໔. ປຸຣາຓຈີວຣສິກ຺ຂາປທວຓ຺ຓນາ

໕໐໓-໕. ເຕນ ສມເຍນາຕິ ປຸຣາຓຈີວຣສິກ຺ຂາປທໍ. ຕຕ຺ຖ ຍາວ ສຕ຺ຕມາ ປິຕາມຫຍຸຄາຕິ ປິຕຸປິຕາ ປິຕາມໂຫ, ປິຕາມຫສ຺ສ ຍຸຄໍ ປິຕາມຫຍຸຄໍ. ຍຸຄນ຺ຕິ ອາຍຸປ຺ປມາຓໍ ວຸຈ຺ຈຕິ. ອຠິລາປ ມຕ຺ຕເມວ ເຈຕໍ. ອຕ຺ຖໂຕ ປນ ປິຕາມໂຫເຍວ ປິຕາມຫຍຸຄໍ. ຕໂຕ ອຸທ຺ຘໍ ສພ຺ເພປິ ປຸພ຺ພປຸຣິສາ ປິຕາມຫຄ຺ຄຫເຓເນວ ຄຫິຕາ. ເອວໍ ຍາວ ສຕ຺ຕໂມ ປຸຣິໂສ ຕາວ ຍາ ອສມ຺ພທ຺ຘາ ສາ ຍາວ ສຕ຺ຕມາ ປິຕາມຫຍຸຄາ ອສມ຺ພທ຺ຘາຕິ ວຸຈ຺ຈຕິ. ເທສນາມຸຂເມວ ເຈຕໍ. ‘‘ມາຕິໂຕ ວາ ປິຕິໂຕ ວາ’’ຕິວຈນໂຕ ປນ ປິຕາມຫຍຸຄມ຺ປິ ປິຕາມຫິຍຸຄມ຺ປິ ມາຕາມຫຍຸຄມ຺ປິ ມາຕາມຫິຍຸຄມ຺ປິ ເຕສໍ ຠາຕຸຠຄິນີຠາຄິເນຍ຺ຍປຸຕ຺ຕປປຸຕ຺ຕາທໂຍປິ ສພ຺ເພ ອິຘ ສງ຺ຄຫິຕາ ເອວາຕິ ເວທິຕພ຺ພາ.

ຕຕ຺ຣາຍໍ ວິຕ຺ຖາຣນໂຍ – ປິຕາ ປິຕຸປິຕາ ຕສ຺ສ ປິຕາ ຕສ຺ສາປິ ປິຕາຕິ ເອວໍ ຍາວ ສຕ຺ຕມາ ຍຸຄາ, ປິຕາ ປິຕຸມາຕາ ຕສ຺ສາ ປິຕາ ຈ ມາຕາ ຈ ຠາຕາ ຈ ຠຄິນີ ຈ ປຸຕ຺ຕາ ຈ ຘີຕໂຣ ຈາຕິ ເອວມ຺ປິ ອຸທ຺ຘຎ຺ຈ ອໂຘ ຈ ຍາວ ສຕ຺ຕມາ ຍຸຄາ, ປິຕາ ປິຕຸຠາຕາ ປິຕຸຠຄິນີ ປິຕຸປຸຕ຺ຕາ ປິຕຸຘີຕໂຣ ເຕສມ຺ປິ ປຸຕ຺ຕຘີຕຸປຣມ຺ປຣາຕິ ເອວມ຺ປິ ຍາວ ສຕ຺ຕມາ ຍຸຄາ, ມາຕາ ມາຕຸມາຕາ ຕສ຺ສາ ມາຕາ ຕສ຺ສາປິ ມາຕາຕິ ເອວມ຺ປິ ຍາວ ສຕ຺ຕມາ ຍຸຄາ, ມາຕາ ມາຕຸປິຕາ ຕສ຺ສ ມາຕາ ຈ ປິຕາ ຈ ຠາຕາ ຈ ຠຄິນີ ຈ ປຸຕ຺ຕາ ຈ ຘີຕໂຣ ຈາຕິ, ເອວມ຺ປິ ອຸທ຺ຘຎ຺ຈ ອໂຘ ຈ ຍາວ ສຕ຺ຕມາ ຍຸຄາ, ມາຕາ ມາຕຸຠາຕາ ມາຕຸຠຄິນີ ມາຕຸປຸຕ຺ຕາ ມາຕຸຘີຕໂຣ ເຕສມ຺ປິ ປຸຕ຺ຕຘີຕຸປຣມ຺ປຣາຕິ ເອວມ຺ປິ ຍາວ ສຕ຺ຕມາ ຍຸຄາ, ເນວ ມາຕຸສມ຺ພນ຺ເຘນ ນ ປິຕຸສມ຺ພນ຺ເຘນ ສມ຺ພທ຺ຘາ, ອຍໍ ອຎ຺ຎາຕິກາ ນາມ.

