໑໒. ທຸພ຺ພຈສິກ຺ຂາປທວຓ຺ຓນາ

໔໒໔. ເຕນ ສມເຍນ ພຸທ຺ໂຘ ຠຄວາຕິ ທຸພ຺ພຈສິກ຺ຂາປທໍ. ຕຕ຺ຖ ອນາຈາຣໍ ອາຈຣຕີຕິ ອເນກປ຺ປກາຣໍ ກາຍວຈີທ຺ວາຣວີຕິກ຺ກມໍ ກໂຣຕິ. ກິໍ ນຸ ໂຂ ນາມາຕິ ວມ຺ຠນວຈນເມຕໍ. ອຫໍ ໂຂ ນາມາຕິ ອຸກ຺ກໍສວຈນໍ. ຕຸມ຺ເຫ ວເທຍ຺ຍນ຺ຕິ ‘‘ອິທໍ ກໂຣຖ, ອິທໍ ມາ ກໂຣຖາ’’ຕິ ອຫໍ ຕຸມ຺ເຫ ວຕ຺ຕຸໍ ອຣຫາມີຕິ ທສ຺ເສຕິ. ກສ຺ມາຕິ ເຈ? ຍສ຺ມາ ອມ຺ຫາກໍ ພຸທ຺ໂຘ ຠຄວາ ກຓ຺ຏກໍ ອາຣຸຍ຺ຫ ມຍາ ສທ຺ຘິໍ ນິກ຺ຂມິຕ຺ວາ ປພ຺ພຊິໂຕຕິເອວມາທິມຕ຺ຖໍ ສນ຺ຘາຍາຫ. ‘‘ອມ຺ຫາກໍ ຘມ຺ໂມ’’ຕິ ວຕ຺ວາ ປນ ອຕ຺ຕໂນ ສນ຺ຕກຠາເວ ຍຸຕ຺ຕິໍ ທສ຺ເສນ຺ໂຕ ‘‘ອມ຺ຫາກໍ ອຍ຺ຍປຸຕ຺ເຕນ ຘມ຺ໂມ ອຠິສມິໂຕ’’ຕິ ອາຫ. ຍສ຺ມາ ອມ຺ຫາກໍ ອຍ຺ຍປຸຕ຺ເຕນ ຈຕຸສຈ຺ຈຘມ຺ໂມ ປຏິວິທ຺ໂຘ, ຕສ຺ມາ ຘມ຺ໂມປິ ອມ຺ຫາກນ຺ຕິ ວຸຕ຺ຕໍ ໂຫຕິ. ສງ຺ຆໍ ປນ ອຕ຺ຕໂນ ເວຣິປກ຺ເຂ ຐິຕໍ ມຎ຺ຎມາໂນ ອມ຺ຫາກໍ ສງ຺ໂຆຕິ ນ ວທຕິ. ອຸປມໍ ປນ ວຕ຺ວາ ສງ຺ຆໍ ອປສາເທຕຸກາໂມ ‘‘ເສຍ຺ຍຖາປິ ນາມາ’’ຕິອາທິມາຫ. ຕິຓກຏ຺ຐປຓ຺ຓສຏນ຺ຕິ ຕຕ຺ຖ ຕຕ຺ຖ ປຕິຕໍ ຕິຓກຏ຺ຐປຓ຺ຓໍ. ອຖ ວາ ຕິຓຎ຺ຈ ນິສ຺ສາຣກໍ ລຫຸກໍ ກຏ຺ຐຎ຺ຈ ຕິຓກຏ຺ຐໍ. ປຓ຺ຓສຏນ຺ຕິ ປຸຣາຓປຓ຺ຓໍ. ອຸສ຺ສາເຣຍ຺ຍາຕິ ຣາສິໍ ກເຣຍ຺ຍ.

