໙. ທຸຕິຍທຸຏ຺ຐໂທສສິກ຺ຂາປທວຓ຺ຓນາ

໓໙໑. ເຕນ ສມເຍນ ພຸທ຺ໂຘ ຠຄວາຕິ ທຸຕິຍທຸຏ຺ຐໂທສສິກ຺ຂາປທໍ. ຕຕ຺ຖ ຫນ຺ທ ມຍໍ ອາວຸໂສ ອິມໍ ຉຄລກໍ ທພ຺ພໍ ມລ຺ລປຸຕ຺ຕໍ ນາມ ກໂຣມາຕິ ເຕ ກິຣ ປຐມວຕ຺ຖຸສ຺ມິໍ ອຕ຺ຕໂນ ມໂນຣຖໍ ສມ຺ປາເທຕຸໍ ອສກ຺ໂກນ຺ຕາ ລທ຺ຘນິຄ຺ຄຫາ ວິຆາຕປ຺ປຕ຺ຕາ ‘‘ອິທານິ ຊານິສ຺ສາມາ’’ຕິ ຕາທິສໍ ວຕ຺ຖຸໍ ປຣິເຍສມານາ ວິຈຣນ຺ຕິ. ອເຖກທິວສໍ ທິສ຺ວາ ຕຸຏ຺ຐາ ອຎ຺ຎມຎ຺ຎໍ ໂອໂລເກຕ຺ວາ ເອວມາຫໍສຸ – ‘‘ຫນ຺ທ ມຍໍ, ອາວຸໂສ, ອິມໍ ຉຄລກໍ ທພ຺ພໍ ມລ຺ລປຸຕ຺ຕໍ ນາມ ກໂຣມາ’’ຕິ, ‘‘ທພ຺ໂພ ມລ຺ລປຸຕ຺ໂຕ ນາມາຍ’’ນ຺ຕິ ເອວມສ຺ສ ນາມໍ ກໂຣມາຕິ ວຸຕ຺ຕໍ ໂຫຕິ. ເອສ ນໂຍ ເມຕ຺ຕິຍໍ ນາມ ຠິກ຺ຂຸນິນ຺ຕິ ເອຕ຺ຖາປິ.

ເຕ ຠິກ຺ຂູ ເມຕ຺ຕິຍຠຸມຊເກ ຠິກ຺ຂູ ອນຸຍຸຎ຺ຊິໍສູຕິ ເອວໍ ອນຸຍຸຎ຺ຊິໍສຸ –‘‘ອາວຸໂສ, ກຸຫິໍ ຕຸມ຺ເຫຫິ ທພ຺ໂພ ມລ຺ລປຸຕ຺ໂຕ ເມຕ຺ຕິຍາຍ ຠິກ຺ຂຸນິຍາ ສທ຺ຘິໍ ທິຏ຺ໂຐ’’ຕິ? ‘‘ຄິຊ຺ຌກູຏປພ຺ພຕປາເທ’’ຕິ. ‘‘ກາຍ ເວລາຍ’’ຕິ? ‘‘ຠິກ຺ຂາຈາຣຄມນເວລາຍາ’’ຕິ. ອາວຸໂສ ທພ຺ພ ອິເມ ເອວໍ ວທນ຺ຕິ – ‘‘ຕ຺ວໍ ຕທາ ກຸຫິ’’ນ຺ຕິ? ‘‘ເວຬຸວເນ ຠຕ຺ຕານິ ອຸທ຺ທິສາມີ’’ຕິ. ‘‘ຕວ ຕາຍ ເວລາຍ ເວຬຸວເນ ອຕ຺ຖິຠາວໍ ໂກ ຊານາຕີ’’ຕິ? ‘‘ຠິກ຺ຂຸສງ຺ໂຆ, ຠນ຺ເຕ’’ຕິ. ເຕ ສງ຺ຆໍ ປຸຈ຺ຉິໍສຸ – ‘‘ຊານາຖ ຕຸມ຺ເຫ ຕາຍ ເວລາຍ ອິມສ຺ສ ເວຬຸວເນ ອຕ຺ຖິຠາວ’’ນ຺ຕິ. ‘‘ອາມ, ອາວຸໂສ, ຊານາມ, ເຖໂຣ ສມ຺ມຸຕິລທ຺ຘທິວສໂຕ ປຏ຺ຐາຍ ເວຬຸວເນເຍວາ’’ຕິ. ຕໂຕ ເມຕ຺ຕິຍຠຸມຊເກ ອາຫໍສຸ – ‘‘ອາວຸໂສ, ຕຸມ຺ຫາກໍ ກຖາ ນ ສເມຕິ, ກຈ຺ຈິ ໂນ ເລສໍ ໂອຑ຺ເຑຕ຺ວາ ວທຖາ’’ຕິ. ເອວໍ ເຕ ເຕຫິ ຠິກ຺ຂູຫິ ອນຸຍຸຎ຺ຊິຍມານາ ອາມ ອາວຸໂສຕິ ວຕ຺ວາ ເອຕມຕ຺ຖໍ ອາໂຣເຈສຸໍ.

