;

ຊມ຺ພຸໂຕ ຜລມາເນນ຺ຕິ, ມມ ສິສ຺ສາ ທຸຣາສທາ.

໑໘໖. ‘‘ອຎ຺ເຎ ຄຈ຺ຉນ຺ຕິ ໂຄຍານໍ, ອຎ຺ເຎ ປຸພ຺ພວິເທຫກໍ [ປຸພ຺ພວິເທຫນໍ (ສ຺ຍາ. ກ.)];

ອຎ຺ເຎ ຈ ອຸຕ຺ຕຣກຸຣຸໍ, ເອສນາຍ ທຸຣາສທາ.

໑໘໗. ‘‘ປຸຣໂຕ ເປເສນ຺ຕິ ຂາຣິໍ, ປຈ຺ຉໂຕ ຈ ວຊນ຺ຕິ ເຕ;

ຈຕຸວີສສຫສ຺ເສຫິ, ຉາທິຕໍ ໂຫຕິ ອມ຺ພຣໍ.

໑໘໘. ‘‘ອຄ຺ຄິປາກີ ອນຄ຺ຄີ ຈ, ທນ຺ໂຕທຸກ຺ຂລິກາປິ ຈ;

ອສ຺ເມນ ໂກຏ຺ຏິຕາ ເກຈິ, ປວຕ຺ຕຜລໂຠຊນາ.

໑໘໙. ‘‘ອຸທໂກໂຣຫຓາ ເກຈິ, ສາຍໍ ປາໂຕ ສຸຈີຣຕາ;

ໂຕຍາຠິເສຈນກຣາ, ມມ ສິສ຺ສາ ທຸຣາສທາ.

໑໙໐. ‘‘ປຣູຬ຺ຫກຈ຺ຉນຂໂລມາ, ປງ຺ກທນ຺ຕາ ຣຊສ຺ສິຣາ;

ຄນ຺ຘິຕາ ສີລຄນ຺ເຘນ, ມມ ສິສ຺ສາ ທຸຣາສທາ.

໑໙໑. ‘‘ປາໂຕວ ສນ຺ນິປຕິຕ຺ວາ, ຊຏິລາ ອຸຄ຺ຄຕາປນາ;

ລາຠາລາຠໍ ປກິຕ຺ເຕຕ຺ວາ, ຄຈ຺ຉນ຺ຕິ ອມ຺ພເຣ ຕທາ.

໑໙໒. ‘‘ເອເຕສໍ ປກ຺ກມນ຺ຕານໍ, ມຫາສທ຺ໂທ ປວຕ຺ຕຕິ;

ອຊິນຈມ຺ມສທ຺ເທນ, ມຸທິຕາ ໂຫນ຺ຕິ ເທວຕາ.

໑໙໓. ‘‘ທິໂສທິສໍ ປກ຺ກມນ຺ຕິ, ອນ຺ຕລິກ຺ຂຈຣາ ອິສີ;

ສເກ ພເລນຸປຕ຺ຖທ຺ຘາ, ເຕ ຄຈ຺ຉນ຺ຕິ ຍທິຈ຺ຉກໍ.

໑໙໔. ‘‘ປຖວີກມ຺ປກາ ເອເຕ, ສພ຺ເພວ ນຠຈາຣິໂນ;

ອຸຄ຺ຄເຕຊາ ທຸປ຺ປສຫາ, ສາຄໂຣວ ອໂຂຠິຍາ.

໑໙໕. ‘‘ຐານຈງ຺ກມິໂນ ເກຈິ, ເກຈິ ເນສຊ຺ຊິກາ ອິສີ;

ປວຕ຺ຕໂຠຊນາ ເກຈິ, ມມ ສິສ຺ສາ ທຸຣາສທາ.

໑໙໖. ‘‘ເມຕ຺ຕາວິຫາຣິໂນ ເອເຕ, ຫິເຕສີ ສພ຺ພປາຓິນໍ;

ອນຕ຺ຕຸກ຺ກໍສກາ ສພ຺ເພ, ນ ເຕ ວມ຺ເຠນ຺ຕິ ກສ຺ສຈິ.

໑໙໗. ‘‘ສີຫຣາຊາວສມ຺ຠີຕາ, ຄຊຣາຊາວ ຖາມວາ;

ທຸຣາສທາ ພ຺ຍຄ຺ຆາຣິວ, ອາຄຈ຺ຉນ຺ຕິ ມມນ຺ຕິເກ.

໑໙໘. ‘‘ວິຊ຺ຊາຘຣາ ເທວຕາ ຈ, ນາຄຄນ຺ຘພ຺ພຣກ຺ຂສາ;

ກຸມ຺ຠຓ຺ຑາ ທານວາ ຄຣຸຬາ, ອຸປຊີວນ຺ຕິ ຕໍ ສຣໍ.

໑໙໙. ‘‘ເຕ ຊຏາຂາຣິຠຣິຕາ, ອຊິນຸຕ຺ຕຣວາສນາ;

ອນ຺ຕລິກ຺ຂຈຣາ ສພ຺ເພ, ອຸປຊີວນ຺ຕິ ຕໍ ສຣໍ.

໒໐໐. ‘‘ສທານຸຈ຺ຉວິກາ [ຕທານຸຈ຺ຉວິກາ (ສ຺ຍາ. ກ.)] ເອເຕ, ອຎ຺ຎມຎ຺ຎໍ ສຄາຣວາ;

ຈຕຸພ຺ພີສສຫສ຺ສານໍ, ຂິປິຕສທ຺ໂທ ນ ວິຊ຺ຊຕິ.