ປພ຺ພເຕຍ຺ຍາຕິ ປພ຺ພຕປ຺ປຠວາ, ສາ ຫິ ສີຆໂສຕາ ໂຫຕິ, ຕສ຺ມາ ຕເມວ ຄຓ຺ຫາຕິ. ສງ຺ຂເສວາລປຓກນ຺ຕິ ເອຕ຺ຖ ສງ຺ໂຂຕິ ທີຆມູລໂກ ປຓ຺ຓເສວາໂລ ວຸຈ຺ຈຕິ. ເສວາໂລຕິ ນີລເສວາໂລ, ອວເສໂສ ອຸທກປປ຺ປຏກຕິລພີຊກາທິ ສພ຺ໂພປິ ປຓໂກຕິ ສງ຺ຂ຺ຍໍ ຄຈ຺ຉຕິ. ເອກໂຕ ອຸສ຺ສາຣິຕາຕິ ເອກຏ຺ຐາເນ ເກນາປິ ສມ຺ປິຓ຺ຑິຕາ ຣາສີກຕາຕິ ທສ຺ເສຕິ.

໔໒໕-໖. ທຸພ຺ພຈຊາຕິໂກຕິ ທຸພ຺ພຈສຠາໂວ ວຕ຺ຕຸໍ ອສກ຺ກຸເຓຍ຺ໂຍຕິ ອຕ຺ໂຖ. ປທຠາຊເນປິສ຺ສ ທຸພ຺ພໂຈຕິ ທຸກ຺ເຂນ ກິຈ຺ເຉນ ວທິຕພ຺ໂພ, ນ ສກ຺ກາ ສຸເຂນ ວຕ຺ຕຸນ຺ຕິ ອຕ຺ໂຖ. ໂທວຈສ຺ສກຣເຓຫີຕິ ທຸພ຺ພຈຠາວກຣຓີເຍຫິ, ເຍ ຘມ຺ມາ ທຸພ຺ພຈໍ ປຸຄ຺ຄລໍ ກໂຣນ຺ຕິ, ເຕຫິ ສມນ຺ນາຄໂຕຕິ ອຕ຺ໂຖ. ເຕ ປນ ‘‘ກຕເມ ຈ, ອາວຸໂສ, ໂທວຈສ຺ສກຣຓາ ຘມ຺ມາ? ອິຘາວຸໂສ, ຠິກ຺ຂຸ ປາປິຈ຺ໂຉ ໂຫຕີ’’ຕິອາທິນາ ນເຍນ ປຏິປາຏິຍາ ອນຸມານສຸຕ຺ເຕ (ມ. ນິ. ໑.໑໘໑) ອາຄຕາ ປາປິຈ຺ຉຕາ, ອຕ຺ຕຸກ຺ກໍສກປຣວມ຺ຠກຕາ, ໂກຘນຕາ, ໂກຘເຫຕຸ ອຸປນາຫິຕາ, ໂກຘເຫຕຸອຠິສງ຺ຄິຕາ, ໂກຘເຫຕຸໂກຘສາມນ຺ຕວາຈານິຈ຺ຉາຣຓຕາ, ໂຈທກໍ ປຏິປ຺ຜຣຓຕາ, ໂຈທກໍ ອປສາທນຕາ, ໂຈທກສ຺ສ ປຈ຺ຈາໂຣປນຕາ, ອຎ຺ເຎນ ອຎ຺ຎໍປຏິຈຣຓຕາ, ອປທາເນນ ນ ສມ຺ປາຍນຕາ, ມກ຺ຂິປຬາສິຕາ, ອິສ຺ສຸກີມຈ຺ຉຣິຕາ, ສຐມາຍາວິຕາ, ຖທ຺ຘາຕິມານິຕາ, ສນ຺ທິຏ຺ຐິປຣາມາສິອາຘານຄ຺ຄຫິທຸປ຺ປຏິນິສ຺ສຄ຺ຄິຕາຕິ ເອກູນວີສຕິ ຘມ຺ມາ ເວທິຕພ຺ພາ.

