ອຸໂປສຖາທິປຸຈ຺ຉາວິສ຺ສຊ຺ຊນາ

໓໓໒. ‘‘ອຸໂປສຖກມ຺ມສ຺ສ ໂກ ອາທີ’’ຕິອາທີນໍ ປຸຈ຺ຉານໍ ວິສ຺ສຊ຺ຊເນ ສາມຄ຺ຄີ ອາທີຕິ ‘‘ອຸໂປສຖໍ ກຣິສ຺ສາມາ’’ຕິ ສີມໍ ໂສເຘຕ຺ວາ ຉນ຺ທປາຣິສຸທ຺ຘິໍ ອາຫຣິຕ຺ວາ ສນ຺ນິປຕິຕານໍ ກາຍສາມຄ຺ຄີ ອາທິ. ກິຣິຍາ ມຊ຺ເຌຕິ ປຸພ຺ພກິຈ຺ຈໍ ກຕ຺ວາ ປາຕິໂມກ຺ຂໂອສາຣຓກິຣິຍາ ມຊ຺ເຌ. ນິຏ຺ຐານໍ ປຣິໂຍສານນ຺ຕິ ‘‘ຕຕ຺ຖ ສພ຺ເພເຫວ ສມຄ຺ເຄຫິ ສມ຺ໂມທມາເນຫິ ອວິວທມາເນຫິ ສິກ຺ຂິຕພ຺ພ’’ນ຺ຕິ ອິທໍ ປາຕິໂມກ຺ຂນິຏ຺ຐານໍ ປຣິໂຍສານໍ. ປວາຣຓາກມ຺ມສ຺ສ ສາມຄ຺ຄີ ອາທີຕິ ‘‘ປວາຣຓໍ ກຣິສ຺ສາມາ’’ຕິ ສີມໍ ໂສເຘຕ຺ວາ ຉນ຺ທປວາຣຓໍ ອາຫຣິຕ຺ວາ ສນ຺ນິປຕິຕານໍ ກາຍສາມຄ຺ຄີ ອາທິ. ກິຣິຍາ ມຊ຺ເຌຕິ ປວາຣຓາຎຕ຺ຕິ ຈ ປວາຣຓາກຖາ ຈ ມຊ຺ເຌ, ສງ຺ຆນວກສ຺ສ ‘‘ປສ຺ສນ຺ໂຕ ປຏິກຣິສ຺ສາມີ’’ຕິ ວຈນໍ ປຣິໂຍສານໍ. ຕຊ຺ຊນີຍກມ຺ມາທີສຸ ວຕ຺ຖຸ ນາມ ເຍນ ວຕ຺ຖຸນາ ກມ຺ມາຣໂຫ ໂຫຕິ, ຕໍ ວຕ຺ຖຸ. ປຸຄ຺ຄໂລຕິ ເຍນ ຕໍ ວຕ຺ຖຸ ກຕໍ, ໂສ ປຸຄ຺ຄໂລ. ກມ຺ມວາຈາ ປຣິໂຍສານນ຺ຕິ ‘‘ກຕໍ ສງ຺ເຆນ ອິຕ຺ຖນ຺ນາມສ຺ສ ຠິກ຺ຂຸໂນ ຕຊ຺ຊນີຍກມ຺ມໍ, ຂມຕິ ສງ຺ຆສ຺ສ, ຕສ຺ມາ ຕຸຓ຺ຫີ, ເອວເມຕໍ ຘາຣຍາມີ’’ຕິ ເອວໍ ຕສ຺ສາ ຕສ຺ສາ ກມ຺ມວາຈາຍ ອວສານວຈນໍ ປຣິໂຍສານໍ. ເສສໍ ສພ຺ພຕ຺ຖ ອຸຕ຺ຕານເມວາຕິ

ອຸໂປສຖາທິປຸຈ຺ຉາວິສ຺ສຊ຺ຊນາວຓ຺ຓນາ ນິຏ຺ຐິຕາ.

ອຕ຺ຖວສປກຣຓາວຓ຺ຓນາ

໓໓໔. ອຕ຺ຖວສປກຣເຓ – ທສ ອຕ຺ຖວເສຕິອາທີສຸ ຍໍ ວຕ຺ຕພ຺ພໍ ຕໍ ປຐມປາຣາຊິກວຓ຺ຓນາຍເມວ ວຸຕ຺ຕໍ. ຍໍ ສງ຺ຆສຸຏ຺ຐຸ ຕໍ ສງ຺ຆຜາສູຕິອາທີສຸ ອຸປຣິມໍ ອຸປຣິມໍ ປທໍ ເຫຏ຺ຐິມສ຺ສ ເຫຏ຺ຐິມສ຺ສ ປທສ຺ສ ອຕ຺ໂຖ.