ອຸຠໂຕ ສງ຺ເຆຕິ ຠິກ຺ຂຸນິສງ຺ເຆ ຎຕ຺ຕິຈຕຸຕ຺ເຖນ ຠິກ຺ຂຸສງ຺ເຆ ຎຕ຺ຕິຈຕຸຕ຺ເຖນາຕິ ອຏ຺ຐວາຈິກວິນຍກມ຺ເມນ ອຸປສມ຺ປນ຺ນາ.

ສກິໍ ນິວຕ຺ຖມ຺ປິ ສກິໍ ປາຣຸຕມ຺ປີຕິ ຣຊິຕ຺ວາ ກປ຺ປໍ ກຕ຺ວາ ເອກວາຣມ຺ປິ ນິວຕ຺ຖໍ ວາ ປາຣຸຕໍ ວາ. ອນ຺ຕມໂສ ປຣິໂຠຄສີເສນ ອໍເສ ວາ ມຕ຺ຖເກ ວາ ກຕ຺ວາ ມຄ຺ຄໍ ຄໂຕ ໂຫຕິ, ອຸສ຺ສີສກໍ ວາ ກຕ຺ວາ ນິປນ຺ໂນ ໂຫຕິ, ເອຕມ຺ປິ ປຸຣາຓຈີວຣເມວ. ສເຈ ປນ ປຈ຺ຈຕ຺ຖຣຓສ຺ສ ເຫຏ຺ຐາ ກຕ຺ວາ ນິປຊ຺ຊຕິ, ຫຕ຺ເຖຫິ ວາ ອຸກ຺ຂິປິຕ຺ວາ ອາກາເສ ວິຕານໍ ກຕ຺ວາ ສີເສນ ອຜຸສນ຺ໂຕ ຄຈ຺ຉຕິ, ອຍໍ ປຣິໂຠໂຄ ນາມ ນ ໂຫຕີຕິ ກຸຣຸນ຺ທິຍໍ ວຸຕ຺ຕໍ.

ໂຘຕໍ ນິສ຺ສຄ຺ຄິຍນ຺ຕິ ເອຕ຺ຖ ເອວໍ ອາຓຕ຺ຕາ ຠິກ຺ຂຸນີ ໂຘວນຕ຺ຖາຍ ອຸທ຺ຘນໍ ສຊ຺ເຊຕິ, ທາຣູນິ ສໍຫຣຕິ, ອຄ຺ຄິໍ ກໂຣຕິ, ອຸທກໍ ອາຫຣຕິ ຍາວ ນໍ ໂຘວິຕ຺ວາ ອຸກ຺ຂິປຕິ, ຕາວ ຠິກ຺ຂຸນິຍາ ປໂຍເຄ ປໂຍເຄ ຠິກ຺ຂຸສ຺ສ ທຸກ຺ກຏໍ. ໂຘວິຕ຺ວາ ອຸກ຺ຂິຕ຺ຕມຕ຺ເຕ ນິສ຺ສຄ຺ຄິຍໍ ໂຫຕິ. ສເຈ ທຸທ຺ໂຘຕນ຺ຕິ ມຎ຺ຎມານາ ປຸນ ສິຎ຺ຈຕິ ວາ ໂຘວຕິ ວາ ຍາວ ນິຏ຺ຐານໍ ນ ຄຈ຺ຉຕິ ຕາວ ປໂຍເຄ ປໂຍເຄ ທຸກ຺ກຏໍ. ເອສ ນໂຍ ຣຊນາໂກຏເນສຸ. ຣຊນໂທຓິຍຎ຺ຫິ ຣຊນໍ ອາກິຣິຕ຺ວາ ຍາວ ສກິໍ ຈີວຣໍ ຣຊຕິ, ຕໂຕ ປຸພ຺ເພ ຍໍກິຎ຺ຈິ ຣຊນຕ຺ຖາຍ ກໂຣຕິ, ປຈ຺ຉາ ວາ ປຏິຣຊຕິ, ສພ຺ພຕ຺ຖ ປໂຍເຄ ປໂຍເຄ ຠິກ຺ຂຸສ຺ສ ທຸກ຺ກຏໍ. ເອວໍ ອາໂກຏເນປິ ປໂຍໂຄ ເວທິຕພ຺ໂພ.

