ເສທໂມຈນຄາຖາ

(໑) ອວິປ຺ປວາສປຎ຺ຫາວຓ຺ຓນາ

໔໗໙. ເສທໂມຈນຄາຖາສຸ ອສໍວາໂສຕິ ອຸໂປສຖປວາຣຓາທິນາ ສໍວາເສນ ອສໍວາໂສ. ສມ຺ໂຠໂຄ ເອກຈ຺ໂຈ ຕຫິໍ ນ ລພ຺ຠຕີຕິ ອກປ຺ປິຍສມ຺ໂຠໂຄ ນ ລພ຺ຠຕິ, ນຫາປນໂຠຊນາທິປຏິຊຄ຺ຄນໍ ປນ ມາຕຣາເຍວ ກາຕຸໍ ລພ຺ຠຕິ. ອວິປ຺ປວາເສນ ອນາປຕ຺ຕີຕິ ສຫຄາຣເສຍ຺ຍາຍ ອນາປຕ຺ຕິ. ປຎ຺ຫາ ເມສາ ກຸສເລຫິ ຈິນ຺ຕິຕາຕິ ເອສາ ປຎ຺ຫາ ກຸສເລຫິ ປຓ຺ຑິເຕຫິ ຈິນ຺ຕິຕາ. ອສ຺ສາ ວິສ຺ສຊ຺ຊນໍ ທາຣກມາຕຸຍາ ຠິກ຺ຂຸນິຍາ ເວທິຕພ຺ພໍ, ຕສ຺ສາ ຫິ ປຸຕ຺ຕໍ ສນ຺ຘາເຍຕໍ ວຸຕ຺ຕນ຺ຕິ.

ອວິສ຺ສຊ຺ຊິຕຄາຖາ ຄຣຸຠຓ຺ຑໍ ສນ຺ຘາຍ ວຸຕ຺ຕາ, ອຕ຺ໂຖ ປນສ຺ສາ ຄຣຸຠຓ຺ຑວິນິຈ຺ຉເຍ ວຸຕ຺ໂຕເຍວ.

ທສ ປຸຄ຺ຄເລ ນ ວທາມີຕິ ເສນາສນກ຺ຂນ຺ຘເກ ວຸຕ຺ເຕ ທສ ປຸຄ຺ຄເລ ນ ວທາມິ. ເອກາທສ ວິວຊ຺ຊິຍາຕິ ເຍ ມຫາຂນ຺ຘເກ ເອກາທສ ວິວຊ຺ຊນີຍປຸຄ຺ຄລາ ວຸຕ຺ຕາ, ເຕປິ ນ ວທາມິ. ອຍໍ ປຎ຺ຫາ ນຄ຺ຄໍ ຠິກ຺ຂຸໍ ສນ຺ຘາຍ ວຸຕ຺ຕາ.

ກຖໍ ນຸ ສິກ຺ຂາຍ ອສາຘາຣໂຓຕິ ປຎ຺ຫາ ນຫາປິຕປຸພ຺ພກໍ ຠິກ຺ຂຸໍ ສນ຺ຘາຍ ວຸຕ຺ຕາ. ອຍຎ຺ຫິ ຂຸຣຠຓ຺ຑໍ ປຣິຫຣິຕຸໍ ນ ລຠຕິ, ອຎ຺ເຎ ລຠນ຺ຕິ; ຕສ຺ມາ ສິກ຺ຂາຍ ອສາຘາຣໂຓ.

ຕໍ ປຸຄ຺ຄລໍ ກຕມໍ ວທນ຺ຕິ ພຸທ຺ຘາຕິ ອຍໍ ປຎ຺ຫາ ນິມ຺ມິຕພຸທ຺ຘໍ ສນ຺ຘາຍ ວຸຕ຺ຕາ.

ອໂຘນາຠິໍ ວິວຊ຺ຊິຍາຕິ ອໂຘນາຠິໍ ວິວຊ຺ເຊຕ຺ວາ. ອຍໍ ປຎ຺ຫາ ຍໍ ຕໍ ອສີສກໍ ກພນ຺ຘໍ, ຍສ຺ສ ອຸເຣ ອກ຺ຂີນິ ເຈວ ມຸຂຎ຺ຈ ໂຫຕິ, ຕໍ ສນ຺ຘາຍ ວຸຕ຺ຕາ.