ໂອວາທໍ ນກ຺ຂມຕິ ນ ສຫຕີຕິ ອກ຺ຂໂມ. ຍຖານຸສິຏ຺ຐໍ ອປ຺ປຏິປຊ຺ຊນໂຕ ປທກ຺ຂິເຓນ ອນຸສາສນິໍ ນ ຄຓ຺ຫາຕີຕິ ອປ຺ປທກ຺ຂິຓຄ຺ຄາຫີ ອນຸສາສນິໍ.

ອຸທ຺ເທສປຣິຍາປນ຺ເນສູຕິ ອຸທ຺ເທເສ ປຣິຍາປນ຺ເນສຸ ອນ຺ໂຕຄເຘສຸ. ‘‘ຍສ຺ສ ສິຍາ ອາປຕ຺ຕິ, ໂສ ອາວິກເຣຍ຺ຍາ’’ຕິ ເອວໍ ສງ຺ຄຫິຕຕ຺ຕາ ອນ຺ໂຕ ປາຕິໂມກ຺ຂສ຺ສ ວຕ຺ຕມາເນສູຕິ ອຕ຺ໂຖ. ສຫຘມ຺ມິກໍ ວຸຈ຺ຈມາໂນຕິ ສຫຘມ຺ມິເກນ ວຸຈ຺ຈມາໂນ ກຣຓຕ຺ເຖ ອຸປໂຍຄວຈນໍ, ປຎ຺ຈຫິ ສຫຘມ຺ມິເກຫິ ສິກ຺ຂິຕພ຺ພຕ຺ຕາ ເຕສໍ ວາ ສນ຺ຕກຕ຺ຕາ ສຫຘມ຺ມິກນ຺ຕິ ລທ຺ຘນາເມນ ພຸທ຺ຘປຎ຺ຎຕ຺ເຕນ ສິກ຺ຂາປເທນ ວຸຈ຺ຈມາໂນຕິ ອຕ຺ໂຖ.

ວິຣມຖາຍສ຺ມນ຺ໂຕ ມມ ວຈນາຍາຕິ ເຍນ ວຈເນນ ມໍ ວທຖ, ຕໂຕ ມມ ວຈນໂຕ ວິຣມຖ. ມາ ມໍ ຕໍ ວຈນໍ ວທຖາຕິ ວຸຕ຺ຕໍ ໂຫຕິ.

ວທຕຸ ສຫຘມ຺ເມນາຕິ ສຫຘມ຺ມິເກນ ສິກ຺ຂາປເທນ ສຫຘມ຺ເມນ ວາ ອຎ຺ເຎນປິ ປາສາທິກຠາວສໍວຕ຺ຕນິເກນ ວຈເນນ ວທຕຸ. ຍທິທນ຺ຕິ ວຸຑ຺ຒິກາຣຓນິທສ຺ສນຕ຺ເຖ ນິປາໂຕ. ເຕນ ‘‘ຍໍ ອິທໍ ອຎ຺ຎມຎ຺ຎສ຺ສ ຫິຕວຈນໍ ອາປຕ຺ຕິໂຕ ວຸຏ຺ຐາປນຎ຺ຈ ເຕນ ອຎ຺ຎມຎ຺ຎວຈເນນ ອຎ຺ຎມຎ຺ຎວຸຏ຺ຐາປເນນ ຈ ສໍວຑ຺ຒາ ປຣິສາ’’ຕິ ເອວໍ ປຣິສາຍ ວຸຑ຺ຒິກາຣຓໍ ທສ຺ສິຕໍ ໂຫຕິ. ເສສໍ ສພ຺ພຕ຺ຖ ອຸຕ຺ຕານເມວ.

ສມຸຏ຺ຐານາທີນິ ປຐມສງ຺ຆເຠທສທິສາເນວາຕິ.

ທຸພ຺ພຈສິກ຺ຂາປທວຓ຺ຓນາ ນິຏ຺ຐິຕາ.