໔. ອຕ຺ຕກາມປາຣິຈຣິຍສິກ຺ຂາປທວຓ຺ຓນາ

໒໙໐. ເຕນ ສມເຍນ ພຸທ຺ໂຘ ຠຄວາຕິ ອຕ຺ຕກາມສິກ຺ຂາປທໍ. ຕຕ຺ຖ ກຸລູປໂກຕິ ກຸລປຍິຣຸປາສນໂກ ຈຕຸນ຺ນໍ ປຈ຺ຈຍານໍ ອຕ຺ຖາຍ ກຸລູປສງ຺ກມເນ ນິຈ຺ຈປ຺ປຍຸຕ຺ໂຕ.

ຈີວຣປິຓ຺ຑປາຕເສນາສນຄິລານປຈ຺ຈຍເຠສຊ຺ຊປຣິກ຺ຂາຣນ຺ຕິ ຈີວຣຎ຺ຈ ປິຓ຺ຑປາຕຎ຺ຈ ເສນາສນຎ຺ຈ ຄິລານປຈ຺ຈຍເຠສຊ຺ຊປຣິກ຺ຂາຣຎ຺ຈ. ຄິລານປຈ຺ຈຍເຠສຊ຺ຊປຣິກ຺ຂາຣນ຺ຕິ ເຈຕ຺ຖ ປຕິກຣຓຕ຺ເຖນ ປຈ຺ຈໂຍ, ຍສ຺ສ ກສ຺ສຈິ ສປ຺ປາຍສ຺ເສຕໍ ອຘິວຈນໍ. ຠິສກ຺ກສ຺ສ ກມ຺ມໍ ເຕນ ອນຸຎ຺ຎາຕຕ຺ຕາຕິ ເຠສຊ຺ຊໍ. ຄິລານປຈ຺ຈໂຍວ ເຠສຊ຺ຊໍ ຄິລານປຈ຺ຈຍເຠສຊ຺ຊໍ, ຍໍກິຎ຺ຈິ ຄິລານສ຺ສ ສປ຺ປາຍໍ ຠິສກ຺ກກມ຺ມໍ ເຕລມຘຸຜາຓິຕາທີຕິ ວຸຕ຺ຕໍ ໂຫຕິ. ປຣິກ຺ຂາໂຣຕິ ປນ ‘‘ສຕ຺ຕຫິ ນຄຣປຣິກ຺ຂາເຣຫິ ສຸປຣິກ຺ຂຕໍ ໂຫຕີ’’ຕິອາທີສຸ (ອ. ນິ. ໗.໖໗) ປຣິວາໂຣ ວຸຈ຺ຈຕິ. ‘‘ຣໂຖ ສີສປຣິກ຺ຂາໂຣ ຌານກ຺ໂຂ ຈກ຺ກວີຣິໂຍ’’ຕິອາທີສຸ (ສໍ. ນິ. ໕.໔) ອລງ຺ກາໂຣ. ‘‘ເຍ ຈິເມ ປພ຺ພຊິເຕນ ຊີວິຕປຣິກ຺ຂາຣາ ສມຸທາເນຕພ຺ພາ’’ຕິອາທີສຸ (ໂຣ. ນິ. ໑.໑.໑໙໑) ສມ຺ຠາໂຣ. ອິຘ ປນ ສມ຺ຠາໂຣປິ ປຣິວາໂຣປິ ວຏ຺ຏຕິ. ຕຎ຺ຫິ ຄິລານປຈ຺ຈຍເຠສຊ຺ຊໍ ຊີວິຕສ຺ສ ປຣິວາໂຣປິ ໂຫຕິ ຊີວິຕວິນາສກາພາຘຸປ຺ປຕ຺ຕິຍາ ອນ຺ຕຣໍ ອທຕ຺ວາ ຣກ຺ຂຓໂຕ, ສມ຺ຠາໂຣປິ ຍຖາ ຈິຣໍ ປວຕ຺ຕຕິ ເອວມສ຺ສ ກາຣຓຠາວໂຕ, ຕສ຺ມາ ປຣິກ຺ຂາໂຣຕິ ວຸຈ຺ຈຕິ. ເອວໍ ຄິລານປຈ຺ຈຍເຠສຊ຺ຊຎ຺ຈ ຕໍ ປຣິກ຺ຂາໂຣ ຈາຕິ ຄິລານປຈ຺ຈຍເຠສຊ຺ຊປຣິກ຺ຂາໂຣ, ຕໍ ຄິລານປຈ຺ຈຍເຠສຊ຺ຊປຣິກ຺ຂາຣນ຺ຕິ ເອວມຕ຺ໂຖ ທຏ຺ຐພ຺ໂພ.