ຠິກ຺ຂຸ ສຎ຺ຎາຈິກາຍ ກຸຏິນ຺ຕິ ອຍໍ ປຎ຺ຫາ ຕິຓຈ຺ຉາທນໍ ກຸຏິໍ ສນ຺ຘາຍ ວຸຕ຺ຕາ. ທຸຕິຍປຎ຺ຫາ ສພ຺ພມຕ຺ຕິກາມຍໍ ກຸຏິໍ ສນ຺ຘາຍ ວຸຕ຺ຕາ.

ອາປຊ຺ເຊຍ຺ຍ ຄຣຸກໍ ເຉຊ຺ຊວຕ຺ຖຸນ຺ຕິ ອຍໍ ປຎ຺ຫາ ວຊ຺ຊປຏິຈ຺ຉາທິກໍ ຠິກ຺ຂຸນິໍ ສນ຺ຘາຍ ວຸຕ຺ຕາ. ທຸຕິຍປຎ຺ຫາ ປຓ຺ຑກາທໂຍ ອຠພ຺ພປຸຄ຺ຄເລ ສນ຺ຘາຍ ວຸຕ຺ຕາ. ເອກາທສປິ ຫິ ເຕ ຄິຫິຠາເວເຍວ ປາຣາຊິກໍ ປຕ຺ຕາ.

ວາຈາຕິ ວາຈາຍ ອນາລປນ຺ໂຕ. ຄິຣໍ ໂນ ຈ ປເຣ ຠເຓຍ຺ຍາຕິ ‘‘ອິຕິ ອິເມ ໂສສ຺ສນ຺ຕີ’’ຕິ ປຣປຸຄ຺ຄເລ ສນ຺ຘາຍ ສທ຺ທມ຺ປິ ນ ນິຈ຺ຉາເຣຍ຺ຍ. ອຍໍ ປຎ຺ຫາ ‘‘ສນ຺ຕິໍ ອາປຕ຺ຕິໍ ນາວິກເຣຍ຺ຍ, ສມ຺ປຊານມຸສາວາທສ຺ສ ໂຫຕີ’’ຕິ ອິມໍ ມຸສາວາທໍ ສນ຺ຘາຍ ວຸຕ຺ຕາ. ຕສ຺ສ ຫິ ຠິກ຺ຂຸໂນ ອຘມ຺ມິກາຍ ປຏິຎ຺ຎາຍ ຕຸຓ຺ຫີຠູຕສ຺ສ ນິສິນ຺ນສ຺ສ ມໂນທ຺ວາເຣ ອາປຕ຺ຕິ ນາມ ນຕ຺ຖິ. ຍສ຺ມາ ປນ ອາວິກາຕພ຺ພໍ ນ ອາວິກໂຣຕິ, ເຕນສ຺ສ ວຈີທ຺ວາເຣ ອກິຣິຍໂຕ ອຍໍ ອາປຕ຺ຕິ ສມຸຏ຺ຐາຕີຕິ ເວທິຕພ຺ພາ.

ສງ຺ຆາທິເສສາ ຈຕຸໂຣຕິ ອຍໍ ປຎ຺ຫາ ອຣຸຓຸຄ຺ເຄ ຄາມນ຺ຕຣປຣິຍາປນ຺ນໍ ນທິປາຣໍ ໂອກ຺ກນ຺ຕຠິກ຺ຂຸນິໍ ສນ຺ຘາຍ ວຸຕ຺ຕາ, ສາ ຫິ ສກຄາມໂຕ ປຈ຺ຈູສສມເຍ ນິກ຺ຂມິຕ຺ວາ ອຣຸຓຸຄ຺ຄມນກາເລ ວຸຕ຺ຕປ຺ປກາຣໍ ນທິປາຣໍ ໂອກ຺ກນ຺ຕມຕ຺ຕາວ ຣຕ຺ຕິວິປ຺ປວາສຄາມນ຺ຕຣນທິປາຣຄຓມ຺ຫາໂອຫີຍນລກ຺ຂເຓນ ເອກປ຺ປຫາເຣເນວ ຈຕຸໂຣ ສງ຺ຆາທິເສເສ ອາປຊ຺ຊຕິ.

