ສຕ຺ຕ ສມາຘິປຣິກ຺ຂາຣາ
໒໙໐. ‘‘‘ຕໍ ກິໍ ມຎ຺ຎນ຺ຕິ, ໂຠນ຺ໂຕ ເທວາ ຕາວຕິໍສາ, ຍາວ ສຸປຎ຺ຎຕ຺ຕາ ຈິເມ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ສຕ຺ຕ ສມາຘິປຣິກ຺ຂາຣາ ສມ຺ມາສມາຘິສ຺ສ ປຣິຠາວນາຍ ສມ຺ມາສມາຘິສ຺ສ ປາຣິປູຣິຍາ. ກຕເມ ສຕ຺ຕ? ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ. ຍາ ໂຂ, ໂຠ, ອິເມຫິ ສຕ຺ຕຫງ຺ເຄຫິ ຈິຕ຺ຕສ຺ສ ເອກຄ຺ຄຕາ ປຣິກ຺ຂຕາ, ອຍໍ ວຸຈ຺ຈຕິ, ໂຠ, ອຣິໂຍ ສມ຺ມາສມາຘິ ສອຸປນິໂສ ອິຕິປິ ສປຣິກ຺ຂາໂຣ ອິຕິປິ. ສມ຺ມາທິຏ຺ຐິສ຺ສ ໂຠ, ສມ຺ມາສງ຺ກປ຺ໂປ ປໂຫຕິ, ສມ຺ມາສງ຺ກປ຺ປສ຺ສ ສມ຺ມາວາຈາ ປໂຫຕິ, ສມ຺ມາວາຈສ຺ສ ສມ຺ມາກມ຺ມນ຺ໂຕ ປໂຫຕິ. ສມ຺ມາກມ຺ມນ຺ຕສ຺ສ ສມ຺ມາອາຊີໂວ ປໂຫຕິ, ສມ຺ມາອາຊີວສ຺ສ ສມ຺ມາວາຍາໂມ ປໂຫຕິ, ສມ຺ມາວາຍາມສ຺ສ ສມ຺ມາສຕິ ປໂຫຕິ, ສມ຺ມາສຕິສ຺ສ ສມ຺ມາສມາຘິ ປໂຫຕິ, ສມ຺ມາສມາຘິສ຺ສ ສມ຺ມາຎາຓໍ ປໂຫຕິ, ສມ຺ມາຎາຓສ຺ສ ສມ຺ມາວິມຸຕ຺ຕິ ປໂຫຕິ. ຍຎ຺ຫິ ຕໍ, ໂຠ, ສມ຺ມາ ວທມາໂນ ວເທຍ຺ຍ – ‘ສ຺ວາກ຺ຂາໂຕ ຠຄວຕາ ຘມ຺ໂມ ສນ຺ທິຏ຺ຐິໂກ ອກາລິໂກ ເອຫິປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫິ ອປາຣຸຕາ ອມຕສ຺ສ ທ຺ວາຣາ’ຕິ ອິທເມວ ຕໍ ສມ຺ມາ ວທມາໂນ ວເທຍ຺ຍ. ສ຺ວາກ຺ຂາໂຕ ຫິ, ໂຠ, ຠຄວຕາ ຘມ຺ໂມ ສນ຺ທິຏ຺ຐິໂກ, ອກາລິໂກ ເອຫິປສ຺ສິໂກ ໂອປເນຍ຺ຍິໂກ ປຈ຺ຈຕ຺ຕໍ ເວທິຕພ຺ໂພ ວິຎ຺ຎູຫິ ອປາຣຸຕາ ອມຕສ຺ສ ທ຺ວາຣາ [ທ຺ວາຣາຕິ (ສ຺ຍາ. ກ.)].
‘‘‘ເຍ ຫິ ເກຈິ, ໂຠ, ພຸທ຺ເຘ ອເວຈ຺ຈປ຺ປສາເທນ ສມນ຺ນາຄຕາ, ຘມ຺ເມ ອເວຈ຺ຈປ຺ປສາເທນ ສມນ຺ນາຄຕາ, ສງ຺ເຆ ອເວຈ຺ຈປ຺ປສາເທນ ສມນ຺ນາຄຕາ, ອຣິຍກນ຺ເຕຫິ ສີເລຫິ ສມນ຺ນາຄຕາ, ເຍ ຈິເມ ໂອປປາຕິກາ ຘມ຺ມວິນີຕາ ສາຕິເຣການິ ຈຕຸວີສຕິສຕສຫສ຺ສານິ ມາຄຘກາ ປຣິຈາຣກາ ອພ຺ຠຕີຕາ ກາລງ຺ກຕາ ຕິຓ຺ຓໍ ສໍໂຍຊນານໍ ປຣິກ຺ຂຍາ ໂສຕາປນ຺ນາ ອວິນິປາຕຘມ຺ມາ ນິຍຕາ ສມ຺ໂພຘິປຣາຍຓາ. ອຕ຺ຖິ ເຈເວຕ຺ຖ ສກທາຄາມິໂນ.
‘‘ອຕ຺ຖາຍໍ [ອຖາຍໍ (ສີ. ສ຺ຍາ.)] ອິຕຣາ ປຊາ, ປຸຎ຺ຎາຠາຄາຕິ ເມ ມໂນ;
ສງ຺ຂາຕຸໍ ໂນປິ ສກ຺ໂກມິ, ມຸສາວາທສ຺ສ ໂອຕ຺ຕປ຺ປ’’ນ຺ຕິ.
