໕. ຈີວຣປຏິຄ຺ຄຫຓສິກ຺ຂາປທວຓ຺ຓນາ

໕໐໘. ເຕນ ສມເຍນາຕິ ຈີວຣປຏິຄ຺ຄຫຓສິກ຺ຂາປທໍ. ຕຕ຺ຖ ປິຓ຺ຑປາຕປຏິກ຺ກນ຺ຕາຕິ ປິຓ຺ຑປາຕໂຕ ປຏິກ຺ກນ຺ຕາ. ເຍນ ອນ຺ຘວນໍ ເຕນຸປສງ຺ກມີຕິ ອປຎ຺ຎຕ຺ເຕ ສິກ຺ຂາປເທ ເຍນ ອນ຺ຘວນໍ ເຕນຸປສງ຺ກມິ. ກຕກມ຺ມາຕິ ກຕໂຈຣິກກມ຺ມາ, ສນ຺ຘິຈ຺ເຉທນາທີຫິ ປຣຠຓ຺ຑໍ ຫຣິຕາຕິ ວຸຕ຺ຕໍ ໂຫຕິ. ໂຈຣຄາມຓິໂກຕິ ໂຈຣເຊຏ຺ຐໂກ. ໂສ ກິຣ ປຸພ຺ເພ ເຖຣິໍ ຊານາຕິ, ຕສ຺ມາ ໂຈຣານໍ ປຸຣໂຕ ຄຈ຺ຉນ຺ໂຕ ທິສ຺ວາ ‘‘ອິໂຕ ມາ ຄຈ຺ຉຖ, ສພ຺ເພ ອິໂຕ ເອຖາ’’ຕິ ເຕ ຄເຫຕ຺ວາ ອຎ຺ເຎນ ມຄ຺ເຄນ ອຄມາສິ. ສມາຘິມ຺ຫາ ວຸຏ຺ຐຫິຕ຺ວາຕິ ເຖຣີ ກິຣ ປຣິຈ຺ຉິນ຺ນເວລາຍໍເຍວ ສມາຘິມ຺ຫາ ວຸຏ຺ຐຫິ. ໂສປິ ຕສ຺ມິໍເຍວ ຂເຓ ເອວໍ ອວຈ, ຕສ຺ມາ ສາ ອສ຺ໂສສິ, ສຸຕ຺ວາ ຈ ‘‘ນຕ຺ຖິ ທານິ ອຎ຺ໂຎ ເອຕ຺ຖ ສມໂຓ ວາ ພ຺ຣາຫ຺ມໂຓ ວາ ອຎ຺ຎຕ຺ຣ ມຍາ’’ຕິ ຕໍ ມໍສໍ ອຄ຺ຄເຫສິ. ເຕນ ວຸຕ຺ຕໍ – ‘‘ອຖ ໂຂ ອຸປ຺ປລວຓ຺ຓາ ຠິກ຺ຂຸນີ’’ຕິອາທິ.

ໂອຫິຍ຺ຍໂກຕິ ອວຫີຍໂກ ອວເສໂສ, ວິຫາຣວາຣໍ ປຕ຺ວາ ເອໂກວ ວິຫາເຣ ຐິໂຕຕິ ອຕ຺ໂຖ. ສເຈ ເມ ຕ຺ວໍ ອນ຺ຕຣວາສກໍ ທເທຍ຺ຍາສີຕິ ກສ຺ມາ ອາຫ? ສຓ຺ຫໍ ຆນມຏ຺ຐໍ ອນ຺ຕຣວາສກໍ ທິສ຺ວາ ໂລເຠນ, ອປິຈ ອປ຺ປໂກ ຕສ຺ສາ ອນ຺ຕຣວາສເກ ໂລໂຠ, ເຖຣິຍາ ປນ ສິຂາປ຺ປຕ຺ຕາ ໂກຏ຺ຐາສສມ຺ປຕ຺ຕິ ເຕນສ຺ສາ ສຣີຣປາຣິປູຣິໍ ປສ຺ສິສ຺ສາມີຕິ ວິສມໂລຠໍ ອຸປ຺ປາເທຕ຺ວາ ເອວມາຫ. ອນ຺ຕິມນ຺ຕິ ປຎ຺ຈນ຺ນໍ ຈີວຣານໍ ສພ຺ພປຣິຍນ຺ຕໍ ຫຸຕ຺ວາ ອນ຺ຕິມໍ, ອນ຺ຕິມນ຺ຕິ ປຈ຺ຉິມໍ. ອຎ຺ຎໍ ເລເສນາປິ ວິກປ຺ເປຕ຺ວາ ວາ ປຈ຺ຈຸທ຺ຘຣິຕ຺ວາ ວາ ຐປິຕໍ ຈີວຣໍ ນຕ຺ຖີຕິ ເອວໍ ຍຖາອນຸຎ຺ຎາຕານໍ ປຎ຺ຈນ຺ນໍ ຈີວຣານໍ ຘາຣຓວເສເນວ ອາຫ, ນ ໂລເຠນ, ນ ຫິ ຂີຓາສວານໍ ໂລໂຠ ອຕ຺ຖິ. ນິປ຺ປີຬິຍມານາຕິ ອຸປມໍ ທສ຺ເສຕ຺ວາ ຄາຬ຺ຫໍ ປີຬຍມານາ.