໕໐໖. ອຎ຺ຎາຕິກາຍ ອຎ຺ຎາຕິກສຎ຺ຎີ ປຸຣາຓຈີວຣໍ ໂຘວາເປຕີຕິ ໂນ ເຈປິ ‘‘ອິມໍ ໂຘວາ’’ຕິ ວທຕິ, ອຖ ໂຂ ໂຘວນຕ຺ຖາຍ ກາຍວິກາຣໍ ກຕ຺ວາ ຫຕ຺ເຖນ ວາ ຫຕ຺ເຖ ເທຕິ, ປາທມູເລ ວາ ຐເປຕິ, ອຸປຣິ ວາ ຂິປຕິ, ສິກ຺ຂມານາສາມເຓຣີສາມເຓຣອຸປາສກຕິຕ຺ຖິຍາທີນໍ ວາ ຫຕ຺ເຖ ເປເສຕິ, ນທີຕິຕ຺ເຖ ໂຘວນ຺ຕິຍາ ອຸປຈາເຣ ວາ ຂິປຕິ, ອນ຺ໂຕທ຺ວາທສຫຕ຺ເຖ ໂອກາເສ ຐຕ຺ວາ, ໂຘວາປິຕໍເຍວ ໂຫຕິ. ສເຈ ປນ ອຸປຈາຣໍ ມຸຎ຺ຈິຕ຺ວາ ໂອຣໂຕ ຐເປຕິ ສາ ເຈ ໂຘວິຕ຺ວາ ອາເນຕິ, ອນາປຕ຺ຕິ. ສິກ຺ຂມານາຍ ວາ ສາມເຓຣິຍາ ວາ ອຸປາສິກາຍ ວາ ຫຕ຺ເຖ ໂຘວນຕ຺ຖາຍ ເທຕິ, ສາ ເຈ ອຸປສມ຺ປຊ຺ຊິຕ຺ວາ ໂຘວຕິ, ອາປຕ຺ຕິເຍວ. ອຸປາສກສ຺ສ ຫຕ຺ເຖ ເທຕິ, ໂສ ເຈ ລິງ຺ເຄ ປຣິວຕ຺ເຕ ຠິກ຺ຂຸນີສຸ ປພ຺ພຊິຕ຺ວາ ອຸປສມ຺ປຊ຺ຊິຕ຺ວາ ໂຘວຕິ, ອາປຕ຺ຕິເຍວ. ສາມເຓຣສ຺ສ ວາ ຠິກ຺ຂຸສ຺ສ ວາ ຫຕ຺ເຖ ທິນ຺ເນປິ ລິງ຺ຄປຣິວຕ຺ຕເນ ເອເສວ ນໂຍ.

ໂຘວາເປຕິ ຣຊາເປຕີຕິອາທີສຸ ເອເກນ ວຕ຺ຖຸນາ ນິສ຺ສຄ຺ຄິຍໍ, ທຸຕິເຍນ ທຸກ຺ກຏໍ. ຕີຓິປິ ກາຣາເປນ຺ຕສ຺ສ ເອເກນ ນິສ຺ສຄ຺ຄິຍໍ, ເສເສຫິ ທ຺ເວ ທຸກ຺ກຏານິ. ຍສ຺ມາ ປເນຕານິ ໂຘວນາທີນິ ປຏິປາຏິຍາ ວາ ອຸປ຺ປຏິປາຏິຍາ ວາ ກາເຣນ຺ຕສ຺ສ ໂມກ຺ໂຂ ນຕ຺ຖິ, ຕສ຺ມາ ເອຕ຺ຖ ຕີຓິ ຈຕຸກ຺ການິ ວຸຕ຺ຕານິ. ສເຈປິ ຫິ ‘‘ອິມໍ ຈີວຣໍ ຣຊິຕ຺ວາ ໂຘວິຕ຺ວາ ອາເນຫີ’’ຕິ ວຸຕ຺ເຕ ສາ ຠິກ຺ຂຸນີ ປຐມໍ ໂຘວິຕ຺ວາ ປຈ຺ຉາ ຣຊຕິ, ນິສ຺ສຄ຺ຄິເຍນ ທຸກ຺ກຏເມວ. ເອວໍ ສພ຺ເພສຸ ວິປຣີຕວຈເນສຸ ນໂຍ ເນຕພ຺ໂພ. ສເຈ ປນ ‘‘ໂຘວິຕ຺ວາ ອາເນຫີ’’ຕິ ວຸຕ຺ຕາ ໂຘວຕິ ເຈວ ຣຊຕິ ຈ, ໂຘວາປນປຈ຺ຈຍາ ເອວ ອາປຕ຺ຕິ, ຣຊເນ ອນາປຕ຺ຕິ. ເອວໍ ສພ຺ພຕ຺ຖ ວຸຕ຺ຕາຘິກກຣເຓ ‘‘ອວຸຕ຺ຕາ ໂຘວຕີ’’ຕິ ອິມິນາ ລກ຺ຂເຓນ ອນາປຕ຺ຕິ ເວທິຕພ຺ພາ. ‘‘ອິມສ຺ມິໍ ຈີວເຣ ຍໍ ກາຕພ຺ພໍ, ສພ຺ພໍ ຕໍ ຕຸຍ຺ຫໍ ຠາໂຣ’’ຕິ ວທນ຺ໂຕ ປນ ເອກວາຈາຍ ສມ຺ພຫຸລາ ອາປຕ຺ຕິໂຍ ອາປຊ຺ຊຕີຕິ.