ສິຍາ ອາປຕ຺ຕິໂຍ ນານາຕິ ອຍໍ ປຎ຺ຫາ ເອກໂຕອຸປສມ຺ປນ຺ນາ ທ຺ເວ ຠິກ຺ຂຸນິໂຍ ສນ຺ຘາຍ ວຸຕ຺ຕາ. ຕາສຸ ຫິ ຠິກ຺ຂູນໍ ສນ຺ຕິເກ ເອກໂຕອຸປສມ຺ປນ຺ນາຍ ຫຕ຺ຖໂຕ ຄຓ຺ຫນ຺ຕສ຺ສ ປາຈິຕ຺ຕິຍໍ, ຠິກ຺ຂຸນີນໍ ສນ຺ຕິເກ ເອກໂຕອຸປສມ຺ປນ຺ນາຍ ຫຕ຺ຖໂຕ ຄຓ຺ຫນ຺ຕສ຺ສ ທຸກ຺ກຏໍ.

ຈຕຸໂຣ ຊນາ ສໍວິຘາຍາຕິ ອາຈຣິໂຍ ຈ ຕໂຍ ຈ ອນ຺ເຕວາສິກາ ຉມາສກໍ ຠຓ຺ຑໍ ອວຫຣິໍສຸ, ອາຈຣິຍສ຺ສ ສາຫຕ຺ຖິກາ ຕໂຍ ມາສກາ, ອາຓຕ຺ຕິຍາປິ ຕໂຍວ ຕສ຺ມາ ຖຸລ຺ລຈ຺ຈຍໍ ອາປຊ຺ຊຕິ, ອິຕເຣສໍ ສາຫຕ຺ຖິໂກ ເອເກໂກ, ອາຓຕ຺ຕິກາ ປຎ຺ຈາຕິ ຕສ຺ມາ ປາຣາຊິກໍ ອາປຊ຺ຊິໍສຸ. ອຍເມຕ຺ຖ ສງ຺ເຂໂປ. ວິຕ຺ຖາໂຣ ປນ ອທິນ຺ນາທານປາຣາຊິເກ ສໍວິທາວຫາຣວຓ຺ຓນາຍໍ ວຸຕ຺ໂຕ.

(໒) ປາຣາຊິກາທິປຎ຺ຫາວຓ຺ຓນາ

໔໘໐. ຉິທ຺ທໍ ຕສ຺ມິໍ ຆເຣ ນຕ຺ຖີຕິ ອຍໍ ປຎ຺ຫາ ທຸສ຺ສກຸຏິອາທີນິ ສນ຺ຖຕເປຍ຺ຍາລຎ຺ຈ ສນ຺ຘາຍ ວຸຕ຺ຕາ.

ເຕລໍ ມຘຸໍ ຜາຓິຕນ຺ຕິ ຄາຖາ ລິງ຺ຄປຣິວຕ຺ຕໍ ສນ຺ຘາຍ ວຸຕ຺ຕາ.

ນິສ຺ສຄ຺ຄິເຍນາຕິ ຄາຖາ ປຣິຓາມນໍ ສນ຺ຘາຍ ວຸຕ຺ຕາ. ໂຍ ຫິ ສງ຺ຆສ຺ສ ປຣິຓຕລາຠໂຕ ເອກໍ ຈີວຣໍ ອຕ຺ຕໂນ, ເອກໍ ອຎ຺ຎສ຺ສາຕິ ທ຺ເວ ຈີວຣານິ ‘‘ເອກໍ ມຍ຺ຫໍ, ເອກໍ ຕສ຺ສ ເທຫີ’’ຕິ ເອກປຍໂອເຄນ ປຣິຓາເມຕິ, ໂສ ນິສ຺ສຄ຺ຄິຍປາຈິຕ຺ຕິຍຎ຺ເຈວ ສຸທ຺ຘິກປາຈິຕ຺ຕິຍຎ຺ຈ ເອກໂຕ ອາປຊ຺ຊຕິ.