ກິໍ ປນ ຕຸມ຺ເຫ, ອາວຸໂສ, ອາຍສ຺ມນ຺ຕໍ ທພ຺ພໍ ມລ຺ລປຸຕ຺ຕໍ ອຎ຺ຎຠາຄິຍສ຺ສ ອຘິກຣຓສ຺ສາຕິ ເອຕ຺ຖ ອຎ຺ຎຠາຄສ຺ສ ອິທໍ, ອຎ຺ຎຠາໂຄ ວາ ອສ຺ສ ອຕ຺ຖີຕິ ອຎ຺ຎຠາຄິຍໍ. ອຘິກຣຓນ຺ຕິ ອາຘາໂຣ ເວທິຕພ຺ໂພ, ວຕ຺ຖຸ ອຘິຏ຺ຐານນ຺ຕິ ວຸຕ຺ຕໍ ໂຫຕິ. ໂຍ ຫິ ໂສ ‘‘ທພ຺ໂພ ມລ຺ລປຸຕ຺ໂຕ ນາມາ’’ຕິ ຉຄລໂກ ວຸຕ຺ໂຕ, ໂສ ຍ຺ວາຍໍ ອາຍສ຺ມໂຕ ທພ຺ພສ຺ສ ມລ຺ລປຸຕ຺ຕສ຺ສ ຠາໂຄ ໂກຏ຺ຐາໂສ ປກ຺ໂຂ ມນຸສ຺ສຊາຕິ ເຈວ ຠິກ຺ຂຸຠາໂວ ຈ ຕໂຕ ອຎ຺ຎສ຺ສ ຠາຄສ຺ສ ໂກຏ຺ຐາສສ຺ສ ປກ຺ຂສ຺ສ ໂຫຕິ ຕິຣຈ຺ຉານຊາຕິຍາ ເຈວ ຉຄລກຠາວສ຺ສ ຈ ໂສ ວາ ອຎ຺ຎຠາໂຄ ອສ຺ສ ອຕ຺ຖີຕິ ຕສ຺ມາ ອຎ຺ຎຠາຄິຍສງ຺ຂ຺ຍໍ ລຠຕິ. ຍສ຺ມາ ຈ ເຕສໍ ‘‘ອິມໍ ມຍໍ ທພ຺ພໍ ມລ຺ລປຸຕ຺ຕໍ ນາມ ກໂຣມາ’’ຕິ ວທນ຺ຕານໍ ຕສ຺ສາ ນາມກຣຓສຎ຺ຎາຍ ອາຘາໂຣ ວຕ຺ຖຸ ອຘິຏ຺ຐານໍ, ຕສ຺ມາ ອຘິກຣຓນ຺ຕິ ເວທິຕພ຺ໂພ. ຕຎ຺ຫິ ສນ຺ຘາຍ ‘‘ເຕ ຠິກ຺ຂູ ອຎ຺ຎຠາຄິຍສ຺ສ ອຘິກຣຓສ຺ສາ’’ຕິ ອາຫໍສຸ, ນ ວິວາທາຘິກຣຓາທີສຸ ອຎ຺ຎຕຣໍ. ກສ຺ມາ? ອສມ຺ຠວໂຕ. ນ ຫິ ເຕ ຈຕຸນ຺ນໍ ອຘິກຣຓານໍ ກສ຺ສຈິ ອຎ຺ຎຠາຄິຍສ຺ສ ອຘິກຣຓສ຺ສ ກຎ຺ຈິເທສໍ ເລສມຕ຺ຕໍ ອຸປາທິຍິໍສຸ. ນ ຈ ຈຕຸນ຺ນໍ ອຘິກຣຓານໍ ເລໂສ ນາມ ອຕ຺ຖິ. ຊາຕິເລສາທໂຍ ຫິ ປຸຄ຺ຄລານໍເຍວ ເລສາ ວຸຕ຺ຕາ, ນ ວິວາທາຘິກຣຓາທີນໍ. ອິທຎ຺ຈ ‘‘ທພ຺ໂພ ມລ຺ລປຸຕ຺ໂຕ’’ຕິ ນາມໍ ຕສ຺ສ ອຎ຺ຎຠາຄິຍາຘິກຣຓຠາເວ ຐິຕສ຺ສ ຉຄລກສ຺ສ ໂກຈິ ເທໂສ ໂຫຕິ ເຖຣໍ ອມູລເກນ ປາຣາຊິເກນ ອນຸທ຺ຘໍເສຕຸໍ ເລສມຕ຺ໂຕ.

