ຕິວິໂຘ ໂອກາສາຘິຄໂມ

໒໘໘. ‘‘‘ຕໍ ກິໍ ມຎ຺ຎນ຺ຕິ, ໂຠນ຺ໂຕ ເທວາ ຕາວຕິໍສາ, ຍາວຎ຺ຈິທໍ ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ຕໂຍ ໂອກາສາຘິຄມາ ອນຸພຸທ຺ຘາ ສຸຂສ຺ສາຘິຄມາຍ. ກຕເມ ຕໂຍ? ອິຘ ໂຠ ເອກຈ຺ໂຈ ສໍສຏ຺ໂຐ ວິຫຣຕິ ກາເມຫິ ສໍສຏ຺ໂຐ ອກຸສເລຫິ ຘມ຺ເມຫິ. ໂສ ອປເຣນ ສມເຍນ ອຣິຍຘມ຺ມໍ ສຸຓາຕິ, ໂຍນິໂສ ມນສິ ກໂຣຕິ, ຘມ຺ມານຸຘມ຺ມໍ ປຏິປຊ຺ຊຕິ. ໂສ ອຣິຍຘມ຺ມສ຺ສວນໍ ອາຄມ຺ມ ໂຍນິໂສມນສິກາຣໍ ຘມ຺ມານຸຘມ຺ມປ຺ປຏິປຕ຺ຕິໍ ອສໍສຏ຺ໂຐ ວິຫຣຕິ ກາເມຫິ ອສໍສຏ຺ໂຐ ອກຸສເລຫິ ຘມ຺ເມຫິ. ຕສ຺ສ ອສໍສຏ຺ຐສ຺ສ ກາເມຫິ ອສໍສຏ຺ຐສ຺ສ ອກຸສເລຫິ ຘມ຺ເມຫິ ອຸປ຺ປຊ຺ຊຕິ ສຸຂໍ, ສຸຂາ ຠິຍ຺ໂຍ ໂສມນສ຺ສໍ. ເສຍ຺ຍຖາປິ, ໂຠ, ປມຸທາ ປາໂມຊ຺ຊໍ [ປາມຸຊ຺ຊໍ (ປີ. ກ.)] ຊາເຍຖ, ເອວເມວ ໂຂ, ໂຠ, ອສໍສຏ຺ຐສ຺ສ ກາເມຫິ ອສໍສຏ຺ຐສ຺ສ ອກຸສເລຫິ ຘມ຺ເມຫິ ອຸປ຺ປຊ຺ຊຕິ ສຸຂໍ, ສຸຂາ ຠິຍ຺ໂຍ ໂສມນສ຺ສໍ. ອຍໍ ໂຂ, ໂຠ, ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ປຐໂມ ໂອກາສາຘິຄໂມ ອນຸພຸທ຺ໂຘ ສຸຂສ຺ສາຘິຄມາຍ.

‘‘‘ປຸນ ຈປຣໍ, ໂຠ, ອິເຘກຈ຺ຈສ຺ສ ໂອຬາຣິກາ ກາຍສງ຺ຂາຣາ ອປ຺ປຏິປ຺ປສ຺ສທ຺ຘາ ໂຫນ຺ຕິ, ໂອຬາຣິກາ ວຈີສງ຺ຂາຣາ ອປ຺ປຏິປ຺ປສ຺ສທ຺ຘາ ໂຫນ຺ຕິ, ໂອຬາຣິກາ ຈິຕ຺ຕສງ຺ຂາຣາ ອປ຺ປຏິປ຺ປສ຺ສທ຺ຘາ ໂຫນ຺ຕິ. ໂສ ອປເຣນ ສມເຍນ ອຣິຍຘມ຺ມໍ ສຸຓາຕິ, ໂຍນິໂສ ມນສິ ກໂຣຕິ, ຘມ຺ມານຸຘມ຺ມໍ ປຏິປຊ຺ຊຕິ. ຕສ຺ສ ອຣິຍຘມ຺ມສ຺ສວນໍ ອາຄມ຺ມ ໂຍນິໂສມນສິກາຣໍ ຘມ຺ມານຸຘມ຺ມປ຺ປຏິປຕ຺ຕິໍ ໂອຬາຣິກາ ກາຍສງ຺ຂາຣາ ປຏິປ຺ປສ຺ສມ຺ຠນ຺ຕິ, ໂອຬາຣິກາ ວຈີສງ຺ຂາຣາ ປຏິປ຺ປສ຺ສມ຺ຠນ຺ຕິ, ໂອຬາຣິກາ ຈິຕ຺ຕສງ຺ຂາຣາ ປຏິປ຺ປສ຺ສມ຺ຠນ຺ຕິ. ຕສ຺ສ ໂອຬາຣິການໍ ກາຍສງ຺ຂາຣານໍ ປຏິປ຺ປສ຺ສທ຺ຘິຍາ ໂອຬາຣິການໍ ວຈີສງ຺ຂາຣານໍ ປຏິປ຺ປສ຺ສທ຺ຘິຍາ ໂອຬາຣິການໍ ຈິຕ຺ຕສງ຺ຂາຣານໍ ປຏິປ຺ປສ຺ສທ຺ຘິຍາ ອຸປ຺ປຊ຺ຊຕິ ສຸຂໍ, ສຸຂາ ຠິຍ຺ໂຍ ໂສມນສ຺ສໍ. ເສຍ຺ຍຖາປິ, ໂຠ, ປມຸທາ ປາໂມຊ຺ຊໍ ຊາເຍຖ, ເອວເມວ ໂຂ ໂຠ ໂອຬາຣິການໍ ກາຍສງ຺ຂາຣານໍ ປຏິປ຺ປສ຺ສທ຺ຘິຍາ ໂອຬາຣິການໍ ວຈີສງ຺ຂາຣານໍ ປຏິປ຺ປສ຺ສທ຺ຘິຍາ ໂອຬາຣິການໍ ຈິຕ຺ຕສງ຺ຂາຣານໍ ປຏິປ຺ປສ຺ສທ຺ຘິຍາ ອຸປ຺ປຊ຺ຊຕິ ສຸຂໍ, ສຸຂາ ຠິຍ຺ໂຍ ໂສມນສ຺ສໍ. ອຍໍ ໂຂ, ໂຠ, ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ທຸຕິໂຍ ໂອກາສາຘິຄໂມ ອນຸພຸທ຺ໂຘ ສຸຂສ຺ສາຘິຄມາຍ.