ກມ຺ມຎ຺ຈ ຕໍ ກຸປ຺ເປຍ຺ຍ ວຄ຺ຄປຈ຺ຈຍາຕິ ອຍໍ ປຎ຺ຫາ ທ຺ວາທສໂຍຊນປມາເຓສຸ ພາຣາຓສິອາທີສຸ ນຄເຣສຸ ຄາມສີມໍ ສນ຺ຘາຍ ວຸຕ຺ຕາ.

ປທວີຕິຫາຣມຕ຺ເຕນາຕິ ຄາຖາ ສຎ຺ຈຣິຕ຺ຕໍ ສນ຺ຘາຍ ວຸຕ຺ຕາ, ອຕ຺ໂຖປິ ຈສ຺ສາ ສຎ຺ຈຣິຕ຺ຕວຓ຺ຓນາຍເມວ ວຸຕ຺ໂຕ.

ສພ຺ພານິ ຕານິ ນິສ຺ສຄ຺ຄິຍານີຕິ ອຍໍ ປຎ຺ຫາ ອຎ຺ຎາຕິກາຍ ຠິກ຺ຂຸນິຍາ ໂຘວາປນໍ ສນ຺ຘາຍ ວຸຕ຺ຕາ. ສເຈ ຫິ ຕິຓ຺ຓມ຺ປິ ຈີວຣານໍ ກາກອູຫທນໍ ວາ ກທ຺ທມມກ຺ຂິຕໍ ວາ ກຓ຺ຓໍ ຄເຫຕ຺ວາ ຠິກ຺ຂຸນີ ອຸທເກນ ໂຘວຕິ, ຠິກ຺ຂຸສ຺ສ ກາຍຄຕາເນວ ນິສ຺ສຄ຺ຄິຍານິ ໂຫນ຺ຕິ.

ສຣຓຄມນມ຺ປິ ນ ຕສ຺ສ ອຕ຺ຖີຕິ ສຣຓຄມນອຸປສມ຺ປທາປິ ນຕ຺ຖິ. ອຍໍ ປນ ປຎ຺ຫາ ມຫາປຊາປຕິຍາ ອຸປສມ຺ປທໍ ສນ຺ຘາຍ ວຸຕ຺ຕາ.

ຫເນຍ຺ຍ ອນຣິຍໍ ມນ຺ໂທຕິ ຕຎ຺ຫິ ອິຕ຺ຖິໍ ວາ ປຸຣິສໍ ວາ ອນຣິຍໍ ຫເນຍ຺ຍ. ອຍໍ ປຎ຺ຫາ ລິງ຺ຄປຣິວຕ຺ເຕນ ອິຕ຺ຖິຠູຕໍ ປິຕຣໍ ປຸຣິສຠູຕຎ຺ຈ ມາຕຣໍ ສນ຺ຘາຍ ວຸຕ຺ຕາ.

ນ ເຕນານນ຺ຕຣໍ ຜຸເສຕິ ອຍໍ ປຎ຺ຫາ ມິຄສິງ຺ຄຕາປສສີຫກຸມາຣາທີນໍ ວິຍ ຕິຣຈ຺ຉານມາຕາປິຕໂຣ ສນ຺ຘາຍ ວຸຕ຺ຕາ.

ອໂຈທຍິຕ຺ວາຕິ ຄາຖາ ທູເຕນຸປສມ຺ປທໍ ສນ຺ຘາຍ ວຸຕ຺ຕາ. ໂຈທຍິຕ຺ວາຕິ ຄາຖາ ປຓ຺ຑກາທີນໍ ອຸປສມ຺ປທໍ ສນ຺ຘາຍ ວຸຕ຺ຕາ. ກຸຣຸນ຺ທິຍໍ ປນ ‘‘ປຐມຄາຖາ ອຏ຺ຐ ອສມ຺ມຸຂາກມ຺ມານິ, ທຸຕິຍາ ອນາປຕ຺ຕິກສ຺ສ ກມ຺ມໍ ສນ຺ຘາຍ ວຸຕ຺ຕາ’’ຕິ ອາຄຕໍ.