ເອຕ຺ຖ ຈ ທິສ຺ສຕິ ອປທິສ຺ສຕິ ອສ຺ສ ອຍນ຺ຕິ ໂວຫຣີຍຕີຕິ ເທໂສ. ຊາຕິອາທີສຸ ອຎ຺ຎຕຣໂກຏ຺ຐາສສ຺ເສຕໍ ອຘິວຈນໍ. ອຎ຺ຎມ຺ປິ ວຕ຺ຖຸໍ ລິສ຺ສຕິ ສິລິສ຺ສຕິ ໂວຫາຣມຕ຺ເຕເນວ ອີສກໍ ອລ຺ລີຍຕີຕິ ເລໂສ. ຊາຕິອາທີນໍເຍວ ອຎ຺ຎຕຣໂກຏ຺ຐາສສ຺ເສຕໍ ອຘິວຈນໍ. ຕໂຕ ປຣໍ ອຸຕ຺ຕານຕ຺ຖເມວ. ສິກ຺ຂາປທປຎ຺ຎຕ຺ຕິຍມ຺ປິ ອຍເມວຕ຺ໂຖ. ປທຠາຊເນ ປນ ຍສ຺ສ ອຎ຺ຎຠາຄິຍສ຺ສ ອຘິກຣຓສ຺ສ ກິຎ຺ຈິເທສໍ ເລສມຕ຺ຕໍ ອຸປາທາຍ ປາຣາຊິເກນ ຘມ຺ເມນ ອນຸທ຺ຘໍເສຍ຺ຍ, ຕໍ ຍສ຺ມາ ອຏ຺ຐຸປ຺ປຕ຺ຕິວເສເນວ ອາວິຠູຕໍ, ຕສ຺ມາ ນ ວິຠຕ຺ຕນ຺ຕິ ເວທິຕພ຺ພໍ.

໓໙໓. ຍານິ ປນ ອຘິກຣຓນ຺ຕິ ວຈນສາມຎ຺ຎໂຕ ອຕ຺ຖຸທ຺ຘາຣວເສນ ປວຕ຺ຕານິ ຈຕ຺ຕາຣິ ອຘິກຣຓານິ, ເຕສໍ ອຎ຺ຎຠາຄິຍຕາ ຈ ຕພ຺ຠາຄິຍຕາ ຈ ຍສ຺ມາ ອປາກຏາ ຊານິຕພ຺ພາ ຈ ວິນຍຘເຣຫິ, ຕສ຺ມາ ວຈນສາມຎ຺ຎໂຕ ລທ຺ຘໍ ອຘິກຣຓໍ ນິສ຺ສາຍ ຕໍ ອາວິກໂຣນ຺ໂຕ ‘‘ອຎ຺ຎຠາຄິຍສ຺ສ ອຘິກຣຓສ຺ສາຕິ ອາປຕ຺ຕຎ຺ຎຠາຄິຍໍ ວາ ໂຫຕິ ອຘິກຣຓຎ຺ຎຠາຄິຍໍ ວາ’’ຕິອາທິມາຫ. ຍາ ຈ ສາ ອວສາເນ ອາປຕ຺ຕຎ຺ຎຠາຄິຍສ຺ສ ອຘິກຣຓສ຺ສ ວເສນ ໂຈທນາ ວຸຕ຺ຕາ, ຕມ຺ປິ ທສ຺ເສຕຸໍ ອຍໍ ສພ຺ພາຘິກຣຓານໍ ຕພ຺ຠາຄິຍອຎ຺ຎຠາຄິຍຕາ ສມາຫຏາຕິ ເວທິຕພ຺ພາ.