ອຕ຺ຖສຕໍ ຘມ຺ມສຕນ຺ຕິອາທິມ຺ຫິ ປນ ຍເທຕໍ ທສສຸ ປເທສຸ ເອເກກໍ ມູລໍ ກຕ຺ວາ ທສກ຺ຂຕ຺ຕຸໍ ໂຍຊນາຍ ປທສຕໍ ວຸຕ຺ຕໍ. ຕຕ຺ຖ ປຈ຺ຉິມສ຺ສ ປຈ຺ຉິມສ຺ສ ປທສ຺ສ ວເສນ ອຕ຺ຖສຕໍ ປຸຣິມສ຺ສ ປຸຣິມສ຺ສ ວເສນ ຘມ຺ມສຕໍ ເວທິຕພ຺ພໍ. ອຖ ວາ ເຍ ທສ ອຕ຺ຖວເສ ປຏິຈ຺ຈ ຕຖາຄເຕນ ສາວການໍ ສິກ຺ຂາປທໍ ປຎ຺ຎຕ຺ຕໍ, ເຍ ປຸພ຺ເພ ປຐມປາຣາຊິກວຓ຺ຓນາຍໍ ‘‘ຕຕ຺ຖ ສງ຺ຆສຸຏ຺ຐຸຕາ ນາມ ສງ຺ຆສ຺ສ ສຸຏ຺ຐຸຠາໂວ ‘ສຸຏ຺ຐຸ ເທວາ’ຕິ ອາຄຕຏ຺ຐາເນ ວິຍ ‘ສຸຏ຺ຐຸ ຠນ຺ເຕ’ຕິ ວຈນສມ຺ປຏິຈ຺ຉນຠາໂວ, ໂຍ ຈ ຕຖາຄຕສ຺ສ ວຈນໍ ສມ຺ປຏິຈ຺ຉຕິ, ຕສ຺ສ ຕໍ ທີຆຣຕ຺ຕໍ ຫິຕາຍ ສຸຂາຍ ໂຫຕິ, ຕສ຺ມາ ສງ຺ຆສ຺ສ ‘ສຸຏ຺ຐຸ ຠນ຺ເຕ’ຕິ ມມ ວຈນສມ຺ປຏິຈ຺ຉນຕ຺ຖໍ ປຎ຺ຎເປສ຺ສາມິ ອສມ຺ປຏິຈ຺ຉເນ ອາທີນວໍ ສມ຺ປຏິຈ຺ຉເນ ຈ ອານິສໍສໍ ທສ຺ເສຕ຺ວາ ນ ພລກ຺ກາເຣນ ອຠິຠວິຕ຺ວາຕິ ເອຕມຕ຺ຖໍ ອາວິກໂຣນ຺ໂຕ ອາຫ – ສງ຺ຆສຸຏ຺ຐຸຕາຍາ’’ຕິ ເອວມາທິນາ ນເຍນ ວຓ຺ຓິຕາ, ເຕສໍ ອິຘ ທສກ຺ຂຕ຺ຕຸໍ ອາຄຕຕ຺ຕາ ອຕ຺ຖສຕໍ ຕທຕ຺ຖໂຊຕການຎ຺ຈ ປທານໍ ວເສນ ຘມ຺ມສຕໍ ເວທິຕພ຺ພໍ. ອິທານິ ອຕ຺ຖໂຊຕການໍ ນິຣຸຕ຺ຕີນໍ ວເສນ ນິຣຸຕ຺ຕິສຕໍ, ຘມ຺ມຠູຕານໍ ນິຣຸຕ຺ຕີນໍ ວເສນ ນິຣຸຕ຺ຕິສຕນ຺ຕິ ທ຺ເວ ນິຣຸຕ຺ຕິສຕານິ, ອຕ຺ຖສເຕ ຎາຓສຕໍ, ຘມ຺ມສເຕ ຎາຓສຕໍ, ທ຺ວີສຸ ນິຣຸຕ຺ຕິສເຕສຸ ທ຺ເວ ຎາຓສຕານີຕິ ຈຕ຺ຕາຣິ ຎາຓສຕານິ ຈ ເວທິຕພ຺ພານິ.

‘‘ອຕ຺ຖສຕໍ ຘມ຺ມສຕໍ, ທ຺ເວ ນິຣຸຕ຺ຕິສຕານິ;

ຈຕ຺ຕາຣິ ຎາຓສຕານິ, ອຕ຺ຖວເສ ປກຣເຓ’’ຕິ.

ອິຕິ ຫິ ຍໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕນ຺ຕິ.

ອິຕິ ສມນ຺ຕປາສາທິກາຍ ວິນຍສໍວຓ຺ຓນາຍ

ມຫາວຄ຺ຄວຓ຺ຓນາ ນິຏ຺ຐິຕາ.