ຉິນ຺ທນ຺ຕສ຺ສ ອາປຕ຺ຕີຕິ ວນປ຺ປຕິໍ ຉິນ຺ທນ຺ຕສ຺ສ ປາຣາຊິກໍ, ຕິຓລຕາທິໍ ຉິນ຺ທນ຺ຕສ຺ສ ປາຈິຕ຺ຕິຍໍ, ອງ຺ຄຊາຕໍ ຉິນ຺ທນ຺ຕສ຺ສ ຖຸລ຺ລຈ຺ຈຍໍ. ຉິນ຺ທນ຺ຕສ຺ສ ອນາປຕ຺ຕີຕິ ເກເສ ຈ ນເຂ ຈ ຉິນ຺ທນ຺ຕສ຺ສ ອນາປຕ຺ຕິ. ຉາເທນ຺ຕສ຺ສ ອາປຕ຺ຕີຕິ ອຕ຺ຕໂນ ອາປຕ຺ຕິໍ ຉາເທນ຺ຕສ຺ສ ອຎ຺ເຎສໍ ວາ ອາປຕ຺ຕິໍ. ຉາເທນ຺ຕສ຺ສ ອນາປຕ຺ຕີຕິ ເຄຫາທີນິ ຉາເທນ຺ຕສ຺ສ ອນາປຕ຺ຕິ.

ສຈ຺ຈໍ ຠຓນ຺ໂຕຕິ ຄາຖາຍ ‘‘ສິຂຣຓີສິ ອຸຠໂຕພ຺ຍຎ຺ຊນາສີ’’ຕິ ສຈ຺ຈໍ ຠຓນ຺ໂຕ ຄຣຸກໍ ອາປຊ຺ຊຕິ, ສມ຺ປຊານມຸສາວາເທ ປນ ມຸສາ ຠາສໂຕ ລຫຸກາປຕ຺ຕິ ໂຫຕິ, ອຠູຕາໂຣຈເນ ມຸສາ ຠຓນ຺ໂຕ ຄຣຸກໍ ອາປຊ຺ຊຕິ, ຠູຕາໂຣຈເນ ສຈ຺ຈໍ ຠາສໂຕ ລຫຸກາປຕ຺ຕິ ໂຫຕີຕິ.

(໓) ປາຈິຕ຺ຕິຍາທິປຎ຺ຫາວຓ຺ຓນາ

໔໘໑. ອຘິຏ຺ຐິຕນ຺ຕິ ຄາຖາ ນິສ຺ສຄ຺ຄິຍຈີວຣໍ ອນິສ຺ສຊ຺ຊິຕ຺ວາ ປຣິຠຸຎ຺ຊນ຺ຕໍ ສນ຺ຘາຍ ວຸຕ຺ຕາ.

ອຕ຺ຖງ຺ຄເຕ ສູຣິເຍຕິ ຄາຖາ ໂຣມນ຺ຖກໍ ສນ຺ຘາຍ ວຸຕ຺ຕາ.

ນ ຣຕ຺ຕຈິຕ຺ໂຕຕິ ຄາຖາຍ ອຍມຕ຺ໂຖ – ຣຕ຺ຕຈິຕ຺ໂຕ ເມຖຸນຘມ຺ມປາຣາຊິກໍ ອາປຊ຺ຊຕິ. ເຖຍ຺ຍຈິຕ຺ໂຕ ອທິນ຺ນາທານປາຣາຊິກໍ, ປຣໍ ມຣຓາຍ ເຈເຕນ຺ໂຕ ມນຸສ຺ສວິຄ຺ຄຫປາຣາຊິກໍ, ສງ຺ຆເຠທໂກ ປນ ນ ຣຕ຺ຕຈິຕ຺ໂຕ ນ ຈ ປນ ເຖຍ຺ຍຈິຕ຺ໂຕ ນ ຈາປິ ໂສ ປຣໍ ມຣຓາຍ ເຈຕຍິ, ສລາກໍ ປນສ຺ສ ເທນ຺ຕສ຺ສ ໂຫຕິ ເຉຊ຺ຊໍ, ປາຣາຊິກໍ ໂຫຕິ, ສລາກໍ ປຏິຄ຺ຄຓ຺ຫນ຺ຕສ຺ສ ເຠທການຸວຕ຺ຕກສ຺ສ ຖຸລ຺ລຈ຺ຈຍໍ.