ຕຕ຺ຖ ຈ ອາປຕ຺ຕຎ຺ຎຠາຄິຍໍ ວາຕິ ປຐມໍ ອຸທ຺ທິຏ຺ຐຕ຺ຕາ ‘‘ກຖຎ຺ຈ ອາປຕ຺ຕິ ອາປຕ຺ຕິຍາ ອຎ຺ຎຠາຄິຍາ ໂຫຕີ’’ຕິ ນິທ຺ເທເສ ອາຣຠິຕພ຺ເພ ຍສ຺ມາ ອາປຕ຺ຕາຘິກຣຓສ຺ສ ຕພ຺ຠາຄິຍວິຈາຣຓາຍໍເຍວ ອຍມຕ຺ໂຖ ອາຄມິສ຺ສຕິ, ຕສ຺ມາ ເອວໍ ອນາຣຠິຕ຺ວາ ‘‘ກຖຎ຺ຈ ອຘິກຣຓໍ ອຘິກຣຓສ຺ສ ອຎ຺ຎຠາຄິຍ’’ນ຺ຕິ ປຈ຺ຉິມປທໍເຍວ ຄເຫຕ຺ວາ ນິທ຺ເທໂສ ອາຣທ຺ໂຘຕິ ເວທິຕພ຺ໂພ.

ຕຕ຺ຖ ອຎ຺ຎຠາຄິຍວາໂຣ ອຸຕ຺ຕານຕ຺ໂຖເຍວ. ເອກເມກຎ຺ຫິ ອຘິກຣຓໍ ອິຕເຣສໍ ຕິຓ຺ຓໍ ຕິຓ຺ຓໍ ອຎ຺ຎຠາຄິຍໍ ອຎ຺ຎປກ຺ຂິຍໍ ອຎ຺ຎໂກຏ຺ຐາສິຍໍ ໂຫຕິ, ວຕ຺ຖຸວິສຠາຄຕ຺ຕາ, ຕພ຺ຠາຄິຍວາເຣ ປນ ວິວາທາຘິກຣຓໍ ວິວາທາຘິກຣຓສ຺ສ ຕພ຺ຠາຄິຍໍ ຕປ຺ປກ຺ຂິຍໍ ຕໍໂກຏ຺ຐາສິຍໍ ວຕ຺ຖຸສຠາຄຕ຺ຕາ, ຕຖາ ອນຸວາທາຘິກຣຓໍ ອນຸວາທາຘິກຣຓສ຺ສ. ກຖໍ? ພຸທ຺ຘກາລໂຕ ປຏ຺ຐາຍ ຫິ ອຏ຺ຐາຣສ ເຠທກຣວຕ຺ຖູນິ ນິສ຺ສາຍ ອຸປ຺ປນ຺ນວິວາໂທ ຈ ອິທານິ ອຸປ຺ປຊ຺ຊນກວິວາໂທ ຈ ວຕ຺ຖຸສຠາຄຕາຍ ເອກໍ ວິວາທາຘິກຣຓເມວ ໂຫຕິ, ຕຖາ ພຸທ຺ຘກາລໂຕ ປຏ຺ຐາຍ ຈຕສ຺ໂສ ວິປຕ຺ຕິໂຍ ນິສ຺ສາຍ ອຸປ຺ປນ຺ນອນຸວາໂທ ຈ ອິທານິ ອຸປ຺ປຊ຺ຊນກອນຸວາໂທ ຈ ວຕ຺ຖຸສຠາຄຕາຍ ເອກໍ ອນຸວາທາຘິກຣຓເມວ ໂຫຕິ. ຍສ຺ມາ ປນ ອາປຕ຺ຕາຘິກຣຓໍ ອາປຕ຺ຕາຘິກຣຓສ຺ສ ສຠາຄວິສຠາຄວຕ຺ຖຸໂຕ ສຠາຄສຣິກ຺ຂາສຣິກ຺ຂໂຕ ຈ ເອກໍເສນ ຕພ຺ຠາຄິຍໍ ນ ໂຫຕິ, ຕສ຺ມາ ອາປຕ຺ຕາຘິກຣຓໍ ອາປຕ຺ຕາຘິກຣຓສ຺ສ ສິຍາ ຕພ຺ຠາຄິຍໍ ສິຍາ ອຎ຺ຎຠາຄິຍນ຺ຕິ ວຸຕ຺ຕໍ. ຕຕ຺ຖ ອາທິໂຕ ປຏ຺ຐາຍ ອຎ຺ຎຠາຄິຍສ຺ສ ປຐມໍ ນິທ຺ທິຏ຺ຐຕ຺ຕາ ອິຘາປິ ອຎ຺ຎຠາຄິຍເມວ ປຐມໍ ນິທ຺ທິຏ຺ຐໍ, ຕຕ຺ຖ ອຎ຺ຎຠາຄິຍຕ຺ຕຎ຺ຈ ປຣໂຕ ຕພ຺ຠາຄິຍຕ຺ຕຎ຺ຈ ວຸຕ຺ຕນເຍເນວ ເວທິຕພ຺ພໍ.

