ຈຕຸສຕິປຏ຺ຐານໍ

໒໘໙. ‘‘‘ຕໍ ກິໍ ມຎ຺ຎນ຺ຕິ, ໂຠນ຺ໂຕ ເທວາ ຕາວຕິໍສາ, ຍາວ ສຸປຎ຺ຎຕ຺ຕາ ຈິເມ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ຈຕ຺ຕາໂຣ ສຕິປຏ຺ຐານາ ປຎ຺ຎຕ຺ຕາ ກຸສລສ຺ສາຘິຄມາຍ. ກຕເມ ຈຕ຺ຕາໂຣ? ອິຘ, ໂຠ, ຠິກ຺ຂຸ ອຊ຺ຌຕ຺ຕໍ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ອຊ຺ຌຕ຺ຕໍ ກາເຍ ກາຍານຸປສ຺ສີ ວິຫຣນ຺ໂຕ ຕຕ຺ຖ ສມ຺ມາ ສມາຘິຍຕິ, ສມ຺ມາ ວິປ຺ປສີທຕິ. ໂສ ຕຕ຺ຖ ສມ຺ມາ ສມາຫິໂຕ ສມ຺ມາ ວິປ຺ປສນ຺ໂນ ພຫິທ຺ຘາ ປຣກາເຍ ຎາຓທສ຺ສນໍ ອຠິນິພ຺ພຕ຺ເຕຕິ. ອຊ຺ຌຕ຺ຕໍ ເວທນາສຸ ເວທນານຸປສ຺ສີ ວິຫຣຕິ…ເປ… ພຫິທ຺ຘາ ປຣເວທນາສຸ ຎາຓທສ຺ສນໍ ອຠິນິພ຺ພຕ຺ເຕຕິ. ອຊ຺ຌຕ຺ຕໍ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ…ເປ… ພຫິທ຺ຘາ ປຣຈິຕ຺ເຕ ຎາຓທສ຺ສນໍ ອຠິນິພ຺ພຕ຺ເຕຕິ. ອຊ຺ຌຕ຺ຕໍ ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ອຊ຺ຌຕ຺ຕໍ ຘມ຺ເມສຸ ຘມ຺ມານຸປສ຺ສີ ວິຫຣນ຺ໂຕ ຕຕ຺ຖ ສມ຺ມາ ສມາຘິຍຕິ, ສມ຺ມາ ວິປ຺ປສີທຕິ. ໂສ ຕຕ຺ຖ ສມ຺ມາ ສມາຫິໂຕ ສມ຺ມາ ວິປ຺ປສນ຺ໂນ ພຫິທ຺ຘາ ປຣຘມ຺ເມສຸ ຎາຓທສ຺ສນໍ ອຠິນິພ຺ພຕ຺ເຕຕິ. ອິເມ ໂຂ, ໂຠ, ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ຈຕ຺ຕາໂຣ ສຕິປຏ຺ຐານາ ປຎ຺ຎຕ຺ຕາ ກຸສລສ຺ສາຘິຄມາຍາ’’ຕິ. ອິມມຕ຺ຖໍ, ຠນ຺ເຕ, ພ຺ຣຫ຺ມາ ສນງ຺ກຸມາໂຣ ຠາສິຕ຺ຖ. ອິມມຕ຺ຖໍ, ຠນ຺ເຕ, ພ຺ຣຫ຺ມາ ສນງ຺ກຸມາໂຣ ຠາສິຕ຺ວາ ເທເວ ຕາວຕິໍເສ ອາມນ຺ເຕສິ –