ຄຈ຺ເຉຍ຺ຍ ອຑ຺ຒໂຍຊນນ຺ຕິ ອຍໍ ປຎ຺ຫາ ສຸປ຺ປຕິຏ຺ຐິຕນິຄ຺ໂຣຘສທິສໍ ເອກກຸລສ຺ສ ຣຸກ຺ຂມູລໍ ສນ຺ຘາຍ ວຸຕ຺ຕາ.

ກາຍິການີຕິ ອຍໍ ຄາຖາ ສມ຺ພຫຸລານໍ ອິຕ຺ຖີນໍ ເກເສ ວາ ອງ຺ຄຸລິໂຍ ວາ ເອກໂຕ ຄຓ຺ຫນ຺ຕໍ ສນ຺ຘາຍ ວຸຕ຺ຕາ.

ວາຈສິການີຕິ ອຍໍ ຄາຖາ ‘‘ສພ຺ພາ ຕຸມ຺ເຫ ສິຂຣຓິໂຍ’’ຕິອາທິນາ ນເຍນ ທຸຏ຺ຐຸລ຺ລຠາຓິໍ ສນ຺ຘາຍ ວຸຕ຺ຕາ.

ຕິສ຺ສິຕ຺ຖິໂຍ ເມຖຸນໍ ຕໍ ນ ເສເວຕິ ຕິສ຺ໂສ ອິຕ຺ຖິໂຍ ວຸຕ຺ຕາ, ຕາສຸປິ ຍໍ ຕໍ ເມຖຸນໍ ນາມ, ຕໍ ນ ເສວຕິ. ຕໂຍ ປຸຣິເສຕິ ຕໂຍ ປຸຣິເສປິ ອຸປຄນ຺ຕ຺ວາ ເມຖຸນໍ ນ ເສວຕິ. ຕໂຍ ອນຣິຍປຓ຺ຑເກຕິ ອຸຠໂຕພ຺ຍຎ຺ຊນສງ຺ຂາເຕ ຕໂຍ ອນຣິເຍ ຕໂຍ ຈ ປຓ຺ຑເກຕິ ອິເມປິ ຉ ຊເນ ອຸປຄນ຺ຕ຺ວາ ເມຖຸນໍ ນ ເສວຕິ. ນ ຈາຈເຣ ເມຖຸນໍ ພ຺ຍຎ຺ຊນສ຺ມິນ຺ຕິ ອນຸໂລມປາຣາຊິກວເສນປິ ເມຖຸນໍ ນາຈຣຕິ. ເຉຊ຺ຊໍ ສິຍາ ເມຖຸນຘມ຺ມປຈ຺ຈຍາຕິ ສິຍາ ເມຖຸນຘມ຺ມປຈ຺ຈຍາ ປາຣາຊິກນ຺ຕິ. ອຍໍ ປຎ຺ຫາ ອຏ຺ຐວຕ຺ຖຸກໍ ສນ຺ຘາຍ ວຸຕ຺ຕາ, ຕສ຺ສາ ຫິ ເມຖຸນຘມ຺ມສ຺ສ ປຸພ຺ພຠາຄໍ ກາຍສໍສຄ຺ຄໍ ອາປຊ຺ຊິຕຸໍ ວາຍມນ຺ຕິຍາ ເມຖຸນຘມ຺ມປຈ຺ຈຍາ ເຉຊ຺ຊໍ ໂຫຕິ.