ກິຈ຺ຈາຘິກຣຓໍ ກິຈ຺ຈາຘິກຣຓສ຺ສ ຕພ຺ຠາຄິຍນ຺ຕິ ເອຕ຺ຖ ປນ ພຸທ຺ຘກາລໂຕ ປຏ຺ຐາຍ ຈຕ຺ຕາຣິ ສງ຺ຆກມ຺ມານິ ນິສ຺ສາຍ ອຸປ຺ປນ຺ນໍ ອຘິກຣຓຎ຺ຈ ອິທານິ ຈຕ຺ຕາຣິ ສງ຺ຆກມ຺ມານິ ນິສ຺ສາຍ ອຸປ຺ປຊ຺ຊນກໍ ອຘິກຣຓຎ຺ຈ ສຠາຄຕາຍ ສຣິກ຺ຂຕາຍ ຈ ເອກໍ ກິຈ຺ຈາຘິກຣຓເມວ ໂຫຕິ. ກິໍ ປນ ສງ຺ຆກມ຺ມານິ ນິສ຺ສາຍ ອຸປ຺ປນ຺ນໍ ອຘິກຣຓໍ ກິຈ຺ຈາຘິກຣຓໍ, ອຸທາຫຸ ສງ຺ຆກມ຺ມານເມເວຕໍ ອຘິວຈນນ຺ຕິ? ສງ຺ຆກມ຺ມານເມເວຕໍ ອຘິວຈນໍ. ເອວໍ ສນ຺ເຕປິ ສງ຺ຆກມ຺ມໍ ນາມ ‘‘ອິທຎ຺ຈິທຎ຺ຈ ເອວໍ ກຕ຺ຕພ຺ພ’’ນ຺ຕິ ຍໍ ກມ຺ມລກ຺ຂຓໍ ມນສິກໂຣຕິ ຕໍ ນິສ຺ສາຍ ອຸປ຺ປຊ຺ຊນໂຕ ປຸຣິມໍ ປຸຣິມໍ ສງ຺ຆກມ຺ມໍ ນິສ຺ສາຍ ອຸປ຺ປຊ຺ຊນໂຕ ຈ ສງ຺ຆກມ຺ມານິ ນິສ຺ສາຍ ອຸປ຺ປນ຺ນໍ ອຘິກຣຓໍ ກິຈ຺ຈາຘິກຣຓນ຺ຕິ ວຸຕ຺ຕໍ.

໓໙໔. ກິຎ຺ຈິ ເທສໍ ເລສມຕ຺ຕໍ ອຸປາທາຍາຕິ ເອຕ຺ຖ ປນ ຍສ຺ມາ ເທໂສຕິ ວາ ເລສມຕ຺ໂຕຕິ ວາ ປຸພ຺ເພ ວຸຕ຺ຕນເຍເນວ ພ຺ຍຎ຺ຊນໂຕ ນານໍ ອຕ຺ຖໂຕ ເອກໍ, ຕສ຺ມາ ‘‘ເລໂສ ນາມ ທສ ເລສາ ຊາຕິເລໂສ ນາມເລໂສ’’ຕິອາທິມາຫ. ຕຕ຺ຖ ຊາຕິເຍວ ຊາຕິເລໂສ. ເອສ ນໂຍ ເສເສສຸ.

