ໂຈທນາກຓ຺ຑໍ

ອນຸວິຊ຺ຊກກິຈ຺ຈວຓ຺ຓນາ

໓໖໐-໓໖໑. ອິທານິ ເອວໍ ອຸປ຺ປນ຺ນາຍ ໂຈທນາຍ ວິນຍຘເຣນ ກຕ຺ຕພ຺ພກິຈ຺ຈໍ ທສ຺ເສຕຸໍ ອນຸວິຊ຺ຊເກນາຕິອາທິ ອາຣທ຺ຘໍ. ຕຕ຺ຖ ທິຏ຺ຐໍ ທິຏ຺ເຐນາຕິ ຄາຖາຍ ອຍມຕ຺ໂຖ – ເອເກເນໂກ ມາຕຸຄາເມນ ສທ຺ຘິໍ ເອກຏ຺ຐານໂຕ ນິກ຺ຂມນ຺ໂຕ ວາ ປວິສນ຺ໂຕ ວາ ທິຏ຺ໂຐ, ໂສ ຕໍ ປາຣາຊິເກນ ໂຈເທຕິ, ອິຕໂຣ ຕສ຺ສ ທສ຺ສນໍ ອນຸຊານາຕິ. ຕໍ ປນ ທສ຺ສນໍ ປຏິຈ຺ຈ ປາຣາຊິກໍ ນ ອຸເປຕິ, ນ ປຏິຊານາຕິ. ເອວເມຕ຺ຖ ຍໍ ເຕນ ທິຏ຺ຐໍ, ຕໍ ຕສ຺ສ ‘‘ທິຏ຺ໂຐ ມຍາ’’ຕິ ອິມິນາ ທິຏ຺ຐວຈເນນ ສເມຕິ. ຍສ຺ມາ ປນ ອິຕໂຣ ຕໍ ທສ຺ສນໍ ປຏິຈ຺ຈ ໂທສໍ ນ ປຏິຊານາຕິ, ຕສ຺ມາ ອສຸທ຺ຘປຣິສງ຺ກິໂຕ ໂຫຕິ; ອມູລກປຣິສງ຺ກິໂຕຕິ ອຕ຺ໂຖ. ຕສ຺ສ ປຸຄ຺ຄລສ຺ສ ‘‘ສຸທ຺ໂຘ ອຫ’’ນ຺ຕິ ປຏິຎ຺ຎາຍ ເຕນ ສທ຺ຘິໍ ອຸໂປສໂຖ ກາຕພ຺ໂພ. ເສສຄາຖາທ຺ວເຍປິ ເອເສວ ນໂຍ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອນຸວິຊ຺ຊກກິຈ຺ຈວຓ຺ຓນາ ນິຏ຺ຐິຕາ.