ວສລນ຺ຕິ ຫີນໍ ລາມກໍ. ອຖ ວາ ວສ຺ສຕີຕິ ວສໂລ, ປຄ຺ຆຣຕີຕິ ອຕ຺ໂຖ, ຕໍ ວສລໍ, ອສຸຈິປຄ຺ຆຣຓກນ຺ຕິ ວຸຕ຺ຕໍ ໂຫຕິ. ນິຏ຺ຐຸຫິຕ຺ວາຕິ ເຂຬໍ ປາເຕຕ຺ວາ.

ກສ຺ສາຫໍ ເກນ ຫາຍາມີຕິ ອຫໍ ກສ຺ສາ ອຎ຺ຎິສ຺ສາ ອິຕ຺ຖິຍາ ເກນ ໂຠເຄນ ວາ ອລງ຺ກາເຣນ ວາ ຣູເປນ ວາ ປຣິຫາຍາມິ, ກາ ນາມ ມຍາ ອຸຕ຺ຕຣິຕຣາຕິ ທີເປຕິ.

໒໙໑. ສນ຺ຕິເກຕິ ອຸປຈາເຣ ຐຕ຺ວາ ສາມນ຺ຕາ ອວິທູເຣ, ປທຠາຊເນປິ ອຍເມວອຕ຺ໂຖ ທີປິໂຕ. ອຕ຺ຕກາມປາຣິຈຣິຍາຍາຕິ ເມຖຸນຘມ຺ມສງ຺ຂາເຕນ ກາເມນ ປາຣິຈຣິຍາ ກາມປາຣິຈຣິຍາ. ອຕ຺ຕໂນ ອຕ຺ຖາຍ ກາມປາຣິຈຣິຍາ ອຕ຺ຕກາມປາຣິຈຣິຍາ, ອຕ຺ຕນາ ວາ ກາມິຕາ ອິຈ຺ຉິຕາຕິ ອຕ຺ຕກາມາ, ສຍໍ ເມຖຸນຣາຄວເສນ ປຕ຺ຖິຕາຕິ ອຕ຺ໂຖ. ອຕ຺ຕກາມາ ຈ ສາ ປາຣິຈຣິຍາ ຈາຕິ ອຕ຺ຕກາມປາຣິຈຣິຍາ, ຕສ຺ສາ ອຕ຺ຕກາມປາຣິຈຣິຍາຍ. ວຓ຺ຓໍ ຠາເສຍ຺ຍາຕິ ຄຸຓໍ ອານິສໍສໍ ປກາເສຍ຺ຍ.

ຕຕ຺ຣ ຍສ຺ມາ ‘‘ອຕ຺ຕໂນ ອຕ຺ຖາຍ ກາມປາຣິຈຣິຍາ’’ຕິ ອິມສ຺ມິໍ ອຕ຺ຖວິກປ຺ເປ ກາໂມ ເຈວ ເຫຕຸ ຈ ປາຣິຈຣິຍາ ຈ ອຕ຺ໂຖ, ເສສໍ ພ຺ຍຎ຺ຊນໍ. ‘‘ອຕ຺ຕກາມາ ຈ ສາ ປາຣິຈຣິຍາ ຈາຕິ ອຕ຺ຕກາມປາຣິຈຣິຍາ’’ຕິ ອິມສ຺ມິໍ ອຕ຺ຖວິກປ຺ເປ ອຘິປ຺ປາໂຍ ເຈວ ປາຣິຈຣິຍາ ຈາຕິ ອຕ຺ໂຖ, ເສສໍ ພ຺ຍຎ຺ຊນໍ. ຕສ຺ມາ ພ຺ຍຎ຺ຊເນ ອາທຣໍ ອກຕ຺ວາ ອຕ຺ຖມຕ຺ຕເມວ ທສ຺ເສຕຸໍ ‘‘ອຕ຺ຕໂນ ກາມໍ ອຕ຺ຕໂນ ເຫຕຸໍ ອຕ຺ຕໂນ ອຘິປ຺ປາຍໍ ອຕ຺ຕໂນ ປາຣິຈຣິຍ’’ນ຺ຕິ ປທຠາຊນໍ ວຸຕ຺ຕໍ. ‘‘ອຕ຺ຕໂນ ກາມໍ ອຕ຺ຕໂນ ເຫຕຸໍ ອຕ຺ຕໂນ ປາຣິຈຣິຍ’’ນ຺ຕິ ຫິ ວຸຕ຺ເຕ ຊານິສ຺ສນ຺ຕິ ປຓ຺ຑິຕາ ‘‘ເອຕ຺ຕາວຕາ ອຕ຺ຕໂນ ອຕ຺ຖາຍ ກາມປາຣິຈຣິຍາ ວຸຕ຺ຕາ’’ຕິ. ‘‘ອຕ຺ຕໂນ ອຘິປ຺ປາຍໍ ອຕ຺ຕໂນ ປາຣິຈຣິຍ’’ນ຺ຕິ ວຸຕ຺ເຕປິ ຊານິສ຺ສນ຺ຕິ ‘‘ເອຕ຺ຕາວຕາ ອຕ຺ຕນາ ອິຈ຺ຉິຕກາມິຕຏ຺ເຐນ ອຕ຺ຕກາມປາຣິຈຣິຍາ ວຸຕ຺ຕາ’’ຕິ.