ອຎ຺ຎາຕິກາຍ ເວມຕິໂກ ອຎ຺ຎາຕິກາຍ ຎາຕິກສຎ຺ຎີຕິ ອິມານິປິ ປທານິ ວຸຕ຺ຕານໍເຍວ ຕິຓ຺ຓໍ ຈຕຸກ຺ການໍ ວເສນ ວິຕ຺ຖາຣໂຕ ເວທິຕພ຺ພານິ.

ເອກໂຕ ອຸປສມ຺ປນ຺ນາຍາຕິ ຠິກ຺ຂຸນີນໍ ສນ຺ຕິເກ ອຸປສມ຺ປນ຺ນາຍ ໂຘວາເປນ຺ຕສ຺ສ ທຸກ຺ກຏໍ. ຠິກ຺ຂູນໍ ສນ຺ຕິເກ ອຸປສມ຺ປນ຺ນາຍ ປນ ຍຖາວຕ຺ຖຸກເມວ, ຠິກ຺ຂູນໍ ສນ຺ຕິເກ ອຸປສມ຺ປນ຺ນາ ນາມ ປຎ຺ຈສຕາ ສາກິຍານິໂຍ.

໕໐໗. ອວຸຕ຺ຕາ ໂຘວຕີຕິ ອຸທ຺ເທສາຍ ວາ ໂອວາທາຍ ວາ ອາຄຕາ ກິລິນ຺ນໍ ຈີວຣໍ ທິສ຺ວາ ຐປິຕຏ຺ຐານໂຕ ຄເຫຕ຺ວາ ວາ ‘‘ເທຖ, ອຍ຺ຍ, ໂຘວິສ຺ສາມີ’’ຕິ ອາຫຣາເປຕ຺ວາ ວາ ໂຘວຕິ ເຈວ ຣຊຕິ ຈ ອາໂກເຏຕິ ຈ, ອຍໍ ອວຸຕ຺ຕາ ໂຘວຕິ ນາມ. ຍາປິ ‘‘ອິມໍ ຈີວຣໍ ໂຘວາ’’ຕິ ທຫຣໍ ວາ ສາມເຓຣໍ ວາ ອາຓາເປນ຺ຕສ຺ສ ຠິກ຺ຂຸໂນ ສຸຕ຺ວາ ‘‘ອາຫຣຖຍ຺ຍ ອຫໍ ໂຘວິສ຺ສາມີ’’ຕິ ໂຘວຕິ, ຕາວກາລິກໍ ວາ ຄເຫຕ຺ວາ ໂຘວິຕ຺ວາ ຣຊິຕ຺ວາ ເທຕິ, ອຍມ຺ປິ ອວຸຕ຺ຕາ ໂຘວຕິ ນາມ.

ອຎ຺ຎໍ ປຣິກ຺ຂາຣນ຺ຕິ ອຸປາຫນຕ຺ຖວິກປຕ຺ຕຕ຺ຖວິກອໍສພທ຺ຘກກາຍພນ຺ຘນມຎ຺ຈປີຐຠິສິຕຏ຺ຏິກາທິໍ ຍໍກິຎ຺ຈິ ໂຘວາເປຕິ, ອນາປຕ຺ຕິ. ເສສເມຕ຺ຖ ອຸຕ຺ຕານຕ຺ຖເມວ.

ສມຸຏ຺ຐານາທີສຸ ປນ ອິທໍ ສິກ຺ຂາປທໍ ຉສມຸຏ຺ຐານໍ, ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ປຸຣາຓຈີວຣສິກ຺ຂາປທວຓ຺ຓນາ ນິຏ຺ຐິຕາ.