໓໙໕. ອິທານິ ຕເມວ ເລສໍ ວິຕ຺ຖາຣໂຕ ທສ຺ເສຕຸໍ ຍຖາ ຕໍ ອຸປາທາຍ ອນຸທ຺ຘໍສນາ ໂຫຕິ ຕຖາ ສວຕ຺ຖຸກໍ ກຕ຺ວາ ທສ຺ເສນ຺ໂຕ ‘‘ຊາຕິເລໂສ ນາມ ຂຕ຺ຕິໂຍ ທິຏ຺ໂຐ ໂຫຕີ’’ຕິອາທິມາຫ. ຕຕ຺ຖ ຂຕ຺ຕິໂຍ ທິຏ຺ໂຐ ໂຫຕີຕິ ອຎ຺ໂຎ ໂກຈິ ຂຕ຺ຕິຍຊາຕິໂຍ ອິມິນາ ໂຈທເກນ ທິຏ຺ໂຐ ໂຫຕິ. ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕຕິ ເມຖຸນຘມ຺ມາທີສຸ ອຎ຺ຎຕຣໍ ອາປຊ຺ຊນ຺ໂຕ. ອຎ຺ຎໍ ຂຕ຺ຕິຍໍ ປສ຺ສິຕ຺ວາ ໂຈເທຕີຕິ ອຖ ໂສ ອຎ຺ຎໍ ອຕ຺ຕໂນ ເວຣິໍ ຂຕ຺ຕິຍຊາຕິຍໍ ຠິກ຺ຂຸໍ ປສ຺ສິຕ຺ວາ ຕໍ ຂຕ຺ຕິຍຊາຕິເລສໍ ຄເຫຕ຺ວາ ເອວໍ ໂຈເທຕິ ‘‘ຂຕ຺ຕິໂຍ ມຍາ ທິຏ຺ໂຐ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ໂຕ, ຕ຺ວໍ ຂຕ຺ຕິໂຍ, ປາຣາຊິກໍ ຘມ຺ມໍ ອຊ຺ຌາປນ຺ໂນສີ’’ ອຖ ວາ ‘‘ຕ຺ວໍ ໂສ ຂຕ຺ຕິໂຍ, ນ ອຎ຺ໂຎ, ປາຣາຊິກໍ ຘມ຺ມໍ ອຊ຺ຌາປນ຺ໂນສິ, ອສ຺ສມໂຓສິ ອສກ຺ຍປຸຕ຺ຕິໂຍສິ ນຕ຺ຖິ ຕຍາ ສທ຺ຘິໍ ອຸໂປສໂຖ ວາ ປວາຣຓາ ວາ ສງ຺ຆກມ຺ມໍ ວາ’’ຕິ, ອາປຕ຺ຕິ ວາຈາຍ ວາຈາຍ ສງ຺ຆາທິເສສສ຺ສ. ເອຕ຺ຖ ຈ ເຕສໍ ຂຕ຺ຕິຍານໍ ອຎ຺ຎມຎ຺ຎໍ ອສທິສສ຺ສ ຕສ຺ສ ຕສ຺ສ ທີຆາທິໂນ ວາ ທິຏ຺ຐາທິໂນ ວາ ວເສນ ອຎ຺ຎຠາຄິຍຕາ ຂຕ຺ຕິຍຊາຕິປຎ຺ຎຕ຺ຕິຍາ ອາຘາຣວເສນ ອຘິກຣຓຕາ ຈ ເວທິຕພ຺ພາ, ເອເຕນຸປາເຍນ ສພ຺ພປເທສຸ ໂຍຊນາ ເວທິຕພ຺ພາ.

໔໐໐. ປຕ຺ຕເລສນິທ຺ເທເສ ຈ ສາຏກປຕ຺ໂຕຕິ ໂລຫປຕ຺ຕສທິໂສ ສຸສຓ຺ຐາໂນ ສຸຈ຺ຉວິ ສິນິທ຺ໂຘ ຠມຣວຓ຺ໂຓ ມຕ຺ຕິກາປຕ຺ໂຕ ວຸຈ຺ຈຕິ. ສຸມ຺ຠກປຕ຺ໂຕຕິ ປກຕິມຕ຺ຕິກາປຕ຺ໂຕ.