ອິທານິ ຕສ຺ສາ ອຕ຺ຕກາມປາຣິຈຣິຍາຍ ວຓ຺ຓຠາສນາກາຣໍ ທສ຺ເສນ຺ໂຕ ‘‘ເອຕທຄ຺ຄ’’ນ຺ຕິອາທິມາຫ. ຕໍ ອຸທ຺ເທສໂຕປິ ນິທ຺ເທສໂຕປິ ອຸຕ຺ຕານຕ຺ຖເມວ. ອຍໍ ປເນຕ຺ຖ ປທສມ຺ພນ຺ໂຘ ຈ ອາປຕ຺ຕິວິນິຈ຺ຉໂຍ ຈ – ເອຕທຄ຺ຄໍ…ເປ… ປຣິຈເຣຍ຺ຍາຕິ ຍາ ມາທິສໍ ສີລວນ຺ຕໍ ກລ຺ຍາຓຘມ຺ມໍ ພ຺ຣຫ຺ມຈາຣິໍ ເອເຕນ ຘມ຺ເມນ ປຣິຈເຣຍ຺ຍ, ຕສ຺ສາ ເອວໍ ມາທິສໍ ປຣິຈຣນ຺ຕິຍາ ຍາ ອຍໍ ປາຣິຈຣິຍາ ນາມ, ເອຕທຄ຺ຄໍ ປາຣິຈຣິຍານນ຺ຕິ.

ເມຖຸນຸປສໍຫິເຕນ ສງ຺ຆາທິເສໂສຕິ ເອວໍ ອຕ຺ຕກາມປາຣິຈຣິຍາຍ ວຓ຺ຓໍ ຠາສນ຺ໂຕ ຈ ເມຖຸນຸປສໍຫິເຕນ ເມຖຸນຘມ຺ມປຏິສໍຍຸຕ຺ເຕເນວ ວຈເນນ ໂຍ ຠາເສຍ຺ຍ, ຕສ຺ສ ສງ຺ຆາທິເສໂສຕິ.

ອິຘານິ ຍສ຺ມາ ເມຖຸນຸປສໍຫິເຕເນວ ຠາສນ຺ຕສ຺ສ ສງ຺ຆາທິເສໂສ ວຸຕ຺ໂຕ, ຕສ຺ມາ ‘‘ອຫມ຺ປິ ຂຕ຺ຕິໂຍ, ຕ຺ວມ຺ປິ ຂຕ຺ຕິຍາ, ອຣຫຕິ ຂຕ຺ຕິຍາ ຂຕ຺ຕິຍສ຺ສ ທາຕຸໍ ສມຊາຕິກຕ຺ຕາ’’ຕິ ເອວມາທີຫິ ວຈເນຫິ ປາຣິຈຣິຍາຍ ວຓ຺ຓໍ ຠາສມານສ຺ສາປິ ສງ຺ຆາທິເສໂສ ນຕ຺ຖິ. ‘‘ອຫມ຺ປິ ຂຕ຺ຕິໂຍ’’ຕິອາທິເກ ປນ ພຫູປິ ປຣິຍາເຍ ວຕ຺ວາ ‘‘ອຣຫສິ ຕ຺ວໍ ມຍ຺ຫໍ ເມຖຸນຘມ຺ມໍ ທາຕຸ’’ນ຺ຕິ ເອວໍ ເມຖຸນປ຺ປຏິສໍຍຸຕ຺ເຕເນວ ຠາສມານສ຺ສ ສງ຺ຆາທິເສໂສຕິ.

ອິຕ຺ຖີ ຈ ໂຫຕີຕິອາທິ ປຸພ຺ເພ ວຸຕ຺ຕນຍເມວ. ອິຘ ອຸທາຍິຕ຺ເຖໂຣ ອາທິກມ຺ມິໂກ, ຕສ຺ສ ອນາປຕ຺ຕິ ອາທິກມ຺ມິກສ຺ສາຕິ.

ສມຸຏ຺ຐານາທິ ສພ຺ພໍ ທຸຏ຺ຐຸລ຺ລວາຈາສທິສໍ. ວິນີຕວຕ຺ຖູນິ ອຸຕ຺ຕານຕ຺ຖາເນວາຕິ.

ອຕ຺ຕກາມປາຣິຈຣິຍສິກ຺ຂາປທວຓ຺ຓນາ ນິຏ຺ຐິຕາ.