໒໙໑. ‘ອິມມຕ຺ຖໍ, ຠນ຺ເຕ, ພ຺ຣຫ຺ມາ ສນງ຺ກຸມາໂຣ ຠາສິຕ຺ຖ, ອິມມຕ຺ຖໍ, ຠນ຺ເຕ, ພ຺ຣຫ຺ມຸໂນ ສນງ຺ກຸມາຣສ຺ສ ຠາສໂຕ ເວສ຺ສວຓສ຺ສ ມຫາຣາຊສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທິ – ‘‘ອຈ຺ຉຣິຍໍ ວຕ ໂຠ, ອພ຺ຠຸຕໍ ວຕ ໂຠ, ເອວຣູໂປປິ ນາມ ອຸຬາໂຣ ສຕ຺ຖາ ຠວິສ຺ສຕິ, ເອວຣູປໍ ອຸຬາຣໍ ຘມ຺ມກ຺ຂານໍ, ເອວຣູປາ ອຸຬາຣາ ວິເສສາຘິຄມາ ປຎ຺ຎາຍິສ຺ສນ຺ຕີ’’ຕິ. ອຖ, ຠນ຺ເຕ, ພ຺ຣຫ຺ມາ ສນງ຺ກຸມາໂຣ ເວສ຺ສວຓສ຺ສ ມຫາຣາຊສ຺ສ ເຈຕສາ ເຈໂຕປຣິວິຕກ຺ກມຎ຺ຎາຍ ເວສ຺ສວຓໍ ມຫາຣາຊານໍ ເອຕທໂວຈ – ‘‘ຕໍ ກິໍ ມຎ຺ຎຕິ ຠວໍ ເວສ຺ສວໂຓ ມຫາຣາຊາ ອຕີຕມ຺ປິ ອທ຺ຘານໍ ເອວຣູໂປ ອຸຬາໂຣ ສຕ຺ຖາ ອໂຫສິ, ເອວຣູປໍ ອຸຬາຣໍ ຘມ຺ມກ຺ຂານໍ, ເອວຣູປາ ອຸຬາຣາ ວິເສສາຘິຄມາ ປຎ຺ຎາຍິໍສຸ. ອນາຄຕມ຺ປິ ອທ຺ຘານໍ ເອວຣູໂປ ອຸຬາໂຣ ສຕ຺ຖາ ຠວິສ຺ສຕິ, ເອວຣູປໍ ອຸຬາຣໍ ຘມ຺ມກ຺ຂານໍ, ເອວຣູປາ ອຸຬາຣາ ວິເສສາຘິຄມາ ປຎ຺ຎາຍິສ຺ສນ຺ຕີ’’’ຕິ.
໒໙໒. ‘‘‘ອິມມຕ຺ຖໍ, ຠນ຺ເຕ, ພ຺ຣຫ຺ມາ ສນງ຺ກຸມາໂຣ ເທວານໍ ຕາວຕິໍສານໍ ອຠາສິ, ອິມມຕ຺ຖໍ ເວສ຺ສວໂຓ ມຫາຣາຊາ ພ຺ຣຫ຺ມຸໂນ ສນງ຺ກຸມາຣສ຺ສ ເທວານໍ ຕາວຕິໍສານໍ ຠາສໂຕ ສມ຺ມຸຂາ ສຸຕໍ [ສຸຕ຺ວາ (ສີ. ປີ.)] ສມ຺ມຸຂາ ປຏິຄ຺ຄຫິຕໍ ສຍໍ ປຣິສາຍໍ ອາໂຣເຈສິ’’.
ອິມມຕ຺ຖໍ ຊນວສໂຠ ຍກ຺ໂຂ ເວສ຺ສວຓສ຺ສ ມຫາຣາຊສ຺ສ ສຍໍ ປຣິສາຍໍ ຠາສໂຕ ສມ຺ມຸຂາ ສຸຕໍ ສມ຺ມຸຂາ ປຏິຄ຺ຄຫິຕໍ [ປຏິຄ຺ຄເຫຕ຺ວາ (ສີ. ປີ.)] ຠຄວໂຕ ອາໂຣເຈສິ. ອິມມຕ຺ຖໍ ຠຄວາ ຊນວສຠສ຺ສ ຍກ຺ຂສ຺ສ ສມ຺ມຸຂາ ສຸຕ຺ວາ ສມ຺ມຸຂາ ປຏິຄ຺ຄເຫຕ຺ວາ ສາມຎ຺ຈ ອຠິຎ຺ຎາຍ ອາຍສ຺ມໂຕ ອານນ຺ທສ຺ສ ອາໂຣເຈສິ, ອິມມຕ຺ຖມາຍສ຺ມາ ອານນ຺ໂທ ຠຄວໂຕ ສມ຺ມຸຂາ ສຸຕ຺ວາ ສມ຺ມຸຂາ ປຏິຄ຺ຄເຫຕ຺ວາ ອາໂຣເຈສິ ຠິກ຺ຂູນໍ ຠິກ຺ຂຸນີນໍ ອຸປາສການໍ ອຸປາສິການໍ. ຕຍິທໍ ພ຺ຣຫ຺ມຈຣິຍໍ ອິທ຺ຘຎ຺ເຈວ ຜີຕຎ຺ຈ ວິຕ຺ຖາຣິກໍ ພາຫຸຊຎ຺ຎໍ ປຸຖຸຠູຕໍ ຍາວ ເທວມນຸສ຺ເສຫິ ສຸປ຺ປກາສິຕນ຺ຕິ.
ຊນວສຠສຸຕ຺ຕໍ ນິຏ຺ຐິຕໍ ປຎ຺ຈມໍ.