໔໐໖. ຍສ຺ມາ ປນ ອາປຕ຺ຕິເລສສ຺ສ ເອກປເທເນວ ສງ຺ເຂປໂຕ ນິທ຺ເທໂສ ວຸຕ຺ໂຕ, ຕສ຺ມາ ວິຕ຺ຖາຣໂຕປິ ຕໍ ທສ຺ເສຕຸໍ ‘‘ຠິກ຺ຂຸ ສງ຺ຆາທິເສສໍ ອຊ຺ຌາປຊ຺ຊນ຺ໂຕ ທິຏ຺ໂຐ ໂຫຕີ’’ຕິອາທິ ວຸຕ຺ຕໍ. ກສ຺ມາ ປນສ຺ສ ຕຕ຺ເຖວ ນິທ຺ເທສໍ ອວຕ຺ວາ ອິຘ ວິສຸໍ ວຸຕ຺ໂຕຕິ? ເສສນິທ຺ເທເສຫິ ອສຠາຄຕ຺ຕາ. ເສສນິທ຺ເທສາ ຫິ ອຎ຺ຎໍ ທິສ຺ວາ ອຎ຺ຎສ຺ສ ໂຈທນາວເສນ ວຸຕ຺ຕາ. ອຍໍ ປນ ເອກເມວ ອຎ຺ຎໍ ອາປຕ຺ຕິໍ ອາປຊ຺ຊນ຺ຕໍ ທິສ຺ວາ ອຎ຺ຎາຍ ອາປຕ຺ຕິຍາ ໂຈທນາວເສນ ວຸຕ຺ໂຕ. ຍທິ ເອວໍ ກຖໍ ອຎ຺ຎຠາຄິຍໍ ອຘິກຣຓໍ ໂຫຕີຕິ? ອາປຕ຺ຕິຍາ. ເຕເນວ ວຸຕ຺ຕໍ – ‘‘ເອວມ຺ປິ ອາປຕ຺ຕຎ຺ຎຠາຄິຍຎ຺ຈ ໂຫຕິ ເລໂສ ຈ ອຸປາທິນ຺ໂນ’’ຕິ. ຍຎ຺ຫິ ໂສ ສງ຺ຆາທິເສສໍ ອາປນ຺ໂນ ຕໍ ປາຣາຊິກສ຺ສ ອຎ຺ຎຠາຄິຍໍ ອຘິກຣຓໍ. ຕສ຺ສ ປນ ອຎ຺ຎຠາຄິຍສ຺ສ ອຘິກຣຓສ຺ສ ເລໂສ ນາມ ໂຍ ໂສ ສພ຺ພຂຕ຺ຕິຍານໍ ສາຘາຣໂຓ ຂຕ຺ຕິຍຠາໂວ ວິຍ ສພ຺ພາປຕ຺ຕີນໍ ສາຘາຣໂຓ ອາປຕ຺ຕິຠາໂວ. ເອເຕນຸປາເຍນ ເສສາປຕ຺ຕິມູລກນໂຍ ໂຈທາປກວາໂຣ ຈ ເວທິຕພ຺ໂພ.

໔໐໘. ອນາປຕ຺ຕິ ຕຖາສຎ຺ຎີ ໂຈເທຕິ ວາ ໂຈທາເປຕິ ວາຕິ ‘‘ປາຣາຊິກໍເຍວ ອຍໍ ອາປນ຺ໂນ’’ຕິ ໂຍ ເອວໍ ຕຖາສຎ຺ຎີ ໂຈເທຕິ ວາ ໂຈທາເປຕິ ວາ ຕສ຺ສ ອນາປຕ຺ຕິ. ເສສໍ ສພ຺ພຕ຺ຖ ອຸຕ຺ຕານເມວ. ສມຸຏ຺ຐານາທີນິປິ ປຐມທຸຏ຺ຐໂທສສທິສາເນວາຕິ.

ທຸຕິຍທຸຏ຺ຐໂທສສິກ຺ຂາປທວຓ຺ຓນາ ນິຏ຺ຐິຕາ.