໒໐໑. ‘‘ປາເທ ປາທໍ ນິກ຺ຂິປນ຺ຕາ, ອປ຺ປສທ຺ທາ ສຸສໍວຸຕາ;

ອຸປສງ຺ກມ຺ມ ສພ຺ເພວ [ສພ຺ເພ ເຕ (ສ຺ຍາ.)], ສິຣສາ ວນ຺ທເຣ ມມໍ.

໒໐໒. ‘‘ເຕຫິ ສິສ຺ເສຫິ ປຣິວຸໂຕ, ສນ຺ເຕຫິ ຈ ຕປສ຺ສິຠິ;

ວສາມິ ອສ຺ສເມ ຕຕ຺ຖ, ຌາຍີ ຌານຣໂຕ ອຫໍ.

໒໐໓. ‘‘ອິສີນໍ ສີລຄນ຺ເຘນ, ປຸປ຺ຜຄນ຺ເຘນ ຈູຠຍໍ;

ຜລີນໍ ຜລຄນ຺ເຘນ, ຄນ຺ຘິໂຕ ໂຫຕິ ອສ຺ສໂມ.

໒໐໔. ‘‘ຣຕ຺ຕິນ຺ທິວໍ ນ ຊານາມິ, ອຣຕິ ເມ ນ ວິຊ຺ຊຕິ;

ສເກ ສິສ຺ເສ ໂອວທນ຺ໂຕ, ຠິຍ຺ໂຍ ຫາສໍ ລຠາມຫໍ.

໒໐໕. ‘‘ປຸປ຺ຜານໍ ປຸປ຺ຜມານານໍ, ຜລານຎ຺ຈ ວິປຈ຺ຈຕໍ;

ທິພ຺ພຄນ຺ຘາ ປວາຍນ຺ຕິ, ໂສຠຍນ຺ຕາ ມມສ຺ສມໍ.

໒໐໖. ‘‘ສມາຘິມ຺ຫາ ວຸຏ຺ຐຫິຕ຺ວາ, ອາຕາປີ ນິປໂກ ອຫໍ;

ຂາຣິຠາຣໍ ຄເຫຕ຺ວານ, ວນໍ ອຊ຺ໂຌຄຫິໍ ອຫໍ.

໒໐໗. ‘‘ອຸປ຺ປາເຕ ສຸປິເນ ຈາປິ, ລກ຺ຂເຓສຸ ສຸສິກ຺ຂິໂຕ;

ປວຕ຺ຕມານໍ [ວຕ຺ຕມານໍ (ກ.)] ມນ຺ຕປທໍ, ຘາຣຍາມິ ອຫໍ ຕທາ.

໒໐໘. ‘‘ອໂນມທສ຺ສີ ຠຄວາ, ໂລກເຊຏ຺ໂຐ ນຣາສໂຠ;

ວິເວກກາໂມ ສມ຺ພຸທ຺ໂຘ, ຫິມວນ຺ຕມຸປາຄມິ.

໒໐໙. ‘‘ອຊ຺ໂຌຄາເຫຕ຺ວາ ຫິມວນ຺ຕໍ, ອຄ຺ໂຄ ກາຣຸຓິໂກ ມຸນິ;

ປລ຺ລງ຺ກໍ ອາຠຸຊິຕ຺ວານ, ນິສີທິ ປຸຣິສຸຕ຺ຕໂມ.

໒໑໐. ‘‘ຕມທ຺ທສາຫໍ ສມ຺ພຸທ຺ຘໍ, ສປ຺ປຠາສໍ ມໂນຣມໍ;

ອິນ຺ທີວຣໍວ ຊລິຕໍ, ອາທິຕ຺ຕໍວ ຫຸຕາສນໍ.

໒໑໑. ‘‘ຊລນ຺ຕໍ ທີປຣຸກ຺ຂໍວ, ວິຊ຺ຊຸຕໍ ຄຄເຓ ຍຖາ;

ສຸຜຸລ຺ລໍ ສາລຣາຊໍວ, ອທ຺ທສໍ ໂລກນາຍກໍ.

໒໑໒. ‘‘ອຍໍ ນາໂຄ ມຫາວີໂຣ, ທຸກ຺ຂສ຺ສນ຺ຕກໂຣ ມຸນິ;

ອິມໍ ທສ຺ສນມາຄມ຺ມ, ສພ຺ພທຸກ຺ຂາ ປມຸຈ຺ຈເຣ.

໒໑໓. ‘‘ທິສ຺ວານາຫໍ ເທວເທວໍ, ລກ຺ຂຓໍ ອຸປຘາຣຍິໍ;

ພຸທ຺ໂຘ ນຸ ໂຂ ນ ວາ ພຸທ຺ໂຘ, ຫນ຺ທ ປສ຺ສາມິ ຈກ຺ຂຸມໍ.

໒໑໔. ‘‘ສຫສ຺ສາຣານິ ຈກ຺ການິ, ທິສ຺ສນ຺ຕິ ຈຣຓຸຕ຺ຕເມ;

ລກ຺ຂຓານິສ຺ສ ທິສ຺ວານ, ນິຏ຺ຐໍ ຄຈ຺ຉິໍ ຕຖາຄເຕ.