ອາປຕ຺ຕິສມຸຏ຺ຐານວຓ຺ຓນາ

໔໗໐. ອຈິຕ຺ຕໂກ ອາປຊ຺ຊຕີຕິອາທີສຸ ສຫເສຍ຺ຍາທິປຓ຺ຓຕ຺ຕິວຊ຺ຊໍ ອສຎ຺ຈິຈ຺ຈ ອາປຊ຺ຊນ຺ໂຕ ອຈິຕ຺ຕໂກ ອາປຊ຺ຊຕິ, ເທເສນ຺ໂຕ ສຈິຕ຺ຕໂກ ວຸຏ຺ຐາຕິ. ຍໍກິຎ຺ຈິ ສຎ຺ຈິຈ຺ຈ ອາປຊ຺ຊນ຺ໂຕ ສຈິຕ຺ຕໂກ ອາປຊ຺ຊຕິ, ຕິຓວຕ຺ຖາຣເກນ ວຸຏ຺ຐຫນ຺ໂຕ ອຈິຕ຺ຕໂກ ວຸຏ຺ຐາຕິ. ປຸພ຺ເພ ວຸຕ຺ຕເມວ ຕິຓວຕ຺ຖາຣເກນ ວຸຏ຺ຐຫນ຺ໂຕ ອຈິຕ຺ຕໂກ ອາປຊ຺ຊຕິ, ອຈິຕ຺ຕໂກ ວຸຏ຺ຐາຕິ. ອິຕຣໍ ເທເສນ຺ໂຕ ສຈິຕ຺ຕໂກ ອາປຊ຺ຊຕິ, ສຈິຕ຺ຕໂກ ວຸຏ຺ຐາຕິ. ‘‘ຘມ຺ມທານໍ ກໂຣມີ’’ຕິ ປທໂສຘມ຺ມາທີນິ ກໂຣນ຺ໂຕ ກຸສລຈິຕ຺ໂຕ ອາປຊ຺ຊຕິ, ‘‘ພຸທ຺ຘານໍ ອນຸສາສນິໍ ກໂຣມີ’’ຕິ ອຸທຄ຺ຄຈິຕ຺ໂຕ ເທເສນ຺ໂຕ ກຸສລຈິຕ຺ໂຕ ວຸຏ຺ຐາຕິ. ໂທມນສ຺ສິໂກ ຫຸຕ຺ວາ ເທເສນ຺ໂຕ ອກຸສລຈິຕ຺ໂຕ ວຸຏ຺ຐາຕິ, ຕິຓວຕ຺ຖາຣເກນ ນິທ຺ທາຄໂຕວ ວຸຏ຺ຐຫນ຺ໂຕ ອພ຺ຍາກຕຈິຕ຺ໂຕ ວຸຏ຺ຐາຕິ. ຠິໍສາປນາທີນິ ກຕ຺ວາ ‘‘ພຸທ຺ຘານໍ ສາສນໍ ກໂຣມີ’’ຕິ ໂສມນສ຺ສິໂກ ເທເສນ຺ໂຕ ອກຸສລຈິຕ຺ໂຕ ອາປຊ຺ຊຕິ, ກຸສລຈິຕ຺ໂຕ ວຸຏ຺ຐາຕິ. ໂທມນສ຺ສິໂກວ ເທເສນ຺ໂຕ ອກຸສລຈິຕ຺ໂຕ ວຸຏ຺ຐາຕິ, ວຸຕ຺ຕນເຍເນວ ຕິຓວຕ຺ຖາຣເກນ ວຸຏ຺ຐຫນ຺ໂຕ ອພ຺ຍາກຕຈິຕ຺ໂຕ ວຸຏ຺ຐາຕິ. ນິທ຺ໂທກ຺ກນ຺ຕສມເຍ ສຫຄາຣເສຍ຺ຍໍ ອາປຊ຺ຊນ຺ໂຕ ອພ຺ຍາກຕຈິຕ຺ໂຕ ອາປຊ຺ຊຕິ, ວຸຕ຺ຕນເຍເນວ ປເນຕ຺ຖ ‘‘ກຸສລຈິຕ຺ໂຕ ວຸຏ຺ຐາຕີ’’ຕິອາທິ ເວທິຕພ຺ພໍ.

ປຐມໍ ປາຣາຊິກໍ ກຕິຫິ ສມຸຏ຺ຐາເນຫີຕິອາທິ ປຸພ຺ເພ ວຸຕ຺ຕນຍຕ຺ຕາ ອຸຕ຺ຕານເມວ.

໔໗໓. ຈຕ຺ຕາໂຣ ປາຣາຊິກາ ກຕິຫິ ສມຸຏ຺ຐາເນຫີຕິອາທີສຸ ອຸກ຺ກຏ຺ຐປຣິຈ຺ເຉທໂຕ ຍໍ ຍໍ ສມຸຏ຺ຐານໍ ຍສ຺ສ ຍສ຺ສ ລພ຺ຠຕິ, ຕໍ ສພ຺ພໍ ວຸຕ຺ຕເມວ ໂຫຕິ.

ອາປຕ຺ຕິສມຸຏ຺ຐານວຓ຺ຓນາ ນິຏ຺ຐິຕາ.