ມາຕຣໍ ຈີວຣນ຺ຕິ ອຍໍ ຄາຖາ ປິຏ຺ຐິສມເຍ ວສ຺ສິກສາຏິກຕ຺ຖໍ ສຕຸປ຺ປາທກຣຓໍ ສນ຺ຘາຍ ວຸຕ຺ຕາ. ວິນິຈ຺ຉໂຍ ປນສ຺ສາ ວສ຺ສິກສາຏິກສິກ຺ຂາປທວຓ຺ຓນາຍເມວ ວຸຕ຺ໂຕ.

ກຸທ຺ໂຘ ອາຣາຘໂກ ໂຫຕີຕິ ຄາຖາ ຕິຕ຺ຖິຍວຕ຺ຕໍ ສນ຺ຘາຍ ວຸຕ຺ຕາ. ຕິຕ຺ຖິໂຍ ຫິ ວຕ຺ຕໍ ປູຣຍມາໂນ ຕິຕ຺ຖິຍານໍ ວຓ຺ເຓ ຠຎ຺ຎມາເນ ກຸທ຺ໂຘ ອາຣາຘໂກ ໂຫຕິ, ວຕ຺ຖຸຕ຺ຕຍສ຺ສ ວຓ຺ເຓ ຠຎ຺ຎມາເນ ກຸທ຺ໂຘ ຄາຣຍ຺ໂຫ ໂຫຕີຕິ ຕຕ຺ເຖວສ຺ສາ ວິຕ຺ຖາໂຣ ວຸຕ຺ໂຕ. ທຸຕິຍຄາຖາປິ ຕເມວ ສນ຺ຘາຍ ວຸຕ຺ຕາ.

ສງ຺ຆາທິເສສນ຺ຕິອາທິ ຄາຖາ ຍາ ຠິກ຺ຂຸນີ ອວສ຺ສຸຕາວ ອວສ຺ສຸຕສ຺ສ ປຸຣິສສ຺ສ ຫຕ຺ຖໂຕ ປິຓ຺ຑປາຕໍ ຄເຫຕ຺ວາ ມນຸສ຺ສມໍສລສຸຓປຓີຕໂຠຊນເສສອກປ຺ປິຍມໍເສຫິ ສທ຺ຘິໍ ໂອມທ຺ທິຕ຺ວາ ອຊ຺ໂຌຫຣຕິ, ຕໍ ສນ຺ຘາຍ ວຸຕ຺ຕາ.

ເອໂກ ອຸປສມ຺ປນ຺ໂນ ເອໂກ ອນຸປສມ຺ປນ຺ໂນຕິ ຄາຖາ ອາກາສຄຕໍ ສນ຺ຘາຍ ວຸຕ຺ຕາ. ສເຈ ຫິ ທ຺ວີສຸ ສາມເຓເຣສຸ ເອໂກ ອິທ຺ຘິຍາ ເກສຄ຺ຄມຕ຺ຕມ຺ປິ ປຖວິໍ ມຸຎ຺ຈິຕ຺ວາ ນິສິນ຺ໂນ ໂຫຕິ, ໂສ ອນຸປສມ຺ປນ຺ໂນ ນາມ ໂຫຕິ. ສງ຺ເຆນາປິ ອາກາເສ ນິສີທິຕ຺ວາ ຠູມິຄຕສ຺ສ ກມ຺ມໍ ນ ກາຕພ຺ພໍ. ສເຈ ກໂຣຕິ, ກຸປ຺ປຕິ.

ອກປ຺ປກຕນ຺ຕິ ຄາຖາ ອຈ຺ຉິນ຺ນຈີວຣກໍ ຠິກ຺ຂຸໍ ສນ຺ຘາຍ ວຸຕ຺ຕາ. ຕສ຺ມິໍເຍວ ຈສ຺ສາ ສິກ຺ຂາປເທ ວິຕ຺ຖາເຣນ ວິນິຈ຺ຉໂຍປິ ວຸຕ຺ໂຕ.