ອນ຺ຕຣວາສກໍ ທຕ຺ວາ ອຸປສ຺ສຍໍ ອຄມາສີຕິ ສງ຺ກຈ຺ຈິກໍ ນິວາເສຕ຺ວາ ຍຖາ ຕສ຺ສ ມໂນຣໂຖ ນ ປູຣຕິ, ເອວໍ ຫຕ຺ຖຕເລເຍວ ທສ຺ເສຕ຺ວາ ອຄມາສິ.

໕໑໐. ກສ຺ມາ ປາຣິວຕ຺ຕກຈີວຣໍ ອປ຺ປຏິຄຓ຺ຫນ຺ເຕ ອຸຊ຺ຌາຍິໍສຸ? ‘‘ສເຈ ເອຕ຺ຕໂກປິ ອມ຺ເຫສຸ ອຍ຺ຍານໍ ວິສ຺ສາໂສ ນຕ຺ຖິ, ກຖໍ ມຍໍ ຍາເປສ຺ສາມາ’’ຕິ ວິຫຕ຺ຖຕາຍ ສມຠິຕຸນ຺ນຕ຺ຕາ.

ອນຸຊານາມິ ຠິກ຺ຂເວ ອິເມສໍ ປຎ຺ຈນ຺ນນ຺ຕິ ອິເມສໍ ປຎ຺ຈນ຺ນໍ ສຫຘມ຺ມິການໍ ສມສທ຺ຘານໍ ສມສີລານໍ ສມທິຏ຺ຐີນໍ ປາຣິວຕ຺ຕກໍ ຄເຫຕຸໍ ອນຸຊານາມີຕິ ອຕ຺ໂຖ.

໕໑໒. ປໂຍເຄ ທຸກ຺ກຏນ຺ຕິ ຄຫຓຕ຺ຖາຍ ຫຕ຺ຖປ຺ປສາຣຓາທີສຸ ທຸກ຺ກຏໍ. ປຏິລາເຠນາຕິ ປຏິຄ຺ຄຫເຓນ. ຕຕ຺ຖ ຈ ຫຕ຺ເຖນ ວາ ຫຕ຺ເຖ ເທຕຸ, ປາທມູເລ ວາ ຐເປຕຸ, ອຸປຣິ ວາ ຂິປຕຸ, ໂສ ເຈ ສາທິຍຕິ, ຄຫິຕເມວ ໂຫຕິ. ສເຈ ປນ ສິກ຺ຂມານາສາມເຓຣສາມເຓຣີອຸປາສກອຸປາສິກາທີນໍ ຫຕ຺ເຖ ເປສິຕໍ ປຏິຄ຺ຄຓ຺ຫາຕິ, ອນາປຕ຺ຕິ. ຘມ຺ມກຖໍ ກເຖນ຺ຕສ຺ສ ຈຕສ຺ໂສປິ ປຣິສາ ຈີວຣານິ ຈ ນານາວິຣາຄວຕ຺ຖານິ ຈ ອາເນຕ຺ວາ ປາທມູເລ ຐເປນ຺ຕິ, ອຸປຈາເຣ ວາ ຐຕ຺ວາ ອຸປຈາຣໍ ວາ ມຸຎ຺ຈິຕ຺ວາ ຂິປນ຺ຕິ, ຍໍ ຕຕ຺ຖ ຠິກ຺ຂຸນີນໍ ສນ຺ຕກໍ, ຕໍ ອຎ຺ຎຕ຺ຣ ປາຣິວຕ຺ຕກາ ຄຓ຺ຫນ຺ຕສ຺ສ ອາປຕ຺ຕິເຍວ. ອຖ ປນ ຣຕ຺ຕິຠາເຄ ຂິຕ຺ຕານິ ໂຫນ຺ຕິ, ‘‘ອິທໍ ຠິກ຺ຂຸນິຍາ, ອິທໍ ອຎ຺ເຎສ’’ນ຺ຕິ ຎາຕຸໍ ນ ສກ຺ກາ, ປາຣິວຕ຺ຕກກິຈ຺ຈໍ ນຕ຺ຖີຕິ ມຫາປຈ຺ຈຣິຍໍ ກຸຣຸນ຺ທິຍຎ຺ຈ ວຸຕ຺ຕໍ, ຕໍ ອຈິຕ຺ຕກຠາເວນ ນ ສເມຕິ. ສເຈ ຠິກ຺ຂຸນີ ວສ຺ສາວາສິກໍ ເທຕິ, ປາຣິວຕ຺ຕກເມວ ກາຕພ຺ພໍ. ສເຈ ປນ ສງ຺ກາຣກູຏາທີສຸ ຐເປຕິ, ‘‘ປໍສຸກູລໍ ຄຓ຺ຫິສ຺ສນ຺ຕີ’’ຕິ ປໍສຸກູລໍ ອຘິຏ຺ຐຫິຕ຺ວາ ຄເຫຕຸໍ ວຏ຺ຏຕິ.