ໂຈທກປຸຈ຺ຉາວິສ຺ສຊ຺ຊນາວຓ຺ຓນາ

໓໖໒-໓໖໓. ໂຈທນາຍ ໂກ ອາທີຕິອາທິປຸຈ຺ຉານໍ ວິສ຺ສຊ຺ຊເນ ສຈ຺ເຈ ຈ ອກຸປ຺ເປ ຈາຕິ ສຈ຺ເຈ ປຕິຏ຺ຐາຕພ຺ພໍ ອກຸປ຺ເປ ຈ. ຍໍ ກຕໍ ວາ ນ ກຕໍ ວາ, ຕເທວ ວຕ຺ຕພ຺ພໍ, ນ ຈ ໂຈທເກ ວາ ອນຸວິຊ຺ຊເກ ວາ ສງ຺ເຆ ວາ ໂກໂປ ອຸປ຺ປາເທຕພ຺ໂພ. ໂອຕິຓ຺ຓາໂນຕິຓ຺ຓໍ ຊານິຕພ຺ພນ຺ຕິ ໂອຕິຓ຺ຓຎ຺ຈ ອໂນຕິຓ຺ຓຎ຺ຈ ວຈນໍ ຊານິຕພ຺ພໍ. ຕຕ຺ຣາຍໍ ຊານນວິຘິ – ເອຕ຺ຕກາ ໂຈທກສ຺ສ ປຸພ຺ພກຖາ, ເອຕ຺ຕກາ ປຈ຺ຉິມກຖາ, ເອຕ຺ຕກາ ຈຸທິຕກສ຺ສ ປຸພ຺ພກຖາ, ເອຕ຺ຕກາ ປຈ຺ຉິມກຖາຕິ ຊານິຕພ຺ພາ. ໂຈທກສ຺ສ ປມາຓໍ ຄຓ຺ຫິຕພ຺ພໍ, ຈຸທິຕກສ຺ສ ປມາຓໍ ຄຓ຺ຫິຕພ຺ພໍ, ອນຸວິຊ຺ຊກສ຺ສ ປມາຓໍ ຄຓ຺ຫິຕພ຺ພໍ, ອນຸວິຊ຺ຊໂກ ອປ຺ປມຕ຺ຕກມ຺ປິ ອຫາເປນ຺ໂຕ ‘‘ອາວຸໂສ ສມນ຺ນາຫຣິຕ຺ວາ ອຸຊຸໍ ກຕ຺ວາ ອາຫຣາ’’ຕິ ວຕ຺ຕພ຺ໂພ, ສງ຺ເຆນ ເອວໍ ປຏິປຊ຺ຊິຕພ຺ພໍ. ເຍນ ຘມ຺ເມນ ເຍນ ວິນເຍນ ເຍນ ສຕ຺ຖຸສາສເນນ ຕໍ ອຘິກຣຓໍ ວູປສມ຺ມຕີຕິ ເອຕ຺ຖ ຘມ຺ໂມຕິ ຠູຕໍ ວຕ຺ຖຸ. ວິນໂຍຕິ ໂຈທນາ ເຈວ ສາຣຓາ ຈ. ສຕ຺ຖຸສາສນນ຺ຕິ ຎຕ຺ຕິສມ຺ປທາ ເຈວ ອນຸສ຺ສາວນສມ຺ປທາ ຈ. ເອເຕນ ຫິ ຘມ຺ເມນ ຈ ວິນເຍນ ຈ ສຕ຺ຖຸສາສເນນ ຈ ອຘິກຣຓໍ ວູປສມຕິ, ຕສ຺ມາ ອນຸວິຊ຺ຊເກນ ຠູເຕນ ວຕ຺ຖຸນາ ໂຈເທຕ຺ວາ ອາປຕ຺ຕິໍ ສາເຣຕ຺ວາ ຎຕ຺ຕິສມ຺ປທາຍ ເຈວ ອນຸສ຺ສາວນສມ຺ປທາຍ ຈ ຕໍ ອຘິກຣຓໍ ວູປສເມຕພ຺ພໍ, ອນຸວິຊ຺ຊເກນ ເອວໍ ປຏິປຊ຺ຊິຕພ຺ພໍ. ເສສເມຕ຺ຖ ອຸຕ຺ຕານເມວ.

