ທຸຕິຍຄາຖາສງ຺ຄຓິກໍ

ໂຈທນາທິປຸຈ຺ຉາວິສ຺ສຊ຺ຊນາວຓ຺ຓນາ

໓໕໙. ທຸຕິຍຄາຖາສງ຺ຄຓິຍໍ ໂຈທນາຕິ ວຕ຺ຖຸຎ຺ຈ ອາປຕ຺ຕິຎ຺ຈ ທສ຺ເສຕ຺ວາ ໂຈທນາ. ສາຣຓາຕິ ໂທສສາຣຓາ. ສງ຺ໂຆ ກິມຕ຺ຖາຍາຕິ ສງ຺ຆສນ຺ນິປາໂຕ ກິມຕ຺ຖາຍ. ມຕິກມ຺ມໍ ປນ ກິສ຺ສ ກາຣຓາຕິ ມຕິກມ຺ມໍ ວຸຈ຺ຈຕິ ມນ຺ຕຄ຺ຄຫຓໍ; ຕໍ ກິສ຺ສ ກາຣຓາຕິ ອຕ຺ໂຖ.

ໂຈທນາ ສາຣຓຕ຺ຖາຍາຕິ ວຸຕ຺ຕປ຺ປກາຣາ ໂຈທນາ, ເຕນ ຈຸທິຕກປຸຄ຺ຄເລນ ໂຈທກໂທສສາຣຓຕ຺ຖາຍ. ນິຄ຺ຄຫຕ຺ຖາຍ ສາຣຓາຕິ ໂທສສາຣຓາ ປນ ຕສ຺ສ ປຸຄ຺ຄລສ຺ສ ນິຄ຺ຄຫຕ຺ຖາຍ. ສງ຺ໂຆ ປຣິຄ຺ຄຫຕ຺ຖາຍາຕິ ຕຕ຺ຖ ສນ຺ນິປຕິໂຕ ສງ຺ໂຆ ວິນິຈ຺ຉຍປຣິຄ຺ຄຫຓຕ຺ຖາຍ; ຘມ຺ມາຘມ຺ມໍ ຕຸລນຕ຺ຖາຍ ສຸວິນິຈ຺ຉິຕທຸພ຺ພິນິຈ຺ຉິຕໍ ຊານນຕ຺ຖາຍາຕິ ອຕ຺ໂຖ. ມຕິກມ຺ມໍ ປນ ປາຏິເຍກ຺ກນ຺ຕິ ສຸຕ຺ຕນ຺ຕິກຕ຺ເຖຣານຎ຺ຈ ວິນຍຘຣຕ຺ເຖຣານຎ຺ຈ ມນ຺ຕຄ຺ຄຫຓໍ ປາເຏກ຺ກໍ ປາເຏກ຺ກໍ ວິນິຈ຺ຉຍສນ຺ນິຏ຺ຐາປນຕ຺ຖໍ.

ມາ ໂຂ ປຏິຆນ຺ຕິ ຈຸທິຕເກ ວາ ໂຈທເກ ວາ ໂກປໍ ມາ ຊນຍິ. ສເຈ ອນຸວິຊ຺ຊໂກ ຕຸວນ຺ຕິ ສເຈ ຕ຺ວໍ ສງ຺ຆມຊ຺ເຌ ໂອຕິຓ຺ຓໍ ອຘິກຣຓໍ ວິນິຈ຺ຉິຕຸໍ ນິສິນ຺ໂນ ວິນຍຘໂຣ.

ວິຄ຺ຄາຫິກນ຺ຕິ ‘‘ນ ຕ຺ວໍ ອິມໍ ຘມ຺ມວິນຍໍ ອາຊານາສີ’’ຕິອາທິນຍປ຺ປວຕ຺ຕໍ. ອນຕ຺ຖສໍຫິຕນ຺ຕິ ຍາ ອນຕ຺ຖໍ ຊນຍຕິ, ປຣິສໍ ໂຂເຠຕ຺ວາ ອຸຏ຺ຐາເປຕິ, ເອວຣູປິໍ ກຖໍ ມາ ອຠຓິ. ສຸຕ຺ເຕ ວິນເຍ ວາຕິອາທີສຸ ສຸຕ຺ຕໍ ນາມ ອຸຠໂຕວິຠງ຺ໂຄ. ວິນໂຍ ນາມ ຂນ຺ຘໂກ. ອນຸໂລໂມ ນາມ ປຣິວາໂຣ. ປຎ຺ຎຕ຺ຕໍ ນາມ ສກລໍ ວິນຍປິຏກໍ. ອນຸໂລມິກໍ ນາມ ຈຕ຺ຕາໂຣ ມຫາປເທສາ.