໕໑໓. ອຎ຺ຎາຕິກາຍ ອຎ຺ຎາຕິກສຎ຺ຎີຕິ ຕິກປາຈິຕ຺ຕິຍໍ. ເອກໂຕ ອຸປສມ຺ປນ຺ນາຍາຕິ ຠິກ຺ຂຸນີນໍ ສນ຺ຕິເກ ອຸປສມ຺ປນ຺ນາຍ ຫຕ຺ຖໂຕ ຄຓ຺ຫນ຺ຕສ຺ສ ທຸກ຺ກຏໍ, ຠິກ຺ຂູນໍ ສນ຺ຕິເກ ອຸປສມ຺ປນ຺ນາຍ ປນ ປາຈິຕ຺ຕິຍເມວ.

໕໑໔. ປຣິຕ຺ເຕນ ວາ ວິປຸລນ຺ຕິ ອປ຺ປຄ຺ຆຈີວເຣນ ວາ ອຸປາຫນຕ຺ຖວິກປຕ຺ຕຕ຺ຖວິກອໍສພທ຺ຘກກາຍພນ຺ຘນາທິນາ ວາ ມຫຄ຺ຆໍ ເຈຕາເປຕ຺ວາ ສເຈປິ ຈີວຣໍ ປຏິຄ຺ຄຓ຺ຫາຕິ, ອນາປຕ຺ຕິ. ມຫາປຈ຺ຈຣິຍໍ ປນ ‘‘ອນ຺ຕມໂສ ຫຣີຕກີຂຓ຺ເຑນາປີ’’ຕິ ວຸຕ຺ຕໍ. ວິປຸເລນ ວາ ປຣິຕ຺ຕນ຺ຕິ ອິທໍ ວຸຕ຺ຕວິປລ຺ລາເສນ ເວທິຕພ຺ພໍ. ອຎ຺ຎໍ ປຣິກ຺ຂາຣນ຺ຕິ ປຕ຺ຕຕ຺ຖວິກາທິໍ ຍໍ ກິຎ຺ຈິ ວິກປ຺ປນຸປຄປຈ຺ຉິມຈີວຣປ຺ປມາຓໍ ປນ ປຏປຣິສ຺ສາວນມ຺ປິ ນ ວຏ຺ຏຕິ. ຍໍ ເນວ ອຘິຏ຺ຐານຸປຄໍ ນ ວິກປ຺ປນຸປຄໍ ຕໍ ສພ຺ພໍ ວຏ຺ຏຕິ. ສເຈປິ ມຎ຺ຈປ຺ປມາຓາ ຠິສິຈ຺ຉວິ ໂຫຕິ, ວຏ຺ຏຕິເຍວ; ໂກ ປນ ວາໂທ ປຕ຺ຕຕ຺ຖວິກາທີສຸ. ເສສໍ ອຸຕ຺ຕານຕ຺ຖເມວ.

ສມຸຏ຺ຐານາທີສຸ ອິທໍ ຉສມຸຏ຺ຐານໍ, ກິຣິຍາກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ຈີວຣປຏິຄ຺ຄຫຓສິກ຺ຂາປທວຓ຺ຓນາ ນິຏ຺ຐິຕາ.