‘‘‘ປຸນ ຈປຣໍ, ໂຠ, ອິເຘກຈ຺ໂຈ ‘ອິທໍ ກຸສລ’ນ຺ຕິ ຍຖາຠູຕໍ ນປ຺ປຊານາຕິ, ‘ອິທໍ ອກຸສລ’ນ຺ຕິ ຍຖາຠູຕໍ ນປ຺ປຊານາຕິ. ‘ອິທໍ ສາວຊ຺ຊໍ ອິທໍ ອນວຊ຺ຊໍ, ອິທໍ ເສວິຕພ຺ພໍ ອິທໍ ນ ເສວິຕພ຺ພໍ, ອິທໍ ຫີນໍ ອິທໍ ປຓີຕໍ, ອິທໍ ກຓ຺ຫສຸກ຺ກສປ຺ປຏິຠາຄ’ນ຺ຕິ ຍຖາຠູຕໍ ນປ຺ປຊານາຕິ. ໂສ ອປເຣນ ສມເຍນ ອຣິຍຘມ຺ມໍ ສຸຓາຕິ, ໂຍນິໂສ ມນສິ ກໂຣຕິ, ຘມ຺ມານຸຘມ຺ມໍ ປຏິປຊ຺ຊຕິ. ໂສ ອຣິຍຘມ຺ມສ຺ສວນໍ ອາຄມ຺ມ ໂຍນິໂສມນສິກາຣໍ ຘມ຺ມານຸຘມ຺ມປ຺ປຏິປຕ຺ຕິໍ, ‘ອິທໍ ກຸສລ’ນ຺ຕິ ຍຖາຠູຕໍ ປຊານາຕິ, ‘ອິທໍ ອກຸສລ’ນ຺ຕິ ຍຖາຠູຕໍ ປຊານາຕິ. ອິທໍ ສາວຊ຺ຊໍ ອິທໍ ອນວຊ຺ຊໍ, ອິທໍ ເສວິຕພ຺ພໍ ອິທໍ ນ ເສວິຕພ຺ພໍ, ອິທໍ ຫີນໍ ອິທໍ ປຓີຕໍ, ອິທໍ ກຓ຺ຫສຸກ຺ກສປ຺ປຏິຠາຄ’ນ຺ຕິ ຍຖາຠູຕໍ ປຊານາຕິ. ຕສ຺ສ ເອວໍ ຊານໂຕ ເອວໍ ປສ຺ສໂຕ ອວິຊ຺ຊາ ປຫີຍຕິ, ວິຊ຺ຊາ ອຸປ຺ປຊ຺ຊຕິ. ຕສ຺ສ ອວິຊ຺ຊາວິຣາຄາ ວິຊ຺ຊຸປ຺ປາທາ ອຸປ຺ປຊ຺ຊຕິ ສຸຂໍ, ສຸຂາ ຠິຍ຺ໂຍ ໂສມນສ຺ສໍ. ເສຍ຺ຍຖາປິ, ໂຠ, ປມຸທາ ປາໂມຊ຺ຊໍ ຊາເຍຖ, ເອວເມວ ໂຂ, ໂຠ, ອວິຊ຺ຊາວິຣາຄາ ວິຊ຺ຊຸປ຺ປາທາ ອຸປ຺ປຊ຺ຊຕິ ສຸຂໍ, ສຸຂາ ຠິຍ຺ໂຍ ໂສມນສ຺ສໍ. ອຍໍ ໂຂ, ໂຠ, ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ຕຕິໂຍ ໂອກາສາຘິຄໂມ ອນຸພຸທ຺ໂຘ ສຸຂສ຺ສາຘິຄມາຍ. ອິເມ ໂຂ, ໂຠ, ເຕນ ຠຄວຕາ ຊານຕາ ປສ຺ສຕາ ອຣຫຕາ ສມ຺ມາສມ຺ພຸທ຺ເຘນ ຕໂຍ ໂອກາສາຘິຄມາ ອນຸພຸທ຺ຘາ ສຸຂສ຺ສາຘິຄມາຍາ’’ຕິ. ອິມມຕ຺ຖໍ, ຠນ຺ເຕ, ພ຺ຣຫ຺ມາ ສນງ຺ກຸມາໂຣ ຠາສິຕ຺ຖ, ອິມມຕ຺ຖໍ, ຠນ຺ເຕ, ພ຺ຣຫ຺ມາ ສນງ຺ກຸມາໂຣ ຠາສິຕ຺ວາ ເທເວ ຕາວຕິໍເສ ອາມນ຺ເຕສິ –