໓໖໔. ອຸໂປສໂຖ ກິມຕ຺ຖາຍາຕິອາທິປຸຈ຺ຉາວິສ຺ສຊ຺ຊນມ຺ປິ ອຸຕ຺ຕານເມວ. ອວສານຄາຖາສຸ ເຖເຣ ຈ ປຣິຠາສຕີຕິ ອວມຎ຺ຎໍ ກໂຣນ຺ໂຕ ‘‘ກິໍ ອິເມ ຊານນ຺ຕີ’’ຕິ ປຣິຠາສຕິ. ຂໂຕ ອຸປຫຕິນ຺ທ຺ຣິໂຍຕິ ຕາຍ ຉນ຺ທາທິຄາມິຕາຍ ເຕນ ຈ ປຣິຠາສເນນ ອຕ຺ຕນາ ອຕ຺ຕໂນ ຂຕຕ຺ຕາ ຂໂຕ. ສທ຺ຘາທີນຎ຺ຈ ອິນ຺ທ຺ຣິຍານໍ ອຸປຫຕຕ຺ຕາ ອຸປຫຕິນ຺ທ຺ຣິໂຍ. ນິຣຍໍ ຄຈ຺ຉຕິ ທຸມ຺ເມໂຘ, ນ ຈ ສິກ຺ຂາຍ ຄາຣໂວຕິ ໂສ ຂໂຕ ອຸປຫຕິນ຺ທ຺ຣິໂຍ ປຎ຺ຎາຍ ອຠາວໂຕ ທຸມ຺ເມໂຘ ຕີສຸ ສິກ຺ຂາສຸ ອສິກ຺ຂນໂຕ ນ ຈ ສິກ຺ຂາຍ ຄາຣໂວ ກາຍສ຺ສ ເຠທາ ນິຣຍເມວ ອຸປຄຈ຺ຉຕິ, ຕສ຺ມາ ນ ຈ ອາມິສໍ ນິສ຺ສາຍ…ເປ… ຍຖາ ຘມ຺ໂມ ຕຖາ ກເຣຕິ. ຕສ຺ສຕ຺ໂຖ ນ ຈ ອາມິສໍ ນິສ຺ສາຍ ກເຣ, ຈຸທິຕກໂຈທເກສຸ ຫິ ອຎ຺ຎຕເຣນ ທິນ຺ນໍ ຈີວຣາທິອາມິສໍ ຄຓ຺ຫນ຺ໂຕ ອາມິສໍ ນິສ຺ສາຍ ກໂຣຕິ, ເອວໍ ນ ກເຣຍ຺ຍ. ນ ຈ ນິສ຺ສາຍ ປຸຄ຺ຄລນ຺ຕິ ‘‘ອຍໍ ເມ ອຸປຊ຺ຌາໂຍ ວາ ອາຈຣິໂຍ ວາ’’ຕິອາທິນາ ນເຍນ ຉນ຺ທາທີຫິ ຄຈ຺ຉນ຺ໂຕ ປຸຄ຺ຄລໍ ນິສ຺ສາຍ ກໂຣຕິ, ເອວໍ ນ ກເຣຍ຺ຍ. ອຖ ໂຂ ອຸໂຠເປເຕ ວິວຊ຺ເຊຕ຺ວາ ຍຖາ ຘມ຺ໂມ ຐິໂຕ, ຕເຖວ ກເຣຍ຺ຍາຕິ.

ອຸປກຓ຺ຓກໍ ຊປ຺ປຕີຕິ ‘‘ເອວໍ ກເຖຫິ, ມາ ເອວໍ ກຖຍິຕ຺ຖາ’’ຕິ ກຓ຺ຓມູເລ ມນ຺ເຕຕິ. ຊິມ຺ຫໍ ເປກ຺ຂຕີຕິ ໂທສເມວ ຄເວສຕິ. ວີຕິຫຣຕີຕິ ວິນິຈ຺ຉຍໍ ຫາເປຕິ. ກຸມ຺ມຄ຺ຄໍ ປຏິເສວຕີຕິ ອາປຕ຺ຕິໍ ທີເປຕິ.

ອກາເລນ ຈ ໂຈເທຕີຕິ ອໂນກາເສ ອນຊ຺ຌິຏ຺ໂຐວ ໂຈເທຕິ. ປຸພ຺ພາປຣໍ ນ ຊານາຕີຕິ ປຸຣິມກຖຎ຺ຈ ປຈ຺ຉິມກຖຎ຺ຈ ນ ຊານາຕິ.

ອນຸສນ຺ຘິວຈນປຖໍ ນ ຊານາຕີຕິ ກຖານຸສນ຺ຘິວິນິຈ຺ຉຍານຸສນ຺ຘິວເສນ ວຈນໍ ນ ຊານາຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ໂຈທນາກຓ຺ຑວຓ຺ຓນາ ນິຏ຺ຐິຕາ.