ນ ເທຕິ ນ ປຏິຄ຺ຄຓ຺ຫາຕີຕິ ນາປິ ອຸຍ຺ໂຍຊິກາ ເທຕິ, ນ ອຸຍ຺ໂຍຊິຕາ ຕສ຺ສາ ຫຕ຺ຖໂຕ ຄຓ຺ຫາຕິ. ປຏິຄ຺ຄໂຫ ເຕນ ນ ວິຊ຺ຊຕີຕິ ເຕເນວ ກາຣເຓນ ອຸຍ຺ໂຍຊິກາຍ ຫຕ຺ຖໂຕ ອຸຍ຺ໂຍຊິຕາຍ ປຏິຄ຺ຄໂຫ ນ ວິຊ຺ຊຕິ. ອາປຊ຺ຊຕິ ຄຣຸກນ຺ຕິ ເອວໍ ສນ຺ເຕປິ ອວສ຺ສຸຕສ຺ສ ຫຕ຺ຖໂຕ ປິຓ຺ຑປາຕຄ຺ຄຫເຓ ອຸຍ຺ໂຍເຊນ຺ຕີ ສງ຺ຆາທິເສສາປຕ຺ຕິໍ ອາປຊ຺ຊຕິ. ຕຎ຺ຈ ປຣິໂຠຄປຈ຺ຈຍາຕິ ຕຎ຺ຈ ປນ ອາປຕ຺ຕິໍ ອາປຊ຺ຊມານາ ຕສ຺ສາ ອຸຍ຺ໂຍຊິຕາຍ ປຣິໂຠຄປຈ຺ຈຍາ ອາປຊ຺ຊຕິ. ຕສ຺ສາ ຫິ ໂຠຊນປຣິໂຍສາເນ ອຸຍ຺ໂຍຊິກາຍ ສງ຺ຆາທິເສໂສ ໂຫຕີຕິ. ທຸຕິຍຄາຖາ ຕສ຺ສາເຍວ ອຸທກທນ຺ຕໂປນຄ຺ຄຫເຓ ອຸຍ຺ໂຍຊນໍ ສນ຺ຘາຍ ວຸຕ຺ຕາ.

ນ ຠິກ຺ຂຸນີ ໂນ ຈ ຜຸເສຍ຺ຍ ວຊ຺ຊນ຺ຕິ ສຕ຺ຕຣສເກສຸ ຫິ ອຎ຺ຎຕຣໍ ອາປຕ຺ຕິໍ ອາປຊ຺ຊິຕ຺ວາ ອນາທຣິເຍນ ຉາທຍມານາປິ ຠິກ຺ຂຸນີ ຉາທນປຈ຺ຈຍາ ວຊ຺ຊໍ ນ ຜຸສຕິ, ອຎ຺ຎໍ ນວໍ ອາປຕ຺ຕິໍ ນາປຊ຺ຊຕິ, ປຏິຈ຺ຉນ຺ນາຍ ວາ ອປ຺ປຏິຈ຺ຉນ຺ນາຍ ວາ ອາປຕ຺ຕິຍາ ປກ຺ຂມານຕ຺ຕເມວ ລຠຕິ. ອຍໍ ປນ ຠິກ຺ຂຸນີປິ ນ ໂຫຕິ, ສາວເສສຎ຺ຈ ຄຣຸກໍ ອາປຊ຺ຊິຕ຺ວາ ຉາເທຕ຺ວາ ວຊ຺ຊໍ ນ ຜຸສຕິ. ປຎ຺ຫາ ເມສາ ກຸສເລຫິ ຈິນ຺ຕິຕາຕິ ອຍໍ ກິຣ ປຎ຺ຫາ ອຸກ຺ຂິຕ຺ຕກຠິກ຺ຂຸໍ ສນ຺ຘາຍ ວຸຕ຺ຕາ. ເຕນ ຫິ ສທ຺ຘິໍ ວິນຍກມ຺ມໍ ນຕ຺ຖິ, ຕສ຺ມາ ໂສ ສງ຺ຆາທິເສສໍ ອາປຊ຺ຊິຕ຺ວາ ຉາເທນ຺ໂຕ ວຊ຺ຊໍ ນ ຜຸສຕີຕິ.

ເສທໂມຈນຄາຖາວຓ຺ຓນາ ນິຏ຺ຐິຕາ.