໗. ວິຫາຣກາຣສິກ຺ຂາປທວຓ຺ຓນາ

໓໖໕. ເຕນ ສມເຍນາຕິ ວິຫາຣກາຣສິກ຺ຂາປທໍ. ຕຕ຺ຖ ໂກສມ຺ພິຍນ຺ຕິ ເອວໍນາມເກ ນຄເຣ. ໂຆສິຕາຣາເມຕິ ໂຆສິຕສ຺ສ ອາຣາເມ. ໂຆສິຕນາມເກນ ກິຣ ເສຏ຺ຐິນາ ໂສ ກາຣິໂຕ, ຕສ຺ມາ ‘‘ໂຆສິຕາຣາໂມ’’ຕິ ວຸຈ຺ຈຕິ. ຉນ຺ນສ຺ສາຕິ ໂພຘິສຕ຺ຕກາເລ ອຸປຏ຺ຐາກຉນ຺ນສ຺ສ. ວິຫາຣວຕ຺ຖຸໍ, ຠນ຺ເຕ, ຊານາຫີຕິ ວິຫາຣສ຺ສ ປຕິຏ຺ຐານຏ຺ຐານໍ, ຠນ຺ເຕ, ຊານາຫິ. ເອຕ຺ຖ ຈ ວິຫາໂຣຕິ ນ ສກລວິຫາໂຣ, ເອໂກ ອາວາໂສ, ເຕເນວາຫ – ‘‘ອຍ຺ຍສ຺ສ ວິຫາຣໍ ກາຣາເປສ຺ສາມີ’’ຕິ.

ເຈຕິຍຣຸກ຺ຂນ຺ຕິ ເອຕ຺ຖ ຈິຕ຺ຕີກຕຏ຺ເຐນ ເຈຕິຍໍ, ປູຊາຣຫານໍ ເທວຏ຺ຐານານເມຕໍ ອຘິວຈນໍ, ‘‘ເຈຕິຍ’’ນ຺ຕິ ສມ຺ມຕໍ ຣຸກ຺ຂໍ ເຈຕິຍຣຸກ຺ຂໍ. ຄາເມນ ປູຊິຕໍ ຄາມສ຺ສ ວາ ປູຊິຕນ຺ຕິ ຄາມປູຊິຕໍ. ເອເສວ ນໂຍ ເສສປເທສຸປິ. ອປິເຈຕ຺ຖ ຊນປໂທຕິ ເອກສ຺ສ ຣຎ຺ໂຎ ຣຊ຺ເຊ ເອເກໂກ ໂກຏ຺ຐາໂສ. ຣຏ຺ຐນ຺ຕິ ສກລຣຊ຺ຊໍ ເວທິຕພ຺ພໍ, ສກລຣຊ຺ຊມ຺ປິ ຫິ ກທາຈິ ກທາຈິ ຕສ຺ສ ຣຸກ຺ຂສ຺ສ ປູຊໍ ກໂຣຕິ, ເຕນ ວຸຕ຺ຕໍ ‘‘ຣຏ຺ຐປູຊິຕ’’ນ຺ຕິ. ເອກິນ຺ທ຺ຣິຍນ຺ຕິ ກາຍິນ຺ທ຺ຣິຍໍ ສນ຺ຘາຍ ວທນ຺ຕິ. ຊີວສຎ຺ຎິໂນຕິ ສຕ຺ຕສຎ຺ຎິໂນ.

໓໖໖. ມຫລ຺ລກນ຺ຕິ ສສ຺ສາມິກຠາເວນ ສໍຍາຈິກກຸຏິໂຕ ມຫນ຺ຕຠາໂວ ເອຕສ຺ສ ອຕ຺ຖີຕິ ມຫລ຺ລໂກ. ຍສ຺ມາ ວາ ວຕ຺ຖຸໍ ເທສາເປຕ຺ວາ ປມາຓາຕິກ຺ກເມນປິ ກາຕຸໍ ວຏ຺ຏຕິ, ຕສ຺ມາ ປມາຓມຫນ຺ຕຕາຍປິ ມຫລ຺ລໂກ, ຕໍ ມຫລ຺ລກໍ. ຍສ຺ມາ ປນສ຺ສ ຕໍ ປມາຓມຫຕ຺ຕໍ ສສ຺ສາມິກຕ຺ຕາວ ລພ຺ຠຕິ, ຕສ຺ມາ ຕທຕ຺ຖທສ຺ສນຕ຺ຖໍ ‘‘ມຫລ຺ລໂກ ນາມ ວິຫາໂຣ ສສ຺ສາມິໂກ ວຸຈ຺ຈຕີ’’ຕິ ປທຠາຊນໍ ວຸຕ຺ຕໍ. ເສສໍ ສພ຺ພໍ ກຸຏິກາຣສິກ຺ຂາປເທ ວຸຕ຺ຕນເຍເນວ ເວທິຕພ຺ພໍ ສທ຺ຘິໍ ສມຸຏ຺ຐານາທີຫິ. ສສ຺ສາມິກຠາວມຕ຺ຕເມວ ຫິ ເອຕ຺ຖ ກິຣິຍໂຕ ສມຸຏ຺ຐານາຠາໂວ ປມາຓນິຍມາຠາໂວ ຈ ວິເສໂສ, ປມາຓນິຍມາຠາວາ ຈ ຈຕຸກ຺ກປາຣິຫານີຕິ.

ວິຫາຣກາຣສິກ຺ຂາປທວຓ຺ຓນາ ນິຏ຺ຐິຕາ.