ອນຸໂຍຄວຕ຺ຕໍ ນິສາມຍາຕິ ອນຸຍຸຎ຺ຊນວຕ຺ຕໍ ນິສາເມຫິ. ກຸສເລນ ພຸທ຺ຘິມຕາ ກຕນ຺ຕິ ເຉເກນ ປຓ຺ຑິເຕນ ຎາຓປາຣມິປ຺ປຕ຺ເຕນ ຠຄວຕາ ນີຫຣິຕ຺ວາ ຐປິຕໍ. ສຸວຸຕ຺ຕນ຺ຕິ ສຸປຎ຺ຎາປິຕໍ. ສິກ຺ຂາປທານຸໂລມິກນ຺ຕິ ສິກ຺ຂາປທານໍ ອນຸໂລມໍ. ອຍໍ ຕາວ ປທຕ຺ໂຖ, ອຍໍ ປເນຕ຺ຖ ສາຘິປ຺ປາຍສງ຺ເຂປວຓ຺ຓນາ – ‘‘ສເຈ ຕ຺ວໍ ອນຸວິຊ຺ຊໂກ, ມາ ສຫສາ ຠຓິ, ມາ ອນຕ຺ຖສໍຫິຕໍ ວິຄ຺ຄາຫິກກຖໍ ຠຓິ. ຍໍ ປນ ກຸສເລນ ພຸທ຺ຘິມຕາ ໂລກນາເຖນ ເອເຕສຸ ສຸຕ຺ຕາທີສຸ ອນຸໂຍຄວຕ຺ຕໍ ກຖໍ ສຸປຎ຺ຎຕ຺ຕໍ ສພ຺ພສິກ຺ຂາປທານໍ ອນຸໂລມໍ, ຕໍ ນິສາມຍ ຕໍ ອຸປຘາເຣຫີ’’ຕິ. ຄຕິໍ ນ ນາເສນ຺ໂຕ ສມ຺ປຣາຍິກນ຺ຕິ ອຕ຺ຕໂນ ສມ຺ປຣາເຍ ສຸຄຕິນິພ຺ພຕ຺ຕິໍ ອນາເສນ຺ໂຕ ອນຸໂຍຄວຕ຺ຕໍ ນິສາມຍ. ໂຍ ຫິ ຕໍ ອນິສາເມຕ຺ວາ ອນຸຍຸຎ຺ຊຕິ, ໂສ ສມ຺ປຣາຍິກໍ ອຕ຺ຕໂນ ຄຕິໍ ນາເສຕິ, ຕສ຺ມາ ຕ຺ວໍ ອນາເສນ຺ໂຕ ນິສາມຍາຕິ ອຕ຺ໂຖ. ອິທານິ ຕໍ ອນຸໂຍຄວຕ຺ຕໍ ທສ຺ເສຕຸໍ ຫິເຕສີຕິອາທິມາຫ. ຕຕ຺ຖ ຫິເຕສີຕິ ຫິຕໍ ເອສນ຺ໂຕ ຄເວສນ຺ໂຕ; ເມຕ຺ຕຎ຺ຈ ເມຕ຺ຕາປຸພ຺ພຠາຄຎ຺ຈ ອຸປຏ຺ຐເປຕ຺ວາຕິ ອຕ຺ໂຖ. ກາເລນາຕິ ຍຸຕ຺ຕປຕ຺ຕກາເລນ; ອຊ຺ເຌສິຕກາເລເຍວ ຕວ ຠາເຣ ກເຕ ອນຸຍຸຎ຺ຊາຕິ ອຕ຺ໂຖ.

ສຫສາ ໂວຫາຣໍ ມາ ປຘາເຣສີຕິ ໂຍ ເອເຕສໍ ສຫສາ ໂວຫາໂຣ ໂຫຕິ, ສຫສາ ຠາສິຕໍ, ຕໍ ມາ ປຘາເຣສິ, ມາ ຄຓ຺ຫິຕ຺ຖ.

ປຏິຎ຺ຎານຸສນ຺ຘິເຕນ ກາຣເຍຕິ ເອຕ຺ຖ ອນຸສນ຺ຘິຕນ຺ຕິ ກຖານຸສນ຺ຘິ ວຸຈ຺ຈຕິ, ຕສ຺ມາ ປຏິຎ຺ຎານຸສນ຺ຘິນາ ກາຣເຍ; ກຖານຸສນ຺ຘິໍ ສລ຺ລກ຺ເຂຕ຺ວາ ປຏິຎ຺ຎາຍ ກາຣເຍຕິ ອຕ຺ໂຖ. ອຖ ວາ ປຏິຎ຺ຎາຍ ຈ ອນຸສນ຺ຘິເຕນ ຈ ກາຣເຍ, ລຊ຺ຊິໍ ປຏິຎ຺ຎາຍ ກາຣເຍ; ອລຊ຺ຊິໍ ວຕ຺ຕານຸສນ຺ຘິນາຕິ ອຕ຺ໂຖ. ຕສ຺ມາ ເອວ ປຏິຎ຺ຎາ ລຊ຺ຊີສູຕິ ຄາຖມາຫ. ຕຕ຺ຖ ວຕ຺ຕານຸສນ຺ຘິເຕນ ກາຣເຍຕິ ວຕ຺ຕານຸສນ຺ຘິນາ ກາຣເຍ, ຍາ ອສ຺ສ ວຕ຺ເຕນ ສທ຺ຘິໍ ປຏິຎ຺ຎາ ສນ຺ຘິຍຕິ, ຕາຍ ປຏິຎ຺ຎາຍ ກາຣເຍຕິ ອຕ຺ໂຖ.

ສຎ຺ຈິຈ຺ຈາຕິ ຊານນ຺ໂຕ ອາປຊ຺ຊຕິ. ປຣິຄູຫຕີຕິ ນິຄູຫຕິ ນ ເທເສຕິ ນ ວຸຏ຺ຐາຕິ.

ສາ ອຫມ຺ປິ ຊານາມີຕິ ຍໍ ຕຸມ຺ເຫຫິ ວຸຕ຺ຕໍ, ຕໍ ສຈ຺ຈໍ, ອຫມ຺ປິ ນໍ ເອວເມວ ຊານາມິ. ອຎ຺ຎຎ຺ຈ ຕາຫນ຺ຕິ ອຎ຺ຎຎ຺ຈ ຕໍ ອຫໍ ປຸຈ຺ຉາມິ.

ປຸພ຺ພາປຣໍ ນ ຊານາຕີຕິ ປຸເຣກຖິຕຎ຺ຈ ປຈ຺ຉາກຖິຕຎ຺ຈ ນ ຊານາຕິ. ອໂກວິໂທຕິ ຕສ຺ມິໍ ປຸພ຺ພາປເຣ ອກຸສໂລ. ອນຸສນ຺ຘິວຈນປຖໍ ນ ຊານາຕີຕິ ກຖານຸສນ຺ຘິວຈນໍ ວິນິຈ຺ຉຍານຸສນ຺ຘິວຈນຎ຺ຈ ນ ຊານາຕິ.

ສີລວິປຕ຺ຕິຍາ ໂຈເທຕີຕິ ທ຺ວີຫິ ອາປຕ຺ຕິກ຺ຂນ຺ເຘຫິ ໂຈເທຕິ. ອາຈາຣທິຏ຺ຐິຍາຕິ ອາຈາຣວິປຕ຺ຕິຍາ ເຈວ ທິຏ຺ຐິວິປຕ຺ຕິຍາ ຈ. ອາຈາຣວິປຕ຺ຕິຍາ ໂຈເທນ຺ໂຕ ປຎ຺ຈຫາປຕ຺ຕິກ຺ຂນ຺ເຘຫິ ໂຈເທຕິ, ທິຏ຺ຐິວິປຕ຺ຕິຍາ ໂຈເທນ຺ໂຕ ມິຈ຺ຉາທິຏ຺ຐິຍາ ເຈວ ອນ຺ຕຄ຺ຄາຫິກທິຏ຺ຐິຍາ ຈ ໂຈເທຕິ. ອາຊີເວນປິ ໂຈເທຕີຕິ ອາຊີວເຫຕຸປຎ຺ຎຕ຺ເຕຫິ ຉຫິ ສິກ຺ຂາປເທຫິ ໂຈເທຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ທຸຕິຍຄາຖາສງ຺ຄຓິກວຓ຺ຓນາ ນິຏ